1 โครินธ์ – 1 Corinthians บทที่ 7

1 โครินธ์ 7:1 แล้วบัดนี้ สำหรับเรื่องฮั้นที่พวกเจ้าเขียนไปเถิงข้อย ขอตอบว่ามันเป็นการดีแล้วที่ผู้ซายสิบ่ซูนบ่บายแม่ญิงเลย 

1 โครินธ์ 7:2 แต่จั่งใดกะตาม ให้ผู้ซายคู่คนมีเมียเป็นของโตเองเด้อ เพื่อป้องกันไว้บ่ให้มีการล่วงประเวณี แล้วกะให้แม่ญิงคู่คนมีผัวเป็นของโตเองนำ

1 โครินธ์ 7:3 ฝ่ายผู้เป็นผัว สมควรที่สิแสดงความเมตตาอารีต่อเมียของโต กับขอให้เมียเฮ็ดคือกันต่อผัวนำ 

1 โครินธ์ 7:4 ฝ่ายผู้เป็นเมียฮั้น กะบ่มีสิทธิ์เหนือร่างกายของโตเอง แต่ผัวมีสิทธิ์เหนือร่างกายของเขา แล้วในทำนองเดียวกัน ฝ่ายผู้เป็นผัวกะบ่มีสิทธิ์เหนือร่างกายของโตเอง แต่เมียมีสิทธิ์เหนือร่างกายของเขา 

1 โครินธ์ 7:5 คืออย่าปฏิเสธกันและกันในการอยู่นำกัน เว้นแต่ว่าได้ตกลงกันไว้ก่อนซั่วระยะหนึ่ง เพื่อสิถวายโตในการถืออดอาหาร กับการอธิษฐานต่อพระเจ้า แล้วจั่งค่อยมาฮ่วมกันอีก เพื่อสิบ่เปิดโอกาสให้มารซาตานซักจูงให้หลงผิดในการควบคุมโตเอง

1 โครินธ์ 7:6 แต่ที่ข้อยว่าจั่งซี้กะเป็นข้อเสนอซื่อๆ บ่แม่นเป็นคำสั่ง

1 โครินธ์ 7:7 คือคั่นเป็นได้ ข้อยอยากให้คู่คนอยู่เป็นโสดคือจั่งข้อยหนิ แต่ว่าคู่คนกะมีพรสวรรค์พิเศษจากพระเจ้า ต่างคนต่างบ่คือกัน

1 โครินธ์ 7:8 จั่งซั้น ข้อยขอเว้ากับคนที่ยังเป็นโสดอยู่กับพวกแม่ญิงที่เป็นม่าย ว่า การที่สิอยู่จั่งข้อยหนิกะเป็นการดีแล้ว 

1 โครินธ์ 7:9 แต่ว่า คั่นเขาบ่สามารถอดได้ กะให้แต่งงานซะ ย้อนว่าการที่สิแต่งงานฮั้นกะดีกว่ามีใจฮ้อนฮนด้วยความอยาก

1 โครินธ์ 7:10 แล้วสำหรับผู้ที่แต่งงานแล้วฮั้น ข้อยขอสั่งว่า ซึ่งบ่แม่นข้อยเป็นผู้สั่งเอาเอง แต่พระผู้เป็นเจ้าเพิ่นเป็นผู้สั่งไว้ว่า ส่วนผู้เป็นเมียกะบ่ให้อย่าจากผัวของโตเอง

1 โครินธ์ 7:11 แต่คั่นแม้นนางได้อย่าจากผัวโตเองไปแล้ว กะให้นางฮั้นอยู่อย่างเป็นโสด บ่ให้มีผัวใหม่อีก หรือบ่ กะให้นางกลับมาคืนดีกันกับผัวเก่า แล้วสำหรับผู้เป็นผัว กะบ่ให้เขาปะถิ้มเมียโตเองคือกัน 

