1 เธสะโลนิกา – 1 Thessalonians บทที่ 4

1 เธสะโลนิกา 4:1 ในสุดท้ายนี้ พี่น้องทั้งหลายเอ้ย พวกเฮาขอหนุนใจพวกเจ้าในพระเยซูเจ้าว่า ให้เติบโตทวีขึ้นอยู่เรื่อยๆ ตามที่พวกเจ้าเคยฮับฮู้จากพวกเฮามาแล้วว่า ควรสิดำเนินซีวิตให้เป็นที่พึงพอใจของพระเจ้า

1 เธสะโลนิกา 4:2 คือพวกเจ้าฮู้จักคำบอกสอน แนวที่พวกเฮาได้มอบไว้ให้กับพวกเจ้ามาแล้ว โดยทางพระเยซูเจ้า 

1 เธสะโลนิกา 4:3 คือ อันนี่เป็นตามพระประสงค์ของพระเจ้า ว่าให้เป็นคนบริสุทธิ์ไว้เฉพาะพระเจ้า สมควรที่สิละเว้นการเล่นซู้ล่วงประเวณี

1 เธสะโลนิกา 4:4 เพื่อให้พวกเจ้าคู่คนฮู้จักฮักษาโตเองไว้ให้บริสุทธิ์ อย่างเป็นที่ถวายเกียรติพระเจ้า

1 เธสะโลนิกา 4:5 บ่แม่นปล่อยให้มั่วสุมรักใคร่ในราคะตัณหา คือจั่งคนต่างซาติที่บ่ฮู้จักพระเจ้า

1 เธสะโลนิกา 4:6 จั่งบ่ให้ผู้ใดเฮ็ดล่วงเกิน เอาเปรียบขี้โกงพี่น้องในเรื่องนี้เลย ย้อนว่าพระผู้เป็นเจ้าเป็นผู้สิแก้แค้น สนองโทษให้คู่คนที่เฮ็ดผิดจั่งซี้ ตามที่พวกเฮาได้บอกไว้เป็นพยานมาก่อนแล้ว

1 เธสะโลนิกา 4:7 ย้อนว่า พระเจ้าบ่ได้เอิ้นได้เซิญพวกเฮามาให้ใซ้ซีวิตในทางสกปรกโสมม แต่ให้ใซ้ในทางบริสุทธิ์ 

1 เธสะโลนิกา 4:8 จั่งซั้น คนใดที่ปฏิเสธดูหมิ่นคำสั่งนี้ บ่ได้ปฏิเสธดูหมิ่นคนซื่อๆ แต่ได้ปฏิเสธดูหมิ่นพระเจ้า ผู้เพิ่นที่โปรดให้พระวิญญาณของเพิ่นไว้กับพวกเฮาแล้ว

1 เธสะโลนิกา 4:9 แต่ส่วนเรื่องการฮักแพงพี่น้องซึ่งกันและกันฮั้น บ่จำเป็นที่สิต้องให้ข้อยเขียนเถิงพวกเจ้าในเรื่องนี้ ย้อนว่าแม่นพระเจ้าเองสอนพวกเจ้าให้ฮักแพงซึ่งกันและกันอยู่แล้ว

1 เธสะโลนิกา 4:10 แท้ที่จริง พวกเจ้ามีความฮักแพงต่อพี่น้องทั่วแถวมาซิโดเนียอยู่แล้ว แต่พี่น้องทั้งหลายเอ้ย พวกเฮาขอร้องต่อพวกเจ้าให้มีการฮักแพงกันเพิ่มขึ้นหลายกว่านี้อีกเด้อ

1 เธสะโลนิกา 4:11 กับให้มีใจปรารถนาใซ้ซีวิตอยู่อย่างสงบสุข ปฏิบัติโตตามธุระของโต เฮ็ดเวียกเฮ็ดงานโดยมือเจ้าของ ตามอย่างที่พวกเฮาได้บอกสอนพวกเจ้ามาแล้ว

1 เธสะโลนิกา 4:12 เพื่อว่าพวกเจ้าสิได้ดำเนินซีวิตอยู่อย่างเหมาะสมต่อคนอยู่ภายนอก เพื่อพวกเจ้าสิบ่ต้องขัดสนอีหยังเลย

1 เธสะโลนิกา 4:13 พี่น้องทั้งหลายเอ้ย ข้อยบ่อยากให้พวกเจ้าขาดความเข้าใจเด้อ เกี่ยวกับพี่น้องที่ล่วงหลับไปในพระเยซูแล้ว เพื่อพวกเจ้าสิบ่ต้องโศกเศร้าเป็นทุกข์คือจั่งคนอื่นๆ ผู้ที่บ่มีความหวัง

1 เธสะโลนิกา 4:14 คือ คั่นเฮาเซื่อกันว่าพระเยซูได้ตายไป แล้วได้เป็นขึ้นมาจากตาย คั่นจั่งซั้น พระเจ้ากะสินำเอาผู้ที่ล่วงหลับไปในพระเยซู ให้มานำเพิ่นตอนเพิ่นสิเสด็จมา

1 เธสะโลนิกา 4:15 คือ พวกเฮาบอกพวกเจ้าตามพระคำของพระผู้เป็นเจ้าว่า ส่วนเฮาผู้ยังมีซีวิตอยู่ในยามที่พระผู้เป็นเจ้าสิเสด็จลงมา สิบ่ได้ถืกฮับขึ้นไปก่อนพี่น้องผู้ที่ล่วงหลับไปแล้วฮั้น

1 เธสะโลนิกา 4:16 โดยว่า พระผู้เป็นเจ้าเองสิเสด็จลงมาจากสวรรค์ โดยเบ็งเสียงฮ้องอันกู่ก้อง ด้วยเสียงเทวทูตองค์ซั้นเอก พร้อมกับเสียงแตรหลวงของพระเจ้า แล้วพี่น้องที่ล่วงหลับไปแล้วอยู่ในพระคริสต์กะสิเป็นขึ้นมาก่อน

1 เธสะโลนิกา 4:17 แล้วส่วนพวกเฮาผู้ยังมีซีวิตอยู่ กะสิถืกฮับขึ้นไปในเมฆนำกันกับพี่น้องผู้ที่ล่วงหลับไปก่อนฮั้น แล้วคนเฮาทั้งสองฝ่ายกะสิพ้อกันกับองค์พระผู้เป็นเจ้าอยู่เทิงท้องฟ้า แล้วพวกเฮาทั้งหลายกะสิอยู่กับองค์พระผู้เป็นเจ้าตลอดกาลเป็นนิตย์

1 เธสะโลนิกา 4:18 จั่งซั้น กะให้พี่น้องปลอบใจซึ่งกันและกันด้วยถ้อยคำแนวหมู่นี้เด้อ
////////// ////////// //////////