วิวรณ์ – Revelation บทที่ 3

วิวรณ์ 3:1 “แล้วให้เขียนเถิงเทวทูตประจำกลุ่มผู้เซื่อในเมืองซาร์ดิสว่า ‘เพิ่นผู้มีวิญญาณทั้งเจ็ดของพระเจ้า กับมีดาวเจ็ดดวงฮั้น เว้าว่า “เฮาฮู้จักการงานของพวกเจ้า ที่ได้ซื่อว่ามีซีวิตอยู่ แต่ว่าพวกเจ้าอยู่ในสภาพตายแล้ว 

วิวรณ์ 3:2 “ให้พวกเจ้าตื่นโตระวังให้ดี ให้เสริมกำลังส่วนที่ยังเหลืออยู่ที่ใกล้สิตายแล้ว ให้มันแข็งแฮงขึ้นเด้อ ย้อนเฮาได้พ้อว่า การงานของพวกเจ้าบ่ดีพร้อมต่อหน้าพระเจ้า 

วิวรณ์ 3:3 “จั่งซั้น ให้พวกเจ้าจดจื่อแนวที่เคยได้ฮับได้ฟังแล้วฮั้นเด้อ แล้วให้ยึดมั่น กลับใจใหม่เด้อ จั่งซั้น คั่นเจ้าบ่เฝ้าระวัง เฮาสิมาหาเจ้าคือปานคนขโมย แล้วพวกเจ้าสิบ่ฮู้จักว่าเฮาสิมาหาเจ้าในโมงใด 

วิวรณ์ 3:4 “แล้วกะมีซื่อของผู้ลางคน แม้นแต่อยู่ในเมืองซาร์ดิสฮั้น ซึ่งว่า เสื้อผ้าของเขาบ่ได้เฮ็ดให้เปื้อนมลทิน แล้วเขาพวกฮั้นสิดำเนินกับเฮาโดยนุ่งสีขาว ย้อนว่าพวกเขาสมควร 

วิวรณ์ 3:5 “ฝ่ายผู้มีซัย ผู้ฮั้นกะสินุ่งเสื้อคลุมยาวสีขาว แล้วเฮาสิบ่ได้ลบซื่อผู้ฮั้นออกจากหนังสือแห่งซีวิต แต่เฮาสิรับรองซื่อผู้ฮั้นต่อพระเจ้าผู้เป็นพ่อของเฮา กับต่อหน้าหมู่เทวทูตทั้งหลายของเพิ่นนำ 

วิวรณ์ 3:6 “ใผมีหูกะให้ฟังเอาโลดเด้อ แนวที่พระวิญญาณพวมบอกกลุ่มผู้เซื่อทั้งหลาย’ 

วิวรณ์ 3:7 “แล้วให้เขียนเถิงเทวทูตประจำกลุ่มผู้เซื่ออยู่เมืองฟีลาเดลเฟีย ว่า ‘เพิ่นผู้บริสุทธิ์ ผู้สัตย์จริง ผู้เพิ่นที่ถือลูกกุญแจของกษัตริย์ดาวิด คือเพิ่นเปิดแล้วบ่มีไผสิปิดได้ กับปิดแล้วบ่มีใผสิเปิดได้ จั่งเว้าว่า 

วิวรณ์ 3:8 “เฮาฮู้จักการงานของพวกเจ้า นี่แน่ะ เฮาได้เปิดประตูไว้ต่อหน้าพวกเจ้าแล้ว แล้วบ่มีใผสามารถปิดได้เลย ย้อนว่าเจ้ายังมีแฮงเหลืออยู่เล็กน้อย ซึ่งเจ้าได้ฮักษาถ้อยคำของเฮาไว้ กับบ่ได้ปฏิเสธนามของเฮา 

วิวรณ์ 3:9 “นี่แน่ะ เฮาสิเฮ็ดให้พวกกลุ่มซมรมของเจ้ามารซาตานที่ตัวะว่าเป็นคนยิว แต่บ่ได้เป็น นี่แน่ะ เฮาสิเฮ็ดให้เขาหมอบกราบลงแทบเท้าของเจ้า กับให้เขาฮู้ว่าเฮาฮักพวกเจ้า 

วิวรณ์ 3:10 “ย้อนว่า เจ้าได้ฮักษาคำสั่งของเฮาที่ว่า ให้อดทนอย่างพากเพียร จั่งซั้น เฮาสิปกป้องฮักษาพวกเจ้าไว้จากยามทดลองฮั้นนำ แนวที่สิเกิดขึ้นทั่วทั้งโลก เป็นการทดสอบใจของเมิ้ดคู่คนที่อยู่ทั่วแผ่นดินโลก 

