วิวรณ์ – Revelation บทที่ 17

วิวรณ์ 17:1 แล้วมีเทวทูตองค์หนึ่งในเจ็ดองค์ที่ถือขันเจ็ดใบฮั้น ได้ออกมาเว้ากับผู้ข้าว่า “ให้มาพี่เด้อ เฮาสิให้เจ้าเบิ่งการตัดสินลงโทษญิงโสเภณีผู้ใหญ่ยิ่งฮั้น ที่นั่งอยู่เทิงน้ำหลวงหลาย 

วิวรณ์ 17:2 คือเป็นญิงที่พวกกษัตริย์ทั้งหลายทั่วแผ่นดินโลกได้เล่นซู้ล่วงประเวณีนำ จั่งเฮ็ดให้คนทั้งหลายอยู่ทั่วโลกกินจนเมาเหล้าองุ่นแห่งการเล่นซู้ล่วงประเวณีของนาง”

วิวรณ์ 17:3 จั่งซั้น เทวทูตองค์ฮั้นได้นำผู้ข้าเข้าไปในถิ่นแห้งแล้งโดยในพระวิญญาณ แล้วผู้ข้าได้เห็นแม่ญิงคนหนึ่งนั่งอยู่เทิงสัตว์เดรัจฉานสีแดงเข้มโตหนึ่ง ซึ่งสัตว์โตฮั้นเต็มไปด้วยซื่อหลายซื่อเป็นคำหมิ่นประมาททั้งฮั้น แล้วมันมีเจ็ดหัวกับสิบเขา

วิวรณ์ 17:4 แล้วแม่ญิงฮั้นได้นุ่งผ้าสีม่วงกับสีแดงเข้ม มีเครื่องประดับเป็นทองคำ เพชรพลอยต่างๆ กับไข่มุก แล้วญิงฮั้นได้ถือจอกทองคำที่เต็มไปด้วยแนวเป็นตาซัง คือแนวสกปรกลามก ซึ่งมาจากการเล่นซู้ล่วงประเวณีของนาง

วิวรณ์ 17:5 แล้วหน้าผากของนางเขียนซื่อไว้ว่า “ลึกลับ บาบิโลนมหานคร เจ้าแม่ของญิงโสเภณีทั้งหลาย กับว่า กับของแนวสกปรกลามกทั้งปวงเทิงแผ่นดินโลก”

วิวรณ์ 17:6 แล้วผู้ข้าได้เห็นญิงฮั้น เมาด้วยเลือดคนของพระเจ้า กับเลือดของคนทั้งหลายที่ยอมตายย้อนคำพยานเถิงพระเยซู บัดผู้ข้าเห็นญิงฮั้นแล้ว ผู้ข้ากะแปลกใจเป็นตางึดหลาย 

วิวรณ์ 17:7 แต่เทวทูตองค์ฮั้นจั่งถามผู้ข้าว่า “เป็นหยังเจ้าคือแปลกใจ เฮาสิบอกให้เจ้าฮู้เถิงเรื่องอันลึกลับของญิงฮั้น กับของสัตว์เดรัจฉานที่ญิงฮั้นขี่ไป ที่มีเจ็ดหัวกับสิบเขา

วิวรณ์ 17:8 แล้วสัตว์เดรัจฉานที่เจ้าได้เห็นฮั้น ที่เคยอยู่มาก่อน แต่บ่ได้อยู่ในปัจจุบัน แล้วสิขึ้นมาจากเหวลึกอันบ่มีสิ้นสุด จั่งเข้าสู่ความพินาศ แล้วผู้คนทั้งหลายที่อยู่เทิงแผ่นดินโลก คือผู้ที่บ่มีซื่อจดไว้ในหนังสือแห่งซีวิตตั้งแต่การสร้างโลก เขากะสิแปลกใจบัดเขาเห็นสัตว์เดรัจฉานฮั้น ที่เคยอยู่มาก่อน แต่บ่ได้อยู่ในปัจจุบัน แล้วกะยังอยู่ต่ออีก

วิวรณ์ 17:9 นี่ต้องใช้ความคึดในทางสติปัญญา หัวทั้งเจ็ดฮั้นคือภูเขาเจ็ดยอดที่ญิงฮั้นนั่งอยู่

วิวรณ์ 17:10 แล้วได้มีกษัตริย์เจ็ดองค์ ซึ่งห้าองค์ในเจ็ดได้ล้มลงแล้ว แล้วมีองค์หนึ่งพวมตั้งอยู่ กับอีกองค์หนึ่งยังบ่ทันตั้งขึ้น กับบัดตั้งขึ้นมาแล้ว สิต้องดำรงอยู่บ่โดน 

วิวรณ์ 17:11 แล้วสัตว์เดรัจฉานฮั้น ที่เคยอยู่มาก่อน แต่บ่ได้อยู่ในปัจจุบัน มันสิเป็นองค์ที่แปด ต่อมาจากเจ็ดองค์ฮั้น แล้วมันกะสิเข้าสู่ความพินาศ

วิวรณ์ 17:12 แล้วเขาทั้งสิบที่เจ้าได้เห็นฮั้น แม่นกษัตริย์สิบองค์ซึ่งยังบ่ทันได้ครองราชสมบัติ แต่เขาสิฮับมอบอำนาจเป็นเวลาหนึ่งซั่วโมง ฮ่วมกันกับสัตว์เดรัจฉานฮั้น

วิวรณ์ 17:13 กษัตริย์พวกนี้มีจุดประสงค์แนวเดียวกัน คือว่าสิมอบอำนาจกับฤทธิ์กำลังของพวกเขาไว้ให้สัตว์เดรัจฉานฮั้น

วิวรณ์ 17:14 แล้วกษัตริย์พวกนี้กะสิเฮ็ดศึกสงคราม ต่อสู้กับแกะน้อยของพระเจ้า แล้วแกะน้อยสิชนะพวกเขา ย้อนว่าเพิ่นเป็นเจ้านายเหนือเจ้านายทั้งหลาย กับเป็นพระมหากษัตริย์เหนือกษัตริย์ทั้งหลาย แล้วผู้ที่อยู่กับเพิ่นฮั้น กะได้ฮับการเอิ้นการเซิญ การเลือก กับเป็นผู้จงรักภักดี”

วิวรณ์ 17:15 แล้วเทวทูตฮั้นเลยบอกผู้ข้าว่า “น้ำหลวงหลายที่เจ้าได้เห็นญิงโสเภณีนั่งอยู่ฮั้น คือ เผ่าพันธุ์ มวลชน ประชาซาติ กับภาษา ต่างๆ ของมนุษยโลกทั้งปวง 

วิวรณ์ 17:16 แล้วสิบเขาที่เจ้าได้เห็นของสัตว์เดรัจฉานฮั้น สิฮ่วมกันซังญิงโสเภณี จั่งเฮ็ดให้นางอยู่โดดเดี่ยวอ้างว้างกับเปลือยกายเลย กับสิกินเนื้อกินโตของนาง แล้วสิเผานางด้วยไฟ 

วิวรณ์ 17:17 ย้อนว่า พระเจ้าดลใจเขาให้เฮ็ดแนวฮั้นตามจุดประสงค์ของเพิ่น คือ ให้เป็นน้ำหนึ่งใจเดียวกันในการมอบแผ่นดินของเขา ไว้ให้สัตว์เดรัจฉานฮั้น จนกว่าถ้อยคำของพระเจ้าสิสำเร็จผล

วิวรณ์ 17:18 แล้วฝ่ายแม่ญิงที่เจ้าเห็น คือ มหานครอันใหญ่หลวงฮั้น ที่มีอำนาจปกครองเหนือกษัตริย์ทั้งหลายทั่วแผ่นดินโลก”
////////// ////////// //////////