1 โครินธ์ 7:12 แล้วส่วนคนอื่นๆ ข้อยขอเว้าเอง บ่แม่นพระผู้เป็นเจ้าเว้า ว่าคั่นพี่น้องคนใดมีเมียที่บ่ได้ฮับเซื่อในพระเจ้า แล้วคั่นเมียผู้บ่ได้ฮับเซื่อฮั้น พอใจที่สิอยู่กับผัวผู้ที่ฮับเซื่อ กะอย่าให้ผัวฮั้นหย่ากับเขาเลยเด้อ

1 โครินธ์ 7:13 แล้วคั่นแม่ญิงคนใดมีผัวที่บ่ได้ฮับเซื่อ คั่นนายผู้เป็นผัวพอใจที่สิอยู่กับเมียผู้ที่ฮับเซื่อ กะอย่าให้นางผู้ฮั้นหย่ากับเขาเลยเด้อ

1 โครินธ์ 7:14 ย้อนว่า ฝ่ายผัวผู้ที่บ่ฮับเซื่อฮั้น กะได้ฮับการแยกไว้เฉพาะพระเจ้าแล้วย้อนเมียโตเอง แล้วฝ่ายเมียผู้ที่บ่ฮับเซื่อฮั้น กะได้ฮับการแยกไว้เฉพาะพระเจ้าแล้วย้อนผัวโตเองคือกัน คั่นบ่ซั้นลูกๆ ของพวกเจ้ากะเป็นมลทิน แต่บัดนี้ลูกๆ ของพวกเจ้ากะเป็นผู้บริสุทธิ์เฉพาะพระเจ้าแล้ว 

1 โครินธ์ 7:15 แต่ว่า คั่นผู้ที่บ่เซื่อสิแยกโตหนีจากไป กะปล่อยให้เขาไปซะ เรื่องจั่งซี้บ่จำเป็นที่พี่น้องซายญิงผู้อยู่ในพระเจ้า สิต้องถืกผูกมัดไว้ให้จำใจอยู่นำกันดอก คือพระเจ้าได้เอิ้นเฮาให้อยู่กันอย่างสงบสุข 

1 โครินธ์ 7:16 โอ้ เจ้าผู้เป็นเมีย เอ้ย เจ้าบ่ฮู้บ้อว่า เจ้าอาจสิมีส่วนซ่อยผัวให้รอดพ้นได้ กับเจ้าผู้เป็นผัว เอ้ย เจ้าบ่ฮู้บ้อว่า เจ้าอาจสิมีส่วนซ่อยเมียให้รอดพ้นได้คือกัน

1 โครินธ์ 7:17 แต่จั่งใดกะตาม พระเจ้าเพิ่นได้กำหนดให้แต่ละคนอยู่แนวใด กะให้ใซ้ซีวิตอยู่จั่งซั้น ตามที่พระผู้เป็นเจ้าได้เอิ้นคู่คนมา คำสั่งข้อนี้ข้อยได้ตั้งไว้ให้พี่น้องกลุ่มผู้เซื่อเมิ้ดคู่หม่อง 

1 โครินธ์ 7:18 มีซายคนใดบ้อ ที่พระเจ้าเอิ้นมาที่ได้เข้าสุหนัตแล้ว กะอย่าให้เขาคึดอยากเป็นคือจั่งคนที่ยังบ่เข้าสุหนัตเลย หรือว่ามีซายคนใดบ้อ ที่พระเจ้าเอิ้นมาที่บ่ได้เข้าสุหนัต กะอย่าให้เขาคึด อยากเป็นคือจั่งคนที่เข้าสุหนัตดอก

1 โครินธ์ 7:19 คือการเข้าสุหนัต หรือบ่เข้าสุหนัตกะบ่แม่นแนวสำคัญอีหยังดอก แต่ว่า การใซ้ซีวิตตามพระคำของพระเจ้าเป็นแนวสำคัญอีหลี

1 โครินธ์ 7:20 ขอให้คู่คนใซ้ซีวิตตามความเป็นอยู่เดิม ที่เป็นอยู่ตอนพระเจ้าได้เอิ้นได้เซิญมาฮั้น 

