1 โครินธ์ – 1 Corinthians บทที่ 9

1 โครินธ์ 9:1 ข้อยบ่ได้เป็นทูตพิเศษบ้อ ข้อยบ่ได้มีเสรีภาพบ้อ ข้อยบ่ได้เห็นพระเยซูคริสต์เจ้าของพวกเฮาบ้อ แล้วพวกเจ้าบ่ได้เป็นผลงานของข้อยในพระผู้เป็นเจ้าบ้อ

1 โครินธ์ 9:2 คั่นแม้นข้อยบ่ได้เป็นทูตพิเศษของคนอื่นๆ ข้อยกะยังเป็นทูตพิเศษของพวกเจ้า ย้อนว่าพวกเจ้าคือปานตรารับรองตำแหน่งทูตพิเศษของข้อยในพระผู้เป็นเจ้าอยู่แล้ว

1 โครินธ์ 9:3 ส่วนผู้ใดที่สิตรวจสอบหาจับผิดข้อย ข้อยกะสิโต้ตอบเขาว่า

1 โครินธ์ 9:4 พวกเฮาบ่มีสิทธิ์ที่สิกินสิดื่มคือกันบ้อ

1 โครินธ์ 9:5 แล้วพวกเฮาบ่มีสิทธิ์ที่สิพาเมียผู้ที่เซื่อ หรือพาพี่น้องมานำบ้อ คือจั่งที่ทูตพิเศษคนอื่นๆ กับพวกน้องซายของพระผู้เป็นเจ้าได้เฮ็ด ฮ่วมทั้งเคฟาสนำ

1 โครินธ์ 9:6 แม่นมีแต่ข้อยกับบารนาบัสท่อฮั้นบ้อ ที่บ่มีสิทธิ์พักผ่อนหย่อนใจในการงานของพระเจ้าจักหน่อยซะบ้อ 

1 โครินธ์ 9:7 มีใผแหน่ที่เป็นทหารไปเข้าการศึกในสนามรบ แล้วต้องออกเงินใซ้จ่ายเอง หรือแม่นใผแหน่ที่ปลูกสวนองุ่น แล้วบ่ได้กินผลจากสวนฮั้น หรือแม่นใผแหน่ที่เลี้ยงฝูงแกะแล้วบ่ได้กินน้ำนมของฝูงแกะฮั้น 

1 โครินธ์ 9:8 ข้อยเว้าจั่งซี้ตามอย่างธรรมดามนุษย์อยู่บ้อ บ่แม่นมีข้อในกฎบัญญัติ ที่ได้เว้าไว้จั่งซี้คือกันบ้อ 

1 โครินธ์ 9:9 คือมีข้อในกฎบัญญัติของเฒ่าโมเสสที่ได้เขียนไว้ว่า “อย่าสู่ครอบปากงัวไว้บัดมันพวมย่างเหยียบข้าวอยู่” ในข้อนี้พระเจ้าเพิ่นเป็นห่วงพวกงัวบ้อ

1 โครินธ์ 9:10 หรือว่า เฒ่าโมเสสได้เว้าไว้เพื่อให้เป็นประโยชน์ของพวกเฮาหนิ แท้จริงแล้วข้อฮั้นมีเขียนไว้เพื่อเล็งเถิงผลประโยชน์ของพวกเฮานำ คือเปรียบคนที่ไถนา เขากะไถด้วยความคาดหวัง กับคนที่ตีข้าว กะตีด้วยความคาดหวังคือกัน ว่าควรได้ฮับผลงานตามที่คาดไว้ฮั้น 

1 โครินธ์ 9:11 คือคั่นพวกเฮาได้หว่านทางจิตวิญญาณให้พวกเจ้าแล้ว มันสิเป็นเรื่องใหญ่อยู่บ้อ คั่นพวกเฮาหวังสิเก็บเกี่ยวลางแนวฝ่ายเนื้อหนังจากพวกเจ้าเป็นผลตอบแทน

1 โครินธ์ 9:12 คือคั่นคนอื่นๆ มีสิทธิ์ที่สิฮับผลประโยชน์จากพวกเจ้าจั่งซี้ บ่แม่นพวกเฮาแฮงมีสิทธิ์กว่าพวกเขาอีกอยู่บ้อ จั่งใดกะตาม พวกเฮาบ่ได้ใซ้สิทธิ์นี้เลย แต่ได้ยอมทนเอาต่อความทุกข์ยากลำบากอันสารพัด เพื่อสิบ่เป็นอุปสรรคใดๆ ต่อข่าวประเสริฐของพระคริสต์

1 โครินธ์ 9:13 พวกเจ้าบ่ฮู้บ้อว่า ผู้ที่ปรนนิบัติงานศักดิ์สิทธิ์อยู่ในพระวิหารฮั้น กะได้ฮับการเลี้ยงดูจากพระวิหาร กับผู้ที่ปรนนิบัติงานอยู่นำแท่นบูซา กะได้ฮับการเลี้ยงดูจากแท่นบูซาฮั้นนำ 

1 โครินธ์ 9:14 ในทำนองเดียวกัน พระผู้เป็นเจ้าได้กำหนดไว้ว่า คนที่ประกาศข่าวประเสริฐควรได้ฮับการเลี้ยงดูด้วยข่าวประเสริฐฮั้นนำ

