1 โครินธ์ – 1 Corinthians บทที่ 11

1 โครินธ์ 11:1 ให้พวกเจ้าใซ้ซีวิตตามแบบอย่างของข้อยเด้อ คือจั่งที่ข้อยใซ้ซีวิตตามแบบอย่างของพระคริสต์ 

1 โครินธ์ 11:2 บัดนี้ พี่น้องทั้งหลาย เอ้ย ข้อยอยากย่องพวกเจ้าที่ว่าพวกเจ้าบ่ได้ลืมข้อยในจักแนว คือพวกเจ้าได้ฮักษาหลักคำสอนฮั้นที่ข้อยได้มอบไว้ให้กับพวกเจ้า

1 โครินธ์ 11:3 แต่ข้อยอยากให้พวกเจ้าเข้าใจไว้ว่า พระคริสต์เพิ่นเป็นศีรษะเป็นหัวหน้าของผู้ซายคู่คน กับผู้ซายเป็นหัวหน้าแม่ญิงของโต แล้วพระเจ้าผู้เป็นพ่อ เพิ่นกะเป็นศีรษะเป็นหัวหน้าของพระคริสต์ 

1 โครินธ์ 11:4 ซายผู้ใดที่อธิษฐานกะดี หรือบรรยายพระคำกะดี คั่นเฮ็ดโดยมีผ้าคลุมหัว กะเฮ็ดให้เกียรติในฐานะการเป็นผู้ซายของเขาเสื่อมเสียไป

1 โครินธ์ 11:5 แต่ญิงผู้ใดที่อธิษฐานกะดี หรือบรรยายพระคำกะดี คั่นนางเฮ็ดโดยบ่มีผ้าคลุมหัวไว้ กะเฮ็ดให้เกียรติในฐานะการเป็นแม่ญิงของเขาเสื่อมเสียไป พอปานนางถืกแถหัว

1 โครินธ์ 11:6 คือคั่นแม่ญิงสิบ่คลุมหัวกะให้เขาตัดผมสั้นโลดเด้อ แต่คั่นการตัดผมสั้นหรือการแถหัวของแม่ญิงเป็นแนวที่น่าอับอาย กะให้นางคลุมหัวไว้โลดเด้อ

1 โครินธ์ 11:7 คือการที่ผู้ซายบ่สมควรสิคลุมหัวฮั้น กะย้อนว่าผู้ซายเป็นภาพลักษณ์กับเป็นสง่าราศีของพระเจ้า แต่ส่วนแม่ญิงนางกะเป็นสง่าราศีของผู้ซาย

1 โครินธ์ 11:8 ย้อนว่าพระเจ้าบ่ได้สร้างผู้ซายจากโตแม่ญิง แต่ได้สร้างแม่ญิงจากโตผู้ซาย 

1 โครินธ์ 11:9 กับเพิ่นบ่ได้สร้างผู้ซายไว้สำหรับแม่ญิง แต่ได้สร้างแม่ญิงไว้สำหรับผู้ซาย

1 โครินธ์ 11:10 ย้อนเหตุนี้ล่ะ ผู้เป็นแม่ญิงควรสิมีสัญลักษณ์เล็งเถิงสิทธิอำนาจไว้เทิงหัวของเขา ย้อนหมู่เทวทูต

1 โครินธ์ 11:11 แต่จั่งใดกะดี ผู้ซายกะบ่ได้อยู่อย่างอิสระจากแม่ญิง แล้วแม่ญิงกะบ่ได้อยู่อย่างอิสระจากผู้ซายคือกัน ในพระผู้เป็นเจ้า 

1 โครินธ์ 11:12 คือแม่ญิงมาจากผู้ซายจั่งใด ผู้ซายกะมาจากแม่ญิงจั่งซั้นคือกัน แต่สรุปความแล้วเมิ้ดคู่อันคู่แนวกะมาจากพระเจ้าทั้งฮั้น 

1 โครินธ์ 11:13 ให้พวกเจ้าตัดสินเอาเองเด้อ มันสิเป็นการสมควรตี้ ที่แม่ญิงสิบ่คลุมหัวบัดยามอธิษฐานเว้านำพระเจ้าฮั้น 

1 โครินธ์ 11:14 ขนาดธรรมซาติเองกะยังสอนเฮาไว้ ว่าคั่นผู้ซายไว้ผมยาวมันกะเป็นเรื่องอับอายสำหรับเขาบ่แม่นบ้อ 

1 โครินธ์ 11:15 แต่คั่นแม่ญิงไว้ผมยาวมันกะเป็นสง่าราศีสำหรับนาง ย้อนว่าผมของนางเป็นแนวที่พระเจ้าประทานให้เขาเพื่อการคลุมหัว 

1 โครินธ์ 11:16 แต่คั่นผู้ใดคึดอยากโต้เถียงในเรื่องนี้ พวกเฮากับพี่น้องกลุ่มผู้เซื่อของพระเจ้าอยู่หม่องอื่นๆ กะบ่มีธรรมเนียมปฏิบัติแบบนี้เลยดอก 

1 โครินธ์ 11:17 บัดนี้ ในการที่ข้อยแนะนำนี้ ข้อยกะบ่สามารถย่องพวกเจ้าดอก คือบัดยามพวกเจ้าเข้าฮ่วมกัน บ่ได้เป็นเพื่อผลดี แต่มันมักสิเกิดผลเสียหลายกว่า 

1 โครินธ์ 11:18 ประการแรก ข้อยได้ยินว่า บัดกลุ่มผู้เซื่อของพวกเจ้ามาฮ่วมกัน ได้มีการแตกร้าวแบ่งพรรคแบ่งพวกในหมู่พวกเจ้า แล้วข้อยกะเซื่อว่าเรื่องที่ข้อยได้ยินมาฮั้น กะมีส่วนจริงบ้าง 

