กาลาเทีย-Galatians บทที่ 4

กาลาเทีย 4:1 ข้อยเว้าอีกว่า ตามหลักแล้ว ผู้ที่มีกรรมสิทธิ์ในมรดก ในตอนที่ยังเป็นเด็กน้อยอยู่ เขากะบ่แตกต่างกับทาสใซ้ เถิงแม่นว่าเขาอาจสิเป็นเจ้าของเมิ้ดทั้งมวลกะได้

กาลาเทีย 4:2 แต่เขากะยังอยู่ใต้พวกผู้ปกครอง กับพวกผู้เบิ่งแยง จนกว่าสิครบอายุที่พ่อของเขาได้กำหนดไว้

กาลาเทีย 4:3 พวกเฮากะคือกัน ในตอนที่เฮายังเป็นเด็กน้อยที่บ่ทันฮู้จักทีป ตอนฮั้นพวกเฮาคือปานทาส อยู่ใต้การบีบบังคับของระบบต่างๆ ทางโลกนี้

กาลาเทีย 4:4 แต่พอครบกำหนดมาแล้ว พระเจ้าได้ใซ้พระบุตรของเพิ่นลงมา เกิดทางแม่ญิง เกิดเป็นคนยิว อยู่ภายใต้กฎบัญญัติฮั้น

กาลาเทีย 4:5 เพื่อมาไถ่มากอบกู้คนยิวผู้อยู่ใต้กฎบัญญัติ เพื่อพวกเฮาสิฮับฐานะว่า มีสิทธิ์เป็นลูกคิงๆ ของพระเจ้า 

กาลาเทีย 4:6 แล้วย้อนว่าพวกเจ้าได้เป็นลูกๆ พระเจ้าได้ส่งพระวิญญาณของพระบุตร ลงมาอยู่ในซีวิตจิตใจของพวกเจ้าแล้ว เอิ้นพระเจ้าว่า “อีพ่อๆ”

กาลาเทีย 4:7 จั่งซั้น พวกเจ้าบ่แม่นทาสต่อไปอีก แต่บัดนี้ได้เป็นลูก คั่นเป็นลูกแล้ว กะได้เป็นผู้มีกรรมสิทธิ์ในมรดกของพระเจ้าทางพระคริสต์แล้ว

กาลาเทีย 4:8 แต่จั่งใดกะตาม ในตอนที่พวกเจ้ายังบ่ทันฮู้จักพระเจ้า พวกเจ้ากะมีแต่ปฏิบัตินำพระนำเจ้าต่างๆ ทางโลกนี้ ซึ่งตามจริงแล้วมันบ่แม่นพระอีหลีดอก

กาลาเทีย 4:9 แต่ว่า บัดพวกเจ้าฮู้จักพระเจ้าแล้ว หรือตามหลัก พระเจ้าได้ฮู้จักกับเจ้า เป็นอีหยังพวกเจ้ากะยังหันกลับไปซอกเป็นทาสอีกคือเก่า ตามระเบียบการต่างๆ ทางโลกนี้ แนวที่อ่อนไหว จนปัญญา ซ่อยอีหยังเจ้าบ่ได้เลย

กาลาเทีย 4:10 คือพวกเจ้าถือมื้อ ถือเว็น ถือเดือน ถือปี

กาลาเทีย 4:11 ข้อยเป็นห่วงพวกเจ้า ย้านว่าที่ข้อยได้มาทุ่มเทในการงานเพื่อพวกเจ้าฮั้น เป็นการเปล่าประโยชน์ซื่อๆ

กาลาเทีย 4:12 พี่น้องเอ้ย ข้อยขอร้องนำพวกเจ้า ให้อยู่อย่างข้อยหนิเด้อ ที่ว่าข้อยได้มาอยู่อย่างคนต่างซาติคือพวกเจ้า พวกเจ้าบ่ได้เฮ็ดอีหยังให้ข้อยเจ็บใจดอก

กาลาเทีย 4:13 พวกเจ้าฮู้อยู่ว่า ตอนแรกฮั้น แม้นแต่ข้อยบ่สบาย ข้อยกะยังมาประกาศข่าวประเสริฐให้พวกเจ้า 

กาลาเทีย 4:14 แล้ว พวกเจ้าได้ทนเอาต่อโตข้อย แม่นแต่โรคของข้อยฮั่น พวกเจ้าบ่ได้รังเกียจหรือปฏิเสธโตข้อย แต่ต้อนฮับอย่างดีปานข้อยเป็นเทวทูตของพระเจ้า หรือดีบ่ดี ปานเป็นพระเยซูคริสต์เอง

กาลาเทีย 4:15 แล้วว่า การที่พวกเจ้าเคยฮับปากว่า ได้พรเป็นสุขหลาย ข้อยกะยังยืนยันได้ว่า ตอนข้อยมาหาฮั้น พวกเจ้าได้ว่า คั่นเป็นได้ พร้อมที่สิควักตาโตเองออกมาสละให้ข้อยโลด

