2 โครินธ์ – 2 Corinthians บทที่ 2

2 โครินธ์ 1:1 จากเปาโล ผู้เป็นทูตพิเศษของพระเยซูคริสต์ตามพระประสงค์ของพระเจ้า กับจากทิโมธี น้องของพวกเฮา เรียนพวกพี่น้องในกลุ่มผู้เซื่อของพระเจ้าอยู่เมืองโครินธ์ พร้อมกับพี่น้องคนของพระเจ้าทั้งหลายผู้อยู่ทั่วแคว้นอาคายา 

2 โครินธ์ 1:2 ขอให้พระกรุณาธิคุณกับสันติภาพจากพระเจ้า พ่อของพวกเฮา กับจากองค์พระเยซูคริสต์เจ้า ดำรงอยู่กับพวกเจ้าไว้เด้อ 

2 โครินธ์ 1:3 จั่งขอขอบคุณพระเจ้า พ่อของพระเยซูคริสต์เจ้าของคนเฮา เป็นพ่อผู้แสดงความเมตตา แล้วกะเป็นพระเจ้าผู้ที่ให้การเล้าโลมหนุนใจในเมิ้ดคู่แนว 

2 โครินธ์ 1:4 ซึ่งเพิ่นได้เล้าโลมหนุนใจพวกเฮาในยามทุกข์ยากคู่แนวของพวกเฮาฮั้น เพื่อพวกเฮาสิได้เล้าโลมหนุนใจคนอื่นๆ นำ ผู้ที่มีความทุกข์ยากต่างๆ ด้วยการเล้าโลมหนุนใจฮั้นซึ่งพวกเฮาเองได้ฮับจากพระเจ้า 

2 โครินธ์ 1:5 คือจั่งที่ความทุกข์ยากของพระคริสต์ได้หลั่งไหลเข้ามาสู่ซีวิตของพวกเฮาหลายส่ำใด ในทำนองเดียวกัน การเล้าโลมหนุนใจที่เฮาได้ฮับมาจากพระคริสต์ กะล้นเข้ามาหลายส่ำฮั้นคือกัน 

2 โครินธ์ 1:6 แล้ว คั่นพวกเฮาได้ถืกความทุกข์ยาก มันกะเพื่อความซูใจกับความรอดเพื่อพวกเจ้า นี้กะเสริมกำลังใจให้พวกเฮามีแฮงเพื่อทนเอาได้ต่อความทุกข์ยากฮั้น แล้วคั่นพวกเฮาได้ฮับการเล้าโลมหนุนใจหรือบ่กะตาม ที่เฮาทนเอาฮั้นกะเพื่อความซูใจกับความรอดของพวกเจ้า 

2 โครินธ์ 1:7 แล้วความหวังที่พวกเฮามีให้พวกเจ้ากะมั่นคง ย้อนพวกเฮาฮู้กันว่า ในการที่พวกเจ้ามีส่วนฮ่วมในความทุกข์ยากของเฮาส่ำใด พวกเจ้ากะสิมีส่วนฮ่วมในการเล้าโลมหนุนใจของพวกเฮาส่ำฮั้นคือกัน 

2 โครินธ์ 1:8 พี่น้องทั้งหลาย เอ้ย พวกเฮาอยากให้พวกเจ้าฮู้เถิงความทุกข์ยากของเฮาที่เกิดในแคว้นเอเซียฮั้น เฮ็ดให้เฮาหนักใจจนเกินกำลังที่สิทนเอาได้ เถิงขนาดว่าพวกเฮาเมิ้ดหวังที่สิเอาซีวิตรอดได้ 

2 โครินธ์ 1:9 เอ่อ พวกเฮาเองได้ถืกลงอาญาประหารซีวิต กะเพื่อพวกเฮาสิบ่ได้ไว้ใจในโตเอง แต่ไว้ใจในพระเจ้า ผู้เพิ่นสามารถให้คนตายเป็นขึ้นมาได้ 

