1 โครินธ์ – 1 Corinthians บทที่ 16

1 โครินธ์ 16:1 บัดนี้ ในเรื่องการเก็บทรัพย์ที่ถวายเพื่อซ่อยพี่น้องคนของพระเจ้าที่ตกทุกข์ได้ยากฮั้น ข้อยได้สั่งพี่น้องกลุ่มผู้เซื่อที่อยู่แคว้นกาลาเทียไว้จั่งซี้ แล้วให้พวกเจ้าเฮ็ดคือกันเด้อ 

1 โครินธ์ 16:2 คือ ในมื้อแรกของสัปดาห์ของคู่อาทิตย์ ให้พวกเจ้าคู่คนเก็บผลส่วนหนึ่งของรายได้ ตามที่พระเจ้าได้อวยพรเจ้า ให้เฮ็ดแนวนี้เพื่อสิบ่ต้องฟ้าวหาเก็บหาแผ่เอาบัดยามข้อยสิมา 

1 โครินธ์ 16:3 กับบัดข้อยมาฮอดแล้ว ผู้ที่พวกเจ้าเห็นซอบสิรับรอง พร้อมกับจดหมายของพวกเจ้าฮั้น ข้อยกะสิใซ้เขานำเอาของถวายของพวกเจ้า ไปส่งให้พี่น้องอยู่เมืองเยรูซาเล็ม 

1 โครินธ์ 16:4 แล้วคั่นเห็นสมควรข้อยกะสิไปนำ แล้วพวกเขากะสิไปนำข้อย 

1 โครินธ์ 16:5 บัดข้อยข้ามแคว้นมาซิโดเนียแล้ว ข้อยกะสิมาหาพวกเจ้า คือมาซิโดเนียกะอยู่ในเส้นทางที่ข้อยสิเดินทางไปฮั้น 

1 โครินธ์ 16:6 แล้วหาลางเทื่อข้อยอาจสิพักอยู่นำพวกเจ้า หรือลางเทื่อคั่นฮอดยามหนาวข้อยอาจสิค้างแรมอยู่นำพวกเจ้าได้ กะเพื่อพวกเจ้าสิส่งข้อยไปทางที่ข้อยสิไปฮั้น 

1 โครินธ์ 16:7 คือข้อยสิบ่พ้อเจ้าบัดข้อยเดินทางผ่านมาในขาไปฮั้น แต่ข้อยหวังสิแวะมาค้างอยู่กับเจ้าโดนแหน่บัดขามา คั่นพระผู้เป็นเจ้าได้โปรด 

1 โครินธ์ 16:8 แต่ข้อยสิอยู่เมืองเอเฟซัสไว้ฮอดเทศกาลเพ็นเทคอสต์ 

1 โครินธ์ 16:9 โดยว่า ได้มีประตูเปิดไว้กว้างให้ข้อยมีโอกาสประกาศอยู่พู่น แล้วกะมีศัตรูหลายนำ 

1 โครินธ์ 16:10 บัดนี้ คั่นทิโมธีมาหาพวกเจ้า กะให้ลาวอยู่กับเจ้าโดยบ่ต้องยำเกรงย้อนหยังเด้อ คือลาวเฮ็ดงานของพระผู้เป็นเจ้าคือจั่งข้อยหนิ 

1 โครินธ์ 16:11 จั่งซั้น อย่าให้ผู้ใดดูหมิ่นเขาเลย แต่ให้ซ่อยส่งลาวเดินทางไปโดยสวัสดิภาพ เพื่อลาวสิได้มาเถิงข้อยโดยดี ย้อนข้อยพวมคอยถ้าลาวกับพวกพี่น้องที่มานำลาวฮั่น 

1 โครินธ์ 16:12 แล้วบัดนี้ ส่วน อปอลโล พี่น้องของพวกเฮาอีกผู้หนึ่งฮั้น ข้อยได้ซักซวนให้ลาวมาเยี่ยมยามพวกเจ้าพร้อมกับพวกพี่น้องนำ แต่ใจลาวบ่ทันอยากมาในยามนี้ บัดโอกาสหน้าลาวจั่งค่อยสิมา 

