วิวรณ์ – Revelation บทที่ 1

วิวรณ์ 1:1 การเปิดเผยเรื่องของพระเยซูคริสต์ ซึ่งพระเจ้าได้มอบใหเพิ่น เพื่อซี้แจงให้พวกผู้ฮับใซ้ทั้งหลายของเพิ่น ให้ฮู้เถิงเหตุการณ์ที่สิต้องเป็นไปในยามบ่โดนนาน แล้วเพิ่นได้ใซ้เทวทูตของเพิ่นให้ไปบ่งบอกยอห์น ผู้ฮับใซ้ของเพิ่น

วิวรณ์ 1:2 ซึ่งยอห์นเป็นพยานหลักฐานเถิงพระคำของพระเจ้า กับเถิงคำพยานของพระเยซูคริสต์ เถิงเหตุการณ์เมิ้ดคู่แนวที่ลาวได้เห็นมาฮั้น

วิวรณ์ 1:3 แล้วผู้ที่อ่านคำพยากรณ์แนวหมู่นี้สิได้พรเป็นสุข ฮ่วมกับผู้คนที่ฮับฟังกะได้พรเป็นสุขนำ กับฮักษาข้อความที่เขียนไว้ในนี้ ย้อนว่ายามฮั้นใกล้สิมาฮอดแล้ว 

วิวรณ์ 1:4 จากยอห์น เรียนมายังกลุ่มผู้เซื่อทั้งเจ็ดกลุ่ม ซึ่งอยู่แถวเอเชีย ขอให้พระกรุณาธิคุณ พร้อมทั้งความสงบสุขจากเพิ่น ผู้ดำรงอยู่ในสมัยนี้ กับในสมัยก่อน กับในอนาคตทางหน้าที่สิมาเถิง กับจากวิญญาณทั้งเจ็ดองค์ซึ่งอยู่ต่อหน้าพระที่นั่งของเพิ่น ดำรงอยู่นำพวกเจ้าเถิด 

วิวรณ์ 1:5 กับจากพระเยซูคริสต์ ผู้เพิ่นเป็นพยานสัตย์ซื่อภักดี กับเป็นผู้ตำอิดที่เป็นขึ้นมาจากตาย กับเป็นประมุข ผู้ครอบครองเหนือกษัตริย์ทั้งมวลในโลก แด่เพิ่นผู้ที่ฮักพวกเฮา กับได้ซำระล้างบาปของพวกเฮาทั้งหลายให้เมิ้ดไปโดยพระโลหิตของเพิ่น 

วิวรณ์ 1:6 กับได้ตั้งพวกเฮาทั้งหลายไว้ให้เป็นราชอาณาจักรปุโรหิตผู้ถวายเครื่องบูซาฯ แด่พระเจ้าผู้เป็นพ่อของเพิ่น ขอพระสิริกับฤทธานุภาพอันสูงสุดมีแด่เพิ่นสืบๆ ไปตลอดกาลเป็นนิตย์ อาเมน 

วิวรณ์ 1:7 นี่แน่ะ เพิ่นกะสิลงมาในเมฆ แล้วดวงตาทั้งเมิ้ดสิได้เห็นเพิ่น แล้วคนแนวหมู่ฮั้นที่ได้ทิ่มแทงเพิ่นกะสิได้เห็นนำ แล้วมนุษย์คู่ซาติอยู่ทั่วโลกสิฮ้องไห้ย้อนเพิ่น จั่งซั้น ขอสาธุการพระเจ้า อาเมน

วิวรณ์ 1:8 องค์พระผู้เป็นเจ้าจั่งเว้าว่า “เฮาหนิเป็นอัลฟากับเป็นโอเมกา เป็นบั้นกกกับเป็นบั้นปลาย เป็นผู้ดำรงอยู่ตลอดกาล อยู่ในอดีต อยู่ในปัจจุบัน ทั้งอยู่ในอนาคตที่สิมาฮั้น ซึ่งเป็นผู้ประกอบด้วยฤทธานุภาพสูงสุด”

วิวรณ์ 1:9 แล้วผู้ข้า คือยอห์นหนิ เป็นพี่น้องของพวกเจ้า เป็นหมู่ฮ่วมกันในการทุกข์ยากลำบาก กับฮ่วมกันในแผ่นดินของเพิ่น กับได้ฮ่วมกันในความอดทนเพื่อพระเยซูคริสต์พร้อมนำพวกเจ้า แล้วผู้ข้าได้ถืกส่งมาอยู่เกาะหนึ่งที่เอิ้นว่า เกาะปัทมอส ย้อนเห็นแก่พระคำของพระเจ้า กับเห็นแก่คำพยานของพระเยซูคริสต์