1 โครินธ์ 11:19 คือข้อยว่า สิต้องมีการขัดแย้งกันแน่นอนในหมู่พวกเจ้าอยู่แล้ว กะเพื่อฝ่ายที่ถืกในพวกเจ้าฮั้นสิได้ปรากฏออกอย่างแจ่มแจ้ง 

1 โครินธ์ 11:20 เพื่อบัดพวกเจ้ามาฮ่วมอยู่หม่องเดียวกัน มันบ่แม่นเพื่อมาฮ่วมฉลองกินในพิธีระลึกเถิงพระผู้เป็นเจ้าดอก 

1 โครินธ์ 11:21 ย้อนว่า ในการกินของพวกเจ้าฮั้น ต่างคนกะต่างกินบ่ฮู้จักถ้ากันเลย คือมีผู้ลางคนกินก่อน ผู้ลางคนมีบ่พอ แล้วอีกผู้ลางคนกะมึนเมา 

1 โครินธ์ 11:22 แม่นหยังมันคือเป็นจั่งซี้ พวกเจ้าบ่มีเฮือนมีซานที่สิกินข้าวกินปลาก่อนบ้อ หรือว่าใจพวกเจ้ามักสิดูหมิ่นกลุ่มผู้เซื่อของพระเจ้าบ้อ จั่งเฮ็ดให้พี่น้องผู้ที่ขัดสนอดอยากต้องอับอาย สิให้ข้อยเว้าจั่งใดกับพวกเจ้าหน้อ สิให้ย่องเจ้าในเรื่องนี้บ้อ ข้อยบ่ย่องพวกเจ้าดอก 

1 โครินธ์ 11:23 คือเรื่องนี้ที่ข้อยได้ฮับมอบหมายจากพระผู้เป็นเจ้าฮั้น ข้อยจั่งนำมาให้พวกเจ้า คือในคืนเดียวกันที่พระเยซูเจ้าได้ถืกเขาทรยศหักหลังฮั้น เพิ่นได้หยิบเอาขนมปังขึ้นมา 

1 โครินธ์ 11:24 แล้วพอเพิ่นได้อธิษฐานขอบคุณพระเจ้าผู้เป็นพ่อ เพิ่นจั่งบิขนมปังออก เว้าว่า “ให้ฮับกินเด้อ นี่กะเล็งเถิงร่างกายของเฮา ซึ่งถืกทำลายฟกซ้ำเพื่อพวกเจ้า เฮาให้เฮ็ดแนวนี้เด้อ เพื่อเป็นการระลึกเถิงเฮา” 

1 โครินธ์ 11:25 แล้วในทำนองเดียวกัน บัดกินขนมปังแล้วเพิ่นจั่งหยิบจอกขึ้นมาเว้าว่า “จอกนี้เล็งเถิงคำมั่นสัญญาใหม่ที่เฮ็ดด้วยโลหิตของเฮา ยามใดพวกเจ้าดื่มจอกนี้ กะให้ดื่มเป็นการระลึกเถิงเฮาเด้อ” 

1 โครินธ์ 11:26 จั่งซั่น ยามใดพวกเจ้ากินขนมปังกับดื่มจอกนี้ มันกะเป็นการประกาศเถิงการตายแทนของพระผู้เป็นเจ้า จนกว่าเพิ่นสิเสด็จมาอีก 

1 โครินธ์ 11:27 จั่งซั้น คั่นผู้ใดกินขนมปัง กับดื่มจอกของพระผู้เป็นเจ้านี้อย่างบ่สมควร ผู้ฮั้นกะได้เฮ็ดผิดต่อพระกายกับพระโลหิตของพระผู้เป็นเจ้า 

1 โครินธ์ 11:28 แต่ว่าให้คู่คนพิจารณาสภาพโตเองไว้ก่อนเด้อ จั่งสิกินขนมปังกับดื่มจอกนี้ 

1 โครินธ์ 11:29 ย้อนว่าผู้ใดที่กินดื่มอย่างบ่สมควร กะได้กินดื่มเอาโทษมาใส่โตเอง ย้อนบ่ได้คำนึงเถิงเกียรติของพระกายพระผู้เป็นเจ้า 

1 โครินธ์ 11:30 ย้อนเหตุนี้ล่ะ หลายคนในพวกเจ้าจั่งอ่อนกำลัง แล้วกะป่วย พร้อมมีหลายคนได้ล่วงหลับไปแล้วนำ 

1 โครินธ์ 11:31 คือคั่นพวกเฮาสิพิจารณาสภาพโตเองไว้ก่อน เฮาสิบ่ถืกพระเจ้าลงโทษดอก 

1 โครินธ์ 11:32 แต่บัดพวกเฮาถืกลงโทษฮั้น พวกเฮากะถืกตีสอนจากองค์พระผู้เป็นเจ้า เพื่อสิบ่ถืกพิพากษาลงโทษฮ่วมกันกับโลก 

1 โครินธ์ 11:33 จั่งซั้น ย้อนเหตุนี้เอง พี่น้องของข้อย เอ้ย บัดเจ้ามาฮ่วมกินนำกันฮั่น ให้ถ้ากินพร้อมกันเด้อ 

1 โครินธ์ 11:34 แล้วคั่นมีใผหิว กะให้เขากินอยู่บ้านซะก่อนเด้อ เพื่อว่าบัดยามมาฮ่วมกันฮั่นพวกเจ้าสิบ่เข้าสู่การตีสอนลงโทษจากพระเจ้า ส่วนเรื่องแนวอื่นๆ ฮั้น บัดข้อยมาหา ข้อยจั่งสิแนะนำแก้ไขให้
////////// ////////// //////////