1 ยอห์น – 1 John บทที่ 1

1 ยอห์น 1:1 ผู้ฮั้นที่เป็นอยู่ตั้งแต่ตำอิดมา ซึ่งพวกเฮาเคยได้ยิน เคยได้เห็นกับตาโตเอง เคยได้พิจารณาเบิ่ง กับเคยได้จับได้บายด้วยมือของโตเอง แม่นองค์พระคำแห่งซีวิตฮั่นเอง

1 ยอห์น 1:2 แล้วองค์ซีวิตฮั้น ได้ปรากฏอยู่แล้ว เฮาจั่งได้เห็น เลยได้เป็นพยาน กับได้ประกาศเถิงซีวิตนิรันดร์ฮั้นให้พวกเจ้าฟัง ซึ่งเพิ่นได้ดำรงอยู่กับพระเจ้าผู้เป็นพ่อ กับได้ปรากฏต่อพวก เฮาทั้งหลายนำ 

1 ยอห์น 1:3 ซึ่งเฮาเคยได้เห็น กับเคยได้ยินฮั้น พวกเฮาจั่งประกาศให้พวกเจ้าฟัง เพื่อพวกเจ้าสิได้ฮ่วมสามัคคีธรรมกับพวกเฮา แท้จริงแล้วพวกเฮามีความสามัคคีธรรมกับพระเจ้าผู้เป็นพ่อ แล้วกับพระเยซูคริสต์ ผู้เป็นพระบุตรของเพิ่นนำ

1 ยอห์น 1:4 แล้วเฮาจั่งลงมือเขียนข้อความแนวหมู่นี้เถิงพวกเจ้า เพื่อว่า ความยินดีของเจ้าสิได้เต็มเปี่ยม

1 ยอห์น 1:5 แล้วข้อความนี่เป็นข้อความที่เฮาได้ยินจากเพิ่น กับประกาศแก่พวกเจ้า คือว่าพระเจ้าเป็นความสว่าง กับบ่มีความมืดอยู่ในเพิ่นเลย

1 ยอห์น 1:6 คั่นเฮาฮับปากว่า เฮาฮ่วมสามัคคีธรรมกับเพิ่น แล้วยังดำเนินซีวิตอยู่ในความมืด เฮากะตัวะโตเอง กับบ่ได้ปฏิบัติใตอยู่ในความจริงเลย

1 ยอห์น 1:7 แต่คั่นเฮาดำเนินซีวิตอยู่ในความสว่าง คือจั่งเพิ่นสถิตในความสว่างฮั้น เฮากะฮ่วม สามัคคีธรรมซึ่งกันและกัน แล้วพระโลหิตของพระเยซูคริสต์ พระบุตรของพระเจ้า ได้ซำระล้างเฮาจากบาปเมิ้ดทั้งปวง

1 ยอห์น 1:8 แต่ว่า คั่นเฮาสิว่าเฮาบ่มีบาป เฮากะหลอกโตเองซื่อๆ แล้วความจริงของเพิ่นบ่ได้อยู่ในโตเฮาเลย 

1 ยอห์น 1:9 คั่นเฮายอมฮับเห็นนำในการสารภาพบาปของเฮา เพิ่นสัตย์ซื่อกับเที่ยงธรรมที่สิโปรดให้อภัยบาปของเฮา กับซำระล้างเฮาจากแนวบ่เป็นธรรมทั้งเมิ้ด

1 ยอห์น 1:10 แต่ คั่นเฮาปฏิเสธว่าเฮาบ่ได้เฮ็ดบาป ท่อกับเฮาหาว่าพระเจ้าตัวะ แล้วพระคำของเพิ่นบ่ได้สถิตอยู่ในโตเฮาเลย
////////// ////////// //////////