วิวรณ์ – Revelation บทที่ 8

วิวรณ์ 8:1 แล้วบัดแกะน้อยได้แกะตราดวงที่เจ็ดออกแล้ว ได้มีความเงียบสงบปกคลุมสวรรค์ไว้ อยู่ประมาณครึ่งซั่วโมง

วิวรณ์ 8:2 แล้วผู้ข้าได้เห็นเทวทูตทั้งเจ็ดองค์ฮั้น ที่ยืนอยู่ต่อหน้าพระเจ้า พวกเขาได้ฮับมอบแตรเจ็ดคัน

วิวรณ์ 8:3 แล้วมีเทวทูตอีกองค์หนึ่งที่ถือกระถางไฟทองคำ ได้ออกมายืนอยู่ที่แท่นบูซา แล้วองค์ฮั้นได้ฮับมอบเครื่องหอมเป็นอันหลาย เพื่อให้ถวาย พร้อมทั้งคำอธิษฐานจากคนของพระเจ้าทั้งปวง อยู่เทิงแท่นบูซาทองคำอยู่ต่อหน้าพระที่นั่งฮั้น

วิวรณ์ 8:4 แล้วควันของเครื่องหอมฮั้น พร้อมทั้งคำอธิษฐานจากคนของพระเจ้า ได้ลอยขึ้นไปอยู่ต่อหน้าพระเจ้า จากมือของเทวทูตฮั้น 

วิวรณ์ 8:5 แล้วเทวทูตองค์ฮั้นได้เอากระถาง ใส่ไฟให้เต็มจากแท่นบูซา แล้วจั่งขว้างลงใส่แผ่นดินโลก แล้วมีเสียงต่างๆ ออกมา มีฟ้าฮ้อง ฟ้าผ่า กับแผ่นดินไหว 

วิวรณ์ 8:6 แล้วเทวทูตเจ็ดองค์ที่ถือแตรทั้งเจ็ดฮั้น ต่างกะเตรียมพร้อมที่สิเป่าแตรนำ

วิวรณ์ 8:7 บัดเทวทูตองค์แรกฮั้น ได้เป่าแตรขึ้นมา มีลูกเห็บกับไฟปนกันกับเลือด กะถืกขว้างลงใส่แผ่นดิน กกไม้หนึ่งในสามถืกไฟไหม้ไป กับหญ้าเขียวสดกะถืกไฟไหม้ไปเมิ้ด 

วิวรณ์ 8:8 บัดเทวทูตองค์ที่สองเป่าแตรขึ้นมา ได้มีแนวหนึ่งคือปานภูเขาไฟใหญ่พวมไหม้อยู่ ได้ถืกขว้างลงไปในทะเล แล้วน้ำทะเลหนึ่งในสามส่วนได้กลายเป็นเลือด

วิวรณ์ 8:9 แล้วแนวมีซีวิตอยู่ในทะเลฮั้นกะตายไปหนึ่งในสามส่วน กับเฮือกะถืกพังทำลายไปหนึ่งในสามส่วนนำ

วิวรณ์ 8:10 แล้วบัดเทวทูตองค์ที่สามฮั้นได้เป่าแตรขึ้นมา กะมีดาวขนาดใหญ่ดวงหนึ่ง เป็นแปวไฟลุกโพลงคือปานโคมไฟ ได้ตกลงมาจากท้องฟ้า อยู่เทิงแม่น้ำหนึ่งในสามส่วน กับอยู่เทิงแหล่งน้ำพุนำ 

วิวรณ์ 8:11 แล้วดาวดวงฮั้นมีซื่อว่า บอระเพ็ด แล้วรสซาดของน้ำ หนึ่งในสามส่วนฮั้น มีรสซาดขมฝาด แล้วมีคนหลวงหลายได้ตายด้วยน้ำฮั้น ย้อนกลายเป็นน้ำขมฝาด

วิวรณ์ 8:12 แล้วบัดเทวทูตองค์ที่สี่ฮั้นได้เป่าแตรขึ้นมา ดวงตะเว็นได้ถืกฟาดตีให้มืดไปหนึ่งในสามส่วน พร้อมทั้งดวงเดือน กับดวงดาวทั้งหลายนำ จั่งมืดไปหนึ่งในสามส่วน กลางเว็นกะบ่แจ้งหนึ่งในสามส่วน แล้วกลางคืนกะคือกัน 

วิวรณ์ 8:13 แล้วผู้ข้าเหลียวเห็น มีเทวทูตองค์หนึ่งพวมบินเทิงท้องฟ้า กับได้ยินเสียงฮ้องดังก้อง ว่า “ฉิบหาย ฉิบหาย ฉิบหาย มีต่อคนทั้งหลายอยู่เทิงแผ่นดินโลกเด้อ ย้อนว่า สิมีเสียงแตรอีกจากเทวทูตทั้งสามองค์ พร้อมที่สิเป่าอยู่แล้ว”
////////// ////////// //////////