1 โครินธ์ – 1 Corinthians บทที่ 12

1 โครินธ์ 12:1 พี่น้องทั้งหลายเอ้ย บัดนี้ข้อยบ่อยากให้เจ้าขาดความเข้าใจในเรื่องพรสวรรค์พิเศษฝ่ายวิญญาณฮั้น 

1 โครินธ์ 12:2 พวกเจ้าฮู้แล้วว่า แต่ก่อนฮั้นพวกเจ้ากะเป็นคนต่างซาติ ถืกซัดไปซัดมาตามแต่สิถืกจูงไป หลงไปนับถือฮูปเคารพอันที่ปากบ่เป็น

1 โครินธ์ 12:3 จั่งซั้น ข้อยอยากให้พวกเจ้าฮู้ว่า สิบ่มีใผเลย ที่สิป้อยด่าพระเยซูให้ถืกสาปแซ่งด้วยการทรงนำของพระวิญญาณของพระเจ้าดอก กับสิบ่มีใผเลย ที่สิฮับปากว่าพระเยซูได้เป็นพระผู้เป็นเจ้า นอกจากด้วยการทรงนำของพระวิญญาณฮั้น

1 โครินธ์ 12:4 แล้วเรื่องพรสวรรค์พิเศษฝ่ายวิญญาณฮั้น มีหลายอย่างที่แตกต่างกัน แต่มีพระวิญญาณองค์เดียว 

1 โครินธ์ 12:5 แล้วการปรนนิบัติฮับใซ้กะมีหลายอย่างที่แตกต่างกัน แต่มีพระผู้เป็นเจ้าองค์เดียว 

1 โครินธ์ 12:6 แล้วกิจกรรมกะมีหลายอย่างที่แตกต่างกัน แต่มีพระผู้เป็นเจ้าองค์เดียว ที่เป็นเหตุให้คู่คนเฮ็ดได้เมิ้ด 

1 โครินธ์ 12:7 แล้วการสำแดงออกของกิจการพระวิญญาณฮั้น พระเจ้ากะประทานให้พี่น้องเมิ้ดแต่ละคน เพื่อประโยชน์ส่วนฮวม 

1 โครินธ์ 12:8 คือพระวิญญาณองค์เดียว ได้โปรดให้ผู้ลางคนมีความเว้าความจาที่ประกอบด้วยสติปัญญา แล้วอีกผู้ลางคนมีความเว้าประกอบด้วยความรอบรู้ ซึ่งเป็นโดยพระวิญญาณองค์เดียวกัน 

1 โครินธ์ 12:9 กับอีกผู้ลางคนมีความเซื่อสูงโดยพระวิญญาณองค์เดียวกัน กับอีกผู้ลางคนมีพรสวรรค์พิเศษ ฮักษาคนป่วยได้โดยพระวิญญาณองค์เดียวกัน

1 โครินธ์ 12:10 กับอีกผู้ลางคนเฮ็ดการอัศจรรย์ต่างๆ กับอีกผู้ลางคนบรรยายพระคำของพระเจ้าได้ กับอีกผู้ลางคนสังเกตุวิญญาณต่างๆ ออกได้ กับอีกผู้ลางคนได้เว้าภาษาอื่นๆ ได้ กับอีกผู้ลางคนแปลภาษาฮั้นได้

1 โครินธ์ 12:11 แต่ว่า เมิ้ดคู่แนวนี้ แม่นพระวิญญาณองค์เดียวที่ได้โปรดให้ความสามารถฝ่ายวิญญาณ แล้วเพิ่นกะแบ่งปันให้แต่ละคนตามพระประสงค์ของเพิ่นเอง

1 โครินธ์ 12:12 คือจั่งว่า ร่างกายของคนเฮาได้มีอวัยวะหลายส่วน แต่ส่วนต่างๆ ฮั้นกะประกอบกันเข้ามาเป็นกายเดียว เรื่องพระกายของพระคริสต์กะเป็นจั่งซั้น

1 โครินธ์ 12:13 คือ บ่ว่าพวกเฮาสิเป็นคนยิวกะดี สิเป็นคนต่างซาติกะดี สิเป็นทาสกะดี หรือบ่เป็นทาสกะดี พวกเฮาทั้งหลายกะถืกฮับเข้าในพระกายอันเดียวกัน โดยพระวิญญาณองค์เดียว กับได้ฮับดื่มด่ำเข้าอยู่ในพระวิญญาณองค์เดียวฮั้นนำ

1 โครินธ์ 12:14 ด้วยว่า ร่างกายบ่แม่นมีแค่อวัยวะเดียว แต่ว่ามีอวัยวะหลายส่วนประกอบกันอยู่ 

1 โครินธ์ 12:15 เว้าพื้น คั่นตีนสิเว้าว่า “ย้อนข้อยบ่ได้เป็นมือ ข้อยจั่งบ่ได้เป็นส่วนหนึ่งของร่างกายเลย” แม่นบ้อ ที่ว่าตีนกะสิบ่เป็นอวัยวะของร่างกายย้อนบ่ได้เป็นมือ

