วิวรณ์ – Revelation บทที่ 21

วิวรณ์ 21:1 แล้วบัดนี้ ผู้ข้าได้เห็นท้องฟ้าใหม่กับแผ่นดินโลกใหม่ ย้อนท้องฟ้าเดิมกับแผ่นดินโลกเดิมฮั้นได้หายเมิ้ดสิ้นไปแล้ว กับบ่มีทะเลอีกต่อไปเลย 

วิวรณ์ 21:2 แล้วผู้ข้า คือยอห์นหนิ ได้เห็นเมืองบริสุทธิ์ คือกรุงเยรูซาเล็มใหม่ ลอยลงมาจากพระเจ้าอยู่เทิงสวรรค์ กรุงนี้ได้จัดเตรียมไว้พร้อมแล้ว คือจั่งเจ้าสาวแต่งโตประดับไว้สำหรับผัวของนาง 

วิวรณ์ 21:3 แล้วผู้ข้าได้ยินเสียงดังก้องมาจากสวรรค์ว่า “นี่แน่ะ พระวิหารของพระเจ้าได้อยู่นำผู้คนทั้งหลายแล้ว กับเพิ่นสิสถิตอยู่นำพวกเขา แล้วพวกเขาสิเป็นพลเมืองของเพิ่น แล้วพระเจ้าเองสิอยู่นำพวกเขา กับสิเป็นพระเจ้าของพวกเขา 

วิวรณ์ 21:4 แล้วพระเจ้าสิเซ็ดน้ำตาเมิ้ดคู่หยดจากตาของพวกเขา แล้วความตายสิบ่มีอีกต่อไป หรือความคร่ำครวญ หรือการฮ้องไห้ กับการเจ็บปวดสิบ่มีอีกต่อไปเลย ย้อนแนวเดิมฮั้นได้ผ่านพ้นไปแล้ว” 

วิวรณ์ 21:5 แล้วเพิ่นผู้นั่งเทิงพระที่นั่งได้เว้าว่า “นี่แน่ะ เฮาได้สร้างสิ่งสารพัดขึ้นมาใหม่แล้ว” กับเพิ่นเว้ากับผู้ข้าอีกว่า “ให้เขียนไว้เด้อ ย้อนว่าถ้อยคำแนวหมู่นี้กะสัตย์จริงกับภักดี” 

วิวรณ์ 21:6 แล้วเพิ่นเว้ากับผู้ข้าว่า “เอ้อ เมิ้ดคู่อย่างสำเร็จแล้ว เฮาหนิเป็นอัลฟากับโอเมกา เป็นบั้นกกกับเป็นบั้นปลาย ผู้ใดที่หิวกระหาย เฮาสิให้ผู้ฮั้นดื่มด่ำจากแหล่งน้ำพุแห่งซีวิตโดยบ่ต้องเสียค่าอีหยังเลย 

วิวรณ์ 21:7 “ผู้ใดมีซัย ผู้ฮั้นสิได้ฮับสิ่งสารพัดเป็นมรดก กับเฮาสิเป็นพระเจ้าของเขา กับเขาสิเป็นลูกของเฮา 

วิวรณ์ 21:8 “แต่คนขี้หย้าน คนบ่เซื่อ คนเป็นตารังเกียจ คนฆ่าคน คนเล่นซู้ล่วงประเวณี คนเล่นเวทมนตร์คาถา คนไหว้ฮูปเคารพ กับคนขี้ตัวะเมิ้ดคู่ กะสิมีส่วนฮ่วมในบึงไฟฮั้นที่เผาไหม้ด้วยไฟกับกำมะถัน ฮั้นคือความตายเทื่อที่สอง”

วิวรณ์ 21:9 แล้วเทวทูตองค์หนึ่งในเทวทูตทั้งเจ็ดฮั้น ที่ถือขันเจ็ดใบอันเต็มด้วยภัยพิบัติสุดท้ายทั้งเจ็ด ได้มาเว้ากับผู้ข้าว่า “ให้มานี่เด้อ เฮาสิให้เจ้าเบิ่งเจ้าสาวของแกะน้อยของพระเจ้า” 

วิวรณ์ 21:10 แล้วเพิ่นได้นำผู้ข้าไปโดยทางพระวิญญาณ ขึ้นไปเทิงภูเขาอันสูงใหญ่หลวง กับได้สำแดงให้ผู้ข้าเห็นเมืองใหญ่ฮั้น คือกรุงเยรูซาเล็มอันบริสุทธิ์ ซึ่งพวมลอยลงมาจากพระเจ้าอยู่เทิงสวรรค์ 

วิวรณ์ 21:11 ซึ่งเมืองฮั้นประกอบด้วยพระสิริของพระเจ้า ออกแสงใสสว่างคือปานพลอยมณีอันล้ำค่า คือปานพลอยหยกอันสุกใสคือแก้วผลึก

