วิวรณ์ – Revelation บทที่ 22

วิวรณ์ 22:1 แล้วเทวทูตองค์ฮั้นได้แสดงแม่น้ำแห่งซีวิตสายหนึ่งให้ผู้ข้าเห็น ซึ่งมีน้ำสุกใสบริสุทธิ์คือปานแก้วผลึก ไหลออกจากพระที่นั่งของพระเจ้า กับของแกะน้อยของเพิ่น 

วิวรณ์ 22:2 แล้วตามหนทางในเมืองฮั้น กับตามสองฟากฝั่งของแม่น้ำฮั้น ได้มีกกไม้ที่ให้ซีวิตซึ่งออกหมากสิบสองแนวคู่เดือน แล้วใบของมันใซ้เป็นยาสำหรับปัวพวกประชาซาติให้เซาเป็นดีจากแนวต่างๆ 

วิวรณ์ 22:3 แล้วสิบ่มีการสาปแซ่งอีกต่อไปเลย ย้อนพระที่นั่งของพระเจ้า กับของแกะน้อยของเพิ่นสิอยู่ในเมืองฮั้นนำ แล้วผู้ฮับใซ้ของเพิ่นกะสิปรนนิบัติเพิ่นอยู่ฮั้น 

วิวรณ์ 22:4 แล้วพวกเขาทั้งหลาย สิได้เห็นหน้าของเพิ่น กับพระนามของเพิ่นสิประทับอยู่เทิงหน้าผากของเขา 

วิวรณ์ 22:5 แล้วสิบ่มียามกลางคืนในเมืองฮั้นเลย พวกเขาจั่งบ่ต้องการแสงโคมไฟหรือแสงตะเว็นอีกต่อไป ย้อนว่าองค์พระผู้เป็นเจ้าเป็นแสงสว่างให้เขา แล้วพวกเขาสิครอบครองอยู่ตลอดกาลเป็นนิตย์

วิวรณ์ 22:6 แล้วเทวทูตองค์ฮั้นได้บอกผู้ข้าว่า “ถ้อยคำนี้แม่นคำภักดีกับสัตย์จริง แล้วพระเจ้าของพวกผู้เป็นปากเป็นเสียงอันบริสุทธิ์ ได้ใช้เทวทูตของเพิ่นซี้แจงให้พวกผู้ฮับใซ้ของเพิ่นเถิงเหตุการณ์ทั้งปวงแนวที่สิต้องเป็นไปในอีกบ่โดน” 

วิวรณ์ 22:7 แล้วเพิ่นเว้าว่า “นี่แน่ะ เฮาสิมาอย่างไวๆ เด้อ แล้วผู้ใดที่ถือฮักษาคำพยากรณ์ในหนังสือม้วนนี้กะสิได้พรเป็นสุข”

วิวรณ์ 22:8 แล้วผู้ข้า คือยอห์นหนิ ได้เห็นกับได้ยินเหตุการณ์แนวหมู่นี้ แล้วพอได้ยินได้เห็นแล้ว ผู้ข้าหมอบกราบลง แทบเท้า ว่าสิเคารพบูซาเทวทูตองค์ที่ได้ซี้แจงให้ผู้ข้าฮั้น

วิวรณ์ 22:9 แต่องค์ฮั้นได้ห้ามผู้ข้าไว้ เว้าว่า “อย่ากราบเฮาเลยเด้อ คือเฮาหนิเป็นผู้ฮับใซ้พระเจ้าคือ จั่งเจ้า คือพวกพี่น้องของเจ้า กับคือพวกผู้เป็นปากเป็นเสียงของพระเจ้า พร้อมทั้งผู้ที่ถือฮักษาถ้อยคำในหนังสือนี้ จั่งซั้น ให้ถวายนมัสการพระเจ้าเด้อ” 

วิวรณ์ 22:10 แล้วองค์ฮั้นบอกผู้ข้าอีกว่า “อย่าประทับตราปิดคำพยากรณ์ในหนังสือนี้ไว้เด้อ ย้อนว่าใกล้สิฮอดเวลาฮั้นแล้ว 

