1 โครินธ์ – 1 Corinthians บทที่ 14

1 โครินธ์ 14:1 ให้มุ่งตามความฮักแบบของพระเจ้าฮั้นไว้เด้อ แล้วกะให้ปรารถนาพรสวรรค์พิเศษฝ่ายวิญญาณอันดีเยี่ยมฮั้นนำ คือ แม่นเฉพาะการบรรยายพระคำของพระเจ้า

1 โครินธ์ 14:2 ย้อนว่า ผู้ใดที่เว้าภาษาอื่นๆ ที่บ่อฮู้จักฮั้น บ่ได้เว้าให้มนุษย์ฟัง แต่เขาได้เว้าไปหาพระเจ้า ย้อนบ่มีใผเข้าใจ คือเขาเว้าแต่แนวล้ำลึกทางจิตวิญญาณ

1 โครินธ์ 14:3 แต่ส่วนผู้ที่บรรยายพระคำฮั้น ได้เว้าให้มนุษย์ฟัง เสริมสร้างให้พี่น้องเจริญขึ้น เตือนสติกับหนุนใจเขานำ 

1 โครินธ์ 14:4 คือสรุปความแล้ว ฝ่ายผู้ที่เว้าภาษาอื่นๆ ที่บ่อฮู้จักฮั้นกะหนุนใจแต่โตเองฝ่ายเดียว แต่ว่าฝ่ายผู้ที่บรรยายพระคำของพระเจ้าฮั้นกะซ่อยเสริมสร้างให้พี่น้องกลุ่มผู้เซื่อเจริญขึ้น 

1 โครินธ์ 14:5 คั่นพวกเจ้าคู่คนเว้าภาษาอื่นๆ ที่บ่อฮู้จักกะดีอยู่ แต่แฮงสิดีกว่าฮั้นอีก ข้อยอยากให้พวกเจ้าบรรยายพระคำของพระเจ้า ย้อนว่าผู้ที่บรรยายพระคำฮั้น กะใหญ่สำคัญกว่าผู้ที่เว้าภาษาอื่นๆ เว้นแต่สิมีผู้แปลนำ เพื่อกลุ่มผู้เซื่อสิได้ฮับการเสริมสร้างให้เจริญขึ้น

1 โครินธ์ 14:6 นี่ล่ะ พี่น้องทั้งหลาย เอ้ย คั่นข้อยมาหาพวกเจ้า มาเว้าแต่ภาษาอื่นๆ ที่เจ้าบ่ฮู้จัก มันสิมีประโยชน์อีหยังกับเจ้า คือมันสิบ่มีความหมายดอก นอกจากว่าข้อยสิเว้าแบบว่า เผยพระคำออกมา หรือให้ความรอบรู้ หรือบรรยายพระคำ หรือสอนหลักข้อเซื่อ

1 โครินธ์ 14:7 คือ แม้นแต่เครื่องดนตรีแนวที่บ่มีซีวิต บ่ว่าสิเป็นปี่กะดี หรือพิณเขาคู่กะอย่า บัดมันส่งเสียง คั่นว่าเสียงฮั้นบ่ซัดเจน ใผสิฮู้ได้ว่ามันเป่าหรือดีดทำนองอีหยัง

1 โครินธ์ 14:8 คือ คั่นว่าแตรส่งเสียงมั่วบ่แน่ซัด ใผแหน่สิฮู้จักว่า ควรเตรียมโตเพื่อเข้าสนามรบได้หรือบ่ 

1 โครินธ์ 14:9 ในทำนองเดียวกัน ใผแหน่สิเข้าใจได้นอกจากว่าพวกเจ้าสิเว้าภาษาที่แน่ซัดเป็นตาเข้าใจง่าย บ่ซั้นพวกเจ้ากะสิเว้าไปตามลมซื่อๆ

1 โครินธ์ 14:10 คือ ในโลกนี้มีหลายภาษา แล้วบ่มีภาษาใดๆ ที่บ่มีความหมายของแต่ละเสียง 

1 โครินธ์ 14:11 จั่งซั้น คั่นข้อยบ่ฮู้จักความหมายของภาษาฮั้น ข้อยสิเป็นปานคนต่างซาติในสายตาของเขาผู้ที่เว้าฮั้น แล้วเขาผู้ที่เว้าฮั้นกะสิเป็นปานคนต่างซาติในสายตาของข้อยคือกัน 

1 โครินธ์ 14:12 ในทำนองเดียวกัน เนื่องด้วยว่าพวกเจ้ามีใจมุ่งหวัง ปรารถนาพรสวรรค์พิเศษต่างๆ ฝ่ายวิญญาณ กะให้เน้นในพรสวรรค์พิเศษแนวที่สิเสริมสร้างให้พี่น้องกลุ่มผู้เซื่อเจริญขึ้น 