1 โครินธ์ 9:15 แต่ส่วนข้อยหนิ กะบ่ได้ใซ้สิทธิ์นี้เลย แล้วข้อยบ่ได้เขียนเรื่องนี้เพื่อซักจูงให้ซ่อยข้อยแนวฮั้นดอก ย้อนว่าข้อยยอมตายกะสิดีกว่า แทนที่สิให้ผู้ใดเฮ็ดให้เกียรติของข้อยในเรื่องนี้เมิ้ดไป 

1 โครินธ์ 9:16 คือเถิงแม้นว่า ข้อยประกาศข่าวประเสริฐ ข้อยกะบ่มีอีหยังที่สิอวดได้เลย ย้อนว่าข้อยมีใจกระตือรือร้นว่าสิต้องประกาศข่าวประเสริฐ แล้วคั่นข้อยบ่ได้ประกาศฮั้น ใจข้อยกะสิเป็นทุกข์หลาย 

1 โครินธ์ 9:17 คือคั่นข้อยประกาศโดยการสมัครใจ ข้อยกะสิได้บำเหน็จรางวัล แต่คั่นข้อยสิฝืนใจประกาศ กะยังเป็นการงานที่พระเจ้าได้มอบหมายไว้ให้ข้อยเฮ็ด

1 โครินธ์ 9:18 แล้วคั่นจั่งซั้น ข้อยสิได้ฮับบำเหน็จรางวัลอีหยังเป็นค่าตอบแทน บำเหน็จของข้อยฮั้นกะคือข้อยยินดีที่สิประกาศข่าวประเสริฐเรื่องพระคริสต์โดยบ่ได้ขอค่าตอบแทนอีหยังเลย เพื่อข้อยสิบ่ได้ใซ้สิทธิ์ในข่าวประเสริฐฮั้นในทางบ่แม่น

1 โครินธ์ 9:19 คือเถิงแม้นว่าข้อยมีอิสระเสรีจากการบังคับของผู้ใดกะตาม ข้อยกะยังยินดีที่สิยอมเป็นทาสฮับใซ้ของคนทั้งหลาย เพื่อสิได้นำเขามาฮับเซื่อเป็นจำนวนหลายขึ้น

1 โครินธ์ 9:20 ต่อพวกคนยิว ข้อยกะวางโตคือจั่งคนยิว เพื่อสิได้นำพวกคนยิวมาฮับเซื่อ ต่อพวกคนที่อยู่ใต้กฎบัญญัติฮั้น ข้อยกะวางโตคือจั่งคนที่อยู่ใต้กฎบัญญัติ เพื่อสิได้คนที่อยู่ใต้กฎบัญญัติฮั้นมาฮับเซื่อนำ 

1 โครินธ์ 9:21 ต่อคนที่อยู่นอกกฎบัญญัติ ข้อยกะวางโตคือจั่งอยู่นอกกฎบัญญัติคือกัน เพื่อสิได้คนที่อยู่นอกกฎบัญญัติฮั้นมาฮับเซื่อ (ทั้งๆ ที่ว่าข้อยบ่ได้อยู่นอกกฎบัญญัติของพระเจ้าดอก แต่อยู่ใต้กฎของพระเยซูคริสต์) 

1 โครินธ์ 9:22 ต่อคนที่มีความเซื่ออ่อน ข้อยกะวางโตคือจั่งเป็นคนที่มีความเซื่ออ่อนคือกัน เพื่อสิได้คนที่มีความเซื่ออ่อนมาฮับเซื่อนำ คือข้อยยอมเป็นคนคู่รูปแบบต่อคนทั้งหลาย เพื่อสิได้นำเขาผู้ลางคนมาสู่ความรอดพ้น 

1 โครินธ์ 9:23 คือข้อยยอมเฮ็ดจั่งซี้ย้อนเห็นแก่ข่าวประเสริฐฮั้นเอง เพื่อข้อยสิได้มีส่วนฮ่วมในข่าวประเสริฐนำกันกับพวกเจ้า 

1 โครินธ์ 9:24 พวกเจ้าบ่ฮู้บ้อว่า นักกีฬาคนที่แล่นแข่งขันกะแล่นกันเมิ้ดคู่คน แต่สิมีผู้เดียวท่อฮั้นที่สิได้ฮับรางวัลที่หนึ่ง จั่งซั้นกะให้แล่นด้วยเต็มกำลังเพื่อมีหวังซิงรางวัลฮั้นให้ได้ 

1 โครินธ์ 9:25 แล้วฝ่ายพวกนักกีฬาคู่คนที่แย่งซิงกันฮั้น เขากะใส่ใจในระเบียบคู่อย่างเพื่อคว้าเอารางวัลให้ได้ แล้วที่เขาเฮ็ดจั่งซั้นกะเพื่อสิได้มงกุฎอนิจจังที่ร่วงไปได้ แต่ฝ่ายพวกเฮากะเฮ็ดเพื่อสิได้มงกุฎอมตะที่บ่มีการร่วงไปเลย 

1 โครินธ์ 9:26 จั่งซั้น ส่วนโตข้อยหนิ ข้อยกะแล่นแข่งอย่างมีเป้าหมายอันมั่นคง แล้วข้อยกะต่อสู้อย่างเต็มที่ บ่แม่นคือนักมวยที่ซ้อมซกแต่ลม 

1 โครินธ์ 9:27 แต่ข้อยฝึกซ้อมทุบตีร่างกายให้อยู่ใต้การบังคับของข้อยเอง หย้านว่าบัดข้อยได้ประกาศให้คนอื่นแล้ว โตข้อยเองอาจสิตกเป็นคนประเภทที่ใซ้การบ่ได้เลย
////////// ////////// //////////