โรม – Romans บทที่ 16

โรม 16:1 บัดนี้ ข้อยขอแนะนำเฟบี น้องสาวของเฮาฝ่ายวิญญาณ เป็นผู้ปรนนิบัติฮับใซ้ในกลุ่มผู้เซื่ออยู่เมืองเคนเครีย 

โรม 16:2 จั่งขอให้พวกเจ้าฮับนางไว้ในพระผู้เป็นเจ้า อย่างเป็นที่สมควรสำหรับผู้เป็นคนของพระเจ้าแหน่ กับขอให้พวกเจ้าซ่อยนางในคู่แนวที่นางต้องการ ย้อนนางมีบทบาทหลายในการซ่อยเหลือหลายคน ฮ่วมทั้งนางได้ซ่อยโตข้อยนำ 

โรม 16:3 แล้วขอฝากความคึดฮอดมายังปริสสิลลา กับอาควิลลา ผู้ฮ่วมงานฮับใซ้นำกันกับข้อยในพระเยซูคริสต์ 

โรม 16:4 คือสองผัวเมียหนิ ได้ยอมเสี่ยงซีวิตโตเองเพื่อป้องกันซีวิตของข้อย ข้อยจั่งขอบคุณพระเจ้าเพื่อเขา กับบ่แม่นแต่ข้อยผู้เดียว แต่กลุ่มผู้เซื่อคู่หม่องของพวกต่างซาติได้ขอบคุณพระเจ้าเพื่อเขาคือกัน 

โรม 16:5 แล้วขอฝากความคึดฮอดมายังกลุ่มผู้เซื่อที่ตุ้มโฮมกันอยู่ในเฮือนของเขานำ แล้วจั่งขอฝากความคึดฮอดมายัง เอเปเนทัส ผู้ที่ข้อยฮักแพงหลาย เป็นคนตำอิดที่ฮับเซื่อในพระคริสต์ในแคว้นอาคายา 

โรม 16:6 แล้วขอฝากความคึดฮอดมายัง มารีย์ ผู้ที่ได้ทนหนักเอาเบาสู้ในการซ่อยพวกเฮาหลาย 

โรม 16:7 แล้วขอฝากความคึดฮอดมายัง อันโดรนิคัส กับยูนีอัส พี่น้องผู้ฮ่วมซาตินำข้อย พร้อมทั้งถืกจองจำกับข้อยนำ ซึ่งเขามีชื่อเสียงดี เป็นที่นับถือในหมู่พวกทูตพิเศษ ทั้งเขาได้เซื่อในพระคริสต์ก่อนข้อยนำ 

โรม 16:8 แล้วขอฝากความคึดฮอดมายัง อัมพลีอัส ผู้ที่ข้อยฮักแพงในพระผู้เป็นเจ้า

โรม 16:9 แล้วขอฝากความคึดฮอดมายัง อูรบานัส ผู้ฮ่วมงานกับพวกเฮาในพระคริสต์ กับฝากความคึดฮอดมายัง สทาคิสนำ ผู้ที่ข้อยฮักแพงคือกัน

โรม 16:10 แล้วขอฝากความคึดฮอดมายัง อาเป็ลเลส ผู้ที่มีการยอมฮับอย่างสูงในพระคริสต์ กับขอฝากความคึดฮอดมายังคู่คนในครัวเฮือนของ อาริสโทบูลัส นำ

โรม 16:11 แล้วขอฝากความคึดฮอดมายัง เฮโรดิโอน พี่น้องผู้ฮ่วมซาตินำกันกับข้อย กับขอฝากความคึดฮอดมายังคู่คนในครัวเฮือนของ นารซิสสัสนำ ผู้ที่อยู่ในพระผู้เป็นเจ้าคือกัน

โรม 16:12 แล้วขอฝากความคึดฮอดมายัง ตรีเฟนา กับ ตรีโฟสา ผู้ที่ได้ทนหนักเอาเบาสู้ในการปรนนิบัติพระผู้เป็นเจ้า กับขอฝากความคึดฮอดมายัง เปอร์ซิส ผู้ที่เป็นตาฮักแพง ที่ได้ทนหนักเอาเบาสู้ในการปรนนิบัติพระผู้เป็นเจ้าคือกัน 

โรม 16:13 แล้วขอฝากความคึดฮอดมายัง รูฟัส ผู้ที่พระผู้เป็นเจ้าได้เลือกไว้ กับขอฝากความคึดฮอดมายังแม่ของเขา ซึ่งข้อยถือว่าเป็นแม่ข้อยนำ 

โรม 16:14 แล้วขอฝากความคึดฮอดมายัง อาสินครีทัส ฟเลโกน เฮอร์มาส ปัทโรบัส เฮอร์เมส พร้อมกับพี่น้องคู่คนที่อยู่กับพวกเขาฮั้น 

โรม 16:15 แล้วขอฝากความคึดฮอดมายัง ฟีโลโลกัส กับยูเลีย กับเนเรอัส กับน้องสาวของเขานำ กับโอลิมปัส กับคนของพระเจ้าทั้งหลายที่อยู่กับคนหมู่ฮั้นนำ 

