ฟีลิปปี-Philippians บทที่ 4

ฟีลิปปี 4:1 จั่งซั้น พี่น้องผู้เป็นที่ฮักของข้อย เอ้ย ที่ข้อยคึดฮอดหลาย เป็นที่ยินดี กับเป็นมงกุฎของข้อยนำ พวกที่ฮักของข้อย เอ้ย ให้ยืนมั่นในองค์พระผู้เป็นเจ้าเด้อ

ฟีลิปปี 4:2 ข้อยขอเตือน นางยูโอเดีย กับ นางสินทิเค ให้มีความนึกคึดปรองดองกันในองค์พระผู้เป็นเจ้าซะ 

ฟีลิปปี 4:3 เอ่อ ข้อยขอร้องเจ้านำแหน่ ผู้เป็นหมู่ฮ่วมแอกที่แท้นำข้อย ให้เจ้าซ่อยแม่ญิงสองคนฮั้นแหน่ คือพวกเขาเคยเฮ็ดการงานในข่าวประเสริฐนำกันกับข้อย พร้อมกับ เคลเมนท์ นำ ทั้งคนอื่นๆ ที่เป็นหมู่ฮ่วมงานของข้อย ซึ่งซื่อของพวกเขาฮั้นมีอยู่ในหนังสือแห่งซีวิตแล้ว

ฟีลิปปี 4:4 ให้ซื่นซมยินดีในองค์พระผู้เป็นเจ้าอยู่เสมอ ข้อยขอเว้าซ้ำอีกว่า ให้ซื่นซมยินดีเด้อ

ฟีลิปปี 4:5 ให้คู่คนเห็นความอ่อนสุภาพของเจ้าเด้อ คือองค์พระผู้เป็นเจ้าได้อยู่ใกล้แล้ว

ฟีลิปปี 4:6 แล้วอย่ากระวนกระวายในเรื่องอีหยังเด้อ แต่ให้บอกความต้องการของเจ้าคู่แนวต่อพระเจ้า ด้วยการอธิษฐาน การวิงวอน กับการขอบพระคุณเด้อ

ฟีลิปปี 4:7 แล้วสันติภาพของพระเจ้า ซึ่งเกินกว่าที่สิเข้าใจได้ สิคุ้มครองจิตใจกับความนึกคึดของเจ้าไว้ในพระเยซูคริสต์ 

ฟีลิปปี 4:8 พี่น้อง เอ้ย ในสุดท้ายนี้ แนวใดที่เป็นความจริง แนวใดที่ดีงามเป็นตานับถือ แนวใดที่ยุติธรรม แนวใดที่บริสุทธิ์ แนวใดที่เป็นตาฮักแพง แนวใดที่เป็นตาฟัง คือคั่นมีแนวใดที่ล้ำเลิศ แนวใดที่เป็นตายกย่องสรรเสริญ กะให้คึดในแนวหมู่นี้เด้อ

ฟีลิปปี 4:9 แล้วแนวที่เจ้าได้เฮียนฮู้ กับได้ฮับไว้ กับได้ยิน กับได้เห็นในโตข้อยแล้ว กะให้เฮ็ดตามแนวหมู่นี้ แล้วพระเจ้าของสันติภาพกะสิอยู่นำพวกเจ้า

ฟีลิปปี 4:10 แต่ข้อยซื่นซมยินดีในองค์พระผู้เป็นเจ้าอย่างสุดซึ้ง ด้วยว่าในที่สุดความคึดฮอดพวกเจ้าต่อข้อยได้ฟื้นมาอีกแล้ว คือแม้นแต่คึดฮอดข้อยอีหลี พวกเจ้ากะยังขาดโอกาสซื่อๆ 

ฟีลิปปี 4:11 ที่ข้อยเว้าหนิ กะบ่ได้เล็งเถิงเรื่องความต้องการของโตเองดอก คือข้อยเฮียนฮู้มาแล้วว่า ข้อยอยู่ในสถานการณ์ใด กะพอใจอยู่ในสถานการณ์ฮั้น

