กาลาเทีย-Galatians บทที่ 5

กาลาเทีย 5:1 จั่งซั่น ให้ยืนมั่นในเสรีภาพซึ่งพระเยซูคริสต์ได้ปลดปล่อยพวกเฮาให้เป็นไทได้แล้ว แล้วอย่าไปยุ่งเกี่ยวกับแอกของการเป็นทาสฮั้นอีกเลย

กาลาเทีย 5:2 คือข้อยเปาโลหนิว่า คั่นพวกเจ้ายอมเข้าสุหนัตนำเขา พระเยซูคริสต์กะเป็นประโยชน์ต่อพวกเจ้าบ่ได้

กาลาเทีย 5:3 ข้อยขอยืนยันอีกว่า ผู้ซายคู่คนที่เข้าสุหนัต เขาเป็นลูกหนี้ของกฎบัญญัติแล้ว จั่งต้องปฏิบัติฮักษาเมิ้ดคู่ข้อเลย

กาลาเทีย 5:4 แล้วเจ้าผู้ที่พยายามเป็นคนซอบธรรมโดยเฮ็ดนำระบบกฎบัญญัติฮั่น พระเยซูคริสต์เมิ้ดความหมายสำหรับพวกเจ้าแล้ว ย้อนเจ้าได้หลุดจากระบบพระคุณแล้ว

กาลาเทีย 5:5 แต่ว่าพวกเฮาผู้ที่คอยถ้าอย่างตื่นเต้น มีความหวังอันมั่นคงโดยพระวิญญาณ ว่าสิเป็นคนซอบธรรมได้โดยความเซี่อ

กาลาเทีย 5:6 ย้อนว่า ในพระเยซูคริสต์ฮั่น การเข้าสุหนัต หรือบ่ได้เข้าสุหนัต บ่มีอำนาจเฮ็ดหยัง มีแต่ความเซื่อท่อฮั้นที่มีอำนาจโดยทางความฮัก ของพระเจ้า

กาลาเทีย 5:7 พวกเจ้าได้แล่นออกโตดีมาก่อน แต่บัดนี้แม่นใผมาก่อกวนกีดกั้นพวกเจ้าไว้ บ่ให้เซื่อฟังความจริง

กาลาเทีย 5:8 คือการซักซวนนี้ บ่ได้มาจากพระเจ้าเลย ผู้เพิ่นที่ได้เอิ้นได้เซิญพวกเจ้ามาฮั้น

กาลาเทีย 5:9 ตามสุภาษิตว่า “เซื้อฟูนิดเดียวสามารถเฮ็ดให้ขนมปังพองขึ้นได้เมิ้ดก้อน”

กาลาเทีย 5:10 แต่ข้อยมั่นใจนำพวกเจ้าในพระเจ้า ว่าพวกเจ้าสิเป็นน้ำหนึ่งใจเดียวกัน แต่ว่าผู้ที่ก่อกวนพวกเจ้าฮั่น เขาสิเป็นใผกะอย่า กะสิถืกการตัดสินลงโทษ

กาลาเทีย 5:11 พี่น้องเอ้ย คั่นข้อยยังบอกสอนการเข้าสุหนัตคือเขา เป็นหยังข้อยยังถืกข่มเหง คั่นบ่ซั้น เรื่องหลักประหารสิบ่ได้เป็นอุปสรรคให้สะดุดอีกต่อไป

กาลาเทีย 5:12 ฝ่ายพวกจอมปลอมที่มาก่อกวนพวกเจ้าฮั้น ข้อยคึดอยากให้เขาตัดของโตเองออกไปเลย 

กาลาเทีย 5:13 พี่น้องเอ้ย พระเจ้าได้เอิ้นพวกเจ้ามาสู่เสรีภาพแล้ว จั่งซั่นอย่าใซ้เสรีภาพฮั้นเป็นซ่องทางเพื่อปล่อยซีวิตไปตามเนื้อหนัง แต่ว่าให้ใซ้ซีวิตฮับใซ้ซ่อยกันและกัน ด้วยความฮักเด้อ 

