ฮีบรู – Hebrews บทที่ 13

ฮีบรู 13:1 ให้ความฮักแพงระหว่างพี่น้องดำเนินอยู่เสมอไปเด้อ

ฮีบรู 13:2 แล้วอย่าลืมที่สิต้อนฮับแขกแปลกหน้า ย้อนว่า การเฮ็ดแนวฮั้น ผู้ลางคนเคยต้อนฮับเทวทูตโดยบ่ฮู้เมื่อโต 

ฮีบรู 13:3 แล้วกะให้คึดพ้อหมู่พวกที่พวมถืกล่ามโซ่จองจำไว้เด้อ ผู้ถืกเคี่ยวเข็ญย้อนเห็นแก่ข่าวประเสริฐ ถือว่าพวกเจ้าได้ถืกคือจั่งเขา 

ฮีบรู 13:4 การแต่งงานกันเป็นสิ่งที่ถืกต้อง เป็นที่นับถือของคนทั้งหลาย กับเตียงนอนของเขากะเป็นที่บริสุทธิ์บ่มีมลทินเลย แต่ส่วนผู้ที่ล่วงประเวณี กับผู้ที่เล่นซู้ผัวเมียกันฮั้น พระเจ้าสิพิพากษาลงโทษ 

ฮีบรู 13:5 ขออย่าให้พฤติกรรมของพวกเจ้ามีการโลภการอิจฉาเลย แต่ให้พอใจในสิ่งของที่โตมี ย้อนว่า พระเจ้าเพิ่นเองกะยังกล่าวไว้ว่า “เฮาสิบ่หนีจากเจ้า หรือปะถิ้มเจ้าจักเทื่อ” 

ฮีบรู 13:6 เพื่อพวกเฮาสิสามารถเว้าด้วยใจกล้าว่า “องค์พระผู้เป็นเจ้าเป็นพระผู้ซ่อยของข้อย จั่งซั้น ข้อยสิบ่หย้านอีหยังเลย มีอีหยังบ้อ ที่มนุษย์สิสามารถเฮ็ดใส่ข้อยได้” 

ฮีบรู 13:7 อย่าลืมคนหมู่ฮั้นที่ปกครองเหนือพวกเจ้าเด้อ คือผู้ที่เคยได้บอกสอนพระคำของพระเจ้าให้พวกเจ้า จั่งให้ตามความเซื่อของเขาเป็นแบบอย่างเด้อ โดยพิจารณาเบิ่งผลซีวิตของเขา 

ฮีบรู 13:8 พระเยซูคริสต์ยังคือเก่าอยู่เสมอ บ่ว่าในอดีต ในปัจจุบัน จนฮอดตลอดนิรันดร์กาล

ฮีบรู 13:9 อย่าหลงไปตามคำสอนต่างๆ นานา อันแปลกๆ ย้อนว่ามันเป็นการดีอยู่แล้ว ที่มีใจเข้มแข็ง ตั้งมั่นอยู่ในพระกรุณาธิคุณ บ่แม่นวุ่นแต่ในพิธีรีตองเรื่องแนวอยู่แนวกิน ว่าอีหยังผิดอีหยังถืก ซึ่งบ่เคยเป็นประโยชน์ให้กับผู้ที่มั่วแต่ในฮั้น 

ฮีบรู 13:10 คือ บัดนี้พวกเฮามีแท่นบูซาอีกแท่นหนึ่ง ซึ่งผู้ที่ปรนนิบัติในวิหารเคลื่อนที่เดิมฮั้น บ่มีสิทธิ์กินได้เลย

ฮีบรู 13:11 โดยว่า ซากศพของสัตว์ซุมฮั่น ที่มหาปุโรหิตผู้สูงสุดฯ ได้นำเอาเลือดของมัน เข้าไปในสถานศักดิ์สิทธิ์เพื่อเป็นการบูซาลบล้างบาปฮั้น กะต้องเอาออกไปเผาอยู่นอกเขตค่าย

ฮีบรู 13:12 จั่งซั้น พระเยซูจั่งทนทุกข์ทรมานอยู่นอกเขตประตูค่ายคือกัน เพื่อซำระให้ประซาซนบริสุทธิ์ด้วยพระโลหิตของเพิ่นเอง 

ฮีบรู 13:13 จั่งซั้น ให้คนเฮาออกไปหาเพิ่นอยู่นอกค่ายฮั้น แล้วยอมฮับเอาคำดูหมิ่นเหยียดหยามนำเพิ่น