ฟีลิปปี 4:12 คือข้อยฮู้จักการอยู่อย่างตกต่ำ แล้วกะฮู้จักการอยู่อย่างเหลือล้นนำ คือข้อยเฮียนฮู้เถิงเคล็ดลับในคู่สถานการณ์มาแล้ว บ่ว่าสิเป็นการอิ่มหนำ การหิวโหย การอยู่อย่างเหลือล้น ฮวมทั้งการขัดสน ข้อยกะอยู่ได้โลด

ฟีลิปปี 4:13 คือข้อยสามารถเฮ็ดคู่แนวได้โดยในพระคริสต์ ผู้เพิ่นเสริมกำลังให้ข้อย

ฟีลิปปี 4:14 จั่งใดกะดี พวกเจ้าได้เฮ็ดดีอยู่แล้ว ที่ว่าได้มีส่วนฮ่วมซ่อยในยามทุกข์ของข้อย 

ฟีลิปปี 4:15 แล้วพวกเจ้าเอง ซาวฟีลิปปี เอ้ย ได้ฮู้อยู่แล้วว่า ตอนเริ่มออกไปประกาศข่าวประเสริฐฮั้น คือตอนข้อยออกจากแคว้นมาซิโดเนียไป บ่มีกลุ่มผู้เซื่อใดๆ มีส่วนฮ่วมกับข้อยในการถวายกับการฮับซ่อยเลย นอกจากพวกเจ้าพวกเดียวท่อฮั้น

ฟีลิปปี 4:16 คือ แม้นแต่ตอนข้อยอยู่ในเมืองเธสะโลนิกา พวกเจ้ากะยังฝากของถวายมาอยู่หลายเทื่อ เพื่อซ่อยเบาบางความขัดสนของข้อย

ฟีลิปปี 4:17 บ่แม่นว่าข้อยซอกอยากฮับอีหยังดอก แต่ว่าข้อยอยากให้เจ้าได้ผลกำไรในบัญซีของพวกเจ้าให้หลายขึ้น 

ฟีลิปปี 4:18 แต่ข้อยมีของครบแล้ว คือมีเหลือล้นแล้ว ข้อยอิ่มหนำย้อนได้ฮับของที่ เอปาโฟรดิทัส ได้นำมาจากพวกเจ้า เป็นกลิ่นหอม เป็นเครื่องบูซาที่พระเจ้าพึงพอใจหลาย

ฟีลิปปี 4:19 แล้วพระเจ้าของข้อยสิโปรดประทานเมิ้ดคู่แนว ตามที่เจ้าต้องการ ตามทรัพย์ที่เพิ่นมีอย่างบ่ฮู้จักเมิ้ดในสถานอันฮุ่งเฮือง โดยในพระเยซูคริสต์

ฟีลิปปี 4:20 บัดนี้ ขอให้พระสิริมีแด่พระเจ้าผู้เป็นพ่อของพวกเฮาสืบๆ ไปเป็นนิตย์ อาเมน

ฟีลิปปี 4:21 ข้อยขอฝากความคึดฮอด มาเถิงพี่น้องคนของพระเจ้าคู่คนในพระเยซูคริสต์ แล้วพี่น้องที่อยู่กับข้อยหนิได้ฝากความคึดฮอดมายังพวกเจ้านำ

ฟีลิปปี 4:22 แล้วคนของพระเจ้าคู่คน ขอฝากความคึดฮอดมาทักทายพวกเจ้านำ แม่นเฉพาะพวกพี่น้องอยู่ในสำนักของจักรพรรดิซีซาร์ 

ฟีลิปปี 4:23 ขอให้ฮ่มพระกรุณาธิคุณขององค์พระเยซูคริสต์เจ้า ดำรงอยู่กับพวกเจ้าคู่คนเทอญ อาเมน [เขียนเถิงซาวฟีลิปปีจากกรุงโรม ส่งโดยเอปาโฟรดิทัส]