1 โครินธ์ – 1 Corinthians บทที่ 15

1 โครินธ์ 15:1 นอกจากฮั้นอีก พี่น้องทั้งหลาย เอ้ย ข้อยขอยืนยันเถิงข่าวประเสริฐที่ให้ไว้กับพวกเจ้าแล้วฮั้น ว่าเป็นข่าวประเสริฐอันดั้งเดิม ที่ข้อยได้มาประกาศให้กับพวกเจ้าแต่ตำอิดฮั้น ซึ่งพวกเจ้าได้ฮับเอาไว้แล้ว ที่พวกเจ้ายังยืนอยู่อย่างมั่นคง 

1 โครินธ์ 15:2 จั่งซั้น ซึ่งพวกเจ้าพวมรอดพ้นอยู่ กะด้วยข่าวประเสริฐฮั้นเอง คั่นแม่นพวกเจ้ายึดมั่นในถ้อยคำที่ข้อยได้ประกาศไว้กับพวกเจ้าแล้ว นอกจากว่าพวกเจ้าฮับเซื่อแต่ปากซื่อๆ 

1 โครินธ์ 15:3 คือเรื่องข่าวประเสริฐที่ข้อยได้นำมาประกาศให้พวกเจ้าฮั้น เป็นข่าวที่ข้อยได้ฮับมอบมาแล้ว ว่า พระคริสต์ได้ตาย ฮับแบกโทษบาปแทนคนเฮาทั้งหลาย ตามพระคำฮั้น 

1 โครินธ์ 15:4 แล้วศพของเพิ่นได้ถืกเมี้ยนไว้ในอุโมงค์ แล้วเพิ่นจั่งเป็นขึ้นมาจากตายในมื้อที่สาม ตามพระคำของพระเจ้าแล้วฮั้น 

1 โครินธ์ 15:5 แล้วเคฟาส(เปโตร)กะได้พ้อได้เห็นเพิ่น แล้วต่อมา พวกทูตพิเศษสิบสองคนฮั้นได้พ้อได้เห็นเพิ่นนำ 

1 โครินธ์ 15:6 หลังจากฮั้น มีพวกพี่น้องห้าร้อยกว่าคน ได้เห็นเพิ่นพร้อมกัน ซึ่งคนส่วนหลายฮั้น เขากะยังอยู่จนฮอดคู่มื้อนี้ แต่ผู้ลางคนได้ล่วงหลับไปแล้ว 

1 โครินธ์ 15:7 ภายหลังฮั้น ยากอบได้พ้อได้เห็นเพิ่น แล้วทูตพิเศษทั้งเมิ้ดกะได้พ้อได้เห็นเพิ่นนำ 

1 โครินธ์ 15:8 สุดท้ายโตข้อยเองกะได้พ้อได้เห็นเพิ่นนำ คือจั่งผู้ที่เกิดผิดยาม 

1 โครินธ์ 15:9 คือข้อยหนิ เป็นผู้เล็กน้อยที่สุดในพวกทูตพิเศษ จั่งบ่สมควรสิได้ซื่อว่าเป็นทูตพิเศษเลย ย้อนว่าโตข้อยเองเคยข่มเหงทรมานกลุ่มผู้เซื่อของพระเจ้ามาก่อน 

1 โครินธ์ 15:10 แต่ว่า ข้อยเป็นอยู่ได้คือจั่งคู่มื้อนี้ กะย้อนพระกรุณาธิคุณของพระเจ้า แล้วพระกรุณาธิคุณของเพิ่นต่อข้อย กะบ่ได้เมิ้ดประโยชน์เลย ย้อนว่าข้อยได้เฮ็ดการงานของเพิ่นหลายกว่าพวกทูตพิเศษคนอื่นๆ แล้วมันบ่แม่นโตข้อยดอก แต่เป็นพระกรุณาธิคุณของพระเจ้าที่ดำรงอยู่กับโตข้อย 

1 โครินธ์ 15:11 จั่งซั้น แม้นโตข้อยกะดี หรือพวกทูตพิเศษฮั้นกะดี เฮาทั้งหลายจั่งได้ประกาศอย่างที่เว้ามาหนิ แล้วพวกเจ้าจั่งได้ฮับเซื่อนำ 

