3 ยอห์น – 3 John บทที่ 1

3 ยอห์น 1:1 จากข้อย ผู้เป็นผู้เบิ่งแยง เรียน มายัง นายกายอัส ผู้เป็นที่ฮักของข้อยในความจริง 

3 ยอห์น 1:2 ผู้ที่ฮักในพระเจ้าเอ้ย ข้อยขอร้องให้เจ้าเจริญในคู่อย่าง กับมีสุขภาพดี คือจั่งที่จิตวิญญาณของเจ้าได้เจริญอยู่ 

3 ยอห์น 1:3 คือ ข้อยชื่นชมยินดีหลาย บัดพวกพี่น้องได้มาเป็นพยาน บอกข้อยเถิงความจริงที่อยู่ในโตเจ้า คือจั่งที่เจ้าดำเนินซีวิตตามความจริงฮั้น

3 ยอห์น 1:4 คือ ข้อยบ่มีความยินดีหลายกว่านี้ ที่ได้ยินว่า ลูกทั้งหลายของข้อยดำเนินอยู่ในความจริง

3 ยอห์น 1:5 เจ้าผู้ที่ฮักเอ้ย อีหยังแหน่ที่เจ้าเฮ็ดเพื่อพี่น้อง กับเพื่อคนแปลกถิ่นนำ จั่งขอให้เจ้าเฮ็ดด้วยความจงรักภักดี

3 ยอห์น 1:6 ซึ่งเขาพวกฮั้นได้เป็นพยาน ต่อหน้ากลุ่มผู้เซื่ออยู่ทางนี้ เถิงความฮักของเจ้าต่อเขา แล้วคั่นเจ้าซ่อยจัดส่งพวกเขาในการเดินทางต่ออีก ตามแบบอย่างอันสมควรต่อพระเจ้า มันกะสิเป็นการดีให้เจ้า

3 ยอห์น 1:7 ย้อนว่า เขาพวกฮั้นได้ออกไป เพื่อพระนามของเพิ่น แต่บ่ได้ฮับการซ่อยเหลือจักแนวจากพวกต่างซาติเลย

3 ยอห์น 1:8 จั่งซั้น เฮาควรต้อนฮับเขา เพื่อพวกเฮาสิได้เป็นผู้ฮ่วมงานในเรื่องความจริง

3 ยอห์น 1:9 แล้วข้อยได้เขียนเถิงกลุ่มผู้เซื่อทางพู่น แต่ นายดิโอเตรเฟส ผู้อยากเป็นใหญ่เป็นโตในหมู่พวกเขา บ่ยอมฮับพวกเฮาไว้ 

3 ยอห์น 1:10 จั่งซั้น คั่นข้อยมา ข้อยสิจดจำการเฮ็ดต่างๆ ของดิโอเตรเฟสไว้ คือแนวที่เขาได้ต่อต้านพวกเฮาด้วยคำกล่าวร้ายป้ายสี กับเขายังบ่พอใจส่ำฮั้น เขากะยังบ่ยอมฮับพี่น้องของพวกเฮา แล้วกะยังกีดกันห้ามไว้ บ่ให้คนที่อยากสิฮับพวกเขา เถิงไล่ออกจากกลุ่มผู้เซื่อเลยซ้ำ

3 ยอห์น 1:11 เจ้าผู้ฮักในพระเจ้าเอ้ย อย่าตามแบบแนวซั่วเด้อ แต่ให้เลียนแบบแนวที่ดี ผู้ที่เฮ็ดดีกะมาจากพระเจ้า ผู้ที่เฮ็ดซั่วกะบ่เคยเห็นพระเจ้า

3 ยอห์น 1:12 ส่วน นายเดเมตริอัสฮั้น ได้ฮับคำพยานดีจากเมิ้ดคู่คน กับความจริงกะเป็นพยานอยู่ในโตของลาวเองอยู่แล้ว แล้วพวกเจ้าฮู้กันว่า คำพยานของพวกเฮาเป็นความจริงนำ

3 ยอห์น 1:13 ข้อยมีหลายเรื่องที่สิเขียน แต่บ่อยากเขียนมายังเจ้าด้วยน้ำหมึกกับปากกา 

3 ยอห์น 1:14 แต่ข้อยหวังว่าสิได้พ้อพวกเจ้าในไวๆ นี้ กับสิได้ซุมกันหน้าต่อหน้า ขอสันติภาพดำรงอยู่นำพวกเจ้า หมู่พวกของเฮาอยู่ทางนี้กะฝากความคึดฮอดมายังเจ้า ซ่อยฝากความคึดฮอดมายังหมู่พวกแหน่ ตามชื่อแต่ละคนเด้อ