ฟีเลโมน – Philemon บทที่ 1

ฟีเลโมน 1:1 จากเปาโล ผู้ถืกจองจำเพื่อพระเยซูคริสต์ กับจากทิโมธีน้องซายของเฮาในพระเจ้า เถิง นายฟีเลโมน หมู่ฮ่วมงานที่ฮักของเฮา

ฟีเลโมน 1:2 กับเถิง นางอัปเฟีย ผู้เป็นที่ฮัก กับอารคิปปัส ผู้เป็นหมู่ทหารเพื่อพระคริสต์นำกันกับเฮา กับเถิงกลุ่มผู้เซื่อที่อยู่ในบ้านของเจ้า

ฟีเลโมน 1:3 ขอให้พระกรุณาธิคุณ กับสันติภาพ ซึ่งจากพระเจ้าผู้เป็นพ่อของเฮา กับจากพระเยซูคริสต์เจ้า ดำรงอยู่กับพวกเจ้าเถิด

ฟีเลโมน 1:4 ข้อยขอบพระคุณพระเจ้าของข้อย โดยได้เอ่ยซื่อเจ้าอยู่เสมอบัดข้อยอธิษฐานเว้านำเพิ่น

ฟีเลโมน 1:5 ย้อนว่า ข้อยได้ยินฮอดความฮักแพงกับความเซื่อของเจ้าที่มีต่อพระเยซูเจ้า กับต่อคนของพระเจ้าทั้งหลายนำ

ฟีเลโมน 1:6 กะเพื่อการสื่อสารความเซื่อของเจ้าปันคนฟังสิได้เกิดผล เนื่องด้วยการยอมฮั้บเถิงแนวดีคู่อย่าง ซึ่งมีอยู่ในเจ้าโดยทางพระเยซูคริสต์

ฟีเลโมน 1:7 น้องซายในพระเจ้า เอ้ย พวกเฮามีความยินดีกับความชูใจหลาย ย้อนความฮักของเจ้าต่อพี่น้อง เป็นเหตุให้จิตใจของพวกคนของพระเจ้ามีแฮงสดซื่นขึ้น

ฟีเลโมน 1:8 จั่งซั้น แม้นว่าข้อยอาจมีใจกล้าในพระคริสต์ที่สิใซ้สิทธิ์สั่งให้เจ้าเฮ็ดแนวที่สมควร

ฟีเลโมน 1:9 แต่ย้อนเห็นแก่ความฮัก ข้อยขออ้อนวอนเจ้าเป็นการดีกว่า คืออ้อนวอนอย่างข้อยเปาโลหนิ แม่นซราแล้ว ซึ่งบัดนี้ได้ถืกจองจำไว้ย้อนเห็นแก่พระเยซูคริสต์ 

ฟีเลโมน 1:10 ข้อยขออ้อนวอนเจ้าย้อน โอเนสิมัส ผู้เป็นลูกในพระเจ้าของข้อย ซึ่งข้อยได้นำมาเกิดใหม่ฝ่ายวิญญาณ บัดยามข้อยยังถืกจองจำไว้อยู่

ฟีเลโมน 1:11 ซื่งแต่ก่อนฮั้นเขาบ่ค่อยเป็นประโยชน์ปานใดเพื่อเจ้า แต่บัดนี้เขาเป็นประโยชน์ทั้งเพื่อเจ้ากับเพื่อข้อยนำ

ฟีเลโมน 1:12 ข้อยจั่งส่งเขา ผู้เป็นดวงจิตของข้อย กลับไปหาเจ้าอีก จั่งซั้น กรุณาต้อนฮับเขาแหน่

ฟีเลโมน 1:13 ซึ่งข้อยคึดอยากสิให้เขาอยู่กับข้อยทางนี้ก่อน เพื่อเขาสิได้คอยเบิ่งแยงข้อย ในยามที่ข้อยพวมถืกจองจำย้อนข่าวประเสริฐฮั้น 