1 โครินธ์ 15:12 แต่บัดนี้ คั่นพวกเฮาประกาศว่าพระคริสต์ได้เป็นขึ้นมาจากตายแล้ว เป็นหยังคือมีผู้ลางคนในพวกเจ้าที่ยังเว้าว่า บ่มีการเป็นขึ้นมาจากตายเลย 

1 โครินธ์ 15:13 แต่คั่นบ่มีการเป็นขึ้นมาจากตาย ขนาดพระคริสต์เอง เพิ่นกะสิบ่ได้เป็นขึ้นมาจากตายคือกัน 

1 โครินธ์ 15:14 แล้วคั่นว่าพระคริสต์บ่ได้เป็นขึ้นมาแล้วฮั้น การประกาศของเฮากะเมิ้ดประโยชน์ไปเลย พร้อมทั้งความเซื่อของพวกเจ้าฮั้นกะเมิ้ดประโยชน์คือกัน 

1 โครินธ์ 15:15 เอ่อ คั่นปรากฏว่าพวกเฮาหนิอ้างพยานเท็จเรื่องพระเจ้า ที่พวกเฮาประกาศว่าเพิ่นได้บันดาลให้พระคริสต์เป็นขึ้นมาจากตายแล้วฮั้น ทั้งๆ ที่ว่าบ่มีการเป็นขึ้นมาจากตาย แสดงว่าพระเจ้าบ่ได้บันดาลให้พระคริสต์เป็นขึ้นมาจากตายซั่นตี้

1 โครินธ์ 15:16 ย้อนว่า คั่นผู้ที่ตายแล้วบ่มีการเป็นขึ้นมา กะแสดงว่าพระคริสต์บ่ได้เป็นขึ้นมาจากตาย 

1 โครินธ์ 15:17 แล้วคั่นพระคริสต์บ่ได้เป็นขึ้นมาจากตายฮั้น ความเซื่อของพวกเจ้ากะบ่มีประโยชน์อีหยังเลย เจ้ากะยังอยู่ในสภาพบาปของโตเองคือเก่า 

1 โครินธ์ 15:18 แล้วฝ่ายผู้ที่ล่วงหลับไปในพระคริสต์ฮั้น พวกเขากะพินาศไปแล้ว 

1 โครินธ์ 15:19 คือ คั่นความหวังที่พวกเฮามีในพระคริสต์ ใซ้ได้ในซีวิตนี้อย่างเดียว พวกเฮาแฮงเป็นตาอิโตน น่าสังเวชที่สุด กว่าคนอื่นๆ ในมวลมนุษย์เลย 

1 โครินธ์ 15:20 แต่ว่า บัดนี้ พระคริสต์เป็นขึ้นมาจากความตายอีหลีแล้ว กับเพิ่นเป็นผลแรกในพวกคนทั้งหลายที่ได้ล่วงหลับไปฮั้น 

1 โครินธ์ 15:21 คือว่า ความตายฮั้นได้เข้ามาสู่มวลมนุษย์ย้อนคนๆหนึ่งเป็นเหตุ แล้วในทำนองเดียวกัน การเป็นขึ้นมาจากตายฮั้น กะได้เข้ามาย้อนคนอีกผู้หนึ่งคือกัน 

1 โครินธ์ 15:22 ด้วยว่า ในปู่อาดัมฮั้น มวลมนุษย์ทั้งปวงได้เข้าสู่ความตายจั่งใด ในพระคริสต์ มนุษย์กะสิเข้าสู่ซีวิตได้จั่งซั้น 

1 โครินธ์ 15:23 แต่ว่ามันสิเป็นตามลำดับ คือพระคริสต์ได้เป็นผลแรกที่เป็นขึ้นมาจากตาย แล้วผู้คนทั้งหลายที่เป็นคนของพระคริสต์ฮั้น สิได้เป็นขึ้นมาตอนหลัง คือตอนเพิ่นสิเสด็จกลับมาฮั้น 

