1 โครินธ์ – 1 Corinthians บทที่ 13

1 โครินธ์ 13:1 แม้นแต่ข้อยอาจสามารถเว้าภาษาอื่นๆ ต่างๆ ทั้งของมนุษย์กะดี หรือของเทวทูตกะอย่า แต่ขาดความฮักความเอ็นดู ข้อยกะกลายเป็นแค่เสียงฉิ่งหรือฉาบที่ดังสะท้อนออกไปซื่อๆ 

1 โครินธ์ 13:2 แล้วแม้นแต่ข้อยอาจมีพรสวรรค์พิเศษในการเผยพระคำ กับสามารเข้าใจในความลึกลับทั้งเมิ้ด กับมีความรอบรู้พิเศษในสิ่งสารพัด แล้วแม้นว่าข้อยอาจมีความเซื่ออันใหญ่ยิ่ง สามารถสั่งภูเขาให้ยกย้ายออกไปได้ แต่ขาดความฮักความเอ็นดู ข้อยบ่มีคุณค่าอีหยังเลย 

1 โครินธ์ 13:3 แล้วแม้นแต่ข้อยอาจบริจาคทรัพย์สมบัติของโตเองให้เมิ้ดเกลี้ยงเพื่อเลี้ยงคนยากจน กับแม้นว่าข้อยอาจถวายโตเองให้เป็นเครื่องบูซาเผาไฟ แต่ยังขาดความฮัก ข้อยกะบ่ได้กำไรอีหยังเลย 

1 โครินธ์ 13:4 คือความฮักความเอ็นดูฮั้นอดทนได้แสนโดน กับความฮักฮั้นมีแต่ความเมตตากรุณา ความฮักฮั้นบ่มีความอิจฉาริษยา ความฮักฮั้นบ่มีการอวดอ้างโต กับบ่มีการหยิ่งผยอง 

1 โครินธ์ 13:5 บ่ได้เฮ็ดในทางบ่เหมาะสม บ่ได้เห็นแก่โต บ่ได้ฉุนเฉียวฮ้ายง่าย บ่ได้นึกคึดในทางซั่ว 

1 โครินธ์ 13:6 บ่ได้ยินดีในแนวบ่เป็นธรรม แต่ว่ายินดีในความจริง

1 โครินธ์ 13:7 ความฮักแบกเอาได้คู่อย่าง เซื่อส่วนดีในคู่อย่าง หวังดีในคู่อย่าง ทนเอาได้ต่อคู่อย่าง 

1 โครินธ์ 13:8 ความฮักฮั้นบ่มีการสูญสิ้นไป แต่สำหรับการเผยพระคำฮั้น มันสิสูญสิ้นไป แล้วการเว้าภาษาอื่นๆ ต่างๆ ฮั้น มันสิมีการจบลง แล้วส่วนความรอบรู้พิเศษฮั้น มันกะสิยกเลิกนำ 

1 โครินธ์ 13:9 ด้วยว่า บัดนี้เฮาเข้าใจเพียงแต่ลางส่วน กับเฮาเผยพระคำเพียงแต่ลางส่วน

1 โครินธ์ 13:10 แต่บัดแนวที่สมบูรณ์แบบมาฮอดแล้ว ในยามฮั้นแนวที่บ่สมบูรณ์กะสิถืกยกเลิกไป 

1 โครินธ์ 13:11 ตอนข้อยเป็นเด็ก ข้อยกะเว้าอย่างเด็ก เข้าใจอย่างเด็ก คึดอย่างเด็ก แต่บัดข้อยโตเป็นผู้ใหญ่แล้วข้อยกะเซาเฮ็ดอย่างเป็นเด็ก 

1 โครินธ์ 13:12 คือ ในยามนี้พวกเฮาเห็นอย่างมืดมัว ปานส่องกระจกซื่อๆ แต่ในยามที่สิมาฮั้น พวกเฮากะสิเห็นได้ซัดเจนอย่างหน้าต่อหน้า ในยามนี้ข้อยฮู้แค่ส่วนเดียว แต่ในยามที่สิมาฮั้น ข้อยกะสิฮู้จักดี คือจั่งที่เพิ่นฮู้จักข้อย 

1 โครินธ์ 13:13 ในยามนี้ มีความเซื่อ ความหวัง กับความฮักที่ดำรงอยู่ แล้วในสามแนวนี้แม่นความฮักฮั้นที่ยิ่งใหญ่กว่าหมู่
////////// ////////// //////////