1 ทิโมธี – 1 Timothy บทที่ 1

1 ทิโมธี 1:1 จาก เปาโล ทูตพิเศษของพระเยซูคริสต์ ผู้ที่ให้ความรอดพ้นให้คนเฮาตามพระประสงค์ของพระเจ้า กับพระเยซูคริสต์ ผู้เป็นความหวังอันมั่นคงของคนเฮานำ

1 ทิโมธี 1:2 เถิง ทิโมธี ลูกข้อยเองทางความเซื่อ ขอพระกรุณาธิคุณ ความเมตตา กับความสงบสุข จากพระเจ้าผู้เป็นพ่อ กับจากพระเยซูคริสต์เจ้าของคนเฮา ดำรงอยู่กับเจ้าเด้อ

1 ทิโมธี 1:3 คือตามที่ข้อยได้สั่งการไว้ให้เจ้าตอนข้อยไปเขตมาซิโดเนียฮั่น ให้เจ้าอยู่เมืองเอเฟซัสไว้ก่อนเด้อ เพื่อเจ้าสิได้สั่งห้ามผู้ลางคนอยู่ฮั่น บ่ให้เขาสอนเรื่องความเซื่อแนวอื่นๆ อีกต่อไป

1 ทิโมธี 1:4 กับบ่ให้เขาสนใจในเรื่องนิยายต่างๆ กับเรื่องรายซื่อวงศ์ตระกูลยาวๆ อันบ่ฮู้จักจบ ซึ่งแนวหมู่นี้ให้เกิดการโต้เถียงกัน แทนที่สิส่งเสริมความเซื่อของพี่น้อง อันเป็นที่ถวายเกียรติพระเจ้า 

1 ทิโมธี 1:5 คือจุดเป้าหมายของกฎบัญญัติของพระเจ้ากะคือ ให้มีความฮักจากใจบริสุทธิ์ มีจิตใต้สำนึกผิดซอบผ่องใสดี กับมีความเซื่ออย่างน้ำใสใจจริง

1 ทิโมธี 1:6 ซึ่งผู้ลางคนได้หลงทางไปแล้ว หันออกไป เว้าแต่แนวมันบ่แม่น

1 ทิโมธี 1:7 คือในขณะที่พวกเขาอยากเป็นครูสอนกฎบัญญัติ เขากะยังฮู้เท่าบ่เถิงการณ์ ในแนวที่เขายืนยันไว้ฮั่น

1 ทิโมธี 1:8 แต่พวกเฮาฮู้อยู่ว่า กฎบัญญัติฮั่นกะดีเมิ้ดคู่ข้อ คั่นสิฮู้จักการใซ้ให้ถืกต้อง

1 ทิโมธี 1:9 โดยฮู้กันแล้วว่า กฎบัญญัติฮั่นบ่มีไว้สำหรับคนซอบธรรมดีพร้อม แต่มีไว้สำหรับคนนอกกฎเกณฑ์ คนดื้อด้านบ่ยอมเซื่อฟัง คนหมิ่นประมาทพระเจ้า คนขี้บาป คนบ่บริสุทธิ์ คนหยาบคาย คนฆ่าพ่อฆ่าแม่ คนฆ่าเพื่อนมนุษย์

1 ทิโมธี 1:10 แล้วสำหรับคนเลวทรามที่ค้าประเวณี คนที่สมสู่ร่วมเพศเดียวกัน คนผู้ร้ายลักคน คนค้าขายทาส คนขี้ตัวะ คนให้คำพยานเท็จ กับพวกคนอื่นๆ ที่ขัดกันกับหลักความเซื่อที่ถืกต้อง

1 ทิโมธี 1:11 อันนี้กะเป็นตามข่าวประเสริฐอันประกอบด้วยสง่าราศีของพระเจ้าผู้มีเกียรติ ที่ได้มอบ หมายไว้กับข้อยหนิ

1 ทิโมธี 1:12 แล้วข้อยขอบคุณพระเยซูคริสต์เจ้า นายซีวิตของพวกเฮา ผู้เพิ่นที่ให้กำลังข้อย โดยว่าเพิ่นถือว่าข้อยเป็นคนสัตย์ซื่อภักดี จั่งได้ตั้งข้อยไว้ให้เป็นผู้ฮับใซ้ของเพิ่น

1 ทิโมธี 1:13 แม้นแต่ข้อยเคยเป็นคนหมิ่นประมาท คนข่มเหงทำลาย คนผยองอวดดี แต่ข้อยได้ฮับความเมตตาปราณีจากพระเจ้า ย้อนว่าข้อยได้เฮ็ดอย่างโง่ๆ บ่มีความเซื่อ

1 ทิโมธี 1:14 แต่พระผู้เป็นเจ้าของพวกเฮาได้แสดงพระกรุณาธิคุณอย่างเหลือล้นให้กับโตข้อย พร้อมทั้งความเซื่อกับความฮักที่มีอยู่ในองค์พระเยซูคริสต์

1 ทิโมธี 1:15 ถ้อยคำนี้กะเป็นคำสัตย์จริง แล้วกะเป็นที่สมควรยอมฮับไว้ ว่าพระเยซูคริสต์ได้เสด็จเข้ามาในโลกเพื่อสิโปรดเมตตาคนบาปให้รอดพ้น ซึ่งข้อยหนิเป็นบาปโตเอก 

1 ทิโมธี 1:16 จั่งใดกะตาม ย้อนเหตุนี้ล่ะ ข้อยได้ฮับความเมตตา เพื่อว่าพระเยซูคริสต์สิได้แสดงความอดทนพากเพียรคู่อย่างของเพิ่นไว้ในโตข้อยก่อน เพื่อเป็นแบบอย่างต่อคนทั้งหลาย ที่สิฮับเซื่อในเพิ่นทีหลัง จั่งได้ซีวิตนิรันดร์

1 ทิโมธี 1:17 บัดนี้ ขอพระเกียรติกับศักดิ์ศรีจงมีแด่พระมหากษัตริย์ ผู้ดำรงอยู่ตลอดกาลเป็นนิตย์ซึ่งบ่ฮู้จักตาย ผู้ที่ตาบ่เห็น ผู้เป็นพระเจ้าที่มีพระปัญญาแต่องค์เดียว มีบารมี มีพระสิริ สืบๆ ไปตลอดซั่วนิรันดร์กาล อาเมน

1 ทิโมธี 1:18 ทิโมธีลูกเอ้ย คำสั่งนี้ข้อยมอบไว้ให้กับเจ้าตามคำทำนายที่มีไว้ก่อนมาเถิงเจ้า เพื่อเจ้าสิได้เฮ็ดสงครามฝ่ายวิญญาณได้ดี ตามคำทำนายฮั้น

1 ทิโมธี 1:19 ด้วยความเซื่อ ด้วยจิตใต้สำนึกผิดซอบอันผ่องใสดี ซึ่งผู้ลางคนได้ปลดถิ้ม แล้วในที่สุดความเซื่อของเขาจั่งพังทลายปานเฮือแตกจมลง 

1 ทิโมธี 1:20 ซึ่งในพวกนี้กะมี ฮีเมเนอัส กับ อเล็กซานเดอร์ ที่ข้อยได้มอบไว้กับเจ้ามารซาตานแล้ว เพื่อสิเป็นบทเรียนบ่ให้เขาหมิ่นประมาททำลายต่อไปอีก
////////// ////////// //////////