1 โครินธ์ 7:21 คือพระเจ้าได้เอิ้นได้เซิญเจ้ามาตอนยังเป็นทาสอยู่บ้อ กะอย่าให้วุ่นวายหลายในการเป็นทาสฮั้น แต่คั่นเจ้าสามารถเป็นอิสระได้กะสิดีกว่า

1 โครินธ์ 7:22 ย้อนผู้ใดที่พระผู้เป็นเจ้าได้เอิ้นได้เซิญมาตอนเป็นทาส ผู้ฮั้นได้เป็นคนเสรีในพระผู้เป็นเจ้าอยู่แล้ว แล้วในทำนองเดียวกัน คนที่ฮับการเอิ้นการเซิญมาตอนเป็นคนเสรี คนฮั้นกะยังเป็นทาสฮับใซ้ของพระคริสต์

1 โครินธ์ 7:23 คือพระเจ้าเพิ่นได้ซื้อพวกเจ้าไว้โดยราคาสูงแล้ว จั่งซั้นอย่าให้เป็นทาสของมนุษย์เลยเด้อ 

1 โครินธ์ 7:24 จั่งซั้น พี่น้องทั้งหลาย เอ้ย ขอให้คู่คนใซ้ซีวิตตามสภาพความเป็นอยู่อันเดิมฮั้น ที่เป็นอยู่ตอนพระเจ้าได้เอิ้นได้เซิญมาฮั้นเด้อ

1 โครินธ์ 7:25 บัดนี้ สำหรับพวกสาวพรหมจารีฮั้น ข้อยบ่มีคำสั่งพิเศษอีหยังจากพระผู้เป็นเจ้าเลย แต่ข้อยขอออกความคึดเห็นในฐานะที่เป็นผู้ซึ่งได้ฮับความเมตตาจากพระผู้เป็นเจ้า ให้เป็นผู้ที่ไว้ใจได้ 

1 โครินธ์ 7:26 จั่งซั้น ย้อนเหตุการณ์อันยุ่งยากลำบากที่มีอยู่ในยามนี้ ข้อยเห็นว่า มันสิเป็นการดีคั่นคู่คนสิอยู่ในสภาพอย่างที่เขาเป็นอยู่หนิ

1 โครินธ์ 7:27 เจ้ามีเมียแล้วบ้อ กะอย่าสู่หย่ากันเลย เจ้ายังบ่ทันแต่งบ้อ กะอย่าหาเมียเลย 

1 โครินธ์ 7:28 แต่คั่นเจ้าสิเอาเมีย เจ้ากะบ่มีความผิดดอก กับคั่นว่าสาวพรหมจารีสิเอาผัวนางกะบ่มีความผิดคือกัน จั่งใดกะตาม คนที่เอาผัวเอาเมียฮั้น คือสิพ้อกับความยุ่งยากลำบากฝ่ายเนื้อหนังตามโลกนี้ แล้วข้อยอยากสิให้พวกเจ้าหวิดพ้นจากความยุ่งยากฮั้น

1 โครินธ์ 7:29 บัดนี้ พี่น้องทั้งหลาย เอ้ย ข้อยว่ายามเวลาของยุคนี้กะสั้นเข้าหลายแล้ว แต่นี้ไปส่วนผู้ที่มีเมียแล้ว ควรอยู่อย่างบ่มีเมีย

1 โครินธ์ 7:30 แล้วส่วนผู้ที่ฮ้องไห้ ควรสิอยู่อย่างบ่มีแนวที่สิต้องฮ้องไห้ ส่วนผู้ที่ซื่นซมยินดี ควรสิอยู่อย่างบ่มีแนวที่สิซื่นซมยินดี ส่วนผู้ที่หาซื้อของมา ควรสิอยู่อย่างบ่มีอีหยังเลย 

1 โครินธ์ 7:31 กับคนที่อาศัยทางโลกนี้ ควรสิอยู่อย่างฮู้จักใซ้สอย ย้อนระบบค่านิยมของโลกนี้พวมสิล่วงไปแล้ว 

