ฮีบรู – Hebrews บทที่ 4

ฮีบรู 4:1 จั่งซั้น บัดยังมีคำมั่นสัญญาคงไว้อยู่ ที่สิเข้าสู่การพักผ่อนหย่อนใจของเพิ่น กะขอให้ไทเฮามีความยำเกรง หย้านว่าสิมีผู้ใดผู้หนึ่งในพวกเจ้าขาดสิทธิ์ที่สิเข้าไปได้ 

ฮีบรู 4:2 คือ แท้จริงแล้ว ข่าวประเสริฐฮั่นได้ประกาศต่อไทเฮาอยู่แล้ว พร้อมทั้งต่อพวกปู่ย่าตาทวดนำ แต่ว่าถ้อยคำที่พวกเขาได้ยินบ่ได้เกิดผลอีหยังเลย ย้อนว่าเขาผู้ได้ยินฮั้นบ่ได้ผสมกับความเซื่อ 

ฮีบรู 4:3 ซึ่งส่วนพวกเฮาผู้ที่ได้ฮับเซื่อกะได้เข้าสู่การพักผ่อนหย่อนใจฮั้นแล้ว แต่ส่วนพวกคนผู้ที่บ่ยอมเซื่อ เพิ่นกะได้กล่าวไว้ว่า “เฮาปฏิญาณด้วยความโกรธเกรี้ยวว่า คนหมู่ฮั่นสิบ่ได้เข้าสู่การพักผ่อนหย่อนใจของเฮาเลย” แม้นแต่ว่า กิจการฮั้นสำเร็จแล้วตั้งแต่เพิ่นวางรากฐานของโลก 

ฮีบรู 4:4 คือมีตอนหนึ่งในพระคำที่เพิ่นเคยกล่าวเถิงมื้อที่เจ็ดจั่งซี้ว่า “คือในมื้อที่เจ็ดฮั่น พระเจ้าได้พักผ่อนหย่อนใจจากการงานของเพิ่นทั้งเมิ้ด” 

ฮีบรู 4:5 แล้วได้เว้าต่ออีกว่า “พวกฮั้นสิบ่ได้เข้าสู่การพักผ่อนหย่อนใจของเฮาเลย”

ฮีบรู 4:6 จั่งซั้น กะยังมีซ่องทางเปิดไว้อยู่ ว่าสิต้องมีผู้ลางคนเข้าสู่การพักผ่อนหย่อนใจได้ แต่ส่วนผู้คนที่ฮับการประกาศแต่ในคราวก่อนฮั้น เขาขาดสิทธิ์ที่สิเข้าได้เลย ย้อนความบ่เซื่อฟังของเขา

ฮีบรู 4:7 แล้วเพิ่นยังกำหนดมือหนึ่งไว้อีก โดยเว้าผ่านทางกษัตริย์ดาวิดว่า “มื้อนี้ คั่นพวกเจ้าสิฟังพระสุรเสียงของพระเจ้า กะอย่าให้ใจของพวกเจ้าแข็งกระด้างไปเด้อ” 

ฮีบรู 4:8 คือว่า คั่นเฒ่าโยชูวาให้พวกเขาเข้าสู่การพักผ่อนหย่อนใจฮั้นได้แล้ว พระเจ้าคือสิบ่ได้เว้าเถิงอีกมื้อหนึ่งในภายหน้าฮั้น 

ฮีบรู 4:9 จั่งซั้น กะยังมีการพักผ่อนหย่อนใจไว้สำหรับคนของพระเจ้า 

ฮีบรู 4:10 ย้อนว่า ผู้ที่ได้เข้าสู่การพักผ่อนหย่อนใจของพระเจ้าแล้ว ผู้ฮั้นกะได้เซาเฮ็ดการงานของโตเอง คือจั่งที่พระเจ้าได้เซาเฮ็ดการงานของเพิ่น 

ฮีบรู 4:11 จั่งซั้น ขอให้ไทเฮาอุตส่าห์ใส่ใจที่สิเข้าสู่การพักผ่อนหย่อนใจฮั้นให้ได้ เกรงว่า อาจมีผู้หนึ่งผู้ใดหลงไปตามโตอย่างของพวกฮั้นที่บ่เซื่อฟัง 

ฮีบรู 4:12 ย้อนว่า พระคำของพระเจ้าประกอบด้วยซีวิตกับฤทธานุภาพ คมยิ่งกว่าดาบสองคมเล่มใดๆ ทั้งเมิ้ด สามารถแทงซอดผ่าจิตกับวิญญาณของคนออกจากกันได้ ตลอดฮอดข้อกระดูกกับไขในกระดูก กับสามารถวินิจฉัยฮู้ฮอดความคึดกับความมุ่งหมายในใจคนได้ 

ฮีบรู 4:13 แล้วกะบ่มีอีหยังที่ถืกปิดเสื่องไว้จากสายตาของเพิ่นได้ แต่เมิ้ดคู่อันคู่แนวปรากฏแจ้งจ่างป่างต่อสายตาของเพิ่นอยู่แล้ว ผู้ที่เฮาคู่คนสิต้องรายงานโต 

ฮีบรู 4:14 จั่งซั้น บัดเห็นว่า เฮามีมหาปุโรหิตผู้สูงสุดฯ ที่ได้ผ่านฟ้าสวรรค์ไปแล้ว คือพระเยซูคริสต์ ผู้เป็นพระบุตรของพระเจ้า จั่งขอให้พวกเฮายึดมั่นในการที่ได้ฮับปากว่าเซื่อแล้ว 

ฮีบรู 4:15 คือ เฮาบ่ได้มีมหาปุโรหิตผู้สูงสุดฯ ที่บ่สามารถเห็นอกเห็นใจในความอ่อนแอของคนเฮา แต่ได้ถืกทดลองใจคือจั่งคนเฮาในคู่อย่าง เถิงจั่งซั้น เพิ่นกะยังบ่มีบาปเลย 

ฮีบรู 4:16 จั่งซั้น ขอให้เฮาทั้งหลายมีใจกล้า เข้ามาเถิงพระที่นั่งแห่งพระกรุณาธิคุณของเพิ่น เพื่อเฮาสิฮับความเมตตา กับพระกรุณาธิคุณที่สิซ่อยเฮาในยามต้องการ
////////// ////////// //////////