เอเฟซัส-Ephesians บทที่ 4

เอเฟซัส 4:1 จั่งซั้น ข้อยเปาโลหนิ เป็นนักโทษถืกจองจำในคุก ย้อนเห็นแก่องค์พระผู้เป็นเจ้า จั่งได้ขอร้องให้พวกเจ้าดำเนินซีวิตให้สมกับฐานะที่พระเจ้าได้เอิ้นมาฮั่น 

เอเฟซัส 4:2 ด้วยการถ่อมใจ มีใจอ่อนสุภาพ อดทนไว้นาน เห็นอกเห็นใจกัน โดยอาศัยความฮักแบบของพระเจ้า 

เอเฟซัส 4:3 จั่งพยายามฮักษาความเป็นหนึ่งในองค์พระวิญญาณ โดยสันติภาพในพระเจ้าเป็นแนวผูกมัดกันไว้

เอเฟซัส 4:4 โดยว่ามีกลุ่มผู้เซื่อแต่กลุ่มเดียว มีพระวิญญาณแต่องค์เดียว มีความหวังอันมั่นคงแต่ทางเดียวที่พระเจ้าได้เซิญพวกเจ้ามาฮั่น

เอเฟซัส 4:5 มีองค์พระผู้เป็นเจ้าแต่ผู้เดียว มีความเซื่อแต่ทางเดียว มีการฮับบัพติศมาเข้ามีส่วนฮ่วมแต่อย่างเดียว 

เอเฟซัส 4:6 มีพระเจ้าแต่ผู้เดียวที่เป็นพ่อของคนทั้งปวง อยู่เหนือเมิ้ดคู่แนว ซึ่งว่าเมิ้ดคู่แนวเป็นไปได้โดยเพิ่น แล้วเพิ่นกะอยู่ในพวกเจ้าคู่คนนำ

เอเฟซัส 4:7 กับว่า เพิ่นได้โปรดให้พระกรุณาธิคุณกับพวกเฮา ตามขนาดการอวยพรของพระคริสต์ 

เอเฟซัส 4:8 ตามคำทำนายว่า “บัดเพิ่นได้เสด็จขึ้นไปประทับอยู่หม่องสูง เพิ่นได้นำเอาผู้กักเซลยให้เป็นเซลยเอง พร้อมทั้งนำของขวัญมาให้ผู้คนนำ”

เอเฟซัส 4:9 แล้วคำว่า “เพิ่นได้เสด็จขึ้นไป” หมายความว่า เพิ่นสิต้องลงมาซะก่อน เข้าสู่แดนล่างของแผ่นดินโลกนี้ 

เอเฟซัส 4:10 แล้วเพิ่นผู้ที่ลงมา กะเป็นผู้เดียวกันกับผู้ที่เสด็จขึ้นไป อยู่เหนือกว่าซั้นฟ้าสวรรค์ทั้งเมิ้ด เพื่อให้เมิ้ดคู่อย่างเต็มไปโดยพระบารมีของเพิ่น

เอเฟซัส 4:11 แล้วเพิ่นได้ตั้งผู้ลางคนให้เป็นทูตพิเศษ ลางคนเป็นผู้เป็นปากเป็นเสียง ลางคนเป็นผู้ประกาศข่าวประเสริฐ ลางคนเป็นผู้เลี้ยงเบิ่งแยง ลางคนเป็นผู้ฝึกสอน 

เอเฟซัส 4:12 เพื่ออบรมเตรียมเขาให้เป็นงานในการปรนนิบัติฮับใซ้ เพื่อสิได้เสริมสร้างหนุนใจคนในกลุ่มผู้เซื่อ อันเป็นร่างเป็นพระกายของพระคริสต์ 

เอเฟซัส 4:13 จนกว่าพวกเฮาเมิ้ดคู่คนสิได้เข้ามาเป็นน้ำหนึ่งใจเดียวกันอย่างถืกต้องในหลักความเซื่อ เข้าใจดีในเรื่องพระเยซูพระบุตรของพระเจ้า จั่งได้เป็นผู้ใหญ่ในพระเยซูคริสต์อย่างสมบูรณ์แบบ

เอเฟซัส 4:14 เพื่อพวกเฮาสิบ่เป็นเด็กน้อยต่อไป ถืกเป่าหูซัดไปซัดมาโดยคำสอนทั่วทีปทั่วแดนที่มาทางพวกผู้บ่หวังดี โดยใซ้เล่ห์กล ดักหลอกคนให้หลงไปนำ

เอเฟซัส 4:15 แต่ด้วยการบอกสอนความจริงด้วยใจฮัก สิได้เจริญขึ้นเป็นผู้ใหญ่ในคู่อย่างในเพิ่นผู้เป็นหัวหน้าเป็นประมุขฮั่น คือพระคริสต์

เอเฟซัส 4:16 ซึ่งคนทั้งมวลที่ฮ่วมเป็นพระกายของเพิ่น สิได้ประสานงาน ฮ่วมเข้ากันอย่างคล่องตามหน้าที่ของใผของมัน เพื่อซ่อยกันเสริมสร้างให้เจริญขึ้นโดยความฮักแพงต่อกัน

เอเฟซัส 4:17 จั่งซั้น ข้อยขอยืนยันในองค์พระผู้เป็นเจ้าว่า พวกเจ้าบ่ควรสิดำเนินซีวิตไปในทางเก่าของคนต่างซาติอีกต่อไป โดยดำเนินตามใจมั่วของเขา คึดแต่แนวที่บ่มีคุณค่าอีหยัง

เอเฟซัส 4:18 คือความเข้าใจของพวกเขาถืกมืดลง บ่มีสิทธิ์มีส่วนในซีวิตของพระเจ้าเลย กะย้อนความโง่ของพวกเขา กับย้อนจิตใจของเขาบอดไปนำ 

เอเฟซัส 4:19 ซึ่งเขาบ่มีความฮู้สึกสำนึกอีหยังเลย จั่งได้มอบโตเองไว้ในแนวมั่วสุม เฮ็ดแต่แนวซั่วซ้าเลวทรามเมิ้ด เห็นแก่โตแก่ได้ 

เอเฟซัส 4:20 แต่พวกเจ้าบ่ได้เฮียนฮู้จากพระคริสต์แนวฮั้น 

เอเฟซัส 4:21 คั่นแม่นว่าพวกเจ้าได้ยินได้ฮู้จักพระเยซูอีหลี แล้วได้ฮับการสอนจิตใจจากเพิ่น ตามทางความจริงซึ่งอยู่ในเพิ่น 

เอเฟซัส 4:22 จั่งให้พวกเจ้าถอดแนวต่างๆ ของพฤติกรรมเดิมให้ออกไป คือซีวิตคนเก่าฮั้น ที่พวมสิเสื่อมไปตามราคะตัณหา ซึ่งเป็นแนวหลอกลวง 

เอเฟซัส 4:23 แล้วให้มีใจใหม่ มีความคึดใหม่

เอเฟซัส 4:24 แล้วให้สวมซีวิตคนใหม่ เป็นซีวิตที่ถืกสร้างขึ้นมาใหม่แบบอย่างพระเจ้า ว่าเป็นผู้ซอบธรรม กับเป็นผู้บริสุทธิ์เฉพาะพระเจ้าอย่างแท้จริง 

เอเฟซัส 4:25 จั่งซั้น ให้เซาเว้าขี้ตัวะหลอกลวงกันเด้อ “ให้คู่คนเว้าแต่แนวเป็นจริงต่อกันและกัน ย้อนว่าพวกเฮาต่างเป็นอวัยวะ**ซึ่งกันและกัน

เอเฟซัส 4:26 “คั่นสิฮ้ายกะฮ้ายโลด แต่อย่าให้เถิงเป็นบาป คือบัดฮ้ายแล้วกะอย่าให้มันเลยมื้อเลยค่ำเด้อ

เอเฟซัส 4:27 แล้วอย่าเปิดซ่องทางให้พญามารมีโอกาสเล่นงานเจ้าได้

เอเฟซัส 4:28 ฝ่ายผู้ที่เคยขี้ลัก กะอย่าขี้ลักอีกต่อไปเด้อ แต่ให้ลงมือเฮ็ดเวียกเฮ็ดงานในทางที่ดีงาม เพื่อสิได้มีแนวแบ่งปันให้กับผู้ที่ขัดสน 

เอเฟซัส 4:29 แล้วอย่าให้มีคำเพอะแนวบ่จบออกจากปากขของพวกเจ้าเด้อ แต่ให้เว้าแต่แนวดีงามที่มีเหตุมีผล ที่เป็นพระคุณเป็นแนวเสริมสร้างในหูของผู้ฟัง

เอเฟซัส 4:30 กับอย่าให้พระวิญญาณของพระเจ้าเสียน้ำใจเด้อ ซึ่งเป็นผู้ที่ประทับตรารับรองเจ้าไว้ มุ่งเถิงมื้อที่พระเจ้าสิมาฮับเอาฮั้น

เอเฟซัส 4:31 กับให้ความขมขื่น โมโหโทโส เลือดขึ้นตา เคียดแค้นซังกัน เว้าใส่ร้ายกัน ทำลายซื่อเสียงกัน ฮ่วมทั้งความซั่วฮ้ายคู่อย่าง ให้ออกจากพวกเจ้าเด้อ

เอเฟซัส 4:32 แต่ให้มีน้ำใจอันดีงามต่อกัน มีใจอ่อนน้อมเห็นอกเห็นใจกัน ให้อภัยโทษกัน คือจั่งพระเจ้าได้ให้อภัยโทษบาปพวกเจ้าได้แล้วในพระเยซูคริสต์
////////// ////////// //////////