ฮีบรู – Hebrews บทที่ 9

ฮีบรู 9:1 แท้จริงแล้ว แม้นแต่พันธสัญญาเดิมฮั้น มันกะยังมีกฎระเบียบต่างๆ ในพิธีการปรนนิบัติถวายพระเจ้า กับมีสถานศักดิ์สิทธิ์บริสุทธิ์อยู่ทางโลกนี้นำ 

ฮีบรู 9:2 โดยว่า มีวิหารเคลื่อนที่ซึ่งตกแต่งจัดเตรียมไว้แล้ว บริเวณนอกมีคันประทีป มีโต๊ะวางของ กับมีขนมปังตั้งไว้ บริเวณนี้เอิ้นว่า สถานศักดิ์สิทธิ์บริสุทธิ์ 

ฮีบรู 9:3 แล้วอยู่ทางหลังม่านซั้นใน เป็นส่วนของวิหารที่เอิ้นว่า หม่องศักดิ์สิทธิ์บริสุทธิ์ที่สุด 

ฮีบรู 9:4 ซึ่งในบริเวณฮั่น มีแท่นบูซาทองคำ เป็นที่เผาถวายเครื่องหอมบูซา กับมีหีบพันธสัญญาที่มีทองคำเคลือบไว้คู่ด้าน ในหีบฮั้นได้มีโถทองคำซึ่งมีมานาใส่ไว้ กับมีไม้เท้าของเฒ่าอาโรนที่งอกออกซ่อ กับมีแผ่นหินสองแผ่นที่มีพันธสัญญาฮั่นจารึกไว้ 

ฮีบรู 9:5 แล้วอยู่เทิงฝาหีบฮั่น ได้มีฮูปเทวาเครูบแห่งพระสิริสองฮูป กางปีกคลุมพระที่นั่งกรุณาไว้ เรื่องแนวหมู่นี้เฮาสิเว้ารายละเอียดยังบ่ทันได้ 

ฮีบรู 9:6 บัดตอนจัดเตรียมแนวหมู่นี้ไว้จั่งซี้แล้ว พวกปุโรหิตผู้นำเครื่องถวายฯ ได้เข้าบริเวณนอกของวิหารเคลื่อนที่ เพื่อเฮ็ดพิธีการปรนนิบัติถวายต่างๆ 

ฮีบรู 9:7 แต่ฝ่ายบริเวณข้างใน มหาปุโรหิตผู้สูงสุดฯ ได้เข้าไปเพียงแต่ปีละเทื่อ จั่งนำเอาเลือดเข้าไปนำ ซึ่งเขาต้องถวายเพื่อความผิดบาปของโตเองก่อน แล้วจั่งเพื่อประซาซน สำหรับการผิดพลาดที่พวกเขาเฮ็ดโดยบ่ฮู้เมื่อโต 

ฮีบรู 9:8 บัดนี้ พระวิญญาณกะซี้แจงว่า ระบบการเข้าไปในที่ศักดิ์สิทธิ์บริสุทธิ์ที่สุดฮั้น ยังบ่ทันถืกเปิดเผยตอนวิหารเคลื่อนที่อันเดิมยังตั้งไว้อยู่ 

ฮีบรู 9:9 คือ ระบบเดิมฮั้น เป็นแต่ภาพพจน์เล็งเถิงโตจริงที่เห็นแล้วในสมัยนี้ ซึ่งระบบเดิมได้มีการถวายของฝากของต้อน กับเครื่องถวายบูซาต่างๆ ซึ่งแนวหมู่นี้ บ่สามารถเฮ็ดให้จิตใต้สำนึกผิดซอบเถิงที่ดีพร้อมของผู้ถวายฮั้นเลย

ฮีบรู 9:10 ซึ่งเป็นแต่เพียงเรื่องของกินของดื่ม กับพิธีซำระล้างต่างๆ กับพิธีการต่างๆ ที่ให้มีไว้สำหรับเนื้อหนัง จนกว่าสิฮอดยามแก้ไขระบบฮั้น 

ฮีบรู 9:11 แต่ว่า พระคริสต์ได้มาเป็นมหาปุโรหิตผู้สูงสุดฯ ของแนวดีงามที่สิมาในภายหน้า ซึ่งเป็นระบบของวิหารระบบใหม่ที่ยิ่งใหญ่ประเสริฐกว่า ที่บ่ได้สร้างด้วยมือ คือบ่ได้เป็นฝ่ายการสร้างทางโลกนี้ 

ฮีบรู 9:12 ที่บ่ได้อาศัยเลือดแพะหรือเลือดงัวน้อย แต่เพิ่นได้นำเอาพระโลหิตของเพิ่นเอง เข้าไปในที่ศักดิ์สิทธิ์บริสุทธิ์ที่สุดหม่องแท้จริงเพียงเทื่อเดียวท่อฮั้น จั่งมีความรอดพ้นคุ้มไว้ตลอดนิรันดร์กาล 

ฮีบรู 9:13 คือ คั่นการซิดเลือดงัวโตผู้ กับเลือดแพะ กับขี้เถ้างัวน้อยโตแม่ สามารถเฮ็ดให้เมิ้ดมลทินเป็นคนบริสุทธ์ได้

ฮีบรู 9:14 แฮงหลายกว่าฮั้นส่ำใด พระโลหิตของพระคริสต์ ผู้เพิ่นได้ถวายเพิ่นเองแด่พระเจ้า โดยบ่มีแป้วหรือจุดด่างเลย สามารถซำระล้างจิตใต้สำนึกผิดซอบของพวกเจ้า ให้พ้นจากการเฮ็ดแนวอนิจจัง เพื่อสิได้ปรนนิบัติฮับใซ้พระเจ้า ผู้ดำรงอยู่ตลอดนิรันดร์กาล 

