มัทธิว – Matthew บทที่ 21

มัทธิว 21:1 บัดพระเยซูกับพวกลูกศิษย์มาใกล้สิฮอดเมืองเยรูซาเล็ม คือมาเถิงหมู่บ้านเบธฟายี ซึ่งอยู่ตีนภูเขาหมากกอกเทศ พระเยซูเลยใซ้ลูกศิษย์สองคน

มัทธิว 21:2 สั่งเขาว่า “ให้เข้าไปในหมู่บ้านอยู่ทางหน้าเจ้าฮั้น แล้วเจ้าสิพ้อลาแม่โตหนึ่งพอดี ถืกผูกไว้อยู่กับลาน้อย ให้แก้แล้วจูงมาให้เฮาเด้อ

มัทธิว 21:3 แล้วคั่นมีผู้ใดว่าอีหยังกับเจ้า กะให้บอกเขาว่า ‘องค์พระผู้เป็นเจ้าต้องการสิใซ้’ แล้วผู้ฮั้นสิปล่อยให้เอามาโลด”

มัทธิว 21:4 เหตุการณ์แนวหมู่นี้ เป็นไปกะเพื่อสิสำเร็จตามพระคำของพระเจ้าที่กล่าวไว้โดยผู้เป็นปากเป็นเสียงของเพิ่น

มัทธิว 21:5 ‘ให้บอกธิดาของศิโยนว่า นี่แน่ะ กษัตริย์ของนางมาหานางแล้วโดยใจอ่อนสุภาพ ได้นั่งเทิงหลังลูกลา’

มัทธิว 21:6 แล้วลูกศิษย์สองคนฮั้น ได้ออกไปเฮ็ดตามที่พระเยซูสั่งไว้

มัทธิว 21:7 แล้วจั่งจูงลาโตแม่กับลูกน้อยมา กับเอาเสื้อของเขาพาดเทิงหลังลา แล้วเขาให้เพิ่นนั่งเทิงหลังลาฮั้น

มัทธิว 21:8 แล้วมีหมู่คนหลวงหลายขนาดได้เอาเสื้อผ้าหน้าแพรของโตมาปูตามหนทาง ผู้ลางคนกะตัดเอาง่าไม้มาปูตามหนทางนำ

มัทธิว 21:9 แล้วหมู่คนหลวงหลายซึ่งย่างไปทางหน้า กับผู้ที่มาทางหลังกะพร้อมกันโห่ ฮ้อง อวยพรว่า “โฮซันนา ต่อ บุตรของกษัตริย์ดาวิด ‘ขอทรงพระเจริญ ผู้ที่มาในนามขององค์พระผู้เป็นเจ้า โฮซันนา’ ในที่สูงสุด”

มัทธิว 21:10 แล้วบัดพอพระเยซูเข้าไปในเมืองเยรูซาเล็ม พวกคนทั่วเมืองกะพากันแตกตื่นถามกันว่า “เพิ่นผู้นี้เป็นผู้ใดกันน้อ”

มัทธิว 21:11 แล้วหมู่คนทั้งหลายที่แห่มาฮั้นบอกว่า “ท่านผู้นี่แม่นเยซู ผู้เป็นปากเป็นเสียงของพระเจ้าจากเมืองนาซาเร็ธในแคว้นกาลิลี”

มัทธิว 21:12 แล้วพระเยซูจั่งเข้าไปในพระวิหารของพระเจ้า ขับไล่พวกผู้ซื้อขายในพระวิหาร กับคว่ำโต๊ะผู้ฮับแลกเงิน พร้อมทั้งคว่ำที่นั่งผู้ขายนกพิราบนำ

มัทธิว 21:13 แล้วเว้ากับเขาว่า “มีพระคำของพระเจ้าเขียนไว้ว่า ‘พระนิเวศของเฮาเขาสิเอิ้นว่าเป็นหม่องการอธิษฐาน’ แต่พวกเจ้ามาเฮ็ดให้เป็น ‘ถ้ำของพวกโจร'”

