โคโลสี-Colossians บทที่ 3

โคโลสี 3:1 คือ คั่นพวกเจ้าได้เป็นขึ้นจากตายนำกันกับพระคริสต์แล้ว กะให้แสวงหาสิ่งใดๆ ซึ่งอยู่เบื้องบนเด้อ หม่องที่พระคริสต์ประทับอยู่เบื้องขวาของพระเจ้า

โคโลสี 3:2 แล้วให้ใส่ใจของโตไว้กับสิ่งที่อยู่เบื้องบนฮั้นเด้อ บ่แม่นในสิ่งซึ่งอยู่ฝ่ายโลกนี้

โคโลสี 3:3 คือซีวิตเก่าของเจ้าได้ตายไปแล้ว แล้วซีวิตใหม่ของเจ้าฮั้นกะถืกซ่อนไว้ฮ่วมกันกับพระคริสต์อยู่ในพระเจ้า 

โคโลสี 3:4 แล้วบัดยามพระคริสต์ผู้เป็นแหล่งซีวิตของพวกเฮาสิมาปรากฏ ในตอนฮั้นพวกเจ้ากะสิมาปรากฏพร้อมกันกับเพิ่นนำ ในสภาพพระสิริอันรุ่งเรือง

โคโลสี 3:5 จั่งซั้นให้ประหารส่วนต่างๆ ในโตเจ้า ซึ่งเป็นนิสัยอยู่ทางโลกนี้เด้อ คือการเล่นซู้ล่วงประเวณี แนวสกปรกบ่บริสุทธิ์ ราคะตัณหา ความใคร่ในทางซั่ว พร้อมกับความโลภซึ่งเป็นการไหว้ฮูปเคารพ 

โคโลสี 3:6 ย้อนแนวหมู่นี้ล่ะ เป็นเหตุให้ความโกรธเคืองของพระเจ้าสิลงมาสู่หัวของผู้คนทั้งหลายที่บ่ยอมเซื่อฟังเพิ่น

โคโลสี 3:7 ซึ่งพวกเจ้าเคยดำเนินตามทางฮั้นคือกัน ตอนที่พวกเจ้ายังใซ้ซีวิตมั่วสุมในแนวหมู่ฮั้น 

โคโลสี 3:8 แต่บัดนี้ ให้พวกเจ้าปลดถิ้มแนวหมู่นี้ทั้งเมิ้ดซะเด้อ คือการโมโหหน้าเลือด ความขัดเคืองโกรธฮ้าย การผูกพยาบาทมุ่งร้าย การเว้าหมิ่นประมาท การเว้าเผอะหยาบคายออกจากปากของเจ้า 

โคโลสี 3:9 แล้วอย่าตัวะกันและกันเด้อ ย้อนว่าพวกเจ้าได้ถอดซีวิตของคนเก่าออกไปแล้ว พร้อมทั้งได้ถิ้มกิจกรรมของมันนำ 

โคโลสี 3:10 แล้วได้สวมซีวิตของคนใหม่แล้ว ซึ่งมีความฮู้ใหม่ ตามภาพลักษณ์ของพระเจ้า ผู้เพิ่นได้สร้างผู้ใหม่ฮั้น 

โคโลสี 3:11 ซึ่งในฮั้น บ่มีการถือกันว่าเป็นกรีกหรือยิว เป็นผู้ที่เข้าสุหนัตหรือบ่ได้เข้าสุหนัต เป็นคนต่างซาติหรือป่าเถื่อน เป็นทาสหรือไท บ่ว่าสิเป็นใผกะอย่า พระคริสต์กะเป็นสารพัดเมิ้ด กับดำรงอยู่ในสารพัดฮั้น 

โคโลสี 3:12 จั่งซั้น ในฐานะที่ว่าเป็นประชากรในกลุ่มชนที่พระเจ้าได้เลือกสรรไว้ฮั้น เป็นผู้บริสุทธิ์ที่เพิ่นฮักแพงหลาย ให้สวมใจเมตตาเด้อ พร้อมทั้งใจปรานี ใจถ่อม ใจอ่อนสุภาพ กับใจอดทนไว้โดนนำ

โคโลสี 3:13 มีใจอดทนต่อกัน กับมีการยกโทษให้อภัยกันและกัน โดยว่าคั่นผู้ใดมีเรื่องอีหยังต่อกัน พระคริสต์ได้ให้อภัยพวกเจ้าแนวใด พวกเจ้าควรสิเฮ็ดแนวฮั้นคือกัน

