ฮีบรู – Hebrews บทที่ 2

ฮีบรู 2:1 จั่งซั้น พวกเฮาควรสิใส่ใจอย่างจริงจังในถ้อยคำแนวที่พวกเฮาได้ยินได้ฟังมาแล้วฮั่น เพื่อพวกเฮาสิบ่หลงลอยออกไป 

ฮีบรู 2:2 คือ คั่นถ้อยคำที่ให้มาทางเทวทูตฮั้น ปรากฏว่าเป็นจริง แล้วคั่นว่าการล่วงละเมิด กับการบ่เซื่อฟังคู่อย่าง ได้ถืกการตอบสนองอันยุติธรรมแล้ว 

ฮีบรู 2:3 พวกคนเฮาสิพ้นได้จั่งใดคั่นเฮาสิละเลยต่อความรอดพ้นอันใหญ่หลวงนี้ ที่องค์พระผู้เป็นเจ้าได้เริ่มกล่าวเถิงมาก่อน แล้วได้ฮับการยืนยันจากผู้คนที่ได้ยินเพิ่นเว้าฮั้น 

ฮีบรู 2:4 ซึ่งพระเจ้าได้สนับสนุน โดยเครื่องหมายอันสำคัญ กับแนวเป็นตางึด พร้อมทั้งการอัศจรรย์ต่างๆ ซึ่งประกอบด้วยฤทธิ์อำนาจ กับพรสวรรค์พิเศษจากพระวิญญาณ ตามพระประสงค์ของพระเจ้า 

ฮีบรู 2:5 แล้วโลกใหม่ที่สิมาในภายหน้าที่เฮาเว้ามาหนิ เพิ่นสิบ่ได้มอบ ไว้อยู่ในการเบิ่งแยงของพวกเทวทูตดอก 

ฮีบรู 2:6 แต่ ตามมีคำพยากรณ์หม่องหนึ่งในพระคำว่า “มนุษย์เป็นผู้ใดล่ะ ที่พระองค์เจ้าสิต้องคำนึงเถิง หรือบุตรมนุษย์เป็นผู้ใดที่พระองค์เจ้าสิต้องเบิ่งแยงเอา 

ฮีบรู 2:7 “พระองค์เจ้าได้กำหนดให้เพิ่นมีฐานะต่ำกว่าเทวทูตเพียงหน่อยหนึ่ง กับพระองค์เจ้า ได้สวมบารมีกับเกียรติเป็นมงกุฎให้เพิ่น แล้วได้ตั้งเพิ่นไว้ให้ครอบครองอยู่เหนือฝีมือของพระองค์เจ้า 

ฮีบรู 2:8 “คือ พระองค์เจ้าได้มอบเมิ้ดทั้งมวลให้อยู่ภายใต้เท้าของเพิ่น” จั่งซั้น ในการที่พระองค์เจ้าได้มอบเมิ้ดคู่แนวไว้ให้อยู่ใต้อำนาจของเพิ่นฮั่น กะบ่มีแนวใดจักอันเลยที่บ่ได้อยู่ใต้อำนาจการปกครองของเพิ่น แต่บัดนี้ พวกเฮายังบ่ทันเห็นคู่แนวอยู่ใต้การปกครองของเพิ่น

ฮีบรู 2:9 แต่ว่า พวกเฮาได้เห็นพระเยซู ผู้เพิ่นฮับสภาพต่ำกว่าเทวทูตเพียงหน่อยหนึ่ง แล้วได้ถืกทุกข์ทรมานเถิงตาย จั่งได้ฮับพระสิริกับพระเกียรติเป็นมงกุฎ คือเพิ่นซิมความตายเพื่อมวลมนุษย์เฮาคู่คน ย้อนพระกรุณาธิคุณของพระเจ้า

ฮีบรู 2:10 คือสมควรอยู่แล้ว ซึ่งว่าสารพัดคู่แนวเป็นของเพิ่น ซึ่งคู่แนวฮั้น กะมีมาโดยเพิ่นนำ ที่เพิ่นสินำเอาบุตรหลายๆ คนมาสู่พระสิริ เพื่อเพิ่นสิเป็นประมุข เป็นนายแห่งความรอดพ้นของพวกเขา ซึ่งเถิงที่สำเร็จโดยการทนทุกข์ทรมานของเพิ่น

ฮีบรู 2:11 โดยว่า ทั้งผู้เพิ่นที่เฮ็ดให้พวกเขาบริสุทธิ์ กับพวกเขาที่พวมฮับการบริสุทธิ์ฮั่น กะเป็นอันหนึ่งอันเดียวกัน จั่งซั้น เพิ่นจั่งบ่ละอายเลยที่สิเอิ้นพวกเขาว่าพี่น้อง 

ฮีบรู 2:12 จั่งซั้น เพิ่นจั่งเว้าว่า “เฮาสิประกาศพระนามของพระองค์เจ้าให้พี่น้องของเฮา เฮาสิร้องเพลงสรรเสริญพระองค์เจ้าอยู่ระหว่างกลางกลุ่มผู้เซื่อ” 

ฮีบรู 2:13 กับได้เว้าอีกว่า “เฮาสิไว้วางใจในพระองค์เจ้า” แล้วอีกว่า “เฮาเองกะอยู่ที่นี่ กับบุตรทั้งหลายที่พระเจ้าได้ประทานให้เฮา” 

ฮีบรู 2:14 คือ ในกรณีที่พวกบุตรทั้งหลายได้มีส่วนฮ่วมเป็นเลือดเนื้อ ในทำนองเดียวกันเพิ่นเองกะได้สวมสภาพเป็นเลือดเนื้อคือกัน เพื่อโดยการตายฮั้น เพิ่นสิทำลายผู้ฮั้นที่เคยมีอำนาจแห่งความตาย คือเจ้ามารซาตานฮั่นล่ะ 

ฮีบรู 2:15 แล้วจั่งปลดปล่อยผู้คนทั้งหลายที่หย้านความตายให้ออกมา คือผู้ที่ถืกผูกมัดไว้ให้เป็นทาสของมันตลอดซั่วซีวิต

ฮีบรู 2:16 ความจริงแล้ว เพิ่นกะบ่ได้ซ่อยเหลือพวกเทวทูต แต่ได้ซ่อยเหลือพี่น้องผู้เป็นเซื้อสายของเฒ่าอับราฮัมฮั้น 

ฮีบรู 2:17 จั่งซั้น เพิ่นได้ฮับสภาพคือจั่งพี่น้องคนเฮาในเมิ้ดคู่อย่าง เพื่อสิได้เป็นมหาปุโรหิตผู้สูงสุดของเขา มีความเมตตา ซื่อสัตย์ภักดีในคู่อย่างที่เกี่ยวกับพระเจ้า เพื่อถวายเครื่องบูซาที่สิลบล้างความผิดบาปของคนเฮาทั้งหลาย 

ฮีบรู 2:18 ซึ่งในการที่เพิ่นเองได้ทนทุกข์ทรมานฮั่น เพิ่นจั่งได้ผ่านการทดลอง จั่งซั้น เพิ่นสามารถหนุนใจซ่อยผู้ที่ถืกการทดลองได้
////////// ////////// //////////