มัทธิว 21:14 แล้วคนตาบอดกับคนง่อยพากันมาหาพระเยซูในพระวิหาร เพิ่นจั่งปัวเขาให้เซาเป็นดี

มัทธิว 21:15 แต่บัดพวกหัวหน้าผู้นำเครื่องถวาย กับเสมียนฯ ได้เห็นแนวเป็นตางึดที่เพิ่นได้เฮ็ด ทั้งได้ยินพวกเด็กฮ้องในพระวิหารว่า “โฮซันนาต่อบุรตของดาวิด” เขาทั้งหลายกะพากันแค้นเคืองบ่พอใจหลาย

มัทธิว 21:16 พวกเขากะเลยถามพระเยซูว่า “เจ้าบ่ได้ยินแนวที่เขาฮ้องกันฮั้นบ้อ” เพิ่นตอบเขาว่า “เอ้อ พวกเจ้ายังบ่เคยอ่านบ้อ ว่า ‘พระองค์ท่านได้ฮับคำสรรเสริญอันสมบูรณ์แบบจากปากของเด็กน้อยกับเด็กอ่อนที่ยังกินนมแม่'”

มัทธิว 21:17 เว้าแล้วเพิ่นได้ลาเขา ออกจากเมืองไปอยู่หมู่บ้านเบธานี

มัทธิว 21:18 บัดมื้ออื่นเซ้ามา ตอนพระเยซูพวมสิเมือเมืองอีก เพิ่นกะหิวอยากกิน

มัทธิว 21:19 แล้วบัดเพิ่นเหลียวเห็นกกหมากเดื่อกกหนึ่งอยู่ตามฮิมทาง เพิ่นกะย่างเข้าไปใกล้กะเห็นกกฮั้นบ่มีหมาก มีแต่ใบซื่อๆ จั่งเว้าคำแซ่งใส่กกฮั้นว่า “แต่นี้ไปเฮาบ่ให้เกิดหมากอีกจักเทื่อเด้อ” หว่างฮั้นพอดี กกหมากเดื่อฮั้นกะเหี่ยวแห้งไปกับหม่อง

มัทธิว 21:20 แล้วบัดพวกลูกศิษย์ได้เห็นแนวฮั้น กะแปลกใจเป็นตางึด เว้ากันว่า “เป็นจั่งใดหนอ กกหมากเดื่อจั่งเหี่ยวแห้งไปไวขนาดนี้”

มัทธิว 21:21 ส่วนพระเยซูตอบเขาว่า “เฮาสิบอกความจริงให้พวกเจ้าโลด ว่า คั่นเจ้ามีความเซื่อโดยบ่ได้สงสัย เจ้าสิเฮ็ดได้คือที่เฮาได้เฮ็ดกับกกหมากเดื่อนี้ แต่หลายกว่าฮั้น เถิงแม้นเจ้าสิสั่งภูเขานี้ว่า ‘ให้ออกไปลงทะเลซะ’ แล้วมันสิเป็นไปตามที่สั่งฮั้น

มัทธิว 21:22 แล้วเมิ้ดคู่อันคู่แนวที่เจ้าอธิษฐานขอนำพระเจ้าด้วยความเซื่อวางใจ เจ้ากะสิได้”

มัทธิว 21:23 บัดพระเยซูเข้าไปในพระวิหารในยามที่เพิ่นพวมสอนอยู่ พวกหัวหน้าผู้นำเครื่องถวาย กับพวกผู้หลักผู้ใหญ่ของผู้คนทั้งหลายมาหาเพิ่นถามว่า “เจ้ามีสิทธิมาแต่ใสที่สิเฮ็ดแนวนี้ ใผให้สิทธินี้กับเจ้า” 

มัทธิว 21:24 พระเยซูตอบเขาว่า “เฮาสิถามพวกเจ้าสักข้อหนึ่งนำ แล้วคั่นพวกเจ้าบอกเฮาได้ เฮาสิบอกพวกเจ้าคือกันว่าเฮาเฮ็ดการนี้โดยสิทธิอันใด

