1 โครินธ์ – 1 Corinthians บทที่ 6

1 โครินธ์ 6:1 ในหมู่พวกเจ้าสิมีผู้ใดอยู่บ้อ บัดยามมีเรื่องมีราวกับพี่น้องคนอื่นๆ กล้าออกไปเว้าความกันต่อหน้าคนบ่ซอบธรรมทางโลก แทนที่สิเว้าความกันต่อหน้าพี่น้องคนของพระเจ้า 

1 โครินธ์ 6:2 พวกเจ้าบ่ฮู้บ้อ ว่าพี่น้องคนของพระเจ้าสิพิพากษาโลก กับคั่นว่าพวกเจ้าสิพิพากษาโลกแล้ว เป็นหยังพวกเจ้าสิบ่สมควรพิพากษาเรื่องเล็กๆ น้อยๆ แนวนี้บ้อ

1 โครินธ์ 6:3 พวกเจ้าบ่ฮู้บ้อ ว่าพวกเฮาสิพิพากษาหมู่เทวทูต แล้วการตัดสินแนวทางซีวิตนี้จั่งเป็นเรื่องใหญ่ส่ำใด 

1 โครินธ์ 6:4 จั่งซั้น คั่นพวกเจ้ามีเรื่องมีราวกันเกี่ยวกับซีวิตนี้ กะให้ตั้งคนในกลุ่มผู้เซื่อที่เป็นผู้เล็กน้อย แล้วให้เข้าตัดสินเอาโลด

1 โครินธ์ 6:5 ข้อยเว้าจั่งซี้กะเพื่อให้พวกเจ้าละอายใจ ในพวกเจ้าบ่มีจักคนบ้อ ที่มีปัญญาตัดสินความระหว่างพี่น้อง 

1 โครินธ์ 6:6 แต่เป็นหยัง พี่น้องกับพี่น้องต้องไปเว้าความกันต่อหน้าคนบ่เซื่อจั่งซั้นบ้อ

1 โครินธ์ 6:7 บัดพวกเจ้าไปเว้าความกันจั่งซี้ กะเป็นการผิดพลาดใหญ่ที่บ่สมควรเฮ็ด เป็นหยังพวกเจ้าคือบ่ทนเอาต่อความผิดที่เขาเฮ็ดให้เจ้า คือยอมให้เขาโกงโลด สิบ่ดีกว่าบ้อ

1 โครินธ์ 6:8 บ่แล้ว พวกเจ้ามักเฮ็ดผิดต่อกัน โกงกันในระหว่างพวกพี่น้อง

1 โครินธ์ 6:9 พวกเจ้าบ่ฮู้บ้อว่า พวกคนซั่วสิบ่ได้ฮับแผ่นดินของพระเจ้าเป็นมรดกเลย อย่าถืกหลอกเด้อ คือคนล่วงประเวณี คนถือฮูปเคารพ คนผิดผัวผิดเมียเขา คนกะเทยคู่ประเพศ

1 โครินธ์ 6:10 คนขี้ลัก คนขี้โลภ คนขี้เมา คนปากร้าย กับคนขี้โกง คนจำพวกนี้สิบ่ได้ฮับเข้าแผ่นดินของพระเจ้าเป็นมรดกเลย

1 โครินธ์ 6:11 แล้วแต่ก่อนฮั่นกะมีผู้ลางคนในพวกเจ้าที่เป็นจั่งซั้น แต่บัดนี้พวกเจ้าได้ฮับการซำระล้าง กับได้ฮับการแยกตั้งไว้ให้บริสุทธิ์เฉพาะพระเจ้า กับได้ฮับการรับรองไว้ว่าเป็นคนซอบธรรมถืกต้องต่อหน้าพระเจ้า โดยในพระนามของพระเยซูเจ้า กับโดยพระวิญญาณของพระเจ้าของพวกเฮา 

1 โครินธ์ 6:12 คือข้อยมีสิทธิ์เฮ็ดได้เมิ้ดคู่อย่าง แต่บ่แม่นเมิ้ดคู่อย่างฮั้นสิเป็นแนวสมควร ข้อยมีสิทธิ์เฮ็ดได้เมิ้ดคู่อย่าง แต่ข้อยบ่ยอมให้มันมีอำนาจเหนือข้อยเลย

1 โครินธ์ 6:13 แนวกินมีไว้เพื่อท้อง กับท้องกะมีไว้เพื่อแนวกิน แต่ว่ามีมื้อหนึ่งที่พระเจ้ากะสิให้ทั้งสองฮั้นสูญสิ้นไป แล้วร่างกายของคนเฮาฮั้น เพิ่นบ่ได้สร้างไว้เพื่อการล่วงประเวณี แต่ได้สร้างไว้สำหรับการถวายเกียรติพระผู้เป็นเจ้า กับพระผู้เป็นเจ้ากะอยู่เพื่อร่างกาย

1 โครินธ์ 6:14 พระเจ้าผู้เป็นพ่อได้บันดาลให้พระผู้เป็นพระบุตรฮั้นเป็นขึ้นมาจากตาย แล้วในทำนองเดียวกัน เพิ่นกะสิบันดาลให้พวกเฮาทั้งหลายเป็นขึ้นมาจากตายคือกันโดยฤทธานุภาพของเพิ่น 

1 โครินธ์ 6:15 พวกเจ้าบ่ฮู้บ้อว่า ร่างกายของพวกเจ้าเป็นอวัยวะของพระคริสต์ บัดเป็นจั่งซั้นแล้ว สิให้ข้อยเอาอวัยวะของพระคริสต์ เข้าเป็นอวัยวะกันกับแม่ญิงหากินได้บ้อ ขออย่าให้เป็นจั่งซั้นเด็ดขาดเลย 

1 โครินธ์ 6:16 หรือ เจ้าบ่ฮู้บ้อว่า คนที่ผูกพันกับแม่ญิงหากินกะสิฮ่วมร่างเป็นกายเดียวกันกับแม่ญิงฮั้น ตามที่เพิ่นได้เว้าไว้ว่า “เขาทั้งสองสิได้เข้าเป็นเลือดเนื้ออันเดียวกัน”

1 โครินธ์ 6:17 แต่ส่วนคนที่ผูกพันกับพระผู้เป็นเจ้า กะเป็นอันเดียวกันกับเพิ่นฝ่ายจิตวิญญาณ 

1 โครินธ์ 6:18 จั่งซั้น ให้หลีกเลี่ยงจากการล่วงประเวณีเด้อ ย้อนว่าความบาปคู่อย่างที่มนุษย์เฮ็ดฮั้นกะเป็นบาปภายนอกร่างกาย แต่ว่าคนที่ล่วงประเวณีฮั้นได้เฮ็ดผิดต่อร่างกายของโตเอง 

1 โครินธ์ 6:19 หรือ เจ้าบ่ฮู้บ้อว่า ร่างกายของพวกเจ้าได้เป็นวิหารของพระวิญญาณบริสุทธิ์ ซึ่งสถิตอยู่ในพวกเจ้าแล้ว ซึ่งพวกเจ้าได้ฮับจากพระเจ้า แล้วเจ้าจั่งบ่แม่นโตเองดอก 

1 โครินธ์ 6:20 ย้อนว่า พระเจ้าได้ซื้อพวกเจ้าไว้แล้วโดยราคาสูง จั่งซั้นกะให้พวกเจ้าถวายพระเกียรติแด่พระเจ้าด้วยร่างกายของโตเจ้าเองเด้อ กับด้วยจิตวิญญาณของเจ้านำ ซึ่งทั้งสองฮั้นเป็นของพระเจ้าแล้ว
////////// ////////// //////////