1 ทิโมธี – 1 Timothy บทที่ 5

1 ทิโมธี 5:1 อย่าสู่ติเตียนพ่อเฒ่า แต่ให้หนุนใจแนะนำเขาส่ำเป็นพ่อเด้อ แล้วให้เฮ็ดนำผู้ซายที่อายุน้อยกว่า ส่ำเป็นอ้ายเป็นน้องกัน

1 ทิโมธี 5:2 แล้วส่วนพวกแม่เฒ่า กะให้เฮ็ดนำส่ำเป็นแม่ กับเฮ็ดนำพวกญิงสาวโดยใจบริสุทธิ์ ส่ำเป็นน้องๆ

1 ทิโมธี 5:3 แล้วฝ่ายแม่ม่ายฮั้น กะให้เกียรติเขา คือผู้ที่เป็นแม่ม่ายที่ขัดสนอีหลี

1 ทิโมธี 5:4 แต่สำหรับแม่ม่ายผู้ที่มีลูกมีหลาน กะให้ลูกหลานฮั่นเฮียนฝึกในการเฮ็ดคุณงามความดีในครัวเฮือนเจ้าของก่อน คือให้เขาเลี้ยงเบิ่งแม่ ซึ่งเป็นการให้เกียรติตอบสนองบุญคุณพ่อแม่โตเอง การเฮ็ดจั่งซี้กะเป็นการดี กับเป็นที่ยอมฮับต่อหน้าพระเจ้า

1 ทิโมธี 5:5 ส่วนผู้ที่เป็นแม่ม่ายอีหลีฮั้น ถืกปะไว้อยู่แต่ผู้เดียว มีแต่เพิ่งหวังในพระเจ้า อธิษฐานวอนขอต่อเพิ่นทั้งกลางเว็นกับกลางคืน กะให้ซ่อยเขา

1 ทิโมธี 5:6 แต่ว่าสำหรับแม่ม่ายผู้ที่มักหาอยู่ในความสนุกสนานทางฝ่ายโลก ผู้ฮั้นกะอยู่ในสภาพตายไปแล้วทั้งๆ ที่ยังมีซีวิตอยู่

1 ทิโมธี 5:7 ข้อความแนวหมู่นี้ให้สั่งสอนบอกกันไว้เด้อ เพื่อพวกเขาสิบ่มีที่ติว่ากล่าวได้

1 ทิโมธี 5:8 แต่คั่นแม่นว่าผู้ใดบ่เลี้ยงเบิ่งญาติพี่น้อง โดยเฉพาะคนในครัวเฮือนเจ้าของเอง ผู้ฮั้นกะได้ปฏิเสธหลักความเซื่อไปแล้ว แล้วเขากะแฮงซั่วหลายกว่าคนที่ยังบ่ทันได้ฮับเซื่ออีกซ้ำ

1 ทิโมธี 5:9 ส่วนรายซื่อแม่ม่ายฮั่น ให้ฮับไว้แต่ผู้ที่มีอายุบ่ต่ำกว่าหกสิบปี ที่เคยเป็นเมียของผัวผู้เดียวท่อฮั้น

1 ทิโมธี 5:10 แล้วคั่นว่าแม่ม่ายฮั้นเป็นผู้มีซื่อเสียงดี คือคั่นเคยเฮ็ดความดีหลายแนว เคยเลี้ยงลูกเลี้ยงเต้า เคยต้อนฮับแขกดี เคยฮับใซ้พี่น้องคนของพระเจ้า เคยบรรเทาทุกข์ซ่อยคนตกทุกข์ได้ยาก กับเคยปฏิบัติติดตามคุณงามความดีคู่แนว กะให้ซ่อยเขา

1 ทิโมธี 5:11 แต่ว่าอย่าฮับแม่ม่ายที่มีอายุน้อยกว่าเด้อ คือบัดยามเขาเกิดห่างๆ จากพระคริสต์ เขากะสิคึดอยากแต่งงานเอาผัวอีก 

1 ทิโมธี 5:12 แล้วเขากะสิถืกว่ากล่าวหาใส่ ย้อนเขาได้เสียสัตย์ต่อความเซื่อถืออันตำอิดของเขา

