2 โครินธ์ – 2 Corinthians บทที่ 11

2 โครินธ์ 11:1 โอ้ ข้อยขอให้พวกเจ้าทนเอาต่อความบ้าๆ บอๆ ของข้อยจักหน่อย กับขอได้โปรดทนเอาแหน่ต่อโตข้อยนำ 

2 โครินธ์ 11:2 คือ ข้อยหวงแหนพวกเจ้าหลาย เป็นการหวงแหนอย่างของพระเจ้า ย้อนว่าแม่นข้อยเองเป็นผู้ที่ได้หมั้นพวกเจ้าไว้แล้ว เพื่อข้อยสิได้มอบพวกเจ้าให้เป็นเจ้าสาวของเจ้าบ่าวแต่ผู้เดียว คือจั่งมอบถวายสาวบริสุทธิ์ต่อพระคริสต์

2 โครินธ์ 11:3 แต่บัดนี้ ข้อยหย้านว่าพวกเจ้าอาจสิหลงไปจากความเซื่อ อันบริสุทธิ์ที่เรียบง่าย ซึ่งมีอยู่ในพระคริสต์ ย้อนถืกหลอกลวงด้วยกลอุบายต่างๆ คือจั่งที่งูโบราณฮั้นได้หลอกลวงแม่เดิมเอวา ให้หลงเซื่อคำเล่ห์เหลี่ยมของมัน

2 โครินธ์ 11:4 คือ คั่นคนซุมฮั้นที่มาหาเจ้าได้มาประกาศพระเยซูองค์อื่นๆ ซึ่งแตกต่างจากองค์พระเยซูที่เฮาได้มาประกาศให้พวกเจ้าแต่ตำอิดฮั้น หรือคั่นพวกเจ้าสิหาฮับเอาวิญญาณอื่นๆ ซึ่งแตกต่างจากที่พวกเจ้าได้ฮับเอามาแต่ตำอิดแล้วฮั้น หรือสิฮับเอาข่าวประเสริฐอื่นๆ ซึ่งแตกต่างจากที่พวกเจ้าได้ฮับเอาไว้แต่ตำอิดฮั้น พวกเจ้าคือทนเอาต่อแนวแปลกๆ ใหม่ๆ ดีแท้

2 โครินธ์ 11:5 คือพิจารณาแล้ว ข้อยว่าโตข้อยบ่ได้ด้อยกว่าทูตพิเศษผู้มีชื่อเสียงอันดีเด่นหมู่ฮั้น แม้นแต่หน่อยเดียว

2 โครินธ์ 11:6 แม้นว่า ข้อยอาจสิเว้าบ่เก่งกะตาม แต่ข้อยกะยังมีความฮู้หลายพอสมควร ที่จริงแล้วพวกเฮากะได้เปิดเผยคู่อย่างซัดเจนให้พวกเจ้าฮู้เห็นแล้ว

2 โครินธ์ 11:7 แม่นข้อยได้เฮ็ดอีหยังผิดต่อพวกเจ้าอยู่บ้อ ในการที่ข้อยถ่อมใจลงแล้วจั่งยกพวกเจ้าขึ้น ย้อนข้อยประกาศข่าวประเสริฐของพระเจ้าให้พวกเจ้า โดยบ่ได้คึดค่าตอบแทนอีหยัง 

2 โครินธ์ 11:8 ท่อกับว่า ข้อยได้ปล้นพี่น้องกลุ่มผู้เซื่อหม่องอื่นๆ คือได้ฮับเงินจากเขา เพื่อสิปรนนิบัติฮับใซ้พวกเจ้าได้ 

2 โครินธ์ 11:9 คือ แม้นแต่ข้อยขาดแคลนบ่มีแนวอยู่แนวกินตอนอยู่นำพวกเจ้า ข้อยกะบ่ได้เป็นภาระให้ผู้ใดเลย ย้อนว่าพี่น้องที่มาจากแคว้นมาซิโดเนีย ได้ซ่อยเหลือเจือจานให้ข้อยมีพออยู่พอกินตามความต้องการ คือข้อยบ่ได้เป็นภาระให้พวกเจ้าในจักแนวเลย แล้วข้อยกะสิอยู่จั่งซั้นต่อไป 