มัทธิว 21:25 คือพิธีจุ่มน้ำของโยฮันฮั้นได้มาแต่ใส มาจากสวรรค์หรือจากคนซื่อๆ” เขาได้ปรึกษากันว่า “คั่นเฮาสิว่า ‘มาจากสวรรค์’ เขาสิโต้ตอบเฮาว่า ‘เป็นหยังพวกเจ้าจั่งบ่เซื่อโยฮันสั่น’

มัทธิว 21:26 แต่คั่นเฮาสิว่า ‘มาจากคน’ พวกเฮากะหย้านพวกคนทั้งหลาย ย้อนเขาถือกันว่า โยฮันเป็นผู้เป็นปากเป็นเสียงของพระเจ้า”

มัทธิว 21:27 เขาจั่งตอบพระเยซูว่า “พวกเฮาบอกบ่ได้” เพิ่นจั่งบอกเขาว่า “คั่นบ่ซั้น เฮาสิบ่ได้บอกพวกเจ้าคือกัน ว่าเฮาเฮ็ดการนี้โดยสิทธิอันใด

มัทธิว 21:28 แต่พวกเจ้าคึดเห็นจั่งใด คือมีซายผู้หนึ่งมีลูกซายสองคน พ่อไปหาลูกคนกกบอกว่า ‘ลูกเอ้ย มื้อนี้พ่อให้ไปเฮ็ดงานในสวนองุ่นของพ่อเด้อ’

มัทธิว 21:29 ลูกคนฮั้นตอบว่า ‘ข้อยบ่ไปดอก’ แต่อยู่มากะกลับใจ แล้วได้ออกไปเฮ็ด

มัทธิว 21:30 แล้วพ่อจั่งไปหาลูกคนที่สองจั่งเว้าแนวเดียวกัน ลูกฮั้นตอบว่า ‘ข้อยสิออกไปครับ’ แต่เขาบ่ได้ไป

มัทธิว 21:31 ในลูกสองคนนี้ คนใดเป็นผู้เฮ็ดตามความประสงค์ของพ่อ” เขาตอบเพิ่นว่า “ลูกกก” พระเยซูตอบเขาว่า “เฮาสิบอกความจริงให้พวกเจ้าโลด ว่า พวกเก็บภาษีกับแม่ญิงขายโตสิเข้าไปในแผ่นดินของพระเจ้าก่อนพวกเจ้าซ้ำ

มัทธิว 21:32 คือจั่งว่า โยฮันฮั้นได้มาหาพวกเจ้าในทางความเที่ยงธรรม แล้วพวกเจ้าบ่ยอมเซื่อลาว แต่พวกเก็บภาษีกับพวกแม่ญิงขายโตฮั้น เขาได้เซื่อลาว แต่ฝ่ายพวกเจ้าหนิ เถิงแม้นได้เห็นแล้ว หลังได้เห็นกะบ่ได้กลับใจเซื่อลาว

มัทธิว 21:33 ให้ฟังคำเปรียบเทียบอีกว่า ยังมีเจ้าของบ้านผู้หนึ่งได้เฮ็ดสวนองุ่น แล้วได้ล้อมรั้วกกไม้ไว้รอบ แล้วได้ขุดหลุมย่ำองุ่นไว้ในสวนนำ กับสร้างหอยามเฝ้า เฮ็ดแล้วกะให้พวกซาวสวนเช่า แล้วลาวได้เดินทางออกไปอยู่เมืองไกลๆ

มัทธิว 21:34 บัดยามเก็บผลองุ่นใกล้สิมาฮอดแล้ว เจ้าของสวนจั่งใซ้พวกผู้ฮับใซ้ไปหาคนเซ่าสวน เพื่อสิได้ฮับผลองุ่นส่วนที่เป็นของลาว