1 ทิโมธี 5:13 นอกจากฮั้นเขามักสิขี้คร้าน เที่ยวเล่นแต่เฮือนฮั้นเฮือนนี้ แล้วบ่ว่าแต่ขี้คร้าน เขากะมักปากบอนนำ ยุ่งแต่เรื่องของผู้อื่น เว้าพื้นเว้าขวัญแนวที่เขาบ่ควรเว้า

1 ทิโมธี 5:14 จั่งซั้น ข้อยจั่งแนะนำอยากให้พวกแม่ม่ายที่มีอายุน้อยกว่า แต่งเอาผัวใหม่ซะ จั่งมีลูกมีเต้า เบิ่งแยงครัวเฮือนโตเอง เพื่อสิบ่เปิดโอกาสให้ฝ่ายศัตรูมีแนวเว้าขวัญนินทาได้

1 ทิโมธี 5:15 คือมีผู้ลางคนได้หันไปติดตามเจ้ามารซาตานไปแล้ว

1 ทิโมธี 5:16 คั่นผู้เซื่อคนใด บ่ว่าเป็นญิงหรือซาย ที่มีแม่เป็นม่าย กะให้เขาซ่อยบรรเทาภาระแม่ของเขา อย่าให้เป็นภาระของกลุ่มผู้เซื่อเด้อ เพื่อสิได้ปล่อยกลุ่มผู้เซื่อให้ซ่อยบรรเทาภาระแม่ม่ายที่ขัดสนอีหลี

1 ทิโมธี 5:17 แล้วส่วนผู้หลักผู้ใหญ่ที่เบิ่งแยงกลุ่มผู้เซื่อได้ดี ให้ถือว่าผู้ฮั้นสมควรสิได้ฮับเกียรติเป็นสองเท่า โดยเฉพาะผู้ที่ทุ่มเทในพระคำ กับในการบอกสอน

1 ทิโมธี 5:18 คือตามที่มีพระคำกล่าวไว้ว่า “อย่าครอบปากงัวที่ย่ำนวดข้าวในลานให้เจ้าของ” กับว่า “คนงานกะสมควรสิได้ฮับค่าจ้างของโตเอง”

1 ทิโมธี 5:19 แล้วอย่าฟ้าวเซื่อคำกล่าวหาต่อผู้หลักผู้ใหญ่ผู้ใดเลย นอกจากว่าสิมีหลักฐานพยานจากสองสามคนที่รับรอง 

1 ทิโมธี 5:20 ส่วนผู้ที่เฮ็ดผิดบาปแล้วฮั้น กะให้ว่ากล่าวเขาต่อหน้าคนทั้งกลุ่ม เพื่อเป็นโตอย่างให้คนอื่นๆ มีความยำเกรง

1 ทิโมธี 5:21 ข้อยขอสั่งเจ้าไว้ต่อพระเจ้า กับต่อพระเยซูคริสต์ กับต่อหมู่เทวทูตที่ได้เลือกสรรไว้ฮั่น ว่าให้เจ้าปรนนิบัติฮักษาข้อความแนวหมู่นี้ไว้ให้ดีเด้อ โดยบ่มีการเข้าข้างผู้ใด หรือเฮ็ดอีหยังด้วยการลำเอียงเลย

1 ทิโมธี 5:22 แล้วอย่าฟ้าววางมือเพื่อแต่งตั้งผู้ใดเลย กะเพื่อบ่มีหุ้นส่วนในความผิดบาปของผู้อื่น จั่งฮักษาโตเองไว้ให้บริสุทธิ์เด้อ

1 ทิโมธี 5:23 แล้วเจ้าอย่าสู่กินแต่น้ำเปล่าอีกต่อไป แต่ให้ใซ้น้ำองุ่นดองจักน้อยพอเป็นยาฮักษากระเพาะของเจ้า กับโรคประจำโตของเจ้านำเด้อ

1 ทิโมธี 5:24 ส่วนความผิดบาปของผู้ลางคนมักสิปรากฏก่อนอย่างซัดแจ้ง นำหน้าเข้าสู่การตัดสิน แต่ส่วนผู้ลางคน บาปของเขาสิปรากฏตามหลัง

1 ทิโมธี 5:25 ในทำนองเดียวกัน ความดีของผู้ลางคนมักสิปรากฏก่อนอย่างซัดแจ้ง แต่ส่วนอีกผู้ลางคน ความดีของเขาสิปรากฏตามหลัง ปิดบังไว้บ่ได้
////////// ////////// //////////