ฮีบรู 13:14 โดยว่า อยู่ทางนี้ พวกเฮาบ่มีเมืองที่สิอาศัยอยู่อันถาวร แต่ว่าพวกเฮาซอกหาเมืองฮั้น ที่สิมาในภายหน้า 

ฮีบรู 13:15 จั่งซั้น ขอให้พวกเฮาถวายคำสรรเสริญตลอดไป โดยทางพระเยซูฮั้น เป็นเครื่องบูซาแด่พระเจ้า เป็นผลปากของพวกเฮา ที่ถวายคำขอบพระคุณแด่พระนามของเพิ่น 

ฮีบรู 13:16 แต่อย่าลืมที่สิเฮ็ดการดี กับแบ่งปันข้าวของซ่อยซึ่งกันและกันเด้อ ย้อนการเฮ็ดจั่งซี้ เป็นเครื่องถวายที่พระเจ้าพึงพอใจหลาย 

ฮีบรู 13:17 ให้ยอมเซื่อฟังพวกผู้ปกครองของพวกเจ้า ด้วยใจอ่อนน้อมเด้อ แม่นพวกเขาคอยเบิ่งแยงจิตวิญญาณของพวกเจ้าไว้ แล้วสิต้องให้คำรายงานต่อพระเจ้านำ แต่ขอเป็นว่า เขาสิรายงานด้วยความซื่นซมยินดี บ่แม่นด้วยความเศร้าใจ ซึ่งสิบ่ได้เป็นประโยชน์ให้พวกเจ้า 

ฮีบรู 13:18 ให้ซ่อยอธิษฐานเพื่อพวกเฮาเด้อ คือ มีความเซื่อมั่นว่า จิตใต้สำนึกของพวกเฮาโปร่งใสดี ปรารถนาดำเนินซีวิตอย่างมีเกียรติในคู่อย่าง

ฮีบรู 13:19 แต่ข้อยขอวิงวอนพวกเจ้าให้อธิษฐานเพื่อข้อยเป็นพิเศษ เพื่อข้อยสิได้กลับไปหาพวกเจ้าในไวๆ นี้ 

ฮีบรู 13:20 บัดนี้ ขอให้พระเจ้าแห่งสันติภาพ ผู้บันดาลให้พระเยซูเจ้าของเฮาเป็นขึ้นมาจากตาย แม่นผู้เลี้ยงแกะอันใหญ่หลวงฮั้น โดยทางพระโลหิตของพันธสัญญา ที่ดำรงอยู่ตลอดกาล 

ฮีบรู 13:21 ขอให้พระเจ้าซ่อยให้พวกเจ้าเถิงที่สมบูรณ์แบบในการดีคู่อย่าง ตามพระประสงค์ของเพิ่น ซึ่งเฮ็ดการงานของเพิ่นในพวกเจ้าตามที่พึงพอใจในสายตาของเพิ่น โดยทางพระเยซูคริสต์ จั่งขอให้พระสิริจงมีแด่เพิ่นตลอดไปเป็นนิตย์ อาเมน 

ฮีบรู 13:22 สุดท้ายนี้ พี่น้องทั้งหลายเอ้ย ข้อยขอวิงวอนพวกเจ้า ให้ทนฟังคำเตือนสติของข้อยนี้เด้อ ที่ข้อยได้เขียนเป็นน้อยคำนี้มายังพวกเจ้า 

ฮีบรู 13:23 แล้วให้ฮู้กันว่า ท้าวทิโมธี ผู้เป็นน้องของพวกเฮาฮั้น ได้ปล่อยออกจากการจองจำแล้ว แล้วคั่นเขามาไวๆ นี้ ข้อยกะสิได้มาหาพวกเจ้าอยู่นำกันกับเขา

ฮีบรู 13:24 บัดนี้ ขอฝากความคึดฮอดไปยังพวกผู้ปกครองของพวกเจ้าแหน่เด้อ กับคนของพระเจ้าทั้งหลายนำแหน่ พวกพี่น้องซาวอิตาลีที่อยู่ทางพี้ได้ฝากความคึดฮอดมายังพวกเจ้านำ 

ฮีบรู 13:25 ขอพระกรุณาธิคุณของพระเจ้าดำรงอยู่กับพวกเจ้าทั้งหลายเทอญ อาเมน [เขียนเถิงซาวฮีบรู ส่งมาโดยนายทิโมธี]