กาลาเทีย 5:14 ย้อนว่ากฎบัญญัติทั้งเมิ้ดฮั่น สรุปได้ในถ้อยคำเดียว คือ “ให้ฮักเพื่อนบ้านคือจั่งฮักโตเอง”

กาลาเทีย 5:15 แต่คั่นพวกเจ้าซอกกัดกินกันและกัน ให้ระวังไว้เด้อ มีแต่สิทำลายกันและกัน
กาลาเทีย 5:16 ข้อยว่า ให้ดำเนินซีวิตในพระวิญญาณ แล้วเจ้าสิบ่ได้เฮ็ดตามกิเลสตัณหาทางเนื้อหนังให้สำเร็จ 

กาลาเทีย 5:17 คือกิเลสตัณหาฝ่ายเนื้อหนังกะต่อต้านการทรงนำของพระวิญญาณ แล้วการทรงนำของพระวิญญาณกะต่อต้านฝ่ายเนื้อหนัง คือสองทางนี้ขัดกันและกัน พวกเจ้าจั่งบ่สามารถเฮ็ดแนวที่ปรารถนาอยากเฮ็ด

กาลาเทีย 5:18 แต่คั่นพวกเจ้าอยู่ในการทรงนำของพระวิญญาณ พวกเจ้ากะสิบ่ได้อยู่ใต้ระบบกฎบัญญัติเลย

กาลาเทีย 5:19 แต่การงานฝ่ายเนื้อหนังกะเห็นซัดเจน คือ การเล่นซู้ผัวเมียกัน การล่วงประเวณีซายญิง การเฮ็ดซั่วซ้าเลวทราม การเฮ็ดลามกบ้ากาม

กาลาเทีย 5:20 การนบไหว้ฮูปเคารพ การเฮ็ดเวทมนตร์คาถา การเคียดซังถือโทษกัน การทะเลาะวิวาทโต้เถียงกัน การอิจฉาตาฮ้อนกัน การโมโหโทโส การออกหน้าแข่งดีกัน การแตกแยกกัน การเล่นพรรคเล่นพวก การถือคำสอนผิด 

กาลาเทีย 5:21 การขี้โลภ การฆ่าฟันลันแทงกัน การกินเหล้าเมายา การเที่ยวเตร่เฮฮากัน กับแนวอื่นๆ ในทำนองเดียวกัน ที่ข้อยเคยบอกมาแล้ว ผู้ที่ปฏิบัติซีวิตอยู่แบบนี้บ่มีสิทธิ์มีส่วนฮับมรดกในแผ่นดินของพระเจ้าได้เลย

กาลาเทีย 5:22 แต่ว่าผลของพระวิญญาณกะคือ ความฮัก ความซื่นซมยินดี ความสงบสุข การทำใจไว้โดน ความปราณี ความดีงาม ความจงรักภักดี 

กาลาเทีย 5:23 ความสุภาพอ่อนน้อม การประมาณโต แนวหมู่หนิ มันกะบ่มีกฎบัญญัติข้อใดที่กีดกั้นห้ามไว้เลย

กาลาเทีย 5:24 แล้วผู้ที่เป็นคนของพระคริสต์ ได้ประหารซีวิตเก่าฝ่ายเนื้อหนังแล้ว พร้อมทั้งกิเลสตัณหาของมัน

กาลาเทีย 5:25 คือ คั่นพวกเฮาได้ซีวิตทางพระวิญญาณ ขอให้พวกเฮาดำเนินซีวิตโดยในพระวิญญาณ 

กาลาเทีย 5:26 แล้วขออย่าให้พวกเฮาซอกหาเกียรติอันบ่เป็นสาระมาอวดโต ยั่วแหย่กัน หรืออิจฉากันเลย
////////// ////////// //////////