1 โครินธ์ 15:24 ต่อจากฮั้นมาสิเป็นยุคสุดท้าย คือเป็นยามที่เพิ่นสิมอบแผ่นดินไว้ให้กับพระเจ้าผู้เป็นพ่อ กับเป็นยามที่เพิ่นสิปราบปรามการปกครอง กับอำนาจ พร้อมอิทธิพลทั้งหลาย ให้เมิ้ดสิ้นไป 

1 โครินธ์ 15:25 ย้อนว่าจำเป็นแล้วที่เพิ่นสิต้องครอบครอง จนกว่าเพิ่นได้ปราบปรามหมู่ศัตรูทั้งหลาย ให้อยู่ใต้ฝ่าเท้าของเพิ่น 

1 โครินธ์ 15:26 แล้วศัตรูอันสุดท้ายที่สิถืกทำลายให้สิ้นไปฮั้น กะคือความตาย 

1 โครินธ์ 15:27 คือ พระเจ้าผู้เป็นพ่อได้โปรดให้เมิ้ดคู่แนวอยู่ใต้ฝ่าเท้าของเพิ่นแล้ว แต่ที่ว่า “เมิ้ดคู่แนวอยู่ใต้เพิ่น” ให้เข้าใจว่า ได้ยกเว้นพระเจ้าเอง ผู้ที่เฮ็ดให้การปกครองของคู่แนวฮั้นอยู่ใต้เพิ่น 

1 โครินธ์ 15:28 แล้วบัดยามพระเจ้าผู้เป็นพ่อได้ปราบให้เมิ้ดคู่แนวให้อยู่ใต้เพิ่นแล้ว บัดฮั้นพระบุตรเองกะสิอยู่ใต้พระเจ้าฮั้นนำ ผู้เพิ่นที่ปราบเมิ้ดคู่แนวให้อยู่ใต้พระบุตร เพื่อพระเจ้าสิเป็นเอกเป็นประมุขเหนือเมิ้ดคู่แนวทั้งปวง 

1 โครินธ์ 15:29 บ่ซั้น คนได้ฮับบัพติศมาลงน้ำเพื่อคนที่ตายแล้วสิเฮ็ดจั่งใด คั่นแม่นบ่มีการเป็นขึ้นมาของผู้ตายเลยซ้ำ พวกเขาฮับบัพติศมาลงน้ำแทนผู้ตายย้อนหยังซั่น 

1 โครินธ์ 15:30 แล้วเป็นหยังพวกเฮาจั่งสิต้องเสี่ยงอันตราย พ้อกับแนวเป็นพิษเป็นภัยอยู่ตลอดคู่ยามเลย 

1 โครินธ์ 15:31 ข้อยยอมเสี่ยงซีวิตประสบความตายคู่มื้อ จั่งยืนยันว่า ข้อยมีความภูมิใจหลายในพวกเจ้าโดยทางพระเยซูคริสต์เจ้าของพวกเฮา 

1 โครินธ์ 15:32 คือ คั่นข้อยเคยต่อสู้กับสัตว์อันตรายอยู่เมืองเอเฟซัสตามค่านิยมทางโลก ข้อยได้ผลประโยชน์อีหยังคั่นคนตายบ่ได้เป็นขึ้นมาอีก เป็นตามถ้อยคำว่า “ให้เฮากินดื่มเถิด ย้อนว่ามื้ออื่นเฮาสิตาย” 

1 โครินธ์ 15:33 อย่าหลงเลย การคบกับคนทุจริต มักสิเฮ็ดให้เสียนิสัย 

1 โครินธ์ 15:34 แต่ให้สร่างนอนตื่นโตไปตามทางซอบธรรมเด้อ แล้วให้เซาติดตามทางผิดบาปซะเด้อ ย้อนว่ายังมีหลายคนที่ยังบ่ฮู้จักกับพระเจ้าเลย ที่ข้อยเว้าจั่งซี้ กะให้พวกเจ้าละอายใจ 

1 โครินธ์ 15:35 แต่อาจมีคนสิถามว่า “ผู้ที่ตายไปแล้วฮั้น เขาสิเป็นขึ้นมาแนวใด แล้วบัดเป็นขึ้นมาฮั้น ร่างกายเขาสิเป็นลักษณะแบบใด” 

1 โครินธ์ 15:36 โอ้ พวกคนโง่เอ้ย เม็ดข้าวที่เจ้าหว่านลงฮั้น คั่นบ่ตายก่อน มันสิแตกตางอกขึ้นมาใหม่ได้จั่งใด 

