1 โครินธ์ – 1 Corinthians บทที่ 4

1 โครินธ์ 4:1 ให้คู่คนถือกันว่า พวกเฮาเป็นผู้ฮับใซ้ของพระคริสต์ กับเป็นผู้เบิ่งแยงแนวล้ำลึกของพระเจ้านำ 

1 โครินธ์ 4:2 ยิ่งกว่าฮั้นอีก ผู้ที่สิเป็นผู้เบิ่งแยงฮั้น สิต้องเป็นคนจงรักภักดี 

1 โครินธ์ 4:3 แล้วสำหรับข้อยหนิ การที่พวกเจ้าหรือคนผู้ใดกะอย่า สิตัดสินโตข้อย ข้อยถือว่าเป็นเรื่องเล็กน้อย เถิงแม้นโตข้อยกะยังบ่ได้ตัดสินโตเองเลย 

1 โครินธ์ 4:4 ย้อนว่า สำหรับข้อยแล้ว จิตสำนึกของข้อยบ่ได้ฟ้องว่าข้อยมีแนวผิดพลาดอีหยังเลย จั่งใดกะตาม ข้อยบ่ได้ถือว่าข้อยถืกต้องจั่งซี้ดอก ย้อนว่าแม่นพระผู้เป็นเจ้า เป็นผู้ตัดสินโตข้อย 

1 โครินธ์ 4:5 จั่งซั้นพวกเจ้าบ่ควรสิตัดสินอีหยังก่อนสิฮอดยาม คือจนกว่าพระผู้เป็นเจ้าสิเสด็จมา ผู้เพิ่นสิเปิดเผยแนวที่ถืกปิดซ่อนไว้อยู่ในความมืดให้มันแจ้งออกเมิ้ด กับสิเปิดเผยความนึกคึดในใจของแต่ละคนนำ แล้วในบัดฮั้น คำซมเซยที่คู่คนสิได้ฮับฮั้นกะสิมาจากพระเจ้า 

1 โครินธ์ 4:6 พี่น้องทั้งหลาย เอ้ย แนวที่ข้อยได้เอามาเว้าหนิ ข้อยเล็งเถิงโตเองกับอปอลโลเป็นโตอย่าง เพื่อเป็นประโยชน์ให้พวกเจ้า ให้เฮียนฮู้จากพวกเฮา ว่าบ่ควรสิยกย่องคนใดคนหนึ่งเกินกว่าที่มีเขียนไว้ฮั้น กะเพื่อบ่มีใผสิยกผู้ใดผู้หนึ่งเหนือผู้อื่นเด้อ

1 โครินธ์ 4:7 คือแม่นผู้ใดที่เฮ็ดให้เจ้าดีเด่นกว่าคนอื่น แล้วพวกเจ้ามีอีหยังที่เจ้าบ่ได้ฮับมา แล้วคั่นได้ฮับมา เป็นหยังเจ้าจั่งอวดปานบ่ได้ฮับมาเลย

1 โครินธ์ 4:8 พวกเจ้าอิ่มหนำสำราญแล้วหน้อ พวกเจ้าฮั่งมีแล้วหน้อ พวกเจ้าได้ปกครองปานกษัตริย์แล้วหน้อ ปานพวกเฮาบ่มีส่วนฮ่วมนำเนาะ ข้อยอยากให้พวกเจ้าขึ้นบัลลังก์ปกครองอีหลี เพื่อเฮาสิได้ขึ้นปกครองนำกันกับเจ้า

1 โครินธ์ 4:9 คือ ข้อยคึดว่า พระเจ้าได้ตั้งพวกเฮาผู้เป็นทูตพิเศษไว้อยู่ท้ายหมู่ พอปานคนถืกปรับโทษฮอดตาย ย้อนว่าพวกเฮาถืกมองเป็นคนแปลกประหลาด เป็นที่ผิดสังเกตต่อโลก ต่อเทวทูต พร้อมทั้งต่อคนอื่นๆ นำ