โรม 16:16 แล้วขอต้อนฮับกันและกันด้วยการสัมผัสแก้มตามธรรมเนียมอันบริสุทธิ์ฮั้น ฝ่ายกลุ่มผู้เซื่อคู่กลุ่มของพระคริสต์อยู่ทางนี้ ขอฝากความคึดฮอดมายังพวกเจ้านำเด้อ 

โรม 16:17 บัดนี้ พี่น้องทั้งหลาย เอ้ย ข้อยวอนขอให้พวกเจ้าคอยสังเกต คนพวกฮั้นไว้เด้อ คือพวกที่เข้ามาก่อแนววุ่นวายให้เกิดการแตกแยกกัน ซึ่งเฮ็ดให้ผู้ลางคนสะดุดสะดุ้งใจลง ด้วยคำสอนที่ผิดเพี้ยนออกไปจากหลักคำสอนที่พวกเจ้าได้เฮียนฮู้มาแล้วฮั้น จั่งให้หลีกเลี่ยงบ่ให้คบกันกับเขาเลยเด้อ 

โรม 16:18 ย้อนว่า คนจำพวกนี้บ่ได้ฮับใซ้พระเยซูคริสต์เจ้าของเฮา แต่ได้เห็นแก่ท้องของโตเองต่างหาก กับได้ล่อลวงคนให้หลงเซื่อ ซักซวนด้วยคำอ่อนหวานที่เป็นตาฟัง 

โรม 16:19 คือการที่พวกเจ้าได้เซื่อฟังข่าวประเสริฐฮั้นได้เลื่องลือไปฮอดคนทั้งปวงแล้ว ข้อยจั่งมีความยินดีย้อนเห็นแก่พวกเจ้า แต่ว่าข้อยอยากเตือนพวกเจ้าไว้ ให้เป็นคนซาญฉลาดมีปัญญาในทางดีงาม แล้วบ่ให้หลำไลในทางซั่วเด้อ

โรม 16:20 แล้วในเวลาบ่ซ้าบ่โดน พระเจ้าผู้ให้สันติภาพ สิปราบปลามบดขยี้มารซาตานอยู่ใต้เท้าของพวกเจ้าซะ สุดท้ายนี้จั่งขอให้พระกรุณาธิคุณของพระเยซูคริสต์เจ้าของเฮา ดำรงอยู่กับพวกเจ้า เถิด อาเมน 

โรม 16:21 ฝ่ายทิโมธี ผู้ฮ่วมงานกับข้อย พร้อมทั้งลูสิอัส กับยาโสน กับโสสิปาเทอร์ พี่น้องผู้ฮ่วมซาติของข้อยฮั้น ขอฝากความคึดฮอดมายังพวกเจ้า 

โรม 16:22 แล้วข้อยหนิ กับ เทอร์ทีอัส ผู้เขียนจดหมายฉบับนี้ให้ จั่งขอฝากความคึดฮอดมายังพวกเจ้าในองค์พระผู้เป็นเจ้านำ 

โรม 16:23 แล้ว กายอัส เจ้าของเฮือน กับเจ้าภาพของข้อย ซึ่งได้เป็นเจ้าภาพประซุมของกลุ่มผู้เซื่อที่ตุ้มโฮมอยู่ฮั้นนำ ได้ฝากความคึดฮอดมายังพวกเจ้า แล้ว เอรัสทัส ผู้เป็นเหรัญญิกเมือง ได้ฝากความคึดฮอดนำ กับ ควารทัส ผู้เป็นพี่น้องในความเซื่อ ฝากความคึดฮอดมาคือกัน 

โรม 16:24 ขอพระคุณของพระเยซูคริสต์เจ้าของเฮา อยู่กับพวกเจ้าทั้งหลายเถอะ อาเมน

โรม 16:25 บัดนี้ ขอถวายพระเกียรติแด่พระเจ้า ผู้เพิ่นที่สามารถโปรดตั้งพวกเจ้าทั้งหลายไว้ให้มั่นคงตามข่าวประเสริฐของข้อยฮั้น คือการประกาศเรื่องพระเยซูคริสต์ ตามแผนงานอันลึกลับของพระเจ้าซึ่งปิดบังไว้ตั้งแต่สร้างโลกมา 

โรม 16:26 แต่ในยามนี้ได้ฮับการเปิดเผยให้ได้ฮู้ได้เห็นแล้ว ตามพระคำที่พวกผู้เป็นปากเป็นเสียงได้ทำนายไว้ฮั้น จั่งป่าวประกาศให้คู่ประซาซาติ ตามคำบัญซาของพระเจ้าผู้เพิ่นดำรงอยู่ตลอดเป็นนิตย์ เพื่อให้พวกเขาทั้งหลายหันมาเซื่อฟังจั่งฮับเซื่อ 

โรม 16:27 แด่พระเจ้า ผู้มีปัญญาสูงสุดแต่ผู้เดียว จั่งขอถวายพระสิริโดยทางพระเยซูคริสต์ ตลอดไปเป็นนิตย์ อาเมน [เขียนเถิงซาวกรุงโรม จากเมืองโครินธ์ กับส่งโดยเฟบี ผู้ปรนนิบัติฮับใซ้พี่น้องในกลุ่มผู้เซื่ออยู่เมืองเคนเครีย]