วิวรณ์ 22:11 แล้วฝ่ายคนบ่ชอบธรรม ปล่อยให้เขาบ่ชอบธรรมต่อไป กับฝ่ายคนสกปรกลามก ปล่อยให้เขาสกปรกลามกต่อไป แต่สำหรับคนชอบธรรม ให้เขาชอบธรรมต่อไป กับสำหรับคนบริสุทธิ์ ให้เขาบริสุทธิ์ต่อไป” 

วิวรณ์ 22:12 “นี่แน่ะ เฮาสิมาอย่างไวๆ เด้อ แล้วเฮาสินำเอาบำเหน็จของเฮามานำ เพื่อตอบแทนคู่คนตามการงานแนวที่เขาได้เฮ็ด 

วิวรณ์ 22:13 เฮาคืออัลฟากับโอเมกา เป็นบั้นกกกับเป็นบั้นปลาย เป็นผู้ตำอิดกับเป็นผู้สุดท้าย” 

วิวรณ์ 22:14 จั่งซั้น คนทั้งหลายที่เฮ็ดตามคำสั่งของเพิ่นสิได้พรเป็นสุข แล้วเขาสิมีสิทธิ์มีส่วนในกกไม้ที่ให้ซีวิต กับเพื่อสิเข้าประตูเมืองฮั้น 

วิวรณ์ 22:15 แต่ว่า ภายนอกฮั้นมีแต่พวกหมา คนใช้เวทมนตร์คาถา คนเล่นซู้ล่วงประเวณี คนฆ่าคน คนไหว้ฮูปเคารพ กับคนขี้ตัวะ 

วิวรณ์ 22:16 “เฮา เยซูหนิ ได้ใช้เทวทูตของเฮาไปเป็นพยานเถิงแนวหมู่นี้ให้เจ้า เพื่อให้บอกกลุ่มผู้เซื่อทั้งหลายนำ เฮาเป็นฮากเหง้ากับเป็นเชื้อสายของกษัตริย์ดาวิด กับเป็นดาวประจำรุ่งเซ้าอันสว่างสุกใส” 

วิวรณ์ 22:17 แล้วพระวิญญาณกับเจ้าสาวเว้าว่า “เซิญมาเด้อ” กับขอให้ผู้ที่ได้ยินเว้าว่า “เซิญมาเด้อ” จั่งขอให้ผู้หิวกระหายมาเลย กับผู้ใดมีใจปรารถนา ให้ผู้ฮั้นมาเลย มาฮับดื่มด่ำน้ำทิพย์แห่งซีวิตโดยบ่ต้องเสียค่าเลย 

วิวรณ์ 22:18 คือ ผู้ข้าได้เป็นพยานให้คู่คนที่ได้ยินคำพยากรณ์ในหนังสือม้วนนี้ แล้วคั่นผู้ใดสิเพิ่มข้อ ความในนี้อีก พระเจ้ากะสิเพิ่มภัยพิบัติที่เขียนไว้ในหนังสือม้วนนี้ให้เขา 

วิวรณ์ 22:19 แล้วคั่นผู้ใดตัดข้อความออกจากหนังสือพยากรณ์นี้ พระเจ้ากะสิถอนส่วนของผู้ฮั้นออกจากหนังสือแห่งซีวิต กับออกจากเมืองบริสุทธิ์ฮั้น กับออกจากแนวดีงามที่มีเขียนไว้ในหนังสือม้วนนี้ไปนำ

วิวรณ์ 22:20 แล้วผู้ที่เป็นพยานเถิงเหตุการณ์แนวหมู่นี้ เว้าว่า “เอ้อ เฮาสิมาไวๆ เด้อ” อาเมน จั่งซั้น เซิญมาเถิด พระเยซูเจ้าเอ้ย 

วิวรณ์ 22:21 ขอให้พระกรุณาธิคุณของพระเยซูคริสต์เจ้า นายซีวิตของเฮา ดำรงอยู่กับพวกเจ้าเทอญ อาเมน