1 โครินธ์ 7:32 แต่ข้อยอยากให้พวกเจ้าอยู่อย่างบ่มีความกังวล คือผู้ที่บ่มีเมีย เขากะมีเวลาที่สิเอาใจใส่ในเวียกงานของพระผู้เป็นเจ้า เพื่อสิได้เฮ็ดในแนวที่พระผู้เป็นเจ้าเห็นดีนำ

1 โครินธ์ 7:33 แต่ฝ่ายผู้ที่มีเมียแล้วฮั้น เขากะมีความกังวลในแนวต่างๆ ทางโลกนี้ คือในแนวที่สิถืกใจเมียของเขา

1 โครินธ์ 7:34 คือสำหรับผู้ที่เป็นเมีย กะแตกต่างกันกับสาวพรหมจารี คือฝ่ายสาวผู้ยังบ่ทันมีผัว เขากะมีเวลาเอาใจใส่ในเวียกงานของพระผู้เป็นเจ้า เพื่อเขาสิได้เป็นคนบริสุทธิ์ทั้งกายกับจิตวิญญาณ แต่ฝ่ายผู้ที่มีผัวแล้วฮั้น เขากะมีความกังวลในแนวต่างๆ ทางโลกนี้ คือในแนวที่สิถืกใจผัวของเขา 

1 โครินธ์ 7:35 ข้อยเว้าจั่งซี้กะเพื่อเป็นผลประโยชน์ของพวกเจ้าเอง บ่แม่นข้อยอยากสิเอาแนวมาคล้องคอพวกเจ้าไว้ดอก แต่เว้าเพื่อให้เป็นความเหมาะสมงดงาม เพื่อให้พวกเจ้าได้ฮับใซ้พระผู้เป็นเจ้าโดยบ่ต้องกังวล มีใจสองฝักสองฝ่ายเลย

1 โครินธ์ 7:36 แต่คั่นผู้ซายคนใดหย้านว่าโตเองอาจสิวางโตอย่างบ่เหมาะสมต่อสาวพรหมจารีที่ฮักของเขา กับคั่นแม่ญิงคนฮั้นพวมสิผ่านวัยหนุ่มสาวแล้ว กะให้เขาพิจารณาเอาเองเฮ็ดตามที่ปรารถนา ให้เขาแต่งเอาโลดกะได้ มันกะบ่ผิดดอก

1 โครินธ์ 7:37 จั่งใดกะตาม ซายผู้ที่สามารถยืนอยู่อย่างมั่นคงได้ กะบ่จำเป็นที่สิต้องแต่งกะได้ คือเขาสามารถที่สิหักห้ามใจโตเองได้ แล้วได้ตัดสินใจว่าสิให้แม่ญิงของเขาเป็นพรหมจารีต่อไป ที่เขาเฮ็ดจั่งซั้นกะเป็นการดีแล้ว 

1 โครินธ์ 7:38 จั่งซั้นซายผู้ที่พาแม่ญิงฮั้นเข้าแต่งงานกะเฮ็ดดีอยู่ แต่คั่นบ่พาแต่งกะแฮงเฮ็ดดีกว่าอีก 

1 โครินธ์ 7:39 แล้วตามกฎหมายในการแต่งงานฮั้น ผู้เป็นเมียกะต้องอยู่กับผัวยามเขายังมีซีวิตอยู่ แต่คั่นผัวตาย นางผู้ฮั้นกะสิเป็นอิสระ มีสิทธิ์แต่งงานกับซายผู้ใดกะได้ตามใจมัก คือผู้ซายที่เซื่อในพระผู้เป็นเจ้าท่อฮั้น 

1 โครินธ์ 7:40 แต่ข้อยว่า คั่นนางผู้ฮั้นสิอยู่เป็นโสดเขากะสิเป็นสุขกว่าไปแต่งใหม่ แล้วข้อยว่า พระวิญญาณ ของพระเจ้าได้เห็นดีกับข้อยนำ
////////// ////////// //////////