ฟีลิปปี-Philippians บทที่ 3

ฟีลิปปี 3:1 สุดท้ายนี้ พี่น้องของข้อย เอ้ย ให้ซื่นซมยินดีในองค์พระผู้เป็นเจ้าเด้อ การที่ข้อยเขียนข้อความเหล่านี้เถิงพวกเจ้าซ้ำอีก ข้อยกะบ่ได้ลำบากจักหน่อยเลย ย้อนว่ามันซ่อยให้พวกเจ้าอยู่ในความปลอดภัย

ฟีลิปปี 3:2 ให้ระวังพวกหมาฮ้ายเด้อ ระวังพวกคนงานซั่วเด้อ กับระวังพวกถือสุหนัตเด้อ

ฟีลิปปี 3:3 ย้อนว่า พวกเฮาเองเป็นพวกที่ถือพิธีเข้าสุหนัตอย่างถืกต้อง คือแม่นพวกผู้ที่นมัสการพระเจ้าฝ่ายจิตวิญญาณ ซึ่งพวกเฮายกย่องในองค์พระเยซูคริสต์ แล้วบ่ได้ไว้ใจในแนวต่างๆ ฝ่ายเนื้อหนังเลย

ฟีลิปปี 3:4 แม้นแต่ คั่นผู้อื่นคึดว่าเขาอาจมีเหตุที่สิไว้ใจในการงานฝ่ายเนื้อหนัง ข้อยกะยังมีเหตุที่สิไว้ใจในเนื้อหนังหลายกว่าเขาอีก

ฟีลิปปี 3:5 คือข้อยได้ฮับเข้าสุหนัตในมื้อที่แปดฮั้น ข้อยเป็นซนซาติอิสราเอลโดยแท้ เป็นเผ่าตระกูลเบนยามิน เป็นคนฮีบรูเกิดในเซื้อสายซาวฮีบรู ในด้านกฎบัญญัติฮั้น ได้อยู่ในคณะฟาริสี 

ฟีลิปปี 3:6 ในด้านความกระตือรือร้น ข้อยกะได้ข่มเหงกลุ่มผู้เซื่อ ในด้านความซอบธรรมตามหลักข้อกฎบัญญัติฮั้น กะบ่มีหม่องหาจับผิดได้เลย

ฟีลิปปี 3:7 จั่งใดกะดี แนวใดที่เคยถือว่า เป็นคุณประโยซน์สำหรับข้อย บัดนี้ข้อยถือว่าแนวหมู่ฮั้นบ่เป็นประโยซน์แล้ว ย้อนเห็นแก่พระคริสต์

ฟีลิปปี 3:8 ที่จริงข้อยถือว่าสิ่งสารพัดฮั้นเปล่าประโยชน์ ย้อนเห็นแก่ความประเสริฐของความฮู้เถิงพระเยซูคริสต์ องค์พระผู้เป็นเจ้าของข้อย คือย้อนเพิ่น ข้อยจั่งได้สละถิ่มคู่อันคู่แนว กับถือว่า แนวหมู่ฮั้นเป็นของเศษที่บ่มีสาระ เพื่อข้อยสิได้พระคริสต์

ฟีลิปปี 3:9 แล้วจั่งพ้อว่าข้อยอยู่ในเพิ่น โดยบ่มีความซอบธรรมของโตเองซึ่งได้ทางกฎบัญญัติ แต่มีความซอบธรรมโดยความเซื่อในพระคริสต์ ที่เป็นความซอบธรรมซึ่งมาจากพระเจ้าโดยความเซื่อ

ฟีลิปปี 3:10 เพื่อข้อยสิได้ฮู้จักกับเพิ่น กับฤทธิ์อำนาจของเพิ่นในการเป็นขึ้นมาจากตาย กับฮ่วมสามัคคีในความทุกข์ของเพิ่น จั่งได้ถืกฮับเข้าฮ่วมในความตายของเพิ่น

ฟีลิปปี 3:11 คั่นว่า โดยวิธีหนึ่งวิธีใดข้อยจั่งสิได้เป็นขึ้นมาจากความตายนำ

ฟีลิปปี 3:12 บ่แม่นว่าข้อยได้ฮอดเส้นซัยแล้ว หรือสำเร็จแล้ว แต่ข้อยพวมมุ่งหน้าคว้าเอาในแนวที่พระเยซูคริสต์ได้คว้าเอาโตข้อยมาแล้วฮั้น

ฟีลิปปี 3:13 พี่น้อง เอ้ย ข้อยบ่ถือว่าข้อยได้คว้าเอาเส้นซัยฮั้นได้แล้ว แต่ข้อยเฮ็ดอย่างหนึ่ง คือลืมแนวที่ผ่านพ้นมาแล้วซะ กับโน้มโตออกไปยังแนวที่อยู่ทางหน้า

ฟีลิปปี 3:14 ข้อยพวมมุ่งหน้าไปสู่เป้าหมายฮั้น คือรางวัลอยู่ที่สูงตามที่พระเจ้าได้เอิ้นมาโดยในพระเยซูคริสต์

ฟีลิปปี 3:15 จั่งซั้น ให้พวกเฮา ซึ่งเป็นผู้ใหญ่แล้ว มีความนึกคึดแนวเดียวกันฮั้น กับว่า คั่นมีใผในพวกเจ้ามีความนึกคึดต่างกัน พระเจ้ากะสิเปิดเผยให้กับเจ้านำ

ฟีลิปปี 3:16 มีแต่ว่า พวกเฮาได้มุ่งหน้าฮอดส่ำใดแล้ว กะให้พวกเฮาดำเนินตามเกณฑ์ฮั้นต่อไป

ฟีลิปปี 3:17 พี่น้อง เอ้ย ให้พวกเจ้าเลียนแบบตามอย่างข้อยเด้อ กับให้ค่อยสังเกตุผู้อื่นๆ ที่อยู่อย่างเดียวกัน ตามแบบอย่างฮั้นที่พวกเฮาให้ไว้แล้ว

ฟีลิปปี 3:18 ย้อนว่า ตามที่ข้อยเคยเตือนพวกเจ้ามาหลายเทื่อ แล้วยังเตือนอยู่เดี๋ยวนี้อีกด้วยน้ำตาไหล ว่ามีหลายคนที่ดำเนินซีวิตอยู่อย่างเป็นศัตรูต่อหลักประหารของพระคริสต์

ฟีลิปปี 3:19 ซึ่งปลายทางของคนพวกฮั้นคือความพินาศ กับว่าท้องโตเองเป็นพระของเขา กับความอับอายเป็นแนวโอ้อวดของเขา แล้วพวกเขาจั่งนึกคึดแต่ในทางของโลกนี้

ฟีลิปปี 3:20 แต่ฝ่ายพวกเฮาหนิ ได้ถือสัญชาติสวรรค์แล้ว ซึ่งพวกเฮาคอยถ้าพระผู้โปรดให้รอดพ้นฮั้น คือพระเยซูคริสต์เจ้า 

ฟีลิปปี 3:21 ซึ่งเพิ่นเองเป็นผู้ที่สิเปลี่ยนแปลงโตอนิจังอันต่ำต้อยของพวกเฮาให้เป็นแนวใหม่ คือจั่งโตของเพิ่นที่ประกอบด้วยพระสิริ ตามฤทธิ์อำนาจของเพิ่นฮั้น ที่เพิ่นสามารถเฮ็ดให้คู่อันคู่แนวอยู่ใต้การปกครองของเพิ่น
////////// ////////// //////////