1 ยอห์น – 1 John บทที่ 2

1 ยอห์น 2:1 โอ้ ลูกเล็กๆ ของข้อยเอ้ย ข้อยเขียนข้อความแนวหมู่นี้เถิงพวกเจ้า กะเพื่อพวกเจ้าสิบ่ได้เฮ็ดบาป แต่คั่นผู้ใดเฮ็ดบาป พวกเฮาได้มีผู้ซ่อยที่เป็นสื่ออยู่ระหว่างพวกคนเฮากับพระเจ้าผู้เป็นพ่อ คือองค์พระเยซูคริสต์ ผู้ชอบธรรมฮั้นเอง

1 ยอห์น 2:2 แล้วเพิ่นเป็นผู้ระงับความโกรธเกรี้ยวของพระเจ้าย้อนความผิดบาปของพวกเฮาฮั้น กับบ่แม่นแต่บาปของพวกเฮาอย่างเดียว แต่เพื่อบาปของซาวโลกทั้งเมิ้ดพร้อมนำ 

1 ยอห์น 2:3 แล้วเฮามั่นใจในแนวนี้ว่า เฮาฮู้จักนำเพิ่น คั่นเฮาฮักษาคำสั่งของเพิ่น 

1 ยอห์น 2:4 แล้วผู้ใดที่ว่า “ข้อยฮู้จักนำเพิ่น” แต่บ่ได้ฮักษาคำสั่งของเพิ่น ผู้ฮั้นกะเป็นคนตัวะ แล้วความจริงของเพิ่นบ่ได้สถิตอยู่ในโตเขาเลย

1 ยอห์น 2:5 แต่ผู้ใดที่ฮักษาพระคำของเพิ่น ความฮักของพระเจ้าพวมเจริญอยู่ในผู้ฮั้นอีหลีอย่างสมบูรณ์แบบ แล้วด้วยประการนี้ล่ะ พวกเฮาจั่งฮู้ว่าเฮาอยู่ในเพิ่นแล้ว

1 ยอห์น 2:6 แล้วผู้ที่เว้าว่าโตเองได้สถิตอยู่ในเพิ่น ผู้ฮั้นควรดำเนินตามแนวทางคือจั่งที่พระองค์ดำเนินอยู่ฮั้น

1 ยอห์น 2:7 พี่น้องทั้งหลายเอ้ย ข้อยบ่ได้เขียนคำสั่งใหม่เถิงพวกเจ้าดอก แต่เป็นคำสั่งเก่า ซึ่งพวกเจ้าได้มีอยู่ตั้งแต่ตำอิดแล้ว คือคำสั่งเก่าฮั้นกะเป็นถ้อยคำซึ่งพวกเจ้าได้ยินตั้งแต่ตำอิดมา

1 ยอห์น 2:8 อีกเทื่อหนึ่ง ข้อยเขียนคำสั่งใหม่มายังพวกเจ้า ซึ่งแนวนี้เป็นความจริง ทั้งในเพิ่นกับในพวกเจ้านำ โดยว่า ความมืดฮั้นพวมสิล่วงไปแล้ว กับความสว่างอันแท้จริงพวมส่องแสงอยู่แล้ว

1 ยอห์น 2:9 ผู้ใดที่เว้าว่าโตเองดำเนินอยู่ในความสว่าง แต่ยังซังพี่น้องของเขา ผู้ฮั้นกะยังอยู่ในความมืดจนฮอดบัดนี้

1 ยอห์น 2:10 แต่ผู้ที่ฮักพี่น้องของโตเองได้ดำเนินอยู่ในความสว่างแล้ว แล้วบ่มีเหตุให้สะดุดในผู้ฮั้นเลย

1 ยอห์น 2:11 แต่ผู้ที่ซังพี่น้องของโตเอง ผู้ฮั้นกะยังอยู่ในความมืด แล้วกะยังดำเนินซีวิตอยู่ในความมืด โดยบ่ฮู้ว่าโตเองพวมสิไปทางใด ย้อนว่าความมืดฮั้นได้เฮ็ดให้ตาของเขาบอดไปแล้ว 