วิวรณ์ 1:10 แล้วผู้ข้าได้อยู่ฝ่ายพระวิญญาณเป็นมื้อขององค์พระผู้เป็นเจ้า ผู้ข้าจั่งได้ยินเสียงดังของผู้มีอํานาจอยู่ทางหลังผู้ข้า เป็นคือเสียงแตร

วิวรณ์ 1:11 ได้เว้าว่า “เฮา เป็นอัลฟากับเป็นโอเมกา เป็นบั้นต้นกับเป็นบั้นปลาย แล้วแนวที่เจ้าได้เห็นหนิกะให้จดไว้ในหนังสือ ฝากไปให้กลุ่มผู้เซื่อทั้งเจ็ดกลุ่ม อยู่ในแถวเอเชีย คืออยู่เมืองเอเฟซัส เมืองสเมอร์นา เมืองเปอร์กามัม เมืองธิยาทิรา เมืองซาร์ดิส เมืองฟีลาเดลเฟีย กับเมืองเลาดีเซีย”

วิวรณ์ 1:12 แล้วผู้ข้าจั่งเหลียวมาทางเสียงที่เว้ากับผู้ข้าฮั้น บัดเหลียวแล้วผู้ข้ากะเห็นโคมไฟทองคำตั้งอยู่เจ็ดอัน

วิวรณ์ 1:13 แล้วอยู่ในเกิ่งกลางโคมไฟทั้งเจ็ดฮั้น มีผู้หนึ่งมีลักษณะคือจั่งบุตรมนุษย์ ได้นุ่งเสื้อคลุมยาวฮอดเท้า กับมีผ้าทองคำพันไว้ที่หน้าเอิก

วิวรณ์ 1:14 หัวกับผมของเพิ่นกะขาวจัวะพอปานขนแกะ คือขาวปานหิมะ แล้วตาของเพิ่นเป็นแสงคือปานแปวไฟ 

วิวรณ์ 1:15 เท้าของเพิ่นคือปานทองเหลืองออกเงา พอปานพวมถืกหลอมไฟในเตาใหญ่ เสียงเว้าของเพิ่นคือปานเสียงน้ำหลากหลายที่ไหลแฮง

วิวรณ์ 1:16 แล้วเพิ่นถือดวงดาวเจ็ดดวงไว้ในมือขวาของเพิ่น แล้วกะมีดาบสองคมซึ่งคมๆ ออกมาจากปากของเพิ่น กับลักษณะสีหน้าของเพิ่นสว่างคือปานดวงตะเว็นที่ส่องแสงกล้าอย่างเต็มแฮงของมัน 

วิวรณ์ 1:17 แล้วบัดผู้ข้าได้เห็นเพิ่น ผู้ข้าได้ล้มลงต่อเท้าของเพิ่น คือปานคนตาย แต่เพิ่นกะเลยวางมือขวาแตะโตผู้ข้า แล้วกะเว้ากับผู้ข้าว่า “อย่าสู่หย้านเด้อ เฮาเป็นบั้นต้นกับบั้นปลาย 

วิวรณ์ 1:18 กับเป็นผู้ที่ดำรงอยู่ ซึ่งเฮาเคยตายไป แต่นี่แน่ะ บัดนี้เฮากะดำรงอยู่ตลอดกาลเป็นนิตย์ อาเมน กับเฮาถือลูกกุญแจของแดนมรณา กับของความตายนำ 

วิวรณ์ 1:19 ให้จดแนวหมู่นี้ไว้เด้อ คือแนวที่เจ้าได้เห็นมาแล้ว กับแนวที่พวมเป็นไปในยามนี้ ทั้งแนวที่สิเกิดขึ้นในภายหน้า

วิวรณ์ 1:20 แล้วส่วนความลึกลับเรื่องของดาวเจ็ดดวง ที่เจ้าได้เห็นในมือขวาของเฮาหนิ กับเรื่องโคมไฟทองคำเจ็ดอันฮั้นได้เป็นจั่งซี้ คือ ดาวเจ็ดดวงฮั้น เป็นเทวทูตเหนือกลุ่มผู้เซื่อเจ็ดกลุ่ม แล้วโคมไฟเจ็ดอันซึ่งเจ้าได้เห็น คือกลุ่มผู้เซื่อเจ็ดกลุ่มฮั้นเอง”
////////// ////////// //////////