ฮีบรู – Hebrews บทที่ 7

ฮีบรู 7:1 คือ ท่านเมลคีเซเดคนี้ เป็นกษัตริย์ของเมืองซาเลม กับท่านเป็นปุโรหิตผู้นำเครื่องถวายของพระเจ้าผู้สูงสุด แม่นผู้นี้ล่ะ ที่ได้พ้อกับเฒ่าอับราฮัมนำทาง บัดลาวพวมกลับมาจากการสู้รบจัดการพวกกษัตริย์ฮั่น แล้วท่านจั่งอวยพรเฒ่าอับราฮัมอยู่ฮั่น 

ฮีบรู 7:2 ซึ่งเฒ่าอับราฮัม ได้ถวายของหนึ่งในสิบจากของริบทั้งเมิ้ดให้ท่านเมลคีเซเดค ผู้มีซื่อแปลว่า กษัตริย์ผู้ยุติธรรม เป็นกษัตริย์ของเมืองซาเลม ซึ่งมีความหมายว่า กษัตริย์แห่งสันติภาพ 

ฮีบรู 7:3 แล้วท่านผู้นี้ พ่อแม่กะบ่มี เซื้อสายวงศ์ตระกูลกะบ่มี มื้อเกิดมื้อตายกะบ่มี แต่มีลักษณะคือจั่งพระบุตรของพระเจ้า มียศตำแหน่งเป็นปุโรหิตผู้นำเครื่องถวายบูซาต่อพระเจ้าอยู่ตลอดนิรันดร์กาล 

ฮีบรู 7:4 บัดนี้ ให้คึดเบิ่งดู ท่านผู้นี้ยิ่งใหญ่ส่ำใด ที่ว่าขนาดเฒ่าอับราฮัมผู้เป็นพ่อตระกูลของคนยิวเฮา ลาวกะยังได้ถวายหนึ่งในสิบจากของที่ริบมาฮั้นให้ท่าน 

ฮีบรู 7:5 แท้จริงแล้ว ซายในเซื้อสายของเลวี ที่ได้ฮับตำแหน่งเป็นปุโรหิตผู้นำเครื่องถวายฮั้น มีคำสั่งไว้ในกฎบัญญัติว่า ให้พวกเขาฮับของหนึ่งในสิบลดจากของที่พี่น้องประซาซนถวาย เถิงแม้นว่าพวกเขาได้เกิดจากเอวของอับราฮัมคือกัน

ฮีบรู 7:6 แต่ส่วนท่านเมลคีเซเดคผู้นี้ ท่านบ่แม่นเซื้อสายของพวกเลวี แต่กะยังได้ฮับของหนึ่งในสิบลดจากเฒ่าอับราฮัม แล้วได้อวยพรลาว ผู้ที่ได้ฮับคำมั่นสัญญาทั้งหลายจากพระเจ้า 

ฮีบรู 7:7 แล้วบัดนี้ แนวที่คัดค้านบ่ได้กะคือว่า ตามหลักแล้ว ผู้ที่น้อยกว่ากะต้องเป็นฝ่ายฮับพรจากผู้ที่ใหญ่กว่า 

ฮีบรู 7:8 อยู่ที่นี่ คนธรรมดาซึ่งอนิจจังกะยังได้ฮับของถวายหนึ่งในสิบลด แต่อยู่พู้น ท่านได้ฮับของถวายหนึ่งในสิบลด ซึ่งมีคำพยานเถิงท่านว่า ท่านดำรงอยู่เป็นอมตะ 

ฮีบรู 7:9 เว้าอีกกรณีหนึ่ง แม้นแต่ขนาด เลวีเอง ได้ฮับของถวายหนึ่งในสิบลด ลาวกะยังถวายหนึ่งในสิบลดผ่านทางเฒ่าอับราฮัมคือกัน 

ฮีบรู 7:10 คือ แม้นแต่เลวียังอยู่ในเอวของพ่อปู่เขา บัดท่านเมลคีเซเดคได้พ้อกับอับราฮัม

ฮีบรู 7:11 จั่งซั้น คั่นสิเป็นคนดีพร้อมได้ โดยตามระบบปุโรหิตของตระกูลเลวีฮั้น เป็นหยังสิต้องมีระบบปุโรหิตอีก คือระบบของท่านเมลคีเซเดค ซึ่งบ่ได้เป็นตามระบบเลวีของเฒ่าอาโรน (คือในระบบเลวีฮั้นประซาซนได้ฮับมอบแต่กฎบัญญัติ)

ฮีบรู 7:12 คือว่า บัดยามระบบปุโรหิตผู้นำเครื่องถวายถืกเปลี่ยนไปแล้ว จำเป็นที่ว่าระบบกฎบัญญัติกะสิต้องเปลี่ยนนำ 

ฮีบรู 7:13 คือ ท่านผู้ฮั้นที่พวมเว้าอยู่หนิ ท่านกะอยู่ในวงศ์ตระกูลอีกตระกูลหนึ่ง ซึ่งจากวงศ์ตระกูลฮั้น บ่เคยมีใผเข้าปฏิบัติหน้าที่เป็นปุโรหิตอยู่ต่อหน้าแท่นบูซาฮั้นเลย 

ฮีบรู 7:14 จั่งซั่น มันเห็นได้ซัดแล้วว่า องค์พระผู้เป็นเจ้าของเฮา ได้มาจากเซื้อสายวงศ์ตระกูลยูดาห์ ซึ่งเฒ่าโมเสสเองบ่เคยได้เว้าเถิงเรื่องปุโรหิตผู้นำเครื่องถวายเลย 