โคโลสี 3:14 แล้วสิ่งสำคัญเหนือกว่านี้อีก กะคือให้สวมใจกุศลมีความฮักแพงแบบของพระเจ้า ซึ่งเป็นสื่อที่ผูกพันคู่แนวไว้อย่างสมบูรณ์ดีพร้อม

โคโลสี 3:15 แล้วให้ความสงบสุขของพระเจ้าครอบครองอยู่ในซีวิตจิตใจของพวกเจ้าเด้อ ซึ่งเป็นเหตุที่พระเจ้าได้เอิ้นได้เซิญพวกเจ้ามาเข้าสู่พระกายอันเดียวกัน จั่งให้มีการขอบพระคุณนำเด้อ

โคโลสี 3:16 แล้วให้พระคำของพระคริสต์สถิตอยู่ในซีวิตจิตใจของพวกเจ้าทั้งหลายอย่างอุดม เพียบ พร้อมด้วยสติปัญญาอันรอบรู้เด้อ มีการสอนแนะนำเตือนกันและกัน ด้วยเพลงสดุดี เพลงนมัสการ กับเพลงสรรเสริญ ขับร้องด้วยใจทราบซึ้งในพระกรุณาธิคุณ ถวายให้แก่องค์พระผู้เป็นเจ้า 

โคโลสี 3:17 แล้วบ่ว่าพวกเจ้าสิเฮ็ดอีหยังกะตาม สิเป็นการเว้ากะดี หรือการกระทำกะอย่า ให้เฮ็ดเมิ้ดคู่แนวโดยในพระนามขององค์พระเยซูเจ้า จั่งเฮ็ดด้วยการขอบคุณพระเจ้าผู้เป็นพ่อโดยทางเพิ่น

โคโลสี 3:18 ฝ่ายผู้เป็นเมีย ให้ยอมฮับฟังคำผัวของโตเด้อ ซึ่งเป็นการเหมาะสมในองค์พระผู้เป็นเจ้า 

โคโลสี 3:19 ส่วนผู้เป็นผัว ให้ฮักแพงเมียของโตเด้อ แล้วอย่าให้เคืองแค้นใจต่อเขาเด้อ

โคโลสี 3:20 ส่วนผู้เป็นลูกๆ ให้เซื่อฟังพ่อแม่ของโตในคู่แนวเด้อ ย้อนว่าการแนวนี้กะเป็นที่พึงพอใจหลายต่อองค์พระผู้เป็นเจ้า 

โคโลสี 3:21 ฝ่ายผู้เป็นพ่อ อย่ายั่วยุลูกๆ ของโตให้ขัดเคืองใจเด้อ หย้านว่าเขาอาจเกิดการท้อแท้ใจ 

โคโลสี 3:22 ส่วนผู้เป็นทาสฮับใซ้ ให้เซื่อฟังนายของโตในคู่อย่างตามเนื้อหนังอย่างธรรมดาโลก บ่แม่นเฮ็ดต่อหน้าต่อตาอย่างคนที่มักเอาใจคน แต่เฮ็ดด้วยน้ำใสใจจริง ด้วยความเกรงกลัวพระเจ้า 

โคโลสี 3:23 แล้ว บ่ว่าพวกเจ้าสิเฮ็ดอีหยังกะตาม ให้เฮ็ดอย่างสุดจิตสุดใจ ปานมอบถวายแด่องค์พระผู้เป็นเจ้า บ่แม่นเฮ็ดให้คนซื่อๆ 

โคโลสี 3:24 โดยฮู้กันแล้วว่า พวกเจ้าผู้เป็นทายาทสิได้ฮับมอบมรดกจากองค์พระผู้เป็นเจ้าเป็นการตอบแทน คือพวกเจ้าปรนนิบัติฮับใซ้องค์พระคริสต์

โคโลสี 3:25 แต่ส่วนผู้ใดที่เฮ็ดแนวบ่ถืกบ่แม่น กะสิได้ฮับค่าตอบแทนสมกับแนวที่เขาได้เฮ็ดฮั้น โดยบ่มีการลำเอียงเห็นแก่หน้าผู้ใดเลย
////////// ////////// //////////