2 เธสะโลนิกา – 2 Thessalonians บทที่ 3
2 เธสะโลนิกา 3:1 แล้วในที่สุดนี้ พี่น้องทั้งหลายเอ้ย ซ่อยอธิษฐานเผื่อพวกเฮา ว่าพระคำขององค์พระผู้เป็นเจ้าสิได้แผ่ออกไปโดยไวอย่างสะดวก กับสิได้ฮับเกียรติ คือจั่งได้เป็นไปในหมู่พวกเจ้าแล้ว
2 เธสะโลนิกา 3:2 แล้วซ่อยอธิษฐานต่อพระเจ้าเผื่อพวกเฮานำ ให้พ้นจากพวกคนอันธพาลกับคนซั่ว ย้อนว่าบ่แม่นคู่คนที่มีความเซื่อ
2 เธสะโลนิกา 3:3 แต่ว่า องค์พระผู้เป็นเจ้าสัตย์ซื่อ ซึ่งเพิ่นสิตั้งพวกเจ้าให้มั่นคง กับปกป้องพวกเจ้าไว้ให้พ้นจากเจ้ามารซาตาน
2 เธสะโลนิกา 3:4 ซึ่งพวกเฮามีความมั่นใจในองค์พระผู้เป็นเจ้าเถิงพวกเจ้า ว่าพวกเจ้าพวมเฮ็ดตามแนวที่พวกเฮาได้บอกสอนไว้แล้วฮั้น แล้วมั่นใจว่าสิเฮ็ดต่อไปอีก
2 เธสะโลนิกา 3:5 แล้วบัดนี้ ขอองค์พระผู้เป็นเจ้าที่สินำจิตใจของพวกเจ้าในทางความฮักแพงของเพิ่น กับในทางความอดทนพากเพียรของพระเยซูคริสต์นำ
2 เธสะโลนิกา 3:6 แต่ว่า พี่น้องทั้งหลายเอ้ย พวกเฮาขอบอกพวกเจ้าในพระนามของพระเยซูคริสต์เจ้าของคนเฮา ว่า ให้ถอนโตออกจากพี่น้องที่ใซ้ซีวิตในทางบ่แม่น บ่ให้คบกับเขา คือผู้ที่บ่ได้ใซ้ซีวิตตามหลักคำสอนที่เขาได้ฮับไว้จากพวกเฮามาแล้วฮั้น
2 เธสะโลนิกา 3:7 ย้อนว่า พวกเจ้าเองกะฮู้อยู่แล้วว่า ควรสิเฮ็ดตามแบบอย่างของพวกเฮา คือพวกเฮาบ่เคยใซ้ซีวิตตามทางแนวบ่แม่น ตอนอยู่นำพวกเจ้า
2 เธสะโลนิกา 3:8 แล้วพวกเฮาบ่ได้กินข้าวปลาอาหารของผู้ใดอย่างฟรีๆ แต่ได้ออกเฮื่อออกแฮง เฮ็ดเวียกเฮ็ดงานเมิ้ดมื้อเมิ้ดคืน เพื่อสิบ่ได้เป็นภาระต่อผู้ใดผู้หนึ่งในพวกเจ้าเลย
2 เธสะโลนิกา 3:9 บ่แม่นว่าพวกเฮาบ่มีสิทธิ์ที่สิเรียกร้องเอาอีหยัง แต่ว่าพวกเฮาได้เฮ็ดจั่งซี้เพื่อเป็นแบบอย่างให้พวกเจ้าเฮ็ดตามพวกเฮา
2 เธสะโลนิกา 3:10 คือแม้นแต่ตอนพวกเฮาอยู่นำพวกเจ้าฮั้น พวกเฮากะยังบอกสอนพวกเจ้าแนวนี้อยู่แล้ว ว่าคั่นผู้ใดบ่ยอมเฮ็ดเวียกเฮ็ดงาน อย่าสู่ให้เขากินกะแล้วกัน
2 เธสะโลนิกา 3:11 คือพวกเฮาได้ยินมาแล้วว่า มีผู้ลางคนในพวกเจ้าพวมใซ้ซีวิตอย่างคนขี้คร้าน บ่มีระเบียบวินัยในการเฮ็ดเวียกเฮ็ดงานเลย แต่เป็นคนเจ้ากี้เจ้าการ มักไปยุ่งกับธุระของคนอื่นๆ
2 เธสะโลนิกา 3:12 สำหรับคนจั่งซี้ พวกเฮาขอเตือนสติ สั่งไว้โดยองค์พระเยซูคริสต์เจ้าของคนเฮาว่า ให้เขายอมเฮ็ดเวียกเฮ็ดงานด้วยความเงียบสงบ แล้วกินข้าวปลาอาหารของโตเอง
2 เธสะโลนิกา 3:13 แต่สำหรับพวกเจ้า พี่น้องทั้งหลายเอ้ย อย่าสู่เมื่อยล้าในการเฮ็ดดี
2 เธสะโลนิกา 3:14 แล้วคั่นมีผู้ใดบ่ยอมเซื่อฟังถ้อยคำของเฮาในจดหมายนี้ กะให้จดจำผู้ฮั้นไว้ แล้วอย่าคบหากับเขาเลยเด้อ เพื่อเขาสิอับอายฮู้เมื่อโต
2 เธสะโลนิกา 3:15 แต่อย่าถือว่าเขาเป็นศัตรูเลย แต่ให้เตือนสติเขาอย่างเป็นพี่น้องกันเด้อ
2 เธสะโลนิกา 3:16 บัดนี้ ขอให้องค์พระผู้เป็นเจ้าแห่งสันติภาพ โปรดให้พวกเจ้ามีความสงบสุขในเมิ้ดคู่ทางอยู่เสมอ แล้วขอให้องค์พระผู้เป็นเจ้าดำรงอยู่กับพวกเจ้าคู่คนเด้อ
2 เธสะโลนิกา 3:17 ข้อยเปาโลหนิ ได้ลงเขียนคำคำนับนี้ด้วยลายมือของข้อยเอง ซึ่งเป็นเครื่องหมายในจดหมายคู่ฉบับที่บ่งบอกว่าข้อยเป็นผู้เขียน
2 เธสะโลนิกา 3:18 ขอให้พระกรุณาธิคุณขององค์พระเยซูคริสต์เจ้าของคนเฮา ดำรงอยู่กับพวกเจ้าทั้งหลายเทอญ อาเมน