ทิตัส – Titus บทที่ 2
ทิตัส 2:1 แต่สำหรับเจ้าฮั่น ให้เว้าแต่แนวที่สอดคล้องกับหลักคำสอนอันถืกต้องเด้อ
ทิตัส 2:2 เพื่อพวกซายอาวุโสสิเป็นคนรอบคอบดี เป็นคนที่น่าเคารพนับถือ มีสติปัญญาในการประมาณโต มั่นคงในหลักความเซื่อ ในความฮัก กับในความอดทนพากเพียร
ทิตัส 2:3 แล้วพวกญิงอาวุโสกะคือกัน เพื่อเขาสิเป็นคนที่น่าเคารพนับถือในการประพฤติ บ่เป็นคนใส่ร้ายป้ายสี บ่เป็นคนติดเหล้าเมายา แต่สามารถเป็นผู้สอนในทางที่ดีงาม
ทิตัส 2:4 เพื่อเขาสิฝึกสอนพวกญิงสาวๆ ให้ฮู้จักการควบคุมประมาณโตเองให้รอบคอบดี ให้ฮักผัว กับฮักลูกๆ ของเขา
ทิตัส 2:5 กับเพื่อให้ญิงสาวฮั้นมีสติปัญญา ฮักษาโตเองไว้ให้บริสุทธิ์ เอาใจใส่ในงานครัวเฮือน เป็นคนดีงาม ฮู้จักเซื่อฟังผัวของโตเอง เพื่อคนภายนอกสิบ่ได้หลบหลู่ดูหมิ่นพระคำของพระเจ้าเลย
ทิตัส 2:6 ส่วนซายหนุ่มกะคือกัน ให้เตือนเขาให้ฮู้จักการควบคุมประมาณโตเองให้รอบคอบดีเด้อ
ทิตัส 2:7 แล้วสำหรับเจ้าฮั่น ให้แสดงโตเป็นแบบอย่างในการเฮ็ดดีคู่แนว ในด้านการสอนกะให้ซื่อตรงดี อย่างน่าเคารพนับถือ ด้วยความบริสุทธิ์จริงใจล้วนๆ
ทิตัส 2:8 ให้มีถ้อยคำอันมีเหตุมีผล ที่บ่มีผู้ใดสิติว่ากล่าวได้ เพื่อฝ่ายต่อต้านสิอับอาย บ่มีความซั่วแนวบ่ดีสิเว้าให้เจ้าได้เลย
ทิตัส 2:9 ส่วนผู้เป็นทาสฮั่น กะให้บอกพวกเขาให้ฮับใซ้ฟังความนายเจ้าของ เฮ็ดแต่แนวที่สิถืกใจนายในคู่อย่าง บ่ให้ตอบโต้เถียงเพิ่นเลย
ทิตัส 2:10 กับบ่ให้ยักยอกลักเล็กขโมยน้อย แต่ให้สัตย์ซื่อภักดีในเมิ้ดคู่แนว เพื่อว่าเขาสิได้ประดับพระคำของพระเจ้า พระผู้โปรดของคนเฮา ด้วยการถวายเกียรติในเมิ้ดคู่อย่าง
ทิตัส 2:11 ด้วยว่า พระกรุณาธิคุณของพระเจ้า ที่นำความรอดพ้นมาให้ ได้ปรากฏแก่คนทั้งปวงแล้ว
ทิตัส 2:12 ได้สอนคนเฮาว่า ควรปฏิเสธนิสัยแนวต่างๆ ที่บ่ถวายเกียรติพระเจ้า กับควรปฏิเสธกิเลสตัณหาทางโลกนี้นำ แล้วจั่งใซ้ซีวิตอย่างมีสติปัญญารอบคอบดี ตามทางซอบธรรมอัน ถืกต้อง ในทางที่ถวายเกียรติพระเจ้า ในปัจจุบันนี้
ทิตัส 2:13 แล้วจั่งคอยถ้าฮับ ความหวังอันประเสริฐที่มั่นคง คือการเสด็จมาอันประกอบด้วยพระสิริของพระเจ้า ซึ่งเป็นพระผู้โปรดอันใหญ่ยิ่งของคนเฮานำ คือพระเยซูคริสต์เจ้า
ทิตัส 2:14 ผู้เพิ่นที่ได้อุทิศซีวิตของเพิ่นเองเพื่อคนเฮา เพื่อสิได้ไถ่คนเฮาออกจากความซั่วซ้าเลวทรามเมิ้ดคู่แนว แล้วจั่งซำระพวกเฮาให้เป็นคนพิเศษเฉพาะเพิ่น มีความกระตือรือร้นในการดี
ทิตัส 2:15 ข้อความแนวหมู่นี้ กะให้แนะนำบอกสอน ตักเตือนว่ากล่าว ด้วยสิทธิอำนาจในคู่อย่างเด้อ อย่าให้ผู้ใดดูหมิ่นดูถูกเจ้าได้เลยเด้อ
////////// ////////// //////////