1 โครินธ์ 16:13 ให้พวกเจ้าระวังไว้ให้ดีเด้อ ให้มั่นคงในความเซื่อนำเด้อ มีใจกล้าหาญ เข้มแข็งนำเด้อ 

1 โครินธ์ 16:14 แล้วเมิ้ดคู่แนวที่พวกเจ้าเฮ็ดฮั้น กะให้เฮ็ดด้วยความฮักเด้อ 

1 โครินธ์ 16:15 ข้อยขอร้องต่อพี่น้อง เอ้ย (พวกเจ้าฮู้แล้ว ว่าครอบครัวของ สเทฟานัส ได้ฮับเซื่อเป็นผลแรกในแคว้นอาคายา พวกเขาจั่งได้เอาใจใส่มีความยินดีในการปรนนิบัติฮับใซ้คนทั้งหลายของพระเจ้า) 

1 โครินธ์ 16:16 คือข้อยขอให้พวกเจ้าถ่อมใจปรนนิบัติพี่น้องคนของพระเจ้าแนวฮั้น คือเขาซ่อยในงานพระเจ้านำกันกับพวกข้อยเด้อ 

1 โครินธ์ 16:17 ข้อยกะดีใจหลายที่ สเทฟานัส กับ ฟอร์ทูนาทัส กับ อาคายคัส ได้มาหาแล้ว คือพวกเขาได้ซ่อยทดแทนเพิ่มส่วนการถวายที่พวกเจ้าขาดฮั้น 

1 โครินธ์ 16:18 คือพวกเขาได้ซ่อยหนุนใจจิตวิญญาณของข้อย พร้อมทั้งจิตวิญญาณของพวกเจ้านำ จั่งซั้น ให้พวกเจ้ายอมฮับนับถือคนจั่งพวกนี้เด้อ 

1 โครินธ์ 16:19 กับว่า พี่น้องกลุ่มผู้เซื่อทั้งหลายในแคว้นเอเซียฝากความคึดฮอดมายังพวกเจ้านำ แล้ว อาควิลลา กับ ปริสสิลลาพร้อมกับพี่น้องกลุ่มผู้เซื่อที่ตุ้มโฮมกันอยู่เฮือนของเขา กะได้ฝากความคึดฮอดในองค์พระผู้เป็นเจ้ามายังพวกเจ้าด้วยความยินดีนำ 

1 โครินธ์ 16:20 แล้วพี่น้องคู่คนอยู่นี้ ได้ฝากความคึดฮอดคึดเถิงมายังพวกเจ้านำ ให้พวกเจ้าทักทายกันและกันด้วยน้ำใจอันบริสุทธิ์เด้อ 

1 โครินธ์ 16:21 ข้อยเขียนคำลงท้ายนี้โดยลายมือของข้อย เปาโลเอง 

1 โครินธ์ 16:22 คั่นผู้ใดบ่ฮักแพงพระเยซูคริสต์เจ้า กะขอให้เขาผู้ฮั้นถืกพระเจ้าสาปแซ่งเด้อ ขอได้มาในไวๆ นี้ พระผู้เป็นเจ้าเอ้ย 

1 โครินธ์ 16:23 ขอให้พระกรุณาธิคุณของพระเยซูคริสต์เจ้าของพวกเฮา ดำรงอยู่กับพวกเจ้าเถิด 

1 โครินธ์ 16:24 แล้วสุดท้ายนี้ ข้อยขอฝากความฮักแพงหลายมายังพวกเจ้าในองค์พระเยซูคริสต์ อาเมน [จดหมายฉบับแรกนี้ ท่านอาจารย์เปาโล ได้เขียนไปยังพี่น้องซาวโครินธ์ จากเมืองฟีลิปปี กับนำส่งโดย สเทฟานัส ฟอร์ทูนาทัส อาคายคัส กับ ทิโมธี]