ฮีบรู 9:15 ย้อนเหตุนี้ล่ะ เพิ่นจั่งเป็นกลางของพันธสัญญาใหม่ ย้อนการตายแทนของเพิ่น เพื่อไถ่คนเฮาผู้ละเมิดต่อพันธสัญญาเดิมฮั้น เพื่อคนทั้งหลายที่ได้ฮับการเอิ้นการเซิญฮั้น สิได้มีส่วนฮ่วมในมรดกอันนิรันดร์ ตามคำมั่นสัญญา 

ฮีบรู 9:16 คือว่า ในกรณีที่มีพินัยกรรม ผู้เฮ็ดพินัยกรรมไว้ กะสิต้องตายก่อน กว่าผู้เป็นทายาทสิมีสิทธิ์ฮับมรดกได้ 

ฮีบรู 9:17 โดยว่า พินัยกรรมใดๆ บ่มีสิทธิ์ใซ้ได้ นอกจากผู้ที่เฮ็ดสิตายก่อน ซึ่งพินัยกรรมฮั้นใซ้บ่ได้บัดผู้เฮ็ดยังมีซีวิตอยู่ 

ฮีบรู 9:18 จั่งซั้น แม้นแต่พันธสัญญาเดิมฮั้น มันยังบ่สามารถถืกแต่งตั้งไว้นอกจากมีเลือด 

ฮีบรู 9:19 โดยว่า บัดเฒ่าโมเสสได้บอกกฎระเบียบเมิ้ดคู่ข้อของกฎบัญญัติ ให้ซนซาติอิสราเอลฟัง ลาวจั่งได้เอาเลือดของงัวน้อย กับเลือดของแพะ กับน้ำ กับเอาขนแกะสีแดง กับต้นหุสบ มาซิดใส่หนังสือม้วนฮั้น แล้วจั่งซิดใส่ซนซาติอิสราเอลทั้งเมิ้ดนำ 

ฮีบรู 9:20 แล้วจั่งเว้าว่า “นี่คือเลือดของพันธสัญญา ซึ่งพระเจ้าได้สั่งไว้กับพวกเจ้า”

ฮีบรู 9:21 แล้วในทำนองเดียวกัน ลาวได้เอาเลือด ซิดใส่วิหารเคลื่อนที่ กับเครื่องใซ้คู่อย่างที่ใซ้ในการปฏิบัติถวายพระเจ้านำ 

ฮีบรู 9:22 คือ ตามกฎบัญญัติฮั้น สามารถซำระล้างมลทินเกือบเมิ้ดคู่แนวได้ด้วยเลือด แล้วนอกจากว่ามีเลือดไหลออก จั่งสิมีการยกโทษให้อภัยบาปได้

ฮีบรู 9:23 จั่งซั้น จำเป็นต้องมีภาพจำลองอยู่ทางโลกนี้ เพื่อเล็งเถิงโตจริงอยู่เทิงสวรรค์ ซึ่งแนวจำลองอยู่ทางนี้ฮั้น ได้ใซ้เลือดแนวหมู่นี้ เป็นเครื่องบูซาลบล้างมลทิน แต่ว่าส่วนโตจริงอยู่เทิงสวรรค์ ใซ้ของประเสริฐกว่าเป็นเครื่องบูซาลบล้างมลทินได้ 

ฮีบรู 9:24 คือว่า พระคริสต์บ่ได้นำเอาเครื่องบูซาเข้าไปในที่ศักดิ์สิทธิ์บริสุทธิ์อยู่ทางโลกนี้ ที่สร้างด้วยมือมนุษย์ อันเป็นภาพจำลองซื่อๆ ที่เล็งเถิงตัวจริง แต่เพิ่นได้นำเอาเครื่องบูซาเข้าไปเทิงสวรรค์ฮั้น ถวายโตเองต่อหน้าพระเจ้าเพื่อคนเฮาทั้งหลาย 

ฮีบรู 9:25 เพิ่นบ่จำเป็นที่สิต้องถวายเพิ่นเองเป็นหลายเทื่อหลายที คือจั่งพวกมหาปุโรหิตผู้สูงสุดฯ อยู่ทางนี้ ต้องนำเอาเลือดสัตว์ เข้าไปในที่ศักดิ์สิทธิ์บริสุทธิ์ที่สุดซ้ำแล้วซ้ำอีก 

ฮีบรู 9:26 คั่นจั่งซั้น พระคริสต์คือสิต้องทนเอาทุกข์ทรมานซ้ำแล้วซ้ำอีกตั้งแต่สร้างโลกมา แต่ว่าบัดนี้ เพิ่นได้มาปรากฏในยามสุดท้ายของยุคนี้ เพื่อสิกำจัดความบาปให้ได้ โดยถวายเพิ่นเองเป็นเครื่องบูซาเพียงเทื่อเดียว

ฮีบรู 9:27 คือมีการกำหนดสำหรับมนุษย์ไว้แล้วว่า สิต้องตายเทื่อเดียว แล้วหลังจากฮั่นกะสิต้องเข้าสู่การพิพากษา 

ฮีบรู 9:28 จั่งซั้น ในทำนองเดียวกัน พระคริสต์ได้ถวายเพิ่นเองในการตายแทนเพียงเทื่อเดียว เพื่อสิฮับแบกเอาความผิดบาปของคนหลวงหลาย แล้วฝ่ายคนที่คอยถ้าเพิ่น เพิ่นกะสิปรากฏเทื่อที่สอง บ่แม่นเพื่อบาป แต่เพื่อความรอดพ้น
////////// ////////// //////////