1 โครินธ์ 12:16 แล้วคั่นหูสิเว้าว่า “ย้อนข้อยบ่ได้เป็นตา ข้อยจั่งบ่ได้เป็นส่วนหนึ่งของร่างกายเลย” แม่นบ้อที่ว่าหูกะสิบ่เป็นอวัยวะของร่างกายฮั่นย้อนบ่ได้เป็นตา

1 โครินธ์ 12:17 แล้วคั่นทั้งร่างกายสิเป็นแต่ตา การได้ยินเสียงสิอยู่ใส กับคั่นเมิ้ดทั้งร่างกายเป็นแต่หู การดมกลิ่นสิอยู่ใส 

1 โครินธ์ 12:18 แต่บัดนี้ พระเจ้าได้แต่งตั้งอวัยวะคู่ส่วนไว้ในร่างกายของคนเฮาตามเป็นที่ซอบตามพระประสงค์ของเพิ่นเอง 

1 โครินธ์ 12:19 แล้ว คั่นคู่ส่วนฮั้นเป็นแค่อวัยวะเดียว ร่างกายอันครบถ้วนฮั้นสิอยู่ใส

1 โครินธ์ 12:20 แต่ที่จริงแล้ว ร่างกายฮั้นกะมีอวัยวะหลายส่วน แต่กะยังประกอบเข้ากันเป็นร่างกายเดียว 

1 โครินธ์ 12:21 คือ ตาบ่มีสิทธิ์เว้ากับมือว่า “ข้อยบ่ต้องการเจ้าดอก” หรือว่าหัวบ่มีสิทธิ์เว้ากับตีนว่า “ข้อยบ่ต้องการเจ้าดอก” 

1 โครินธ์ 12:22 แต่อวัยวะของร่างกายส่วนที่เบ่งว่าอ่อนด้อยบ่มีความสำคัญ กลับเป็นว่า สำคัญอีหลี 

1 โครินธ์ 12:23 กับอวัยวะของร่างกายส่วนที่พวกเฮาถือว่าด้อยเกียรติ เฮากะให้เกียรติหลายกว่า กับอวัยวะส่วนที่เฮาว่าบ่งาม กลับเป็นว่างามกว่า

1 โครินธ์ 12:24 ย้อนว่าอวัยวะส่วนที่งามแล้ว บ่จำเป็นที่สิเพิ่มอีหยัง จั่งใดกะตาม พระเจ้าได้ประกอบร่างกายให้อวัยวะที่เบิ่งว่าด้อยเกียรติฮั้น ให้มีเกียรติหลายกว่า

1 โครินธ์ 12:25 อันนี้กะเพื่อบ่ให้มีการแก่งแย่งแตกร้าวอีหยังกันในร่างกาย แต่ให้อวัยวะคู่ส่วนมีความ สัมพันธ์ห่วงใย เกื้อกูลซึ่งกันและกัน 

1 โครินธ์ 12:26 แล้วคั่นอวัยวะส่วนใดส่วนหนึ่งเกิดมีความเจ็บปวดขึ้นมา อวัยวะคู่ส่วนกะสิเจ็บปวดตาม หรือว่าคั่นอวัยวะส่วนใดส่วนหนึ่งได้ฮับเกียรติ อวัยวะคู่ส่วนกะสิซื่นซมยินดีนำ

1 โครินธ์ 12:27 บัดนี้ พวกเจ้าเป็นพระกายของพระคริสต์แล้ว กับต่างคนต่างกะเป็นอวัยวะของพระกายฮั้น 

1 โครินธ์ 12:28 กับพระเจ้าได้แต่งตั้งผู้ลางคนในกลุ่มผู้เซื่อไว้เป็นพิเศษ ประการแรกฮั้น มีทูตพิเศษ สองมีผู้บรรยายพระคำ สามมีผู้สอน แล้วต่อจากฮั้นมากะมีการอัศจรรย์ กับมีพรสวรรค์พิเศษในการฮักษาโรค ในการซ่อยเหลือกัน ในการครอบครองเบิ่งแยงกัน กับภาษาอื่นๆ นำ 

1 โครินธ์ 12:29 แม่นคู่คนบ้อที่เป็นทูตพิเศษ แม่นคู่คนบ้อที่เป็นผู้บรรยายพระคำ แม่นคู่คนบ้อที่เป็นผู้สอน แม่นคู่คนบ้อที่เฮ็ดการอัศจรรย์ได้ 

1 โครินธ์ 12:30 แม่นคู่คนบ้อที่ได้ฮับพรสวรรค์พิเศษให้ฮักษาโรค แม่นคู่คนบ้อที่เว้าภาษาอื่นๆ ได้ แม่นคู่คนบ้อที่เป็นล่ามแปลได้ 

1 โครินธ์ 12:31 แต่ให้ปรารถนาพรสวรรค์พิเศษที่ดีเยี่ยมเด้อ แล้วบัดนี้ข้อยสิซี้แจงอีกทางหนึ่งที่ยอดเยี่ยมเหนือกว่าฮั้นอีก
////////// ////////// //////////