2 โครินธ์ 11:10 บ่มีใผในเขตแคว้นอาคายาสิสามารถห้ามข้อยไว้บ่ให้อวดเรื่องนี้ได้เลย คือความจริงเรื่องพระคริสต์มีอยู่ในโตข้อยอยู่แล้ว

2 โครินธ์ 11:11 ย้อนหยัง ย้อนข้อยบ่ฮักแพงพวกเจ้าบ้อ พระเจ้าฮู้จักดีในเรื่องนี้อยู่แล้ว

2 โครินธ์ 11:12 แต่แนวที่ข้อยเฮ็ดฮั้น ข้อยกะสิเฮ็ดต่อไป เพื่อสิตัดโอกาสคนซุมฮั้นที่คอยหาโอกาสอยากให้คนอื่นๆ ถือว่าเขาคือกันกับพวกเฮาในแนวที่เขาอวดฮั้น

2 โครินธ์ 11:13 ย้อนว่า คนจำพวกนี้เป็นทูตเทียม เป็นคนงานที่หลอกลวง ปลอมโตว่าเขาเป็นทูตพิเศษของพระคริสต์

2 โครินธ์ 11:14 สมพอแม่น มันเลยบ่แปลกอีหยังดอก ขนาดมารซาตานเองกะยังสามารถแปลงโตเป็นเทวทูตแห่งความสว่างได้

2 โครินธ์ 11:15 จั่งซั้น มันบ่เป็นเรื่องแปลกอีหยัง ที่ผู้ฮับใซ้ของมารซาตานสามารถสิปลอมโตเป็นผู้ฮับใซ้ที่ประกาศทางความซอบธรรมฮั้นได้ ซึ่งจุดหมายปลายทางของพวกเขา สิเป็นไปตามกิจการแนวที่เขาได้เฮ็ด

2 โครินธ์ 11:16 ข้อยขอเว้าซ้ำอีกว่า อย่าให้ใผคึดเห็นว่าข้อยหนิเป็นคนบ้า บ่ซั้น อย่างน้อยให้เขาต้อนฮับข้อยคือจั่งคนบ้า เพื่อทนเอาต่อข้ออวดของข้อยฮั้นได้เล็กน้อย

2 โครินธ์ 11:17 แต่แนวที่ข้อยอวดอ้างจั่งซี้ ข้อยบ่ได้เว้าตามการทรงนำขององค์พระผู้เป็นเจ้าดอก แต่ได้เว้าด้วยความมั่นใจปานเป็นคนบ้าซื่อๆ

2 โครินธ์ 11:18 ย้อนบัดเห็นว่า มีหลายคนมักสิอวดตามเนื้อหนัง ข้อยกะสิลองอวดจั่งซั้นคือกัน 

2 โครินธ์ 11:19 การที่พวกเจ้าสามารถทนเอาต่อคนบ้าได้ฮั้น คือสิเป็นย้อนว่า พวกเจ้ามีปัญญาหลายหน้อ 

2 โครินธ์ 11:20 คือพวกเจ้าทนเอาได้ คั่นมีใผนำเอาเจ้าไปเป็นทาสเขากะดี หรือคั่นสิมีใผเอาเปรียบตัวะต้มเจ้ากะดี หรือคั่นสิมีใผมาลักเอาทรัพย์ของเจ้าไปกะดี หรือคั่นสิมีใผยกโตเป็นใหญ่ต่อหน้าเจ้ากะดี หรือคั่นสิมีใผมาตบหน้าเจ้ากะดี

2 โครินธ์ 11:21 คือเป็นตาอับอายที่ว่า พวกเฮายอมฮับกันว่าเฮาอ่อนแอเกินไปที่สิเฮ็ดแนวนี้ใส่พวกเจ้า บ่ว่าใผสิกล้าอวดในเรื่องใด (ข้อยพวมเว้าอย่างบ้าอีกแล้ว) ข้อยกะกล้าหาญคือกัน

