ฮีบรู – Hebrews บทที่ 1
ฮีบรู 1:1 ในสมัยก่อน พระเจ้าเคยเว้าเคยจากับปู่ย่าตาทวดของพวกเฮา เป็นครั้งเป็นยามโดยวิธีแนวต่างๆ ผ่านทางผู้เป็นปากเป็นเสียงของเพิ่น
ฮีบรู 1:2 แต่ในสมัยคู่มื้อนี้ เพิ่นได้เว้าได้จากับพวกคนเฮาโดยผ่านทางพระบุตรของเพิ่น แม่นผู้ที่พระเจ้าได้แต่งตั้งให้เป็นผู้มีกรรมสิทธิ์ในเมิ้ดคู่อันคู่แนว ซึ่งโดยทางพระบุตรฮั้น เพิ่นได้สร้างกัปกาลจักรวาลทั้งหลายนำ
ฮีบรู 1:3 ซึ่งพระบุตรฮั้น ประกอบด้วยแสงบารมีอันรุ่งโรจน์ของพระเจ้า กับเป็นภาพลักษณ์ของเพิ่นอย่างตรงเปะ ทั้งเป็นผู้ที่ค้ำจุนฮักษาเมิ้ดคู่อันคู่แนวไว้ในจักรวาลให้คงอยู่ โดยคำสั่งอันมีฤทธิ์อำนาจของเพิ่น แล้วตอนเพิ่นได้ชำระล้างบาปของคนเฮาด้วยเพิ่นเองให้สิ้นเซิงแล้ว เพิ่นจั่งได้ประทับอยู่ทางขวาของพระเจ้า ผู้เพิ่นประกอบด้วยบารมีในที่สูงสุด
ฮีบรู 1:4 จั่งได้ฮับฐานะอันใหญ่ยิ่งกว่าพวกเทวทูตทั้งหลายฮั้น คือเพิ่นมีพระนามที่ประเสริฐกว่าพวกเขา โดยกรรมสิทธิ์ในมรดกของเพิ่น
ฮีบรู 1:5 คือ มีเทวทูตองค์ใดที่พระเจ้าเคยเว้าว่า “ท่านเป็นบุตรของเฮา แม่นมื้อนี้ล่ะ เฮาให้การกำเนิดแก่ท่าน” แล้วยังเว้าอีกว่า “เฮาสิเป็นคือพ่อของท่าน แล้วท่านสิเป็นคือบุตรของเฮา”
ฮีบรู 1:6 แล้วอีกเทื่อหนึ่ง บัดพระเจ้าให้พระบุตร ลูกคิงๆ ของเพิ่นเกิดมาในโลก เพิ่นจั่งเว้าว่า “ให้พวกเทวทูตทั้งปวงของเฮากราบไหว้ท่านเด้อ”
ฮีบรู 1:7 แล้วส่วนพวกเทวทูตฮั้น พระเจ้ากล่าวอีกว่า “ท่านได้บันดาลให้เทวทูตของท่านเป็นดวงวิญญาณ กับให้เป็นผู้ฮับใซ้ของท่าน อันเป็นคือแปวไฟ”
ฮีบรู 1:8 แต่สำหรับพระบุตรฮั้น เพิ่นว่า “ราชบัลลังก์ของท่านคงอยู่เป็นนิตย์ แล้วคทาอันซอบธรรมฮั้นเป็นสัญญลักษณ์ของราชอาณาจักรท่าน
ฮีบรู 1:9 “คือท่านฮักความซอบธรรม แล้วเกลียดซังแนวบ่เป็นธรรม จั่งซั้น พระเจ้าของท่านได้เจิมท่านด้วยน้ำมันแห่งความซื่นซมยินดีหลายกว่าพวกสหายของท่านฮั้น”
ฮีบรู 1:10 กับว่า “ในตำอิดฮั่น ท่านประมุข ได้วางฐานรากของแผ่นดินโลก แล้วฟ้าสวรรค์เป็นที่แสดงฝีมือของท่าน
ฮีบรู 1:11 “แนวหมู่ฮั้นกะสิพังทลายพินาศไป แต่ท่านดำรงอยู่ตลอดกาล แนวหมู่ฮั้นกะสิเก่าแก่ไปคือจั่งเสื้อผ้าหน้าแพร
ฮีบรู 1:12 “แล้วท่านสิพับแนวหมู่ฮั้นไว้คือปานเสื้อคลุม ซึ่งมันสิถืกเปลี่ยนแปลงไป แต่ว่าท่านสิคงอยู่คือเก่า แล้ววันเดือนปีของท่านสิบ่มีสิ้นสุดเลย”
ฮีบรู 1:13 แต่ว่าเคยมีเทวทูตองค์ใดแหน่ ที่พระเจ้าเคยเว้าว่า “เซิญนั่งอยู่ทางขวาของเฮาเถอะ จนกว่าเฮาสิเฮ็ดให้พวกศัตรูของท่านเป็นตั่งพักเท้าของท่าน”
ฮีบรู 1:14 คือ พวกเทวทูตทั้งหลายฮั้น เป็นวิญญาณฮับใซ้ที่ถืกใซ้ออกไปปรนนิบัติเบิ่งแยงผู้คนทั้งหลาย ที่สิฮับความรอดพ้นบ่แม่นบ้อ
////////// ////////// //////////