มัทธิว 21:35 แล้วคนเซ่าสวนฮั้นจับพวกผู้ฮับใซ้ที่เจ้าของสวนส่งมา เฆี่ยนตีคนหนึ่ง กับฆ่าคนหนึ่ง แล้วเอาหินขว้างให้ตายอีกคนหนึ่ง

มัทธิว 21:36 แล้วอีกเทื่อหนึ่งเจ้าของสวนกะใซ้ผู้ฮับใซ้คนอื่นๆ ของลาว ไปหลายกว่าแต่ก่อน แต่พวกคนที่เซ่าสวนของลาวฮั้น กะได้เฮ็ดใส่เขาคือเก่า

มัทธิว 21:37 แต่เทื่อสุดท้าย ลาวจั่งใซ้ลูกซายของลาวไปหา แล้วนึกในใจว่า ‘พวกเขาคือสิเคารพลูกซายของเฮาอยู่ดอก’

มัทธิว 21:38 แต่บัดพวกคนเซ่าสวนเห็นลูกซายเจ้าของสวนมา กะเว้ากันว่า ‘คนนี้ล่ะเป็นผู้ฮับมรดก มาเถอะ เฮาสิฆ่าเขาสิเป็นหยัง แล้วเฮาสิยึดเอามรดกของเขาซะ’

มัทธิว 21:39 แล้วพวกเขาจั่งพากันจับเอาลูกซายผู้ฮั้น ลากออกไปนอกสวนองุ่นแล้วฆ่าถิ้ม

มัทธิว 21:40 จั่งซั้น บัดเจ้าของสวนองุ่นมา ลาวสิเฮ็ดอีหยังกับคนเซ่าสวนพวกฮั้น”

มัทธิว 21:41 บัดนี้ พวกเขาที่ฟังพระเยซู ได้ตอบเพิ่นว่า “เขาสิทำลายล้างคนซั่วพวกฮั้นอย่างแสนสาหัส กับสิให้คนอื่นๆ เซ่าสวนองุ่นของลาวฮั้น คือสิหาผู้ที่สิแบ่งผลของสวนองุ่นกับลาวให้ถืกต้องตามฤดูกาล”

มัทธิว 21:42 พระเยซูเว้ากับเขาว่า “พวกเจ้ายังบ่เคยอ่านในพระคำบ้อ หม่องที่ว่า ‘ศิลาที่ซ่างก่อปฏิเสธฮั้น ศิลาอันเดียวกันฮั้น กะได้เป็นศิลามุมเอกแล้ว การนี้เป็นมาจากองค์พระผู้เป็นเจ้า กับเป็นที่ประทับใจอย่างยอดเยี่ยมในสายตาของเฮา’

มัทธิว 21:43 จั่งซั้นเฮาบอกพวกเจ้าว่า แผ่นดินของพระเจ้าสิถืกถอนออกจากมือของพวกเจ้า แล้วสิยกให้อีกซนซาติหนึ่ง แล้วพวกเขาสิเฮ็ดให้เกิดผลอันดีตามสมควร

มัทธิว 21:44 แล้วผู้ใดล้มลงใส่ศิลานี้ ผู้ฮั้นสิต้องแตกมุ่นไป แต่ศิลานี้สิตกลงทับผู้ใด กะสิบดขยี้ผู้ฮั้นจนมุ่นเป็นผง”

มัทธิว 21:45 บัดพวกหัวหน้าผู้นำเครื่องถวายกับพวกฟาริสีได้ยินคำเปรียบเทียบของพระเยซูฮั้น พวกเขากะฮู้เมื่อโตว่าแนวที่เพิ่นเว้าฮั้น กะเล็งเถิงพวกเขาเอง

มัทธิว 21:46 แต่ บัดพวกเขาคึดอยากจับพระเยซู เขากะหย้านหมู่คนหลวงหลาย ย้อนหมู่คนหลวงหลายฮั้นถือว่าพระเยซูเป็นผู้เป็นปากเป็นเสียงของพระเจ้า
////////// ////////// //////////