กาลาเทีย-Galatians บทที่ 3

กาลาเทีย 3:1 โอ้ พวกกาลาเทีย เอ้ย คือโง่แท้ แม่นใผมาสะกดจิตบ่ให้เซื่อฟังความจริง ซึ่งว่าภาพการประหารของพระเยซูฮั้น ได้วาดไว้ต่อหน้าพวกเจ้าแล้ว

กาลาเทีย 3:2 ข้อยขอถามพวกเจ้าแนวหนึ่ง คือ พวกเจ้าได้ฮับพระวิญญาณโดยทางปฏิบัติตามกฎบัญญัติ หรือว่าด้วยการเซื่อฟังข่าวประเสริฐ

กาลาเทีย 3:3 พวกเจ้าโง่ปานฮั้นบ้อ ว่าพวกเจ้าได้เริ่มซีวิตใหม่โดยในพระวิญญาณ แล้วบัดนี้พวกเจ้าสิเข้าสู่ความสมบูรณ์โดยการปฏิบัติบ้อ

กาลาเทีย 3:4 พวกเจ้าได้ทนความลำบากหลายแนวมาแล้ว บัดหนิสิให้มันเปล่าประโยชน์อยู่บ้อ 

กาลาเทีย 3:5 จั่งซั้น ส่วนผู้ที่โปรดให้พวกเจ้าฮับพระวิญญาณ กับได้โปรดให้มีเหตุการณ์อัศจรรย์เกิดต่อหน้าพวกเจ้า เพิ่นได้โปรดให้ย้อนการปฏิบัติตามทางเนื้อหนังหรือย้อนการเซื่อฟังข่าวประเสริฐ 

กาลาเทีย 3:6 คือจั่งที่เฒ่าอับราฮัมได้เซื่อพระเจ้า แล้วความเซื่อของลาวฮั้น พระเจ้าจั่งถือว่า มันเฮ็ดให้ลาวเป็นผู้ซอบธรรม 

กาลาเทีย 3:7 จั่งซั้น ให้เข้าใจกันว่า ผู้ที่มีความเซื่อคือจั่งเฒ่าอับราฮัมท่อฮั้น ได้เป็นลูกหลานของลาว

กาลาเทีย 3:8 แล้วพระคำ โดยเห็นไว้ล่วงหน้าก่อนว่า พระเจ้าเพิ่นสิให้คนต่างซาติเป็นคนซอบธรรมต่อเพิ่นได้โดยความเซื่อ เพิ่นจั่งประกาศข่าวประเสริฐไว้กับเฒ่าอับราฮัมล่วงหน้าก่อนว่า “ซนซาติทั้งหลายสิได้พรเป็นสุขโดยทางเจ้าเด้อ”

กาลาเทีย 3:9 จั่งซั้น มีแต่ผู้ที่มีความเซื่อ จั่งได้พรเป็นสุข คือจั่งเฒ่าอับราฮัมฮั้น 

กาลาเทีย 3:10 คือผู้ที่อาศัยการปฏิบัติตามกฎบัญญัติ กะอยู่ภายใต้การสาปแซ่ง ตามที่มีเขียนไว้ว่า “ส่วนผู้ที่บ่ได้ปฏิบัติตามเมิ้ดคู่ข้ออยู่เสมอที่มีไว้ในกฎบัญญัติ ผู้ฮั้นได้ตกอยู่ใต้การสาปแซ่งแล้ว 

กาลาเทีย 3:11 แต่มันซัดเจนแล้วว่า บ่มีใผสามารถเป็นคนซอบธรรมในสายตาของพระเจ้าได้โดยทางกฎบัญญัติ โดยว่าผู้ซอบธรรมมีซีวิตอยู่ได้ด้วยทางความเซื่อ 

กาลาเทีย 3:12 กับว่า เรื่องกฎบัญญัติฮั้นบ่ได้อาศัยความเซื่อ แต่”ส่วนผู้ที่อาศัยการปฏิบัติตามกฎบัญญัติกะต้องมีซีวิตอยู่ได้ด้วยคู่ข้อฮั้น” 

กาลาเทีย 3:13 แต่พระคริสต์ได้ไถ่พวกเฮาออกจากการถืกสาปแซ่งของข้อกฎบัญญัติแล้ว คือเพิ่นถืกการสาปแซ่งแทนพวกเฮา ตามที่มีคำเขียนไว้ว่า “คู่คนที่ถืกห้อยไว้เทิงลำไม้ได้ถืกสาปแซ่งแล้ว”

กาลาเทีย 3:14 เพื่อว่า คำอวยพรที่ให้ไว้กับเฒ่าอับราฮัมฮั้น สิได้เข้าเถิงพวกคนต่างซาตินำ ในพระเยซูคริสต์ เพื่อพวกเฮาสิได้ฮับพระวิญญาณ ซึ่งเป็นผู้ที่สัญญาไว้ฮั้น ด้วยทางความเซื่อ