2 โครินธ์ 11:22 พวกเขาเป็นคนฮีบรูบ้อ ข้อยกะเป็นคือกัน พวกเขาเป็นคนอิสราเอลบ้อ ข้อยกะเป็นคือกัน พวกเขาเป็นเซื้อสายของพ่ออับราฮัมบ้อ ข้อยกะเป็นคือกัน

2 โครินธ์ 11:23 พวกเขาว่าเป็นผู้ฮับใซ้ของพระคริสต์บ้อ (ข้อยกะยังเว้าปานคนบ้า) ข้อยกะแฮงเป็นกว่าเขาซะอีก คือข้อยมีประสบการณ์ในการงานหลายกว่า เคยถืกโบยตีเกินขนาด เคยถืกจองจำกักขังไว้หลายกว่าอีก แล้วเคยหวิดล้มหวิดตายหลายเทื่อนำ

2 โครินธ์ 11:24 แล้วเคยถืกพวกยิวเอาแส้เฆี่ยนข้อยห้ารอบ เป็นรอบละสามสิบเก้าเทื่อ

2 โครินธ์ 11:25 ข้อยถืกฟาดตีด้วยไม้ฆ้อนสามเทื่อ ถืกคนเอาก้อนหินดึกใส่เทื่อหนึ่ง เผซิญภัยเฮือแตกจมทะเลสามเทื่อ เทื่อหนึ่งข้อยต้องลอยคอในทะเลทั้งกลางเว็นกลางคืน

2 โครินธ์ 11:26 ข้อยต้องเดินทางหลายเที่อ เผซิญภัยอันเป็นตาหย้านทางน้ำ เผซิญภัยจากพวกโจร เผซิญภัยจากไทซาติเดียวกันของข้อยเอง เผซิญภัยจากคนต่างซาตินำ เผซิญภัยในเมือง เผซิญภัยในโคกในป่าในที่กันดาร เผซิญภัยในทะเล เผซิญภัยจากพี่น้องจอมปลอม

2 โครินธ์ 11:27 เคยยากลำบากเมื่อยล้า เจ็บตนเจ็บโตหลาย เคยอดหลับอดนอนหลายเที่อ เคยหิวข้าวหิวน้ำ เคยทนหนาวจัด เคยขาดเสื้อผ้าหน้าแพร

2 โครินธ์ 11:28 นอกจากแนวหมู่นี้แล้ว กะยังมีหลายแนวที่โตข้อยต้องฮับผิดซอบแบกพละอยู่คู่มื้อคู่เว็น คือการเบิ่งแยงเป็นห่วงพี่น้องกลุ่มผู้เซื่อทั้งมวลนำ

2 โครินธ์ 11:29 มีใผแหน่เป็นคนอ่อนกำลัง แล้วข้อยบ่ได้อ่อนกำลังนำ มีใผแหน่ที่ถืกเฮ็ดให้สะดุด ที่ข้อยบ่ได้เป็นทุกข์เป็นฮ้อนนำ

2 โครินธ์ 11:30 คั่นข้อยสิต้องอวด ข้อยกะสิอวดในแนวต่างๆ ที่เป็นเหตุให้ข้อยต้องอ่อนกำลัง 

2 โครินธ์ 11:31 พระเจ้า ผู้เป็นพ่อของพระเยซูคริสต์เจ้าของพวกเฮา ผู้เพิ่นที่สมควรสิได้ฮับการยกย่องสรรเสริญอยู่ตลอดกาลเป็นนิตย์ เพิ่นกะฮู้จักดีว่าข้อยเว้าความจริงเมิ้ด บ่ได้ตัวะเลย 

2 โครินธ์ 11:32 แล้วเจ้าเมืองผู้อยู่ใต้กษัตริย์อาเรทัสในเมืองดามัสกัสฮั้น ได้ส่งกองทหารรักษาการณ์ออกไปเฝ้าเมืองฮั้นไว้ เพื่อให้จับโตข้อย 

2 โครินธ์ 11:33 แต่หมู่พวกกะได้เอาโตข้อยใส่กระบุง หย่อนลงทางป่องหน้าต่างอยู่เทิงกำแพงเมือง ข้อยจั่งหวิดพ้นจากเงื้อมมือของเจ้าเมืองฮั้น
////////// ////////// //////////