1 โครินธ์ 14:13 จั่งซั้น ให้ผู้ที่เว้าภาษาอื่นๆ ที่บ่อฮู้จักฮั้น อธิษฐานขอนำพระเจ้าให้สามารถแปลออกมาได้นำ 

1 โครินธ์ 14:14 ย้อนว่า คั่นข้อยอธิษฐาน เว้าเป็นภาษาอื่นๆ ที่บ่อฮู้จัก จิตวิญญาณของข้อยอาจสิอธิษฐานอยู่ แต่ว่าผลลัพธ์ทางความเข้าใจกะบ่มีเลยซ้ำ

1 โครินธ์ 14:15 สรุปแล้ว สิว่าจั่งใดดี ข้อยกะสิอธิษฐานเว้านำพระเจ้าด้วยจิตวิญญาณ พร้อมทั้งความเข้าใจ กับสิร้องเพลงสรรเสริญด้วยจิตวิญญาณ พร้อมทั้งความเข้าใจนำ

1 โครินธ์ 14:16 บ่ซั่น คั่นยกย่องพระเจ้าด้วยทางจิตวิญญาณอย่างเดียวฮั้น แล้วมีคนภายนอกเข้ามา ผู้ฮั้นสิสรรเสริญเว้าอาเมนนำเจ้าได้จั่งใดคั่นเขาบ่เข้าใจ

1 โครินธ์ 14:17 แม้นว่า เจ้าอาจสิพวมขอบคุณพระเจ้าอยู่ แต่ส่วนผู้ฮั้น เขากะบ่ได้ฮับการเสริมสร้างให้เจริญขึ้นจักหน่อย 

1 โครินธ์ 14:18 ข้อยขอบคุณพระเจ้าของข้อย ที่ข้อยเว้าภาษาอื่นๆ ฮั้นได้หลายกว่าพวกเจ้าคู่คน 

1 โครินธ์ 14:19 แต่ว่า บัดพี่น้องกลุ่มผู้เซื่อมาตุ้มโฮมกัน ข้อยสิเลือกที่สิเว้าจักห้าคำด้วยความเข้าใจของข้อย เพื่อข้อยอาจสิสอนคนอื่นได้ กะสิดีกว่าเว้าหมื่นคำเป็นภาษาอื่นๆ ที่บ่อเข้าใจ 

1 โครินธ์ 14:20 พี่น้องทั้งหลาย เอ้ย ฝ่ายเรื่องความเข้าใจ อย่าให้เป็นเด็กน้อยเลย แต่ให้เป็นผู้ใหญ่เด้อ แต่ฝ่ายความซั่วแนวบ่ดีฮั้น กะให้เป็นคือปานเด็กน้อยโลดเด้อ

1 โครินธ์ 14:21 คือในกฎบัญญัติฮั้น ได้มีคำเขียนไว้แล้วว่า “พระผู้เป็นเจ้าเว้าว่า ‘แม่นแต่เฮาสิเว้ากับซนซาติอิสราเอลนี้โดยใซ้ภาษากับใซ้ปากของคนต่างซาติกะตาม พวกเขาสิบ่ฮับฟังเฮาเลย'” 

1 โครินธ์ 14:22 จั่งซั้น การเว้าภาษาอื่นๆ ที่บ่อฮู้จักฮั้น บ่แม่นสำหรับให้ผู้ที่เซื่อแล้ว แต่สำหรับผู้ที่ยังบ่เซื่อ แต่การบรรยายพระคำของพระเจ้าฮั้นบ่แม่นสำหรับผู้ที่ยังบ่เซื่อ แต่สำหรับผู้ที่เซื่อแล้ว 

1 โครินธ์ 14:23 จั่งซั้น คั่นพี่น้องกลุ่มผู้เซื่อเมิ้ดคู่คนได้มาตุ้มโฮมในหม่องเดียวกัน แล้วเมิ้ดคู่คนฮั้นต่างกะเว้าภาษาอื่นๆ ที่บ่อฮู้จัก แล้วได้มีผู้ลางคนที่บ่ฮู้เรื่อง หรือผู้ที่ยังบ่ทันเซื่อได้เข้ามาฟัง บ่แม่นเขาสิว่าพวกเจ้าเป็นบ้าไปแล้วบ้อ 

1 โครินธ์ 14:24 แต่คั่นคู่คนอยู่ฮั้นต่างกะบรรยายพระคำของพระเจ้า แล้วมีคนที่ยังบ่ทันเซื่อ หรือผู้ที่บ่ฮู้เรื่องได้เข้ามา บ่แม่นเขาสิสำนึกโตในเรื่องบาปกับการพิพากษานำถ้อยคำฮั้นบ้อ 

1 โครินธ์ 14:25 แล้วความลับอยู่ในใจของเขากะสิถืกเผยออกอย่างเด่นซัด เขาจั่งสิคุกเข่าก้มหน้าลงดิน นมัสการพระเจ้า ยอมฮับว่าเพิ่นอยู่นำพวกเจ้าอีหลี

