1 ยอห์น – 1 John บทที่ 3

1 ยอห์น 3:1 นี่แน่ะ แม่นความฮักแบบใดที่พระเจ้าผู้เป็นพ่อ จั่งโปรดให้พวกเฮา ที่ว่าเฮาได้ชื่อว่า “เป็นลูกๆ ของพระเจ้า” ซึ่งเป็นเหตุที่โลกบ่ฮู้จักพวกเฮา ย้อนว่าโลกบ่ฮู้จักเพิ่น 

1 ยอห์น 3:2 พี่น้องที่ฮักเอ้ย บัดนี้พวกเฮาทั้งหลายเป็นลูกๆ ของพระเจ้าแล้ว แต่มันยังบ่ทันปรากฏซัดเจน ว่าพวกเฮาสิเป็นแบบใด แต่เฮาฮู้อยู่แล้วว่า บัดเพิ่นลงมาปรากฏแล้ว พวกเฮาสิเป็นคือเพิ่น โดยว่า เฮาสิเห็นเพิ่นในสภาพตามที่เพิ่นเป็นอยู่ 

1 ยอห์น 3:3 แล้วคู่คนที่มีความหวังแนวนี้ในเพิ่น ได้ฮักษาโตเองไว้ให้บริสุทธิ์ คือจั่งที่เพิ่นเป็นผู้บริสุทธิ์ฮั้น

1 ยอห์น 3:4 โดยว่า ผู้ใดที่เฮ็ดบาป กะได้ล่วงละเมิดกฎบัญญัติของพระเจ้า คือความผิดบาปฮั้น เป็นการฝ่าฝืนกฎบัญญัติ 

1 ยอห์น 3:5 พวกเจ้ากะฮู้อยู่แล้วว่า พระเยซูได้ลงมาปรากฏในสภาพคน เพื่อนำบาปของคนเฮาทั้งหลายให้ออกไป แต่ว่าบาปในโตเพิ่นเองกะบ่มีเลย 

1 ยอห์น 3:6 ส่วนผู้ใดที่ดำเนินอยู่ในเพิ่น ผู้ฮั้นบ่ได้เฮ็ดบาป แล้วส่วนผู้ที่เฮ็ดบาปฮั้น แสดงว่าบ่เคยเห็นเพิ่น กับบ่ฮู้จักเพิ่นนำ

1 ยอห์น 3:7 ลูกเล็กๆ เอ้ย อย่ายอมให้ใผล่อลวงเจ้าให้หลง ผู้ที่เฮ็ดในทางความดีความชอบกะเป็นผู้ชอบธรรม คือจั่งเพิ่นเป็นผู้ชอบธรรม

1 ยอห์น 3:8 แต่ผู้ที่เฮ็ดบาปกะมาจากพญามาร ย้อนว่าพญามารได้เฮ็ดบาปตั้งแต่ตำอิดมา แม่นย้อนนี้เอง พระบุตรของพระเจ้าได้มาปรากฏ เพื่อทำลายกิจการของพญามาร 

1 ยอห์น 3:9 ผู้ใดเกิดใหม่จากพระเจ้าแล้ว ผู้ฮั้นบ่ได้อยู่ในบาปต่อไป ย้อนพระวิญญาณของเพิ่นดำรงอยู่ในผู้ฮั้น แล้วผู้ฮั้นอยู่ในบาปต่อไปบ่ได้เลย ย้อนเขาเกิดใหม่จากพระเจ้า 

1 ยอห์น 3:10 ในนี้ ผู้เป็นลูกของพระเจ้า กับผู้เป็นลูกของพญามาร ได้ปรากฎออกจากกัน คือผู้ใดที่บ่ได้เฮ็ดแนวเป็นธรรม ผู้ฮั้นบ่ได้มาจากพระเจ้า แล้วผู้ที่บ่ฮักพี่น้องของโตกะคือกัน 

1 ยอห์น 3:11 นี่กะเป็นข้อความที่พวกเจ้าได้ยินมาตั้งแต่ตำอิด ที่ว่า พวกเฮาควรฮักซึ่งกันและกัน