1 โครินธ์ 15:37 แล้วเม็ดข้าวที่เจ้าหว่านลงฮั้น เจ้ากะบ่ได้หว่านลงเป็นลักษณะต้นที่สิงอกขึ้นมาฮั่น แต่ได้หว่านแค่เป็นเม็ดซื่อๆ 

1 โครินธ์ 15:38 แต่พระเจ้าเพิ่นได้ให้เม็ดพืชฮั้นมีรูปมีร่างของแต่ละแนวตามที่เพิ่นได้กำหนดไว้ คือให้ตามซนิดของใผของมันเมิ้ด 

1 โครินธ์ 15:39 แล้วลักษณะของเนื้อเลือดแต่ละแนวกะบ่คือกัน คือของคนกะแนวหนึ่ง ของพวกสัตว์สี่ตีนกะแนวหนึ่ง ของโตปลากะแนวหนึ่ง แล้วของพวกนกกะอีกแนวหนึ่ง 

1 โครินธ์ 15:40 แล้วกะมีร่างกายอมตะที่เหมาะสำหรับสวรรค์กะดี กับร่างกายอนิจจังที่เหมาะสำหรับโลกกะดี แต่ศักดิ์ศรีของร่างกายสำหรับสวรรค์กะเป็นแนวหนึ่ง กับศักดิ์ศรีของร่างกายสำหรับโลกกะเป็นอีกแนวหนึ่ง 

1 โครินธ์ 15:41 แล้วมีศักดิ์ศรีของดวงตะเว็นกะแนวหนึ่ง ศักดิ์ศรีของดวงจันทร์กะแนวหนึ่ง แล้วศักดิ์ศรีของหมู่ดวงดาวกะแนวหนึ่ง แต่ศักดิ์ศรีของหมู่ดาวกะบ่คือกันแต่ละดวง มีแสงของใผของมันเมิ้ดคู่ดวง 

1 โครินธ์ 15:42 แล้วการเป็นขึ้นมาจากตายฮั้นกะคือกัน ตอนที่หว่านลงฮั้นเป็นของเน่าเปื่อย แต่บัดได้เป็นขึ้นมาฮั้น มันกะบ่ฮู้จักเน่าเปื่อย 

1 โครินธ์ 15:43 แนวที่ถืกหว่านลงกะบ่มีศักดิ์ศรี แต่แนวที่เป็นขึ้นมาฮั้นกะสิมีศักดิ์ศรีหลาย กับแนวที่หว่านลงฮั้นอ่อนกำลังแล้ว แต่แนวที่เป็นขึ้นมาใหม่กะสิมีฤทธิ์กำลังหลาย 

1 โครินธ์ 15:44 แนวที่หว่านลงฮั้นกะเป็นแค่ร่างกายธรรมดาโลกซื่อๆ แต่แนวที่เป็นขึ้นมาฮั้นกะสิเป็นร่างฝ่ายวิญญาณ คือว่า ร่างกายธรรมดาโลกนี้กะมี กับร่างฝ่ายวิญญาณกะมี 

1 โครินธ์ 15:45 คือจั่งมีเขียนไว้แล้วว่า “อาดัมคนผู้แรกฮั้นถืกสร้างขึ้นมาให้เป็นผู้มีซีวิต” แต่ว่าอาดัมผู้สุดท้ายฮั่นคือพระเยซูคริสต์ เป็นวิญญาณผู้ที่โปรดให้ซีวิต 

1 โครินธ์ 15:46 แต่ว่า ซึ่งมาก่อนฮั้น บ่ได้เป็นฝ่ายวิญญาณ แต่เป็นแนวธรรมดา แล้วซึ่งเป็นฝ่ายวิญญาณฮั้น ได้มาตอนหลัง 

1 โครินธ์ 15:47 คนตำอิดฮั้นมาจากดิน อยู่ฝ่ายดิน แต่คนผู้ที่สองฮั้นกะเป็นพระผู้เป็นเจ้าผู้ที่เสด็จลงมาจากสวรรค์ 