วิวรณ์ 3:11 “นี่แน่ะ บัดยามเฮามา เฮาสิมาไวๆ โลดเด้อ จั่งซั้น ให้ยึดมั่นในความจริงที่พวกเจ้ามีอยู่เด้อ เพื่อบ่ให้ผู้หนึ่งผู้ใดซิงเอามงกุฎของเจ้าไปได้ 

วิวรณ์ 3:12 “คือผู้ใดมีซัย เฮาสิเฮ็ดให้ผู้ฮั้นเป็นเสาหลักในพระวิหารของพระเจ้าของเฮา กับผู้ฮั้นสิบ่ออกไปภายนอกอีกเลย กับเฮาสิจารึกพระนามพระเจ้าไว้ที่ผู้ฮั้น กับซื่อเมืองของพระเจ้าเฮานำ คือกรุงเยรูซาเล็มใหม่ ที่ลงมาจากสวรรค์จากพระเจ้าเฮา กับเฮาสิจารึกนามใหม่ของเฮาไว้ที่ผู้ฮั้นนำ 

วิวรณ์ 3:13 “ใผมีหูกะให้ฟังเอาโลดเด้อ แนวที่พระวิญญาณพวมบอกกลุ่มผู้เซื่อทั้งหลาย’ 

วิวรณ์ 3:14 “แล้วให้เขียนเถิงเทวทูตประจำกลุ่มผู้เซื่ออยู่เมืองเลาดีเซียว่า ‘ผู้เพิ่นซึ่งเป็น ‘อาเมน’ กับได้เป็นพยานผู้จงรักภักดีกับสัตย์จริง กับเป็นต้นเหตุของเมิ้ดคู่อันคู่แนวที่พระเจ้าได้สร้าง เว้าว่า 

วิวรณ์ 3:15 “เฮาฮู้จักการงานของพวกเจ้า คือพวกเจ้าเป็นคนซื่อๆ ซ่าๆ อยู่ เย็นกะบ่เย็น ฮ้อนกะบ่ฮ้อน เฮาจั่งปรารถนาอยากให้เจ้าเป็นคนเย็น หรือว่าเป็นคนฮ้อน 

วิวรณ์ 3:16 “จั่งซั้น ย้อนว่าพวกเจ้าเป็นแต่อุ่นๆ บ่เย็นกับบ่ฮ้อน เฮาสิคายพวกเจ้าออกจากปากของเฮาโลด 

วิวรณ์ 3:17 “ย้อนพวกเจ้าได้เว้าว่า ‘เฮาเป็นคนฮั่งมี ได้ทรัพย์สมบัติหลาย บ่ได้ขาดอีหยังเลย’ พวกเจ้าบ่ฮู้บ้อว่า พวกเจ้าเป็นคนสมเพช เป็นคนยากแค้น เป็นคนขัดสน เป็นคนตาบอด กับเป็นคนเปลือยเปล่า 

วิวรณ์ 3:18 “เฮาแนะนำพวกเจ้าว่า ให้ซื้อทองคำที่หลอมไฟให้บริสุทธิ์จากเฮา เพื่อพวกเจ้าสิเป็นคนฮั่งมีอีหลี กับซื้อเสื้อขาวให้มีแนวนุ่งได้ เพื่อปกปิดความละอายย้อนการเปลือยเปล่าของเจ้า กับซื้อยาฮักษาตาของเจ้าเพื่อสิมองเห็นได้ 

วิวรณ์ 3:19 “ผู้ใดที่เฮาฮัก เฮากะตักเตือนว่ากล่าวผู้ฮั้น จั่งซั้น ให้กระตือรือร้นกลับใจใหม่เด้อ 

วิวรณ์ 3:20 “นี่แน่ะ เฮายืนเคาะประตูของเจ้า คั่นผู้ใดได้ยินเสียงของเฮา แล้วเปิดประตู เฮากะสิเข้าอยู่นำผู้ฮั้น กับสิกินข้าวปลาอาหารนำเขา แล้วเขากะสิกินนำเฮา 

วิวรณ์ 3:21 “คือผู้ใดมีซัย เฮาสิอนุญาตให้ผู้ฮั้นนั่งกับเฮาเทิงพระที่นั่งของเฮา คือจั่งที่เฮามีซัย แล้วได้นั่งกับพระเจ้าผู้เป็นพ่อของเฮา อยู่พระที่นั่งของเพิ่น 

วิวรณ์ 3:22 “ใผมีหูกะให้ฟังเอาโลดเด้อ แนวที่พระวิญญาณพวมบอกกลุ่มผู้เซื่อทั้งหลาย'”
////////// ////////// //////////