2 โครินธ์ 1:10 ผู้ได้ซ่อยให้พวกเฮาหวิดพ้นจากการตายอย่างโหดเหี้ยมฮั้นมาแล้ว แล้วกะยังซ่อยให้พวกเฮาหวิดพ้นอยู่เลื่อยๆ แม่นผู้ที่พวกเฮาไว้ใจกันว่า เพิ่นกะยังสิซ่อยเฮาอีกต่อๆ ไปนำ 

2 โครินธ์ 1:11 แล้วพวกเจ้าได้ซ่อยพวกเฮานำ ด้วยการอธิษฐานเผื่อ แล้วในที่สุดมีอีกหลายคนสิได้ขอบคุณพระเจ้าโดยผ่านทางพวกเฮา เนื่องจากทรัพย์ฮั้นที่หลายคนในพวกเจ้าได้ถวายมา เพื่อเป็นของขว้ญซ่อยพวกเขา 

2 โครินธ์ 1:12 ความภูมิใจของพวกเฮาเป็นจั่งซี้ คือใจของพวกเฮาเป็นพยานในโตเองว่า การที่พวกเฮาวางโตอยู่ทางโลกนี้ กะเป็นโดยการถวายเกียรติต่อพระเจ้าด้วยใจจริง บ่แม่นด้วยใซ้ปัญญาทางเนื้อหนัง แต่ด้วยเห็นแก่พระกรุณาธิคุณของพระเจ้าต่อพวกเจ้าอย่างเหลือล้น 

2 โครินธ์ 1:13 คือพวกเฮาบ่ได้เขียนเรื่องอื่นๆ มาเถิงพวกเจ้าดอก นอกจากเรื่องที่พวกเจ้าได้อ่านกับได้ยอมฮับฮั้น ซึ่งข้อยหวังว่าในที่สุด พวกเจ้าสิได้เข้าใจดี 

2 โครินธ์ 1:14 คือจั่งที่พวกเจ้าได้ยอมฮับฮู้จักดีในพวกเฮามาแล้ว จั่งภูมิใจกับพวกเฮานำ คือจั่งที่พวกเฮาสิได้ภูมิใจในพวกเจ้าในมื้อของพระเยซูเจ้าที่สิมาฮั้น 

2 โครินธ์ 1:15 แล้วย้อนความมั่นใจที่ข้อยมีในเรื่องนี้ ข้อยมุ่งว่าสิมาแวะหาพวกเจ้าก่อน เพื่อสิเป็นประโยชน์ให้พวกเจ้าสองต่อ 

2 โครินธ์ 1:16 คือข้อยตั้งใจสิแวะมาหาพวกเจ้าระหว่างที่เดินทางไปแคว้นมาซิโดเนีย แล้วบัดข้อยกลับมาจากมาซิโดเนียฮั้น กะสิแวะมาหาพวกเจ้าอีก แล้วกะสิให้พวกเจ้าส่งข้อยออกเดินทางไปแคว้นยูเดีย 

2 โครินธ์ 1:17 จั่งซั้น บัดข้อยตั้งใจว่าสิมาหาเจ้าฮั้น ข้อยได้เว้าอย่างลังเลใจบ้อ หรือในสิ่งที่ข้อยมุ่งหมายตั้งเป้าไว้ฮั้น ข้อยได้วางเป้าตามเนื้อหนังบ้อ คือสำหรับโตข้อยหนิ คั่นว่าแม่น ข้อยกะว่าแม่นโลด แล้วคั่นว่าบ่แม่น ข้อยกะว่าบ่แม่นโลด 

2 โครินธ์ 1:18 แต่ว่า ตามที่พระเจ้าเป็นผู้สัตย์จริงส่ำใด แนวที่เฮาเว้ากับพวกเจ้ากะเป็นคำสัตย์จริงจั่งซั้น บ่มีการลังเลเลย 

2 โครินธ์ 1:19 ย้อนว่า พระบุตรของพระเจ้าคือพระเยซูคริสต์ ผู้ซึ่งพวกข้อยได้ประกาศให้พวกเจ้าฮั้น คือโตข้อยเอง พร้อมกับ สิลวานัส กับ ทิโมธีนำ แล้วพวกเฮาบ่ได้ประกาศแบบลังเลซื่อๆ แต่ด้วยความมั่นคงอันแน่วแน่ในเพิ่น 