วิวรณ์ 21:12 แล้วเมืองฮั้นมีกำแพงอันสูงใหญ่หลวง มีประตูสิบสองประตู แล้วมีเทวทูตสิบสององค์เฝ้าอยู่ที่ประตู แล้วซื่อของตระกูลสิบสองเผ่าของซนซาติอิสราเอลได้จารึกไว้อยู่ที่ประตูหมู่ฮั้น 

วิวรณ์ 21:13 ทางด้านตะเว็นออกมีสามประตู ทางด้านเหนือมีสามประตู ทางด้านใต้มีสามประตู กับทางด้านตะเว็นตกกะมีสามประตู 

วิวรณ์ 21:14 แล้วกำแพงของเมืองฮั้นมีฐานรากสิบสองฐาน กับที่ฐานรากฮั้น ได้จารึกซื่อทูตพิเศษสิบสองคนของแกะน้อยของพระเจ้า

วิวรณ์ 21:15 แล้วเทวทูตองค์ที่เว้ากับผู้ข้าฮั้น ได้ถือไม้เมตรทองคำเพื่อสิวัดเมือง วัดประตู กับวัดกำแพงของเมืองฮั้น

วิวรณ์ 21:16 แล้วพื้นที่ของเมืองฮั้นเป็นสี่เหลี่ยมจัตุรัส กว้างยาวท่อกัน แล้วเทวทูตจั่งวัดเอาเมืองฮั้น ได้ 12,000 สทาดิโอน (2,400 กิโลเมตร) กว้างยาวสูงท่อกัน

วิวรณ์ 21:17 แล้วเทวทูตได้วัดเอาความสูงของกำแพงเมืองนำ ได้ 144 ศอก (65 เมตร) เป็นตามมาตรฐานการวัดของคน ซึ่งเป็นมาตรฐานของเทวทูต

วิวรณ์ 21:18 แล้วกำแพงของเมืองฮั้นสร้างด้วยนิลโมรา แล้วเมืองฮั้นเป็นทองคำบริสุทธิ์ สุกใสคือปานแก้ว

วิวรณ์ 21:19 แล้วฐานรากของกำแพงเมืองฮั้นประดับด้วยเพชรนิลจินดาคู่ซนิด คือฐานรากที่หนึ่งเป็นพลอยนิลแดง ที่สองเป็นไพลิน ที่สามเป็นโมรา ที่สี่เป็นมรกต

วิวรณ์ 21:20 แล้วที่ห้าเป็นโกเมน ที่หกเป็นทับทิม ที่เจ็ดเป็นเพอริโดต์เขียว ที่แปดเป็นเบริลเขียว ที่เก้าเป็นบุษราคัม ที่สิบเป็นหยก ที่สิบเอ็ดเป็นโกเมนแดง ที่สิบสองเป็นอเมทิม่วง

วิวรณ์ 21:21 แล้วประตูทั้งสิบสองฮั้น แต่ละบานเฮ็ดด้วยไข่มุกใหญ่ประตูละเม็ด แล้วหนทางในเมืองฮั้นลาดด้วยทองคำบริสุทธิ์ สุกใสปานแก้ว 

วิวรณ์ 21:22 แล้วผู้ข้าได้เหลียวเบิ่ง แต่บ่เห็นพระวิหารในเมืองฮั้นเลย ย้อนว่าองค์พระผู้เป็นเจ้า ผู้เพิ่นฤทธานุภาพสูงสุด กับแกะน้อยของเพิ่นได้เป็นพระวิหารในเมืองฮั้น 

วิวรณ์ 21:23 แล้วเมืองฮั้นบ่ต้องการดวงตะเว็น หรือดวงเดือนเพื่อออกแสงให้แจ้งสว่าง ย้อนว่า พระสิริของพระเจ้า กับแกะน้อยของพระเจ้าได้เป็นแสงสว่างของเมืองฮั้น

วิวรณ์ 21:24 แล้วคนของประชาซาติต่างๆ ที่รอดพ้นแล้ว สิได้ย่างไปมาในแสงสว่างของเมืองฮั้น แล้วกษัตริย์ต่างๆ ทางแผ่นดินโลกจั่งนำพระสิริกับเกียรติยศของพวกเขาเข้ามาในเมืองฮั้น

วิวรณ์ 21:25 แล้วประตูของเมืองฮั้นสิบ่ได้ปิดไว้ตลอดยามกลางเว็น (ย้อนเมืองฮั้นบ่มียามกลางคืน) 

วิวรณ์ 21:26 แล้วคนทั้งหลายสินำเอาพระสิริกับเกียรติยศของประชาซาติทั้งหลาย นำเข้ามาในเมือง

วิวรณ์ 21:27 แล้วสิบ่มีอีหยังสามารถเข้าไปในเมืองที่เฮ็ดเป็นมลทิน หรือเฮ็ดเป็นลามก หรือเฮ็ดเป็นแนวตัวะแนวบ่จริง มีแต่ผู้มีซื่อจดไว้ในหนังสือแห่งซีวิตของแกะน้อยของพระเจ้าท่อฮั้น
////////// ////////// //////////