1 ยอห์น 3:12 อย่าเป็นคือท้าวคาอิน ผู้ที่มาจากมารร้ายฮั้น จั่งได้ฆ่าน้องซายของโตเอง แล้วเป็นหยังเขาจั่งฆ่าน้องซาย กะย้อนการเฮ็ดของอ้ายคาอินซั่ว แต่การเฮ็ดของน้องกะเป็นที่ชอบต่อพระเจ้า

1 ยอห์น 3:13 พี่น้องของข้อยเอ้ย อย่าแปลกใจเป็นตางึด คั่นโลกนี้ซังพวกเจ้า 

1 ยอห์น 3:14 พวกเฮาฮู้ว่า เฮาได้พ้นจากความตายไปสู่ซีวิตแล้ว ย้อนว่า เฮาฮักพี่น้อง ผู้ใดที่บ่ฮักพี่น้องของโต ผู้ฮั้นยังดำรงอยู่ในสภาพตาย 

1 ยอห์น 3:15 คือ ผู้ใดที่ซังพี่น้องของโต ผู้ฮั้นคือเป็นฆาตกร แล้วพวกเจ้าฮู้แล้วว่า บ่มีฆาตกรคนใดที่มีซีวิตนิรันดร์ดำรงอยู่ในโตเขาเลย 

1 ยอห์น 3:16 โดยอันนี้ล่ะ เป็นทางที่เฮาฮู้กันเถิงความฮักของพระเจ้าได้ ย้อนว่า เพิ่นได้ยอมวางซีวิตของเพิ่นลงเพื่อพวกเฮา จั่งซั้นพวกเฮาควรสิวางซีวิตของเฮาลงเพื่อพี่น้อง

1 ยอห์น 3:17 แต่คั่นผู้ใดมีทรัพย์สมบัติทางโลกนี้ แล้วเห็นพี่น้องของโตขัดสน แต่ปิดใจไว้บ่ยอมซ่อยเขา ความฮักของพระเจ้าสิดำรงอยู่ในผู้ฮั้นได้จั่งใด 

1 ยอห์น 3:18 ลูกเล็กๆ ทั้งหลายของข้อยเอ้ย อย่าให้พวกเฮาฮักแพงกันด้วยถ้อยคำจากปากซื่อๆ แต่ด้วยการเฮ็ดกับความจริง 

1 ยอห์น 3:19 โดยอันนี้ล่ะ พวกเฮาฮู้ได้ว่า เฮาอยู่ฝ่ายความจริง จั่งมีความมั่นใจแน่วแน่ต่อหน้าเพิ่น 

1 ยอห์น 3:20 ย้อนว่า คั่นใจของเฮากล่าวโทษโตเอง พระเจ้าเป็นใหญ่กว่าใจของเฮา กับเพิ่นฮู้จักเมิ้ดคู่อย่าง 

1 ยอห์น 3:21 พี่น้องที่ฮักเอ้ย คั่นใจของเฮาบ่ได้กล่าวโทษโตเอง เฮามีความมั่นใจต่อหน้าพระเจ้า

1 ยอห์น 3:22 แล้วเฮาสิขอแนวหนึ่งแนวใดกะตาม เฮาสิได้แนวฮั้นจากเพิ่น ย้อนว่า เฮาเบิ่งแยงฮักษาคำสั่งของเพิ่น กับเฮ็ดตามแนวหมู่ฮั้นอันเป็นที่พึงพอใจในสายตาของเพิ่น 

1 ยอห์น 3:23 แล้วนี่กะเป็นคำสั่งของเพิ่น ว่าคนเฮาทั้งหลายควรเซื่อในพระนามของพระเยซูคริสต์ พระบุตรของเพิ่น กับฮักซึ่งกันและกัน ตามที่เพิ่นได้สั่งไว้กับเฮาแล้ว

1 ยอห์น 3:24 บัดนี้ ผู้คนที่ฮักษาคำสั่งของเพิ่น กะดำเนินอยู่ในเพิ่น กับเพิ่นสถิตอยู่ในผู้ฮั้น ด้วยเหตุนี้ล่ะ เฮาจั่งฮู้ว่าเพิ่นได้สถิตอยู่ในเฮา โดยทางพระวิญญาณซึ่งเพิ่นได้ให้กับพวกเฮาอยู่แล้ว
////////// ////////// //////////