1 ยอห์น 2:12 ลูกเล็กๆ เอ้ย ข้อยเขียนจดหมายมายังพวกเจ้า ย้อนว่าบาปของเจ้าได้ฮับการอภัยแล้ว ย้อนเห็นแก่พระนามของเพิ่น

1 ยอห์น 2:13 พวกผู้เป็นพ่อเอ้ย ข้อยเขียนจดหมายมายังพวกเจ้า ย้อนพวกเจ้าได้ฮู้จักองค์ผู้ฮั้นมาแล้ว คือผู้เพิ่นดำรงอยู่ตั้งแต่ตำอิดมา พวกหนุ่มๆ เอ้ย ข้อยเขียนจดหมายมายังพวกเจ้า ย้อนพวกเจ้ามีซัยต่อเจ้ามารร้ายฮั้นแล้ว ลูกเล็กๆ เอ้ย ข้อยเขียนจดหมายมายังพวกเจ้า ย้อนพวกเจ้าได้ฮู้จักพระเจ้าผู้เป็นพ่อมาแล้ว 

1 ยอห์น 2:14 ส่วนพวกเจ้าผู้เป็นพ่อฮั้น ข้อยได้เขียนจดหมายมายังพวกเจ้าย้อนพวกเจ้าได้ฮู้จักกันกับองค์ผู้ฮั้นแล้ว ผู้เพิ่นที่ดำรงอยู่ตั้งแต่ตำอิดมา ส่วนพวกเจ้าผู้เป็นหนุ่มฮั้น ข้อยเขียนจดหมายมายังพวกเจ้า ย้อนพวกเจ้าแขงแฮงดี กับพระคำของพระเจ้าดำรงอยู่ในพวกเจ้า แล้วพวกเจ้าได้มีชัยต่อเจ้ามารร้ายนำ

1 ยอห์น 2:15 อย่าฮักโลกกับแนวที่อยู่ในโลกเด้อ คั่นผู้ใดฮักโลก ความฮักของพระเจ้าผู้เป็นพ่อบ่ได้สถิตอยู่ในผู้ฮั้นเลย

1 ยอห์น 2:16 ย้อนว่า เมิ้ดคู่อันคู่แนวที่อยู่ในโลกนี้ คือตัณหาทางเนื้อหนัง ตัณหาทางตา กับความเย่อหยิ่งจองหองทางซีวิต บ่ได้มาจากพระเจ้าผู้เป็นพ่อ แต่เป็นของฝ่ายโลกีย์วิสัยนี้ 

1 ยอห์น 2:17 แล้วโลกนี้พวมผ่านพ้นล่วงไป พร้อมทั้งแนวของมันที่ยั่วยวนล่อใจฮั้น แต่ผู้ที่เฮ็ดตามพระประสงค์ของพระเจ้า กะดำรงอยู่ตลอดเป็นนิตย์

1 ยอห์น 2:18 ลูกเล็กๆ ทั้งหลายเอ้ย นี้กะเป็นวาระสุดท้าย แล้วตามที่พวกเจ้าเคยได้ยินมา ผู้ปฏิปักษ์ต่อพระคริสต์ผู้ฮั้นพวมสิมา แล้วแม้นแต่บัดนี้ กะยังมีพวกปฏิปักษ์ต่อพระคริสต์หลายที่มาแล้ว จั่งซั้น เฮาจั่งฮู้กันว่า ยามนี้เป็นวาระสุดท้ายแล้ว

