1 โครินธ์ – 1 Corinthians บทที่ 10

1 โครินธ์ 10:1 แล้วยิ่งกว่านี้อีก พี่น้องทั้งหลาย เอ้ย ข้อยอยากให้พวกเจ้าเข้าใจว่า ปู่ย่าตาทวดเมิ้ดคู่คนของพวกคนยิวฮั้น พวกเขาได้ถืกพระเจ้านำไปทางเมฆฮั้นในท้องฟ้า กับได้ย่างผ่านกลางท้องทะเลไปนำ 

1 โครินธ์ 10:2 คือเขาคู่คนได้เข้ามีส่วนฮ่วมในการนำพาของเฒ่าโมเสสภายใต้เมฆ กับในท้องทะเลฮั้นนำ

1 โครินธ์ 10:3 กับเขาเมิ้ดคู่คนได้ฮับกินอาหารทิพย์ฝ่ายวิญญาณอันเดียวกัน 

1 โครินธ์ 10:4 กับได้ฮับดื่มน้ำทิพย์ฝ่ายวิญญาณอันเดียวกันนำ คือฮับดื่มน้ำทิพย์ฮั้น ที่ไหลออกมาจากก้อนหินทิพย์ที่ติดตามเขามา แล้วก้อนหินทิพย์ฮั้นหมายเถิงพระคริสต์ 

1 โครินธ์ 10:5 แต่ว่า มีหลายคนในคนพวกฮั้นที่พระเจ้าบ่พอใจหลาย จั่งได้ลบล้างเขาให้ตายกระจายไปในถิ่นแห้งแล้ง

1 โครินธ์ 10:6 บัดนี้ แนวหมู่นี้ได้เป็นโตอย่าง ไว้ให้เตือนพวกเฮา บ่ให้มีใจขี้โลภ หลงไปตามแนวซั่วแนวบ่ดีคือจั่งเขา 

1 โครินธ์ 10:7 แล้วพวกเจ้าอย่าไปนับถือฮูปเคารพคือจั่งที่ผู้ลางคนในพวกเขา ตามที่มีคำเขียนไว้แล้วว่า “ประซาซนได้นั่งลงกินดื่มกัน แล้วกะลุกขึ้นเล่นสนุกสนานม่วนซื่นกันอยู่ฮั้น” 

1 โครินธ์ 10:8 แล้วอย่าให้พวกเฮาหลงไปเฮ็ดการล่วงประเวณี คือจั่งที่ผู้ลางคนในพวกเขาได้เฮ็ดฮั้น แล้วจั่งล้มลงตายในมื้อเดียว เป็นจำนวนสองหมื่นสามพันคน 

1 โครินธ์ 10:9 อย่าให้พวกเฮาท้าทายลองดีพระคริสต์ คือจั่งผู้ลางคนในพวกเขา แล้วเขากะพินาศไปย้อนถืกงูฮ้ายตอดตาย 

1 โครินธ์ 10:10 แล้วอย่าเป็นคนขี้จ่มคือจั่งผู้ลางคนในพวกเขา แล้วเขาจั่งถืกพินาศไปด้วยเพชฌฆาตฮั้น 

1 โครินธ์ 10:11 เหตุการณ์แนวหมู่นี้ได้เป็นไปกับพวกเขาเพื่อเป็นโตอย่าง คือมีเขียนไว้เพื่อเตือนพวกเฮานำ ผู้ซึ่งอยู่ในยามสุดปลายของยุคที่มาฮอดแล้วฮั้น 

1 โครินธ์ 10:12 จั่งซั้น ให้ผู้ที่คึดว่าโตเองยืนอย่างมั่นคง ให้ระวังโตไว้ให้ดีเด้อ บ่ซั้นอาจสิล้มลงกะได้ 

1 โครินธ์ 10:13 คือบ่มีการทดลองอีหยังที่เคยเกิดขึ้นนำพวกเจ้า นอกจากที่เคยเกิดขึ้นนำมนุษย์ผู้อื่นๆ มาแล้ว แต่ว่า พระเจ้าเพิ่นเป็นผู้สัตย์ซื่อ จั่งสิบ่ให้เจ้าถืกการทดลองเกินกว่าสิทนเอาได้ แล้วสิโปรดให้มีทางหลีกออกมาได้นำ เพื่อเจ้าสิสามารถทนเอาได้ 

1 โครินธ์ 10:14 จั่งซั้น พี่น้องที่ฮักของข้อย เอ้ย ให้หนีพ้นจากการถือฮูปเคารพเด้อ 

1 โครินธ์ 10:15 ข้อยเว้านำพวกเจ้าคือจั่งเว้ากับผู้ที่มีสติปัญญาแล้ว ให้เจ้าพิจารณาเอาในแนวที่ข้อยเว้ามาหนิเด้อ 

1 โครินธ์ 10:16 จอกฮั้นที่พวกเฮาฮับกินด้วยความขอบคุณกะเป็นพระพรหลาย เป็นที่ถวายเกียรติพระเจ้า ซึ่งเล็งเถิงการมีส่วนฮ่วมในพระโลหิตของพระคริสต์บ่แม่นบ้อ แล้วขนมปังที่พวกเฮาบิกินนำกันฮั่น ได้เล็งเถิงการมีส่วนฮ่วมสามัคคีธรรมในพระกายของพระคริสต์นำบ่แม่นบ้อ 

1 โครินธ์ 10:17 แล้วพวกเฮา แม้นว่าเป็นคนหลวงหลาย กะได้ฮ่วมเป็นกายเดียวกัน มีส่วนฮ่วมในขนมปังก้อนเดียวฮั้น 