1 โครินธ์ 14:26 พี่น้องทั้งหลาย เอ้ย บัดพวกเจ้ามาตุ้มโฮมกัน คู่คนต่างกะมีเพลงสดุดี มีคำสอน มีภาษาอื่นๆ มีการเปิดเผยพระคำ มีการแปลความหมาย กะขอให้เฮ็ดคู่แนวเพื่อเป็นการเสริมสร้างให้เจริญขึ้นเด้อ 

1 โครินธ์ 14:27 คั่นผู้ใดสิมีการเว้าภาษาอื่นๆ ฮั้น กะให้เว้าแค่สองคนหรืออย่างหลายกะบ่ให้เกินสาม แล้วกะให้เว้าเทื่อละคนให้เป็นระเบียบ แล้วกะให้มีอีกคนหนึ่งเป็นล่ามแปลเด้อ

1 โครินธ์ 14:28 แต่ว่า คั่นบ่มีใผที่เป็นล่ามแปล กะให้ผู้ที่สิเว้าภาษาฮั้นนั่งมิดอยู่ในที่ประซุมเด้อ แล้วให้เขาเว้ากับโตเองในใจ กับต่อพระเจ้าซะเด้อ 

1 โครินธ์ 14:29 แล้วฝ่ายพวกผู้บรรยายพระคำของพระเจ้าฮั้น กะให้เว้าสองหรือสามคน แล้วให้คนในที่ประซุมพิจารณาเอาในแนวที่เขาเว้าฮั้นเด้อ 

1 โครินธ์ 14:30 แล้วคั่นมีแนวใดที่เปิดเผยให้อีกผู้อื่นที่นั่งอยู่ฮั้น กะให้คนที่พวมเว้าเซาซะก่อน 

1 โครินธ์ 14:31 คือคู่คนที่บรรยายพระคำของพระเจ้ากะเว้าได้แต่ละคน เพื่อที่ประซุมสิได้เฮียนฮู้ กับได้ฮับการเล้าโลมหนุนใจนำ 

1 โครินธ์ 14:32 คือจิตวิญญาณของผู้บรรยายพระคำของพระเจ้าแต่ละคนฮั้น กะอยู่ใต้การควบคุมของโตเขาเอง 

1 โครินธ์ 14:33 ด้วยว่า พระเจ้าบ่แม่นพระเจ้าแห่งความสับสนวุ่นวาย แต่เป็นพระเจ้าแห่งความสงบเรียบร้อย คือจั่งที่มีอยู่ในพี่น้องกลุ่มผู้เซื่อคนของพระเจ้าอยู่หม่องอื่นๆ นำ 

1 โครินธ์ 14:34 จั่งซั้น กะให้พวกแม่ญิงมิดซะ บ่ให้เว้ากลางที่ประซุมของกลุ่มผู้เซื่อ ย้อนพวกเขาบ่ได้ฮับอนุญาตให้เว้า แต่ให้นางยอมอยู่ใต้การควบคุมคือจั่งที่กฎบัญญัติสั่งไว้ฮั้น 

1 โครินธ์ 14:35 แล้วคั่นพวกนางอยากฮู้จักเรื่องอีหยัง กะให้นางคอยถ้าถามผัวโตเองอยู่เฮือน ย้อนว่ามันเป็นเรื่องละอายอันบ่สมควรให้พวกแม่ญิงซุมกันกลางที่ประซุมฃองกลุ่มผู้เซื่อ 

1 โครินธ์ 14:36 หรือว่า พระคำของพระเจ้าเริ่มที่พวกเจ้าบ้อ หรือว่าได้มาเถิงพวกเจ้าแต่พวกเดียวบ้อ 

1 โครินธ์ 14:37 คั่นผู้ใดถือว่าโตเป็นผู้บรรยายพระคำของพระเจ้า หรือว่าเป็นผู้ที่อยู่ฝ่ายวิญญาณ กะให้เขายอมฮับกันว่า แนวที่ข้อยได้เขียนมาให้เจ้าหนิ เป็นคำสั่งจากพระผู้เป็นเจ้าเด้อ 

1 โครินธ์ 14:38 แต่คั่นผู้ใดบ่ฮู้จักหยัง กะให้เขาโง่ต่อไปเลยเด้อ 

1 โครินธ์ 14:39 จั่งซั้น พี่น้องทั้งหลาย เอ้ย ให้ปรารถนาที่สิเป็นผู้บรรยายพระคำของพระเจ้าเด้อ แล้วบ่ควรห้ามการเว้าภาษาอื่นๆ เด้อ 

1 โครินธ์ 14:40 จั่งใดกะตาม ให้เมิ้ดคู่อันคู่แนวที่สิเฮ็ดฮั้นเป็นระเบียบเรียบร้อยตามที่สมควรเด้อ
////////// ////////// //////////