1 เธสะโลนิกา – 1 Thessalonians บทที่ 1

1 เธสะโลนิกา 1:1 จาก เปาโล สิลวานัส กับ ทิโมธี เถิงพี่น้องกลุ่มผู้เซื่อซาวเมืองเธสะโลนิกา ผู้อยู่ในพระเจ้าผู้เป็นพ่อ กับอยู่ในพระเยซูคริสต์ ผู้เป็นนายซีวิต ขอให้พระกรุณาธิคุณกับความสงบสุข ซึ่งจากพระเจ้าผู้เป็นพ่อของพวกเฮา กับจากพระเยซูคริสต์ผู้เป็นนายซีวิต จั่งดำรงอยู่กับพวกเจ้าเด้อ

1 เธสะโลนิกา 1:2 พวกเฮาจั่งขอบคุณพระเจ้าย้อนพวกเจ้าคู่คนอย่างบ่อยู่บ่เซา แล้วกะเอ่ยซื่อพวกเจ้าในคำอธิษฐานต่อพระเจ้าของพวกเฮา

1 เธสะโลนิกา 1:3 จั่งได้คึดพ้อเถิงผลงานของพวกเจ้าอยู่เสมอ ที่พวกเจ้าเฮ็ดด้วยความเซื่อ กับเถิงงานอันเหน็ดเหนื่อย ที่พวกเจ้าเฮ็ดด้วยความฮัก กับเถิงความอดทนพากเพียรที่พวกเจ้ามี ซึ่งด้วยความหวังอันมั่นคงในองค์พระเยซูคริสต์เจ้า ต่อพระเจ้าผู้เป็นพ่อของพวกเฮาทั้งหลาย

1 เธสะโลนิกา 1:4 พี่น้องที่ฮักเอ้ย เฮาฮู้กันว่า พระเจ้าได้เลือกสรรพวกเจ้าออกมาไว้แล้ว

1 เธสะโลนิกา 1:5 คือ ข่าวประเสริฐของเฮาที่นำมาเถิงพวกเจ้าฮั้น บ่แม่นเพียงแต่การเว้าซื่อๆ แต่มาด้วยฤทธิ์อำนาจ กับการสนับสนุนของพระวิญญาณ พร้อมทั้งความมั่นคงอันแน่วแน่ พวกเจ้าจั่งฮู้กันว่า พวกเฮาเป็นคนแบบใดตอนมาอยู่นำ ซึ่งได้มาย้อนเห็นแก่พวกเจ้า

1 เธสะโลนิกา 1:6 แล้วพวกเจ้าจั่งได้เป็นลูกศิษย์ของพวกเฮา ทั้งขององค์พระผู้เป็นเจ้านำ แม้นแต่ตอนได้ฮับเอาพระคำฮั้น กะได้ถืกบีบคั้นด้วยความทุกข์ยากลำบากหลายแนว กะยังฮับเอาด้วยความซื่นซมยินดีในพระวิญญาณ

1 เธสะโลนิกา 1:7 จั่งซั้น พวกเจ้าจั่งเป็นโตอย่างให้กับคู่คนที่เซื่อแล้วทั่วแถว มาซิโดเนีย กับแถว อาคายา นำ

1 เธสะโลนิกา 1:8 คือ พระคำขององค์พระผู้เป็นเจ้าได้เลื่องลือก้องออกจากพวกเจ้าไป บ่ว่าแต่ในแถว มาซิโดเนีย กับแถว อาคายา ท่อฮั้น แต่ว่าการที่พวกเจ้าได้เซื่อในพระเจ้าฮั้น ได้เลื่องลือออกไปเถิงทั่วคู่หม่อง พวกเฮาจั่งบ่จำเป็นสิต้องประกาศอีหยังให้เขาอีกเลย

1 เธสะโลนิกา 1:9 คือ คนพวกฮั้นได้เล่าปันฟังว่า พวกเฮามีผลดีส่ำใดตอนเข้าไปหาพวกเจ้า ที่ว่าพวกเจ้าได้หันหน้าออกจากฮูปเคารพ มาหาพระเจ้า เพื่อปรนนิบัติฮับใซ้เพิ่น พระผู้เที่ยงแท้ผู้เพิ่นดำรงอยู่

1 เธสะโลนิกา 1:10 แล้วจั่งคอยถ้าฮับการเสด็จมาจากสวรรค์ของพระบุตรพระเจ้า ผู้เพิ่นที่พระเจ้าโปรดให้เป็นขึ้นมาจากตาย คือพระเยซูฮั้นเอง ผู้ให้พวกเฮารอดพ้นจากการลงโทษอันใหญ่หลวงที่สิมาฮั้น
////////// ////////// //////////