2 โครินธ์ 1:20 ย้อนว่าคำมั่นสัญญาของพระเจ้าในพระเยซูคริสต์ฮั้น กะล้วนแต่มั่นคงแน่วแน่แม่นเมิ้ดคู่ข้อ ย้อนเหตุนี้เฮาจั่งเว้าว่า “อาเมน” เอ้อ แม่นแท้ จั่งเป็นเหตุที่เฮาถวายเกียรติแด่พระเจ้า 

2 โครินธ์ 1:21 แล้วบัดนี้ แม่นพระเจ้าเอง เป็นผู้ที่ได้เจิมได้แต่งตั้งพวกเฮาไว้ให้กับพวกเจ้าอยู่ในพระคริสต์ 

2 โครินธ์ 1:22 กับพระเจ้าเพิ่นได้ประทับตราพวกเฮาไว้ กับได้โปรดให้พระวิญญาณไว้ในใจของพวกเฮา เป็นค่ามัดจำรับรองไว้ 

2 โครินธ์ 1:23 นอกจากฮั้นอีก ข้อยขออ้างพระเจ้าให้เป็นพยานยืนยันเถิงความตั้งใจของข้อยว่า ที่ข้อยยังบ่ได้มาเถิงเมืองโครินธ์ฮั้น ย้อนข้อยอยากเว้นพวกเจ้าไว้ซะก่อน 

2 โครินธ์ 1:24 บ่แม่นว่าพวกเฮาเป็นเจ้าเป็นนายเหนือความเซื่อของพวกเจ้าดอก แต่พวกเฮาเป็นแต่ผู้ฮับใซ้นำกัน เพื่อเสริมสร้างความปิติยินดีของพวกเจ้า คือพวกเจ้ายืนมั่นอยู่ได้ ย้อนความเซื่อ
////////// ////////// //////////
2 โครินธ์ 2:1 แต่ข้อยได้มุ่งหมายไว้ในใจว่า สิบ่นำเอาแนวที่สิพาให้เป็นทุกข์จั่งซี้มาหาพวกเจ้าอีก 

2 โครินธ์ 2:2 ย้อนว่า คั่นข้อยพาพวกเจ้าให้หนักใจเป็นทุกข์ แม่นใผสิเล้าโลมหนุนใจข้อยให้ซื่นบานยินดีได้ นอกจากพวกเจ้าเอง ผู้ที่ข้อยอาจสิต้องพาเป็นทุกข์ฮั้น 

2 โครินธ์ 2:3 แล้วที่ข้อยเขียนมาหาพวกเจ้าแนวนี้ กะเพื่อว่า บัดข้อยสิมาหาฮั้น ข้อยสิบ่ได้ทุกข์ใจย้อนพวกเจ้า ผู้ที่ควรสิเฮ็ดให้ข้อยมีความซื่นบานยินดี แต่ข้อยมั่นใจในพวกเจ้าว่า ความซื่นบานยินดีที่ข้อยมีอยู่หนิกะสิเป็นความยินดีของพวกเจ้าเมิ้ดคู่คนนำ 

2 โครินธ์ 2:4 แต่ว่า เหตุที่ข้อยเขียนมาหาพวกเจ้าด้วยความทุกข์ใจนี้ กับได้เสียน้ำตาหลาย บ่แม่นเพื่อให้พวกเจ้าเป็นทุกข์ใจนำ แต่เพื่อพวกเจ้าอาจฮู้เถิงความฮักแบบของพระเจ้าที่ข้อยมีให้พวกเจ้าอย่างเหลือล้น 

2 โครินธ์ 2:5 แต่คั่นผู้ใดอยู่ฮั้นเป็นเหตุให้เกิดมีความเป็นทุกข์ ผู้ฮั้นบ่ได้เฮ็ดให้ข้อยหนักใจเป็นทุกข์แต่ผู้เดียว แต่ผู้ลางคนในพวกเจ้ากะหนักใจเป็นทุกข์นำ ข้อยกะเลยบ่อยากซ้ำเติมพวกเจ้าอีกดอก 