1 โครินธ์ 4:10 พวกเฮาเป็นคนโง่เขลาเบาปัญญาย้อนเห็นแก่พระคริสต์ แต่ฝ่ายพวกเจ้าเป็นคนมีปัญญาหลาย พวกเฮาเป็นคนอ่อนกำลัง แต่ฝ่ายพวกเจ้าเป็นคนเข้มแข็ง พวกเฮาเป็นคนอัปยศ แต่ฝ่ายพวกเจ้าได้มีเกียรติสูง

1 โครินธ์ 4:11 แม้นแต่บัดนี้ พวกเฮากะยังหิวข้าวหิวน้ำ ทั้งขาดแนวนุ่งที่ดี ถืกเบียดเบียนโบยตี บ่มีหม่องอยู่อาศัยเป็นหลักเป็นแหล่งเลย

1 โครินธ์ 4:12 เอ่อ พวกเฮาเฮ็ดงานหนักด้วยมือโตเอง บัดถืกด่าพวกเฮากะอวยพร บัดถืกข่มเหงพวกเฮากะอดทนเอา 

1 โครินธ์ 4:13 บัดถืกคนว่าใส่ร้ายใส่ความ พวกเฮากะอ้อนวอนขอร้องเอา พวกเฮากะกลายเป็นกากเป็นเดนของโลก ปานเศษของคู่อย่างจนฮอดปัจจุบันนี้เลย

1 โครินธ์ 4:14 ข้อยบ่ได้เขียนแนวนี้เพื่อสิให้พวกเจ้าอับอายขายหน้าดอก แต่ได้เขียนเพื่อสิเตือนสติในฐานะที่พวกเจ้าเป็นลูกที่ฮักแพงของข้อย

1 โครินธ์ 4:15 คือ เถิงแม้นพวกเจ้าสิมีครูในพระคริสต์เป็นพันเป็นหมื่นกะตาม พวกเจ้ามีแต่ข้อยแต่ผู้เดียวที่เป็นพ่อ ย้อนว่าแม่นข้อยหนิ ที่ให้พวกเจ้ามีการเกิดใหม่ในพระเยซูคริสต์โดยทางข่าวประเสริฐฮั้น

1 โครินธ์ 4:16 จั่งซั้น ข้อยจั่งขอให้พวกเจ้าดำเนินตามอย่างข้อยไป

1 โครินธ์ 4:17 ย้อนเหตุนี้เอง ข้อยจั่งใซ้ทิโมธีลูกที่ฮักของข้อย ซึ่งเป็นผู้จงรักภักดีในพระผู้เป็นเจ้า มาหาพวกเจ้า เพื่อสิเตือนความจำพวกเจ้า เถิงแบบอย่างซีวิตของข้อยในพระคริสต์ ตามที่ข้อยได้สอนในคู่กลุ่มผู้เซื่ออยู่คู่หม่อง

1 โครินธ์ 4:18 บัดนี้ ได้มีผู้ลางคนในหมู่พวกเจ้าที่มีใจผยอง มีท่าที่ปานกับว่าข้อยสิบ่มาหาพวกเจ้า

1 โครินธ์ 4:19 แต่คั่นพระผู้เป็นเจ้าโปรดให้ข้อยมา ข้อยสิมาหาพวกเจ้าในไวๆ นี้ แล้วสิได้ฮู้จักความจริง บ่แม่นแต่การขี้คุยของซุมคนที่ผยองฮั้น แต่สิได้ฮู้จักรสซาติกำลังที่แท้จริงของเขา

1 โครินธ์ 4:20 ย้อนว่า แผ่นดินของพระเจ้าฮั้นบ่แม่นแต่เรื่องความเว้าซื่อๆ แต่เต็มไปด้วยฤทธานุภาพของพระเจ้า 

1 โครินธ์ 4:21 พวกเจ้าสิเอาจั่งใดกะให้เลือกเอาเบิ่งดู สิให้ข้อยถือไม้แส้มาหาพวกเจ้า หรือว่าสิให้ข้อยมาด้วยความฮักกับด้วยใจอ่อนน้อม
////////// ////////// //////////