1 โครินธ์ 10:18 นี่แน่ะ ให้พิจารณาพวกคนอิสราเอลตามเนื้อหนัง บ่แม่นเขาผู้ที่กินเครื่องบูซาแล้วฮั้น กะมีส่วนฮ่วมกันในแท่นบูซาแท่นเดียวกันบ่แม่นบ้อ 

1 โครินธ์ 10:19 คั่นจั่งซี้ ข้อยสิอธิบายจั่งใดหน้อ สิว่าฮูปเคารพฮั้นศักดิ์สิทธิ์อีหยังบ้อ หรือสิว่าเครื่องบูซาที่ถืกถวายฮั้นศักดิ์สิทธิ์อีหยังบ้อ 

1 โครินธ์ 10:20 แต่ข้อยว่า เครื่องบูซาที่พวกต่างซาติได้ถวายฮั้น แท้จริงแล้วเขากะถวายบูซาต่อพวกปีศาจ บ่แม่นถวายต่อพระเจ้าดอก แล้วใจข้อยหนิกะบ่อยากให้เจ้ามีส่วนฮ่วมสามัคคีกับพวกปีศาจเป็นอันขาดเลย 

1 โครินธ์ 10:21 เจ้าสิฮ่วมดื่มจอกของพระผู้เป็นเจ้า แล้วหันไปฮ่วมจอกของพวกปีศาจนำกะบ่ได้เลย กับเจ้าสิฮ่วมโต๊ะของพระผู้เป็นเจ้าแล้วกะไปฮ่วมโต๊ะของปีศาจนำกะบ่ได้อีก 

1 โครินธ์ 10:22 พวกเฮาสิยั่วยุพระผู้เป็นเจ้าให้อิจฉาบ้อ พวกเฮามีฤทธิ์อำนาจกว่าเพิ่นอยู่บ้อ 

1 โครินธ์ 10:23 คือข้อยมีสิทธิ์เฮ็ดได้เมิ้ดคู่แนว แต่บ่แม่นคู่แนวฮั้นที่เป็นประโยชน์ ข้อยมีสิทธิ์เฮ็ดได้เมิ้ดคู่แนว แต่บ่แม่นคู่แนวที่สิเสริมสร้างให้เจริญขึ้น 

1 โครินธ์ 10:24 อย่าให้ผู้ใดติดตามผลประโยชน์ของโตเองเด้อ แต่ให้ซ่อยคนอื่นให้อยู่ดีมีแฮงดีกว่า 

1 โครินธ์ 10:25 คู่แนวที่ขายกันในตลาดเนื้อฮั้น กะให้ซื้อไปกินโลดเด้อ บ่ต้องถามเพื่อความสบายของจิตใต้สำนึกโตเอง 

1 โครินธ์ 10:26 ย้อนว่า “แผ่นดินโลกเป็นของพระผู้เป็นเจ้า พร้อมทั้งเมิ้ดคู่แนวที่อยู่ในฮั้น.” 

1 โครินธ์ 10:27 คือคั่นผู้ที่บ่เซื่อสิเซิญเจ้าไปกินเลี้ยงกัน แล้วเจ้าคึดอยากไป แนวใดที่เขาวางไว้ฮั้น กะให้กินโลดเด้อ โดยบ่ต้องถามเพื่อความสบายจิตใจ 

1 โครินธ์ 10:28 แต่คั่นมีใผบอกเจ้าว่า “ของกินนี้เขาถวายให้ฮูปเคารพแล้ว” เจ้าอย่ากินเด้อ เพื่อเห็นแก่ผู้ที่บอกมาฮั้น กับเพื่อเห็นแก่ใจสำนึกผิดถืกนำ ย้อนว่า “แผ่นดินโลกเป็นของพระผู้เป็นเจ้า พร้อมทั้งเมิ้ดคู่แนวที่อยู่ในฮั้น.” 

1 โครินธ์ 10:29 ที่ข้อยว่า ใจสำนึกผิดถืกฮั้น ข้อยบ่ได้หมายเถิงของเจ้าดอก แต่หมายเถิงของคนอื่นฮั้น คือเป็นหยังเสรีภาพของข้อยหนิ สิต้องถืกการตัดสิน ย้อนใจสำนึกผิดถืกที่ยังอ่อนของผู้อื่น 

1 โครินธ์ 10:30 คือว่า คั่นข้อยมีเสรีภาพที่สิฮับกินได้โดยการขอบพระคุณแล้ว เป็นหยังข้อยคือสิต้องถืกการติเตียนโจมตีในแนวที่ข้อยได้ขอบพระคุณพระเจ้าแล้วฮั้น 

1 โครินธ์ 10:31 จั่งซั้น บัดเจ้าสิกิน สิดื่ม หรือสิเฮ็ดอีหยังกะตาม ให้เฮ็ดเมิ้ดคู่แนวเพื่อเป็นการถวายพระเกียรติแด่พระเจ้าเด้อ 

1 โครินธ์ 10:32 อย่าเป็นต้นเหตุให้คนอื่นสะดุดล้มลงเด้อ บ่ว่าสิเป็นพวกคนยิวกะดี หรือพวกคนต่างซาติกะดี หรือพี่น้องในกลุ่มผู้เซื่อของพระเจ้ากะอย่า 

1 โครินธ์ 10:33 คือจั่งที่ข้อยพยายามเฮ็ดคู่อย่างเพื่อให้ถืกใจคนทั้งเมิ้ด คือบ่ได้เห็นแก่ผลประโยชน์ส่วนโต แต่เห็นแก่ผลประโยชน์ของคนทั้งหลายฮั้น เพื่อหลังเทื่อเขาอาจสิรอดพ้นได้
////////// ////////// //////////