2 เปโตร – 2 Peter บทที่ 3

2 เปโตร 3:1 พี่น้องที่ฮักแพงเอ้ย บัดนี้ข้อยเขียนจดหมายฉบับที่สองไปยังพวกเจ้า (ซึ่งในสองฉบับนี้ ข้อยอยากเตือนความจำของใจบริสุทธิ์พวกเจ้าไว้อีก) 

2 เปโตร 3:2 เพื่อพวกเจ้าสิได้จื่อถ้อยคำของพวกผู้เป็นปากเป็นเสียงผู้บริสุทธิ์ กับจื่อคำสั่งของพวกเฮา ผู้เป็นทูตพิเศษขององค์พระผู้เป็นเจ้า พระผู้โปรดฮั่น 

2 เปโตร 3:3 โดยฮู้กันไว้ก่อนว่า ในซ่วงท้ายของยุคนี้ สิมีพวกหัวเราะเยาะเย้ยเกิดขึ้นมา ซึ่งพวกฮั้นดำเนินซีวิตตามราคะตัณหาโตเอง 

2 เปโตร 3:4 เขาเว้าว่า “การเสด็จมาที่เพิ่นสัญญาไว้ฮั้น อยู่ใสเดี๋ยวหนิ คือตั้งแต่พ่อแต่ปู่ได้ล่วงหลับไปแล้ว คู่อย่างกะยังคือเก่า คือตั้งแต่เริ่มแรกสร้างโลกมา” 

2 เปโตร 3:5 คือเขาจงใจลืมความจริงว่า ฟ้าสวรรค์อันเก่าแก่ฮั้น ได้ถืกสร้างขึ้นมาโดยพระคำของพระเจ้า แล้วแผ่นดินได้ขึ้นมาออกจากน้ำ ซึ่งน้ำฮั้นกะล้อมรอบอยู่ 

2 เปโตร 3:6 ซึ่งโลกอยู่สมัยก่อนฮั้น ได้ถืกทำลายให้ฉิบหายไปโดยน้ำท่วม 

2 เปโตร 3:7 แต่ว่า ท้องฟ้าอากาศ กับแผ่นดินโลกฮั้น ซึ่งปัจจุบันนี้ ได้ฮับการเก็บฮักษาไว้ด้วยพระคำอันเดียวกัน สำรองไว้สำหรับการเผาไฟ ในมื้อพิพากษาของคนชั่วฮั่น 

2 เปโตร 3:8 แต่พี่น้องที่ฮักแพงเอ้ย อย่าลืมข้อเดียวนี้เด้อ ว่า สำหรับองค์พระผู้เป็นเจ้าฮั้น มื้อเดียวคือปานหนึ่งพันปี แล้วหนึ่งพันปีคือปานมื้อเดียว 

2 เปโตร 3:9 จั่งซั้น องค์พระผู้เป็นเจ้าบ่ได้ล้าซ้าต่อพระคำสัญญาของเพิ่น ตามที่ผู้ลางคนคึด แต่เพิ่นอดกลั้นใจไว้มาโดนนานแล้ว ย้อนเห็นแก่เฮาทั้งหลาย โดยว่าเพิ่นบ่ประสงค์ให้ผู้หนึ่งผู้ใดพินาศเลย แต่อยากให้คนทั้งปวงกลับใจใหม่ 

2 เปโตร 3:10 แต่ว่า มื้อขององค์พระผู้เป็นเจ้า สิมาเถิงคือจั่งขโมยแอบเข้ามาในยามกลางคืน ซึ่งในมื้อฮั้น ท้องฟ้าสิล่วงไปด้วยเสียงดังกึกก้อง กับธาตุทั้งโลกสิหลอมสลายไปด้วยความฮ้อนขนาดที่สุด แล้วแผ่นดินโลกกับสิ่งสารพัดที่มีอยู่ในโลก สิไหม้ไปเมิ้ด 

2 เปโตร 3:11 จั่งซั้น บัดเห็นว่าสรรพสิ่งทั้งปวงสิต้องสลายไปเมิ้ดแนวนี้ พวกเจ้าควรสิเป็นคนแบบใด ในการใช้ซีวิตทางบริสุทธิ์ กับการถวายเกียรติพระเจ้า

2 เปโตร 3:12 จั่งคอยท่าอยากเห็นมื้อของพระเจ้ามาฮอดไวๆ ซึ่งในมื้อฮั้น ท้องฟ้าอากาศสิละลายไปโดยไฟเผา กับธาตุทั้งโลกสิหลอมสลายไปด้วยความฮ้อน ขนาดที่สุด 

2 เปโตร 3:13 จั่งใดกะตาม พวกเฮาจั่งคอยท่าท้องฟ้าอากาศใหม่ กับแผ่นดินโลกใหม่ ตามที่เพิ่นได้สัญญาไว้ฮั่น ซึ่งในฮั้น สิมีแต่ความซอบธรรมดำรงครองอยู่ 

2 เปโตร 3:14 จั่งซั้น พวกพี่น้องที่ฮักแพงเอ้ย ในขณะพวกเจ้าพวมคอยท่าแนวนี้อยู่ ให้อุตส่าห์เป็นคนมีความสงบสุข บ่มีจุดด่างมลทิน หรือที่ตำหนิหาจับผิดได้เลยเด้อ ตอนเพิ่นมาพ้อมาเห็น

2 เปโตร 3:15 กับให้พิจารณาเด้อ เถิงการอดกลั้นไว้นานขององค์พระผู้เป็นเจ้า ซึ่งเป็นความรอดพ้นเพื่อพวกเฮา คือจั่งที่เปาโล พี่น้องที่ฮักของเฮา ได้เขียนไปยังพวกเจ้านำ ตามสติปัญญาที่พระเจ้าโปรดให้ลาว 

2 เปโตร 3:16 คือกับจดหมายคู่ฉบับของลาว ลาวได้เขียนกล่าวเถิงเหตุการณ์นี้ ซึ่งมีข้อลำลึกบางข้อที่เข้าใจยากแหน่ ซึ่งมีผู้ลางคนที่อ่อนในทางเฮียนฮู้ กับในทางสติปัญญา ได้บิดเบือนความหมายตามใจมัก คือจั่งที่พวกเขาเคยเฮ็ดกับพระคำข้ออื่นๆ จั่งเป็นเหตุให้เขาสิต้องพินาศ 

2 เปโตร 3:17 จั่งซั้น พวกพี่น้องที่ฮักแพงเอ้ย บัดพวกเจ้าได้ฮับฮู้มาก่อนในเรื่องนี้ ให้ระวังให้ดีเด้อ บ่ซั้น หย้านว่าพวกเจ้าอาจสิล้มลง จากความมั่นคงของพวกเจ้า ถืกจูงไปในทางผิดทางเท็จของพวกคนเลวทราม 

2 เปโตร 3:18 แต่ว่า ให้เจริญเติบโตขึ้นในพระกรุณาธิคุณ กับในความรอบรู้เถิงองค์พระผู้เป็นเจ้า กับพระผู้โปรดของพวกเฮา คือองค์พระเยซูคริสต์ ขอให้พระสิริมีแด่เพิ่น ทั้งในปัจจุบัน เถิงตลอดกาลเป็นนิตย์ อาเมน