ฮีบรู 7:15 แล้วยิ่งกว่าฮั้นอีก คั่นสิมีปุโรหิตผู้นำเครื่องถวายฯ อีกผู้หนึ่งเป็นขึ้นมาตามแบบอย่างของท่านเมลคีเซเดคฮั้น

ฮีบรู 7:16 ซึ่งผู้เพิ่นได้มาแล้ว แต่บ่แม่นตามระบบกฎบัญญัติที่ใซ้กับซีวิตอนิจจังฝ่ายเนื้อหนัง แต่ตามฤทธิ์เดชที่สามารถให้ซีวิตอมตะที่บ่ฮู้จักสิ้นสุดเลย

ฮีบรู 7:17 ซึ่งพระเจ้าได้ยืนยันเถิงผู้ฮั้นว่า “ท่านเป็นปุโรหิตผู้นำเครื่องถวายฯ ตลอดนิรันดร์กาล ตามยศตำแหน่งของท่านเมลคีเซเดค”

ฮีบรู 7:18 ด้วยว่า ฝ่ายระบบกฎบัญญัติอันเก่าฮั้น กะได้ถืกการยกเลิกไปแล้ว ย้อนความอ่อนด้อยของมัน ที่บ่สามารถให้ซีวิตได้ เลยบ่มีประโยชน์อีกต่อไป 

ฮีบรู 7:19 ย้อนว่า ระบบกฎบัญญัติฮั้น บ่สามารถที่สิเฮ็ดอีหยังให้เถิงความดีพร้อมสมบูรณ์แบบได้เลย แต่ว่าไทเฮามีความหวังอันมั่นคงดีกว่าฮั้นอีก สามารถให้คนเฮาเข้ามาใกล้ซิดกับพระเจ้าได้ 

ฮีบรู 7:20 แล้ว เนื่องจากว่า เพิ่นบ่ได้ฮับตำแหน่งเป็นมหาปุโรหิตผู้สูงสุดฯ โดยบ่มีการฮับปากกล่าวคำปฏิญาณไว้ก่อน 

ฮีบรู 7:21 (คือ พวกปุโรหิตฮั้น ได้เข้าฮับตำแหน่งโดยบ่ต้องมีการกล่าวคำปฏิญาณไว้ก่อน แต่ส่วนผู้นี้ได้มีการกล่าวคำปฏิญาณไว้ก่อนโดยพระเจ้า ที่บอกเพิ่นว่า “องค์พระผู้เป็นเจ้าฮั้นได้ปฏิญาณแล้ว ซึ่งสิบ่เปลี่ยนใจท้อถอย ‘ท่านเป็นมหาปุโรหิตผู้สูงสุดฯ อยู่ตลอดกาล ตามยศตำแหน่งของท่านเมลคีเซเดค'”) 

ฮีบรู 7:22 แล้วอันนี้รับรองไว้ว่า พระเยซูได้เป็นสื่อ ให้มีพันธสัญญาดีกว่าระบบเดิมฮั้น 

ฮีบรู 7:23 คือ ส่วนปุโรหิตผู้นำเครื่องถวายฯ ในระบบเดิมฮั้น ต้องมีหลายคนไว้เพื่อสืบทอดตำแหน่ง ย้อนว่าความตายขัดขวาง 

ฮีบรู 7:24 แต่ฝ่ายเพิ่นผู้นี้ เพิ่นมีซีวิตอมตะดำรงอยู่ตลอดนิรันดร์กาล ปุโรหิตผู้นำเครื่องถวายฯ ฮั้น กะบ่มีการเปลี่ยนตำแหน่งเลย 

ฮีบรู 7:25 คั่นจั่งซั่น เพิ่นสามารถซ่อยคนทั้งหลายให้รอดพ้นเถิงที่สุด แม่นผู้ที่มาหาพระเจ้าโดยทางเพิ่น ด้วยว่าเพิ่นดำรงอยู่ตลอดนิรันดร์กาล เพื่อไกล่เกลี่ยต่อพระเจ้าเพื่อเขาทั้งหลายอยู่เสมอ 

ฮีบรู 7:26 คือ มหาปุโรหิตผู้สูงสุดฯ แบบนี้ กะเหมาะสมแล้วสำหรับไทเฮา คือเพิ่นเป็นผู้บริสุทธิ์ที่บ่มีกลอุบาย บ่มีมลทิน ต่างจากพวกคนบาป แล้วบัดนี้ได้ประทับอยู่ในที่สูงสุด เหนือกว่าฟ้าสวรรค์ขึ้นไปอีก 

ฮีบรู 7:27 ซึ่งเพิ่นบ่ต้องนำเครื่องบูซามาถวายฯ อยู่คู่มื้อ คือจั่งพวกมหาปุโรหิตผู้นำเครื่องถวายฯ หมู่ฮั่น ผู้ที่ต้องนำเครื่องถวายบูซาฯ เพื่อลบล้างความผิดบาปของโตเองก่อน แล้วจั่งเพื่อประซาซนตอนหลัง โดยว่า เพิ่นได้ถวายเครื่องบูซาฯ เพียงแต่เทื่อเดียว บัดตอนเพิ่นถวายโตเพิ่นเอง 

ฮีบรู 7:28 ย้อนว่า ฝ่ายกฎบัญญัติฮั้น มีแต่แต่งตั้งคนธรรมดาที่อ่อนกำลังให้เป็นมหาปุโรหิตผู้สูงสุดฯ แต่คำปฏิญาณที่พระเจ้าได้กล่าวไว้ฮั้น ซึ่งมาภายหลังระบบกฎบัญญัติ กะได้แต่งตั้งพระบุตร แม่นผู้ซึ่งฮับการดีพร้อมสมบูรณ์แบบอยู่ตลอดนิรันดร์กาล
////////// ////////// //////////