กาลาเทีย 3:15 พี่น้อง เอ้ย ข้อยขอเว้าเรื่องคำมั่นสัญญาของมนุษย์ คือตามหลักแล้ว แม้นแต่มันเป็นคำมั่นสัญญาระหว่างคนซื่อๆ บัดยืนยันกันแล้ว บ่มีใผมีสิทธิ์ยกเลิกให้เป็นโมฆะ หรือเพิ่มข้ออีหยังอีกได้เลย

กาลาเทีย 3:16 บัดนี้ ฝ่ายคำมั่นสัญญาที่พระเจ้าโปรดให้ไว้กับอับราฮัม เพิ่นบ่ได้ว่า “กับเซื้อสายทั้งหลาย” คือหลายคน แต่ได้ว่า “เซื้อสายคนเดียว” แล้วผู้ฮั้นคือพระคริสต์ 

กาลาเทีย 3:17 แล้วคำมั่นสัญญาของพระเจ้าที่ข้อยเว้าหนิ เพิ่นได้สัญญาไว้ 430 ปี ก่อนสิตั้งกฎบัญญัติ จั่งซั้น กฎบัญญัติฮั้นจั่งบ่มีสิทธิ์ที่สิยกเลิกคำมั่นสัญญาที่พระเจ้าโปรดยืนยันไว้แล้วโดยทางพระเยซูคริสต์ ให้เป็นโมฆะได้เลย 

กาลาเทีย 3:18 จั่งซั้น คั่นกรรมสิทธิ์ในมรดกขึ้นอยู่กับเรื่องกฎบัญญัติ มันกะบ่ได้ขึ้นกับคำมั่นสัญญาต่อไปอีก แต่ว่า พระเจ้าได้มอบมรดกฮั้นไว้ให้อับราฮัมตามคำมั่นสัญญาแล้ว

กาลาเทีย 3:19 คั่นบ่ซั้น การตั้งกฎบัญญัติไว้ฮั้นกะมีประโยชน์อีหยังซั่น มันถืกเพิ่มไว้ผ่านทางเทวทูตโดยมือของคนกลางย้อนการล่วงละเมิดของคน จนกว่า”เซื้อสายคนเดียว” ฮั้นได้มา ที่คำมั่นสัญญาเล็งเถิง 

กาลาเทีย 3:20 บัดนี้ ส่วนคนกลางบ่ได้เจรจาให้ฝ่ายเดียว แต่ว่าส่วนพระเจ้า เพิ่นกะเป็นหนึ่ง 

กาลาเทีย 3:21 จั่งซั้น กฎบัญญัติขัดขวางคำมั่นสัญญาของพระเจ้าอยู่บ้อ มันเป็นไปบ่ได้ดอก ย้อนว่าคั่นแม่นมีข้อกฎบัญญัติสามารถให้ซีวิตนิรันดร์ได้ การเป็นคนซอบธรรมต่อพระเจ้าได้กะสิมาทางกฎบัญญัติ

กาลาเทีย 3:22 แต่พระคำสรุปไว้ว่า คนทั้งปวงถืกกักขังไว้อยู่ใต้อำนาจบาปแล้ว เพื่อว่าคำมั่นสัญญาเรื่องความเซื่อในพระเยซูคริสต์กะสิมอบไว้ให้ผู้ที่เซื่อ 

กาลาเทีย 3:23 แต่ว่า ก่อนเรื่องความเซื่อฮั้นได้มาเถิง พวกเฮากะอยู่ใต้การเบิ่งแยงฮักษาของกฎบัญญัติ จนกว่าเรื่องความเซื่อได้ฮับการเปิดเผย 

กาลาเทีย 3:24 จั่งซั้น กฎบัญญัติเปรียบปานนายครู มีหน้าที่นำมาหาพระคริสต์ เพื่อเป็นคนซอบธรรมได้โดยทางความเซื่อ

กาลาเทีย 3:25 แต่บัดเรื่องความเซื่อได้มาเถิงแล้ว พวกเฮาบ่ได้อยู่ใต้นายครูฮั้นอีกต่อไป 

กาลาเทีย 3:26 ย้อนว่า พวกเจ้าได้เป็นลูกๆ ของพระเจ้า โดยทางความเซื่อเพิ่งในพระเยซูคริสต์เมิ้ดคู่คนแล้ว 

กาลาเทีย 3:27 คือผู้ใดในพวกเจ้าที่ฮับเซื่อ เข้ามีส่วนฮ่วมในพระเยซูคริสต์ ผู้ฮั้นได้สวมพระคริสต์แล้ว

กาลาเทีย 3:28 จั่งซั้น บ่มีการถือว่าเป็นซาติยิว ซาติฮั้นซาตินี้ เป็นทาสเป็นไท เป็นญิงเป็นซายอีกต่อไป แต่ได้มาฮ่วมเป็นอันหนึ่งอันเดียวกันในพระเยซูคริสต์เมิ้ดแล้ว

กาลาเทีย 3:29 คือ คั่นเจ้าเป็นคนของพระคริสต์ เจ้ากะเป็นคนในเซื้อสายของเฒ่าอับราฮัมแล้ว มีกรรมสิทธิ์ฮ่วมกันในมรดกตามคำมั่นสัญญาฮั้น
////////// ////////// //////////