กาลาเทีย 4:16 บัดนี้ โตข้อยกลายเป็นศัตรูอยู่บ้อ ย้อนข้อยได้บอกความจริงให้พวกเจ้า

กาลาเทีย 4:17 คือพวกจอมปลอมฮั่น เขามีใจฮ้อนฮนนำพวกเจ้า แต่ว่าเพื่อแนวบ่ดี คือเขากีดกั้นพวกเจ้าไว้ กะเพื่อพวกเจ้าสิกลับมีใจฮ้อนฮนนำพวกเขา ตามผลประโยชน์ของเขาเอง

กาลาเทีย 4:18 คือมันเป็นการดีที่สิมีใจฮ้อนฮนต่อแนวดีอยู่เสมอ บ่ว่าข้อยสิอยู่นำหรือบ่

กาลาเทีย 4:19 โอ้ ลูกน้อย เอ้ย ข้อยอยากนำพวกเจ้าอีกแล้ว คือข้อยฮู้สึกปั่นป่วนใจหลายปานแม่ญิงเจ็บท้องสิออกลูก จนกว่าภาพลักษณ์ของพระเยซูคริสต์ได้ก่อขึ้นเถิงขั้นสมบูรณ์ในพวกเจ้าแล้ว 

กาลาเทีย 4:20 คือใจข้อยปรารถนาอยากมาอยู่นำพวกเจ้าอยู่เดี๋ยวหนิ อยากมาเว้าแบบอ่อนน้อมแหน่ ย้อนข้อยมีความสงสัยนำพวกเจ้า

กาลาเทีย 4:21 บอกข้อยแหน่ พวกเจ้าผู้ที่คึดอยากอยู้ใต้กฎบัญญัติ พวกเจ้าคือบ่ได้ยินบ้อ ว่า กฎบัญญัติว่าจั่งใด

กาลาเทีย 4:22 คือมีพระคำเขียนไว้ว่า เฒ่าอับราฮัมมีลูกซายสองคน ผู้หนึ่งซื่ออิชมาเอล เกิดนำนางฮาการ์ผู้เป็นทาสใซ้ แล้วอีกผู้หนึ่งซื่ออิสอัค เกิดนำนางซาราห์ผู้เป็นไท

กาลาเทีย 4:23 แล้วลูกผู้ที่เกิดนำญิงผู้เป็นทาสใซ้ ได้เกิดมาตามธรรมดาโลก แต่ลูกผู้ที่เกิดนำญิงผู้เป็นไท ได้เกิดมาตามคำมั่นสัญญาฮั้น

กาลาเทีย 4:24 ซึ่งได้เป็นภาพพจน์เล็งเถิงพันธสัญญาสองอย่าง อย่างหนึ่งเป็นตามกฎบัญญัติจากภูเขาซีนาย ซึ่งเขาเกิดมาเป็นทาส หมายเถิงนางฮาการ์

กาลาเทีย 4:25 คือนางฮาการ์นี้ ได้แก่ภูเขาซีนายอยู่เขตอาระเบีย เล็งเถิงเมืองเยรูซาเล็มซึ่งคู่มื้อนี้กะอยู่ใต้การเป็นทาสพร้อมกับพลเมืองของมัน

กาลาเทีย 4:26 แต่ว่ายังมีเมืองเยรูซาเล็มอีกเมืองหนึ่งอยู่เทิงสวรรค์ แล้วพลเมืองฮั้นกะมีแต่เสรีภาพ นี่ล่ะ เป็นคือแม่แท้ของพวกเฮา ผู้อยู่ในพระคริสต์ 

กาลาเทีย 4:27 ตามที่มีคำทำนายเขียนไว้ ว่า “ให้ซื่นซมยินดีไว้ นางผู้เป็นหมันบ่มีลูก เอ้ย ผู้บ่เคยเจ็บท้องออกลูกมาก่อน กะให้โห่ฮ้องดีใจได้แล้ว คือนางผู้อยู่โดดเดี่ยวมีลูกหลายกว่านางผู้มีผัว”

กาลาเทีย 4:28 บัดนี้ พี่น้องเอ้ย พวกเฮาเป็นลูกๆตามคำมั่นสัญญา คือจั่งอิสอัคฮั่น

กาลาเทีย 4:29 แต่ อ้ายผู้ที่เกิดมาตามเนื้อหนังฮั้น ได้เบียดเบียนข่มเหงน้อง ผู้ที่เกิดมาโดยอำนาจของพระวิญญาณ แล้วการเบียดเบียนข่มเหงฮั้นกะยังมีฮอดคู่มื้อนี้

กาลาเทีย 4:30 จั่งใดกะตาม พระคำเขียนไว้ว่าจั่งใด “ให้ไล่นางผู้เป็นทาสฮั่นให้หนีไปพร้อมทั้งลูกของเขา” ย้อนว่าลูกของญิงผู้เป็นทาสบ่มีกรรมสิทธิ์ในมรดกฮ่วมกับลูกของญิงผู้เป็นไทเลย

กาลาเทีย 4:31 จั่งซั่น พี่น้องเอ้ย พวกเฮาบ่แม่นลูกๆ ของนางผู้เป็นทาสฮั่น แต่ว่าเป็นลูกๆ ของนางผู้เป็นไท