ฟีเลโมน 1:14 แต่ว่า ข้อยสิบ่ได้เฮ็ดหยังนอกจากเจ้าสิอนุญาตนำ เพื่อว่าการดีของเจ้า บ่อาจเป็นด้วยการบังคับเกรงใจกัน แต่ด้วยความหวังดี 

ฟีเลโมน 1:15 คือ หาลังเทื่อ การที่เขาหนีออกมาซั่วระยะหนึ่งฮั้น อาจเพื่อว่าเจ้าสิต้อนฮับเขามาอยู่นำตลอดไป

ฟีเลโมน 1:16 บัดนี้ บ่เป็นในฐานะว่าเป็นทาสอีกต่อไป แต่ยามนี้แฮงดีกว่าการเป็นทาส เขาได้เป็นเพื่อนซึ่งเป็นพี่น้องที่ฮักในพระเจ้านำ โดยเฉพาะสำหรับข้อย แต่คงสิแฮงหลายกว่าสำหรับเจ้า ทั้งเป็นเพื่อนฝ่ายเนื้อหนังกับในองค์พระผู้เป็นเจ้านำ

ฟีเลโมน 1:17 จั่งซั้น คั่นเจ้าถือว่าข้อยหนิเป็นหมู่ฮ่วมงานของเจ้า กะให้ฮับเขาไว้ คือปานฮับตัวข้อยเด้อ

ฟีเลโมน 1:18 แต่ว่า คั่นเขาได้เฮ็ดผิดอีหยังต่อเจ้า หรือเป็นหนี้อีหยังเจ้า กะให้เจ้าเอาจากข้อย 

ฟีเลโมน 1:19 ข้อยเปาโลหนิ ได้เขียนนี้ไว้ด้วยมือของข้อยเอง ข้อยสิจ่ายให้อยู่ดอก แล้วสิบ่อ้างเรื่องที่เจ้าเป็นหนี้บุญคุณข้อย ฮอดโตของเจ้าเองซ้ำ

ฟีเลโมน 1:20 เอ้อ น้องเอ้ย ข้อยขอความซื่นซมยินดีในองค์พระผู้เป็นเจ้าโดยทางเจ้าเถิด กรุณาหนุนน้ำใจให้ข้อยในองค์พระผู้เป็นเจ้านำแหน่

ฟีเลโมน 1:21 ข้อยมีความมั่นใจในโตเจ้า ที่ว่าเจ้าสิฮับฟัง จั่งได้เขียนมายังเจ้า ย้อนข้อยฮู้อยู่ว่า เจ้าสิเฮ็ดหลายกว่าที่ข้อยได้ขออีกซ้ำ 

ฟีเลโมน 1:22 อีกแนวหนึ่ง ขอเจ้าได้จัดเตรียมที่พักไว้สำหรับข้อยนำแหน่ ย้อนข้อยเซื่อว่า สิได้มาหามายามเจ้าอีก ตามคำอธิษฐานของเจ้าฮั้น

ฟีเลโมน 1:23 ส่วน นายเอปาฟรัสฮั้น ผู้ถืกจองจำไว้นำข้อยในพระเยซูคริสต์อยู่ทางนี้ ได้ฝากความคึดฮอดมายังเจ้านำ

ฟีเลโมน 1:24 พร้อมทั้ง มาระโก อาริสทารคัส เดมาส กับลูกา ผู้เป็นหมู่ฮ่วมงานกับข้อย ได้ฝากความ คึดฮอดมายังเจ้านำ

ฟีเลโมน 1:25 ขอพระกรุณาธิคุณขององค์พระเยซูคริสต์เจ้าของเฮา ดำรงอยู่กับจิตวิญญาณของเจ้าเทอญ อาเมน [เขียนจากกรุงโรมเถิงฟีเลโมน แล้วส่งโดยโอเนสิมัส ผู้เป็นทาสฮับใช้]