1 โครินธ์ 15:48 คือผู้ฮั้นที่มาจากดินเป็นจั่งใด คู่คนที่มาจากดินกะเป็นจั่งซั้น แล้วผู้ฮั้นที่อยู่ฝ่ายสวรรค์เป็นจั่งใด คู่คนที่อยู่ฝ่ายสวรรค์กะเป็นจั่งซั้น 

1 โครินธ์ 15:49 กับว่า ซึ่งพวกเฮามีภาพลักษณ์คือจั่งผู้ที่มาจากดิน ในอนาคตพวกเฮากะสิมีภาพลักษณ์คือจั่งผู้ที่มาจากสวรรค์ 

1 โครินธ์ 15:50 แต่บัดนี้ พี่น้องทั้งหลาย เอ้ย ข้อยว่า เนื้อกับเลือดฮั้น บ่สามารถที่สิฮับแผ่นดินของพระเจ้าเป็นมรดกได้ แล้วในทำนองเดียวกัน แนวอนิจจังที่ฮู้จักเปื่อยเน่าไปฮั้น บ่สามารถฮับเอาแนวอมตะซึ่งบ่ฮู้จักเปื่อยเน่าเป็นมรดกได้คือกัน 

1 โครินธ์ 15:51 นี่แน่ะ ข้อยมีแนวล้ำลึกที่สิบอกพวกเจ้า คือพวกเฮาเมิ้ดคู่คนสิบ่ได้ล่วงหลับไป แต่ว่าพวกเฮาเมิ้ดคู่คนสิได้ฮับการเปลี่ยนสภาพใหม่ 

1 โครินธ์ 15:52 คือในแว็บเดียว ในพริบตาเดียว สิมีการเป่าแตรเป็นเทื่อสุดท้าย คือแตรฮั้นสิส่งเสียงออกมา แล้วคนผู้ที่ตายแล้วในพระคริสต์สิได้เป็นขึ้นมาในสภาพอมตะที่บ่ฮู้จักเปื่อยเน่า แล้วพวกเฮาที่ยังอยู่กะสิได้ฮับการเปลี่ยนแปลงใหม่นำ 

1 โครินธ์ 15:53 คือแนวอนิจจังที่เปื่อยเน่านี้ สิต้องสวมสภาพอมตะที่บ่ฮู้จักเปื่อยเน่า กับแนวที่ฮู้จักตายนี้ กะต้องสวมสภาพแนวที่บ่ฮู้จักตาย 

1 โครินธ์ 15:54 เพื่อให้เป็นว่า บัดแนวซึ่งเปื่อยเน่าเป็น ได้สวมสภาพแนวซึ่งเปื่อยเน่าบ่เป็น กับบัดแนวซึ่งฮู้จักตาย ได้สวมสภาพแนวที่บ่ฮู้จักตาย ในบัดฮั้น กะสิสำเร็จตามพระคำที่มีเขียนไว้ว่า “ความตายได้ถืกกลืนไปแล้วโดยการมีซัย” 

1 โครินธ์ 15:55 โอ้ ความตายเอ้ย เหล็กไนของเจ้าอยู่ใส โอ้ ขุมนรกเอ้ย การมีซัยของเจ้าอยู่ใส 

1 โครินธ์ 15:56 เหล็กไนของความตายฮั้น กะคือบาป กับฤทธิ์อำนาจของบาปฮั้น กะคือกฎบัญญัติ 

1 โครินธ์ 15:57 แต่สาธุการพระเจ้า ผู้เพิ่นให้คนเฮามีซัย โดยพระเยซูคริสต์เจ้าของพวกเฮา 

1 โครินธ์ 15:58 จั่งซั้น พี่น้องที่ฮักของข้อย เอ้ย ให้พวกเจ้าดำรงอยู่อย่างมั่นคงเด้อ บ่มีการหวั่นไหวเลย โดยใส่ใจอยู่คู่ยามอย่างเหลือล้นในการงานของพระผู้เป็นเจ้า ด้วยพวกเจ้าฮู้อยู่แล้วว่า การงานที่พวกเจ้าเฮ็ดโดยในองค์พระผู้เป็นเจ้าฮั้น สิบ่ได้เปล่าประโยชน์เลย
////////// ////////// //////////