กาลาเทีย-Galatians บทที่ 6

กาลาเทีย 6:1 พี่น้องเอ้ย คั่นมีผู้ใดพ่ายแพ้ต่อความผิด กะให้ผู้ที่พวมใซ้ซีวิตในการนำพาของพระวิญญาณ ซ่อยผู้ฮั้นให้คืนมาตั้งโตใหม่ แต่ให้เฮ็ดนำเขาโดยมีใจอ่อนน้อมเด้อ โดยคึดเห็นโตเองนำ ว่าใผกะสามารถหลงผิดได้คือกัน

กาลาเทีย 6:2 ให้ซ่อยแบ่งเบาภาระกันและกัน กับเห็นอกเห็นใจกันเด้อ ซึ่งเป็นการปฏิบัติตามหลักเกณฑ์ของพระคริสต์ให้สำเร็จ

กาลาเทีย 6:3 คือ คั่นผู้ใดถือโตว่าสำคัญดีเด่น บัดเขาบ่มีอีหยังดีเด่น เขากะหลอกโตเองซื่อๆ

กาลาเทีย 6:4 แต่ให้คู่คนพิจารณาเบิ่งผลในซีวิตของโตเองดีกว่า แล้วเขาจั่งมีแนวของโตเองที่ยกย่องได้ บ่แม่นในโตผู้อื่น

กาลาเทีย 6:5 คือคู่คนควรสิฮับผิดซอบในภาระของโตเอง

กาลาเทีย 6:6 แล้วส่วนผู้ที่ได้ฮับการฝึกสอนในพระคำ กะให้มีน้ำใจ แบ่งปันแนวดีคู่แนว ซึ่งเป็นการตอบแทนผู้ที่ฝึกสอนเขา

กาลาเทีย 6:7 อย่าคึดผิดเด้อ เจ้าหลอกพระเจ้าบ่ได้เลย ย้อนว่าผู้ใดหว่านอีหยังลงไป กะสิเก็บเกี่ยวผลแนวฮั้น

กาลาเทีย 6:8 คือ ส่วนผู้ใดหว่านไว้ในทางเนื้อหนัง กะสิได้ความเปื่อยเน่าเป็นผลลัพธ์ แต่ส่วนผู้ที่หว่านไว้ในทางพระวิญญาณ กะสิได้ซีวิตนิรันดร์จากพระวิญญาณเป็นผลลัพธ์

กาลาเทีย 6:9 แล้วอย่าให้พวกเฮาเกิดเมื่อยล้าในการเฮ็ดดี ย้อนว่าพอฮอดยามแล้ว กะสิได้ฮับผลตอบแทน คั่นเฮาบ่ได้ท้อแท้ใจก่อน

กาลาเทีย 6:10 จั่งซั่น บัดพวกเฮามีโอกาส กะให้เฮ็ดดีต่อคู่คน โดยเฉพาะต่อพี่น้องผู้เซื่อในครัวเฮือนของพระเจ้า 

กาลาเทีย 6:11 พวกเจ้าได้สังเกตบ้อ โตหนังสือใหญ่ที่ข้อยได้ลงมือเขียนเองเถิงพวกเจ้า

กาลาเทีย 6:12 แล้วสำหรับพวกจอมปลอมฮั่น เขาซักซวนให้พวกเจ้าเข้าสุหนัตนำ เพื่อเป็นการออกหน้าให้คนเห็นดีนำเขา หย้านว่าสิถืกหมู่โจมตีต่อว่า ย้อนเรื่องหลักประหารของพระคริสต์ 

กาลาเทีย 6:13 คือ แม้แต่พวกเขาที่เข้าสุหนัตฮั่น สามารถฮักษากฎบัญญัติได้ แต่เขาอยากให้พวกเจ้าเข้าสุหนัตนำเขา เพื่อเขาสิได้มีแนวอวดทางเนื้อหนังซื่อๆ

กาลาเทีย 6:14 แต่อย่าให้มันเป็นไปเด็ดขาดเด้อ ที่ว่าข้อยสิซอกอวดอ้างอีหยัง นอกจากสิอวดในหลักประหารขององค์พระเยซูคริสต์เจ้าของพวกเฮาท่อฮั้น ที่เป็นเหตุที่ข้อยถืกประหารต่อโลก กับโลกถืกประหารต่อข้อยนำ 

กาลาเทีย 6:15 ย้อนว่าในพระเยซูคริสต์ฮั้น การเข้าสุหนัต ทั้งการบ่เข้าสุหนัต บ่มีความหมายอีหยังเลย แต่การถืกสร้างขึ้นมาเป็นคนใหม่ท่อฮั้น ที่มีความหมาย 

กาลาเทีย 6:16 ขอให้สันติภาพกับความเมตตาของพระเจ้า มีอยู่กับผู้ที่ดำเนินซีวิตตามหลักความจริงนี้ แล้วอยู่กับพี่น้องคนอิสราเอลของพระเจ้าฮั่นนำ 

กาลาเทีย 6:17 แล้วแต่นี้ไป ขออย่าให้ผู้ใด มารบกวนข้อยต่อไปอีกเด้อ ย้อนว่าในโตข้อยหนิ มีสัญลักษณ์ขององค์พระเยซูคริสต์เจ้า 

กาลาเทีย 6:18 พี่น้อง เอ้ย สุดท้ายนี้ ขอให้พระคุณของพระเยซูคริสต์เจ้าของเฮา สถิตอยู่นำจิตวิญญาณของพวกเจ้า อาเมน [เขียนเถิงพี่น้องซาวกาลาเทียจากเมืองโรม]