2 โครินธ์ 2:6 คือ ที่คนส่วนหลายได้พากันลงโทษคนฮั้นกะเพียงพอแล้ว

2 โครินธ์ 2:7 บัดนี้ ในทางตรงกันข้าม พวกเจ้าควรสิยกโทษให้อภัยผู้ฮั้นต่างหาก แล้วกะเล้าโลมหนุนใจเขาซะ หย้านว่าใจของคนฮั้นอาจสิถืกกลืนกินไปด้วยความกลุ้มใจหลายกะได้ 

2 โครินธ์ 2:8 จั่งซั้น ข้อยขอวิงวอนพวกเจ้า ให้ยืนยันความฮักของพวกเจ้าต่อคนฮั้นใหม่อีกแหน่ 

2 โครินธ์ 2:9 เป็นย้อนสาเหตุนี้ล่ะ ที่ข้อยได้เขียนมาตักเตือนพวกเจ้าแต่ตำอิด เป็นการพิสูจน์เบิ่งใจของพวกเจ้า เพื่อสิฮู้ว่าพวกเจ้าสิยอมเซื่อฟังในคู่อย่างหรือบ่ 

2 โครินธ์ 2:10 คือ บัดพวกเจ้าสิยกโทษให้อภัยผู้ใด ข้อยกะยกโทษให้อภัยผู้ฮั้นนำ ย้อนว่าคั่นข้อยเคยยกโทษให้อภัยอีหยัง ข้อยได้ยกโทษให้อภัยผู้ฮั้นต่อหน้าพระคริสต์ ย้อนเห็นแก่พวกเจ้า 

2 โครินธ์ 2:11 บ่ซั้น เกร็งว่ามารซาตานอาจสิมีซ่องทางเอาเปรียบพวกเฮาได้ โดยว่าเฮาฮู้ดีในลูกเล่นกลอุบายของมันอยู่แล้ว 

2 โครินธ์ 2:12 นอกจากฮั้นอีก บัดข้อยไปฮอดเมืองโตรอัส เพื่อประกาศข่าวประเสริฐเรื่องพระคริสต์ฮั้น เพิ่นผู้เป็นพระผู้เป็นเจ้าได้เปิดประตูเป็นหนทางไว้ให้ข้อย 

2 โครินธ์ 2:13 แต่ข้อยบ่ค่อยสบายใจ ย้อนข้อยบ่ได้พ้อ ทิตัส น้องในความเซื่อของข้อยอยู่ฮั่น กะเลยลาพวกเขาเดินทางไปแคว้นมาซิโดเนียต่อ 

2 โครินธ์ 2:14 แต่บัดนี้ ขอขอบคุณพระเจ้า ผู้เพิ่นที่นำเฮาไปสู่ความมีซัยอยู่ตลอดในพระคริสต์ คือกลิ่นหอมในการฮู้จักเรื่องเพิ่น กะได้ลามไปฮอดทั่วคู่หม่องโดยทางพวกเฮา 

2 โครินธ์ 2:15 คือสำหรับพระเจ้าฮั่นพวกเฮากะส่งกลิ่นอันหอมหวานของพระคริสต์ ทั้งในพวกคนที่พวมสิรอดพ้นฮั้น พร้อมทั้งในพวกคนที่พวมสิพินาศฮั้นนำ 

2 โครินธ์ 2:16 คือสำหรับผู้คนที่บ่เซื่อ มันเป็นกลิ่นความตาย นำเขาไปสู่ความตาย แล้วสำหรับผู้คนที่เซื่อฮั้น มันกะเป็นกลิ่นหอมของซีวิต นำเขาไปสู่ซีวิตนิรันดร์ ใผแหน่พอเพียงในถ้อยคำแนวหมู่นี้ 

2 โครินธ์ 2:17 แล้วพวกเฮาบ่คือหลายคนที่บิดเบือนพระคำของพระเจ้า หากินด้วยเล่ห์เหลี่ยม แต่ตรงกันข้าม คือจั่งคนที่มาจากพระเจ้า พวกเฮาประกาศเรื่องพระคริสต์ด้วยใจจริงโดยในสายตาของพระเจ้า
////////// ////////// //////////