1 ยอห์น 2:19 แล้วพวกเขาฮั้น ได้ออกจากพวกเฮาไป ซึ่งเขาบ่แม่นพวกเฮาอยู่แล้ว ย้อนว่าคั่นเขาเป็นพวกของเฮา เขาสิอยู่กับพวกเฮาต่อไป แต่พวกเขาได้ออกไปแล้ว กะเพื่อสิเห็นได้ซัดว่า พวกเขาแม้นแต่คนเดียวกะบ่แม่นพวกของเฮาดอก

1 ยอห์น 2:20 แต่พวกเจ้าได้ฮับการเจิมจากผู้บริสุทธิ์ผู้ฮั้นมาแล้ว พวกเจ้าจั่งฮู้คู่อย่าง

1 ยอห์น 2:21 ข้อยบ่ได้เขียนมายังพวกเจ้า ย้อนพวกเจ้าบ่ทันฮู้ความจริง แต่ย้อนว่าพวกเจ้าฮู้อยู่แล้ว กับฮู้กันว่าแนวตัวะบ่ได้มาจากความจริงเลย

1 ยอห์น 2:22 แม่นใผเป็นผู้ตัวะนอกจากผู้ที่ปฏิเสธว่า พระเยซูบ่แม่นพระคริสต์ฮั้น แล้วผู้ฮั้นเป็นฝ่ายปฏิปักษ์ที่ปฏิเสธพระเจ้าผู้เป็นพ่อ พร้อมทั้งปฏิเสธพระบุตรนำ 

1 ยอห์น 2:23 ผู้ใดที่ปฏิเสธพระบุตร ผู้ฮั้นกะบ่มีพระเจ้าผู้เป็นพ่อด้วยซ้ำ แต่ผู้ใดที่ฮับพระบุตร ผู้ฮั้นกะมีพระเจ้าผู้เป็นพ่อพร้อมนำ

1 ยอห์น 2:24 จั่งซั้น ให้ข้อความที่เจ้าได้ยินมาตั้งแต่ตำอิดฮั้น ดำรงอยู่ในเจ้าเด้อ คือคั่นข้อความที่เจ้าได้ยินมาตั้งแต่ตำอิด ดำรงอยู่กับเจ้าแล้ว เจ้ากะสิมั่นคงอยู่ในพระบุตร พร้อมกับอยู่ในพระเจ้าผู้เป็นพ่อนำ

1 ยอห์น 2:25 นี่ล่ะเป็นคำมั่นสัญญาที่เพิ่นได้สัญญาว่าสิให้เฮา คือซีวิตนิรันดร์

1 ยอห์น 2:26 ข้อยเขียนข้อความนี้มายังเจ้า เกี่ยวกับคนพวกฮั้นที่พยายามล่อลวงพวกเจ้า

1 ยอห์น 2:27 แต่การเจิมที่พวกเจ้าได้ฮับจากเพิ่นฮั้น ได้ดำรงอยู่ในพวกเจ้า พวกเจ้าจั่งบ่จำเป็นสิต้องให้มีใผสอนพวกเจ้า ย้อนว่าการเจิมฮั้นได้สอนเจ้าเถิงเมิ้ดคู่อย่าง เป็นความจริง บ่แม่นความเท็จ แล้วที่การเจิมฮั้นได้สอนพวกเจ้ามาแล้วจั่งใด เจ้ากะมั่นคงอยู่ในเพิ่นจั่งซั้น 

1 ยอห์น 2:28 แต่บัดนี้ ลูกเล็กๆทั้งหลายเอ้ย ให้ดำรงอยู่ในเพิ่น เพื่อบัดเพิ่นมาปรากฎ พวกเฮาสิได้มีใจมั่นคง จั่งบ่มีความละอายต่อหน้าเพิ่นบัดเพิ่นมา

1 ยอห์น 2:29 คั่นพวกเจ้าฮู้ว่า เพิ่นเป็นผู้ชอบธรรม พวกเจ้ากะได้ฮู้ว่า คู่คนที่ปฏิบัติตามความชอบธรรมฮั้น แม่นผู้ที่เกิดจากเพิ่นแล้ว
////////// ////////// //////////