วิวรณ์ – Revelation บทที่ 13

วิวรณ์ 13:1 แล้วผู้ข้ายืนอยู่หาดทรายทะเล แล้วได้เห็นสัตว์เดรัจฉานโตหนึ่งขึ้นมาจากทะเล ซึ่งมีเจ็ดหัวกับสิบเขา แล้วเขาทั้งสิบฮั้นมีมงกุฎสิบอัน กับมีซื่อที่เป็นคำหมิ่นประมาทจารึกไว้ที่หัวทั้งเจ็ดของมัน

วิวรณ์ 13:2 แล้วฝ่ายสัตว์เดรัจฉานที่ผู้ข้าได้เห็นฮั้น มีลักษณะคือปานเสือดาว มีตีนคือปานตีนหมี มีปากคือปานปากสิงโต แล้วพญานาคได้มอบฤทธิ์กำลังของมันให้สัตว์เดรัจฉานฮั้น กับบัลลังก์ พร้อมกับมหาอำนาจให้มันนำ 

วิวรณ์ 13:3 แล้วผู้ข้าได้สังเกตุเห็นว่าหัวหนึ่งของสัตว์เดรัจฉานเบิ่งคือถืกฟันเถิงตาย แต่แผลฮั้นได้เซาดีแล้ว คนทั้งโลกกะเลยเป็นตางึดสัตว์เดรัจฉานฮั้น

วิวรณ์ 13:4 แล้วเขาทั้งหลายจั่งไหว้บูซาพญานาคที่ได้มอบอำนาจให้สัตว์เดรัจฉานฮั้น พร้อมกับไหว้บูซาสัตว์เดรัจฉานฮั้นนำ บอกว่า “ใผสิเปรียบคือปานสัตว์เดรัจฉานนี้ กับใผสิสามารถเฮ็ดศึกสงคราม ต่อสู้กับสัตว์เดรัจฉานนี้ได้” 

วิวรณ์ 13:5 แล้วพญานาคได้มอบให้สัตว์เดรัจฉานฮั้น มีปากเว้าโอ้อวดใหญ่โต กับมีคำลบหลู่หมิ่นประมาทต่างๆ แล้วมันได้ฮับอำนาจเฮ็ดจั่งซั้นตลอดเป็นเวลาสี่สิบสองเดือน

วิวรณ์ 13:6 แล้วมันได้เว้าคำหมิ่นประมาทใส่พระเจ้า ลบหลู่พระนามของเพิ่น กับวิหารของเพิ่น พร้อมกับผู้คนทั้งหลายที่อยู่ในสวรรค์นำ 

วิวรณ์ 13:7 กับมันได้ฮับมอบอำนาจที่สิเฮ็ดศึกสงคราม ต่อสู้กับคนของพระเจ้า กับให้เอาซนะพวกเขา กับได้ฮับมอบอำนาจเหนือคู่คน คือคู่เผ่าพันธุ์ คู่ภาษา กับคู่ซนซาติ

วิวรณ์ 13:8 แล้วคนหลวงหลายที่อยู่ในแผ่นดินโลกสิไหว้บูซาสัตว์เดรัจฉานฮั้น คือคู่คนที่บ่มีซื่อจดไว้ในหนังสือแห่งซีวิตของแกะน้อยของพระเจ้า ผู้เพิ่นที่ถืกฆ่าก่อนสิสร้างโลก 

วิวรณ์ 13:9 ใผมีหูกะให้ฟังเอาโลดเด้อ 

วิวรณ์ 13:10 ผู้ใดที่นำคนเข้าไปเป็นเชลย ผู้ฮั้นกะสิต้องตกเป็นเซลยคือกัน กับผู้ใดที่ฆ่าเขาด้วยดาบ ผู้ฮั้นกะสิต้องถืกฆ่าด้วยดาบคือกัน ในนี้ล่ะ เป็นความอดทนกับความเซื่อของพวกคนของพระเจ้า 

วิวรณ์ 13:11 แล้วผู้ข้าเหลียวเบิ่ง ได้เห็นสัตว์เดรัจฉานอีกโตหนึ่งขึ้นมาจากแผ่นดิน โตฮั้นมีสองเขาคือปานแกะน้อย แล้วมีเสียงเว้าคือปานพญานาค 

วิวรณ์ 13:12 แล้วสัตว์เดรัจฉานโตนี้มีอำนาจคือจั่งสัตว์เดรัจฉานโตเดิมฮั้นอย่างครบ เลยสามารถเฮ็ดให้คนหลวงหลายที่อยู่ในโลกฮั้นไหว้บูซาสัตว์เดรัจฉานโตเดิม ซึ่งเคยมีแผลปางตายแต่เซาแล้ว 

วิวรณ์ 13:13 แล้วมันสามารถเฮ็ดแนวเป็นตางึดอย่างใหญ่หลายแนว จั่งได้เฮ็ดให้ไฟตกลงมาจากท้องฟ้าใส่แผ่นดินโลกต่อหน้าต่อตาผู้คนทั้งหลาย

วิวรณ์ 13:14 แล้วมันได้ล่อลวงคนทั้งหลายที่อยู่ในโลก โดยแนวเป็นตางึดหมู่ฮั้น ซึ่งมันได้ฮับมอบอำนาจที่สิเฮ็ดต่อหน้าต่อตาสัตว์เดรัจฉานโตเดิมฮั้น แล้วมันได้สั่งให้คนทั้งหลายที่อาศัยอยู่ในแผ่นดินโลก ให้ปั้นฮูปของสัตว์เดรัจฉานโตเดิมฮั้น ที่ถืกฟันด้วยดาบแต่ยังมีซีวิตอยู่

วิวรณ์ 13:15 แล้วมันได้ฮับมอบอำนาจที่สิเฮ็ดให้ฮูปปั้นของสัตว์เดรัจฉานโตเดิมฮั้นเกิดมีซีวิตอยู่ เพื่อให้ฮูปปั้นของสัตว์เดรัจฉานสามารถทั้งเว้าได้ กับทั้งฆ่าผู้คนที่บ่ยอมไหว้บูซาฮูปปั้นสัตว์เดรัจฉานฮั้น 

วิวรณ์ 13:16 แล้วมันยังสามารถเฮ็ดให้เมิ้ดคู่คน ทั้งผู้ใหญ่ กับผู้น้อย ผู้ฮั่งมี กับผู้ยากจน ทั้งผู้เป็นไท กับผู้เป็นทาส ให้ฮับเครื่องหมายไว้อยู่ที่มือขวาหรืออยู่ที่หน้าผากของเขา 

วิวรณ์ 13:17 เพื่อบ่ให้ผู้ใดค้าขายได้นอกจากผู้ที่มีเครื่องหมายฮั้น หรือซื่อของสัตว์เดรัจฉานฮั้น หรือโตเลขของซื่อมัน

วิวรณ์ 13:18 ในเรื่องนี้ควรสิใซ้ปัญญา ขอให้ผู้ใดมีความเข้าใจกะคำนวนโตเลขของสัตว์เดรัจฉานฮั้น คือมันเป็นเลขของคนๆ หนึ่ง โตเลขฮั้นคือ 666
////////// ////////// //////////