ยากอบ – James บทที่ 5

ยากอบ 5:1 นี่แน่ะ ระวังเด้อ เจ้าผู้ฮั่งมี ให้ฮ้องไห้ครวญครางเด้อ ย้อนความทุกข์ที่สิเข้ามาสู่ซีวิตเจ้า 

ยากอบ 5:2 ทรัพย์สมบัติของเจ้า มันกะผุพัง แล้วมอดมันกะกัดกินเสื้อผ้าหน้าแพรของเจ้านำ

ยากอบ 5:3 เงินทองของเจ้าได้เข้าขี้เกลือแล้ว แล้วขี้เกลือฮั้นสิเป็นหลักฐานพยานฟ้องร้องเจ้า กับมันสิกินเนื้อหนังของโตเจ้าคือไฟ แม่นกล่องสมบัติฮั้น ที่เจ้าได้เมี้ยนเอาไว้เพื่อยามเวลาสุดท้าย

ยากอบ 5:4 นี่แน่ะ ค่าจ้างของคนงานที่ได้เกี่ยวข้าวในนาของเจ้า ซึ่งเจ้าได้โกงเงินเขาเอาไว้ฮั้น กะฮ้องฟ้องขึ้นมา แล้วเสียงฮ้องของคนงานที่เกี่ยวข้าวของเจ้าฮั้น ได้ซอดหูขององค์พระผู้เป็นเจ้าแล้ว แม่นผู้บัญชาการจอมโยธาสูงสุด 

ยากอบ 5:5 พวกเจ้าได้ใซ้ซีวิตอยู่ในโลกนี้อย่างสนุกสนานมัวเมา มัวแต่เอาใจใส่ให้อิ่มหนำสำราญ พอปานสัตว์พันธุ์เนื้อ คอยถ้ามื้อที่สิถืกฆ่า 

ยากอบ 5:6 เจ้าเคยตัดสินลงโทษคนผู้ซอบธรรม เคยฆ่าเขานำ แล้วพวกเขากะบ่ได้ต่อต้านเจ้าเลย 

ยากอบ 5:7 จั่งซั้น พี่น้องทั้งหลายเอ้ย ให้อดทนคอยถ้าองค์พระผู้เป็นเจ้าลงมาอีกเด้อ นี่แน่ะ ให้คอยสังเกตุซาวไฮ่ซาวนาเด้อ พวกเขาคอยถ้ายามเก็บเกี่ยวผลดีงามจากแผ่นดิน คอยถ้าจนกว่าฝนต้นปี กับฝนปลายปี 

ยากอบ 5:8 จั่งซั้น ให้พวกเจ้าอดทนคอยถ้าคือกันเด้อ ตั้งอกตั้งใจให้ดีเด้อ ด้วยว่าการมาขององค์พระผู้เป็นเจ้าฮั้น ใกล้สิมาฮอดแล้ว

ยากอบ 5:9 พี่น้องทั้งหลายเอ้ย อย่าโจมตีต่อว่ากันและกันเด้อ บ่ซั้น หย้านว่าเจ้าอาจสิถืกเพิ่นพิจารณาตัดสิน นี่แน่ะ ผู้พิพากษาอันใหญ่หลวง ยืนอยู่หน้าประตูแล้ว 

ยากอบ 5:10 พี่น้องทั้งหลายของข้อยเอ้ย ให้เอาพวกผู้เป็นปากเป็นเสียงเป็นแบบอย่าง ในการทนทุกข์กับการอดทน แม่นผู้ที่กล่าวในพระนามขององค์พระผู้เป็นเจ้า 

ยากอบ 5:11 นี่แน่ะ เฮาถือว่า ผู้ที่อดทนได้นานกะได้พรเป็นสุข พวกเจ้าเคยได้ยินเรื่องความอดทนพากเพียรของท้าวโยบ คือในสุดท้าย องค์พระผู้เป็นเจ้าได้แสดงความเมตตากับความปรานีต่อลาวอย่างหลาย 

ยากอบ 5:12 พี่น้องทั้งหลายของข้อยเอ้ย ที่สำคัญกว่าแนวอื่น กะคือ อย่าสาบานเด้อ บ่ว่าสิสาบานโดยอ้างฟ้าสวรรค์หรืออ้างแผ่นดินโลก บ่ว่าสิเป็นคำสาบานอื่นใดกะตาม กะบ่ควรเลย แต่ว่า คั่นแม่นกะให้ว่า แม่นโลด แล้วคั่นบ่แม่นกะให้ว่าบ่แม่นโลด บ่ซั้น หย้านว่า เจ้าอาจสิถืกเพิ่นพิจารณาตัดสิน 

ยากอบ 5:13 มีผู้ใดในพวกเจ้าเป็นทุกข์เป็นฮ้อนบ้อ กะให้ผู้ฮั้นอธิษฐานโลดเด้อ มีผู้ใดร่าเริงยินดีบ้อ กะให้ผู้ฮั้นร้องเพลงสดุดีสรรเสริญพระเจ้านำเด้อ

ยากอบ 5:14 มีผู้ใดในพวกเจ้าเป็นเจ็บเป็นไข้บ้อ กะให้ผู้ฮั้นเอิ้นพวกผู้หลักผู้ใหญ่ที่เบิ่งแยงกลุ่มผู้เซื่อมาเด้อ แล้วให้พวกเขาอธิษฐานเผื่อเด้อ เจิมผู้เจ็บไข้ฮั้นด้วยน้ำมันในพระนามขององค์พระผู้เป็นเจ้า 

ยากอบ 5:15 คือ การอธิษฐานเว้านำพระเจ้าด้วยความเซื่อสิซ่อยผู้เจ็บไข้ให้พ้นฮั้น แล้วองค์พระผู้เป็นเจ้ากะสิโปรดให้เขาเซาเป็นดีคือเก่า กับคั่นเขาได้เฮ็ดบาปเป็นเหตุ เขากะสิได้ฮับการอภัย 

ยากอบ 5:16 ให้พวกเจ้าสารภาพความผิดบาปต่อกันและกันเด้อ กับให้อธิษฐานเผื่อกันและกันนำเด้อ กะเพื่อพวกเจ้าสิได้หายโรคภัยไข้เจ็บ คือคำอธิษฐานที่ออกจากใจจริงของผู้ชอบธรรมฮั้น มีอิทธิพลหลายในการเกิดผล

ยากอบ 5:17 ท้าวเอลียาห์กะเป็นธรรมซาติมนุษย์คือจั่งพวกเฮา แล้วลาวได้อธิษฐานขอต่อพระเจ้าอย่างจริงจังบ่ให้ฝนตก แล้วฝนกะบ่ได้ตกใส่แผ่นดินเป็นเวลาฮอดสามปีหกเดือนเต็ม

ยากอบ 5:18 กับลาวได้อธิษฐานขอต่อพระเจ้าอีกเทื่อหนึ่ง แล้วฝนจั่งตกลงมาจากฟ้าสวรรค์อีก แผ่นดินโลกจั่งได้ออกดอกเกิดผลคือเก่า 

ยากอบ 5:19 พี่น้องทั้งหลายเอ้ย คั่นคนใดในพวกเจ้าหลงผิดไปจากทางความจริง แล้วอีกผู้หนึ่งซ่อยซักจูงให้เขาหันกลับมาอีก

ยากอบ 5:20 กะให้เขา ผู้ที่ซ่อยคนบาปให้หันกลับมาจากทางผิดของเขา ฮู้ไว้ว่า ได้ซ่อยซีวิตคนให้รอดพ้นจากตาย กับได้ปกปิดการบาปไว้อย่างหลายแล้ว