เอเฟซัส-Ephesians บทที่ 2

เอเฟซัส 2:1 แล้วฝ่ายพวกเจ้า เพิ่นโปรดให้มีซีวิต แม้นแต่พวกเจ้าอยู่ในสภาพตายไปแล้วย้อนการล่วงละเมิดในความผิดบาปฮั้น 

เอเฟซัส 2:2 คือแต่ก่อน พวกเจ้าเคยใซ้ซีวิตตามระบบค่านิยมของโลกนี้ ตกอยู่ใต้อำนาจของมารผู้ครอบครองเทิงฟ้าอากาศ แล้วคู่มื้อนี้มันเป็นวิญญาณฮั้นที่ยังบังคับบัญซาในใจของคนที่บ่ยอมเซื่อฟัง

เอเฟซัส 2:3 แต่ก่อน พวกเฮากะเคยใซ้ซีวิตแต่ในทางกิเลสตัณหาของเนื้อหนังตามใจมัก คึดอยากเฮ็ดหยังกะเฮ็ดไปโลด ตกอยู่ในสภาพสมควรสิถืกพระเจ้าลงโทษคือจั่งคนอื่น 

เอเฟซัส 2:4 แต่พระเจ้า ผู้ที่เต็มไปด้วยความเมตตา แล้วย้อนความฮักแพงที่เพิ่นมีต่อพวกเฮา

เอเฟซัส 2:5 เถิงแม้นว่าพวกเฮายังอยู่ในสภาพตายแล้วในบาปของโตเองกะตาม เพิ่นโปรดให้มีซีวิตขึ้นมาใหม่ฮ่วมกับพระเยซูคริสต์ (คือที่พวกเฮารอดพ้นได้ฮั้น กะย้อนพระกรุณาธิคุณ)

เอเฟซัส 2:6 แล้วจั่งโปรดให้พวกเฮาขึ้นนั่งนำกันอยู่เทิงสวรรค์กับพระเยซูคริสต์ 

เอเฟซัส 2:7 เพื่อในยุคต่อๆ มา พระเจ้าสิได้แสดงพระกรุณาธิคุณอันมหาศาลของเพิ่น พร้อมกับความเมตตาของเพิ่น ให้กับพวกเฮาโดยในพระเยซูคริสต์

เอเฟซัส 2:8 คือ ที่พวกเจ้ารอดพ้นบาปได้ฮั้นกะย้อนพระกรุณาธิคุณของพระเจ้า โดยความเซื่อ มันบ่ได้ขึ้นอยู่กับโตเจ้าเอง แต่ได้เป็นของขวัญมาจากพระเจ้า 

เอเฟซัส 2:9 แล้วบ่ได้ขึ้นอยู่กับการปฏิบัติ เพื่อบ่มีใผสามารถอวดอ้างได้ 

เอเฟซัส 2:10 คือพวกเฮากะเป็นฝีมือของเพิ่น ที่เพิ่นได้สร้างให้เฮามีซีวิตขึ้นมาใหม่ในพระเยซูคริสต์ เพื่อประกอบการดี ตามแผนการที่พระเจ้าได้วางไว้มาก่อน กะเพื่อให้เฮาดำเนินซีวิตตามฮั้น

เอเฟซัส 2:11 จั่งซั้น ให้จื่อไว้ว่า พวกเจ้าเคยเป็นคนต่างซาติมาก่อนฝ่ายเนื้อหนัง เป็นขี้ปากของพวกคนที่เข้าสุหนัตที่เฮ็ดด้วยมือฮั้น ว่าพวกเจ้าบ่ได้เข้าสุหนัตคือเขา

เอเฟซัส 2:12 แล้วในตอนฮั้น พวกเจ้าอยู่นอกพระคริสต์ บ่มีสิทธิ์ในการเป็นพลเมืองอิสราเอล เป็นคนนอกพันธสัญญาต่างๆ ที่พระเจ้าได้สัญญาไว้ บ่มีความหวัง กับอยู่ในโลกนี้โดยบ่มีพระเจ้าเลย 

เอเฟซัส 2:13 แต่บัดนี้ พวกเจ้าได้เข้ามาเถิงแล้วในพระเยซูคริสต์ ซึ่งแต่ก่อนพวกเจ้าอยู่ห่างไกล แต่เดี๋ยวนี้ได้มาใกล้ซิดแล้ว โดยพระโลหิตของพระเยซูคริสต์ 

เอเฟซัส 2:14 คือเพิ่นเองเป็นแหล่งสันติภาพของพวกเฮา เหตุให้พวกเฮาทั้งสองฝ่าย เข้ามาเป็นอันหนึ่งอันเดียวกัน แล้วจั่งม้างกำแพงแนวที่กีดกั้นไว้ฮั้นให้พังลงแล้ว

เอเฟซัส 2:15 คือเพิ่นได้จัดการระบบเก่าทางข้อปฏบัติในกฎบัญญัติ แนวที่เฮ็ดให้เป็นศัตรูกันให้เมิ้ดไป โดยในร่างกายของเพิ่นเอง เพื่อสิได้สร้างบุคคลผู้ใหม่ผู้หนึ่งในโตเพิ่น ออกจากสองฟากสองฝ่ายฮั้น มาเป็นคนเดียวกัน จั่งให้มีสันติภาพซึ่งกันและกัน

เอเฟซัส 2:16 แล้วเพื่อเพิ่นสิได้ให้ทั้งสองฝ่ายฮั้นคืนดีกันกับพระเจ้า เป็นกลุ่มเดียวกันได้โดยทางหลักประหารฮั้น จั่งได้ประหารการเป็นศัตรูกันให้เมิ้ดแล้ว 

เอเฟซัส 2:17 แล้วเพิ่นได้มาประกาศสันติภาพให้พวกเจ้า ผู้อยู่ห่างไกล พร้อมทั้งซาติยิวผู้อยู่ใกล้

เอเฟซัส 2:18 คือ โดยทางเพิ่นเอง เฮาทั้งสองฝ่ายจั่งมีทางเข้าเถิงพระวิญญาณ กับเถิงพระเจ้าผู้เป็นพ่อนำ 

เอเฟซัส 2:19 จั่งซั้น แต่นี้ไปพวกเจ้าบ่แม่นคนต่างด้าวท้าวต่างแดนอีกแล้ว แต่ได้เป็นพี่น้องซาติเดียวกัน เป็นคนของพระเจ้านำกัน เป็นไทเฮือนเดียวกันอยู่ในครอบครัวของพระเจ้าแล้ว

เอเฟซัส 2:20 คือถืกสร้างขึ้นมาโดยพวกทูตพิเศษ กับพวกผู้เป็นปากเป็นเสียงของพระเจ้า ซึ่งเป็นรากฐานอันมั่นคง แล้วพระเยซูคริสต์เองเป็นก้อนหินเอกที่หัวมุม 

เอเฟซัส 2:21 คือในพระเยซูนี้ พวกเจ้ากะเปรียบคือเฮือนที่พวมถืกประกอบกันขึ้น เป็นวิหารอันบริสุทธิ์ในองค์พระผู้เป็นเจ้า 

เอเฟซัส 2:22 คือถืกก่อกันขึ้นเป็นหม่องสถิตอยู่ของพระเจ้